‘Sigui Cana Den Union Cu Cristo’

“P’esei, ya cu boso a aceptá Cristo Jesus e Señor, sigui cana den union cuné.”—COLOSENSENAN 2:6.

1, 2. (a) Con Bijbel ta describí Enoc su bida di sirbishi fiel na Jehova? (b) Manera Colosensenan 2:6, 7 ta indicá, con Jehova a yuda nos cana cuné?

BO A yega di mira un mucha chikitu cana cu su tata? E chikitin ta imitá tur movecion di su tata, i su cara ta briya di admiracion; e tata ta yuda e yu keda pareu cuné, i su cara mes tambe ta expresá amor i aprobacion. Apropiadamente, Jehova ta usa net un cuadro asina pa describí un bida di sirbishi fiel na dje. Por ehempel, e Palabra di Dios ta bisa cu e homber fiel Enoc “a sigui cana cu e Dios [berdadero].”—Génesis 5:24; 6:9.

² Mescos cu un tata compasivo lo yuda su yu chikitu cana cuné, Jehova a duna nos e mihó yudansa posibel. El a manda su Yu unigénito na tera. Cada stap di Jesucristo su bida completo aki riba tera a reflehá su Tata celestial perfectamente. (Juan 14:9, 10; Hebreonan 1:3) Pues, pa por cana cu Dios, nos tin cu cana cu Jesus. Apostel Pablo a skirbi: “P’esei, ya cu boso a aceptá Cristo Jesus e Señor, sigui cana den union cuné, cu rais den dje i siendo edificá den dje i siendo stabilisá den e fe, net manera boso a ser siñá, brotando over cu fe den gradicimentu.”—Colosensenan 2:6, 7.

 3. Di acuerdo cu Colosensenan 2:6, 7, pakico nos por bisa cu cana den union cu Cristo ta encerá mas cu simplemente bautisá?

³ Studiantenan di Bijbel di curason onrado ta bautisá dor cu nan kier cana den union cu Cristo i ta haci esfuerso pa sigui su pasonan perfecto. (Lucas 3:21; Hebreonan 10:7-9) Rond mundu, na 1997 so, mas cu 375.000 persona a dal e paso vital aki—un promedio di mas cu 1.000 pa dia. E aumento aki ta emocionante! Sin embargo, Pablo su palabranan registrá na Colosensenan 2:6, 7 ta mustra cu cana cu Cristo ta encerá mas cu simplemente bautisá. E verbo griego traducí como “sigui cana” ta describí un accion cu mester ta continuo. Ademas, Pablo ta agregá cu canamentu cu Cristo ta encerá cuater cos: saca rais den Cristo, ser edificá den dje, ser stabilisá den e fe, i brota over cu gradicimentu. Laga nos considerá cada un di nan i mira con e ta yuda nos sigui cana den union cu Cristo.

Bo Tin ‘Rais den Cristo’?

 4. Kico kier men saca ‘rais den Cristo’?

⁴ Di promé, Pablo ta skirbi, nos mester tin ‘rais den Cristo.’ (Compará cu Mateo 13:20, 21.) Con un persona por traha pa saca rais den Cristo? Wel, e raisnan di un mata ta scondí for di bista, pero nan ta vital p’e mata—nan ta dun’é stabilidad i ta suministr’é nutricion. Di igual manera, Cristo su ehempel i siñansa ta influenciá nos promé den un manera invisibel, birando un parti integral di nos mente i curason. Ei nan ta nutri nos i ta fortalecé nos. Ora nos permití nan dirigí nos manera di pensa, nos accion i decisionnan, nos ta ser impulsá pa dedicá nos bida na Jehova.—1 Pedro 2:21.

 5. Con nos por “desaroyá un anhelo” pa alimento spiritual?

⁵ Jesus a stima e conocimentu cu ta bini di Dios. El a asta compar’é cu cuminda. (Mateo 4:4) Sí, den su Sermon Riba Ceru, el a cita 21 biaha for di ocho diferente buki dje Scritura Hebreo. Pa sigui su ehempel, nos tin cu haci manera apostel Pedro ta insta, esta, “desaroyá un anhelo” pa alimento spiritual “manera criaturanan recien nací.” (1 Pedro 2:2) Ora un criatura recien nací kier come, e no ta laga duda tocante su anhelo intenso. Si actualmente nos no ta sinti asina tocante alimento spiritual, Pedro su palabranan ta animá nos pa “desaroyá” e anhelo ei. Con asina? E principio hañá na Salmo 34:8 lo por yuda nos: “Purba i mira cu Jehova ta bon.” Si nos ta “purba” regularmente dje Palabra di Jehova, Bijbel, tal bes lesando un parti di dje tur dia, nos lo mira cu e ta spiritualmente nutritivo i bon. Cu tempu, nos anhelo p’e lo crece.

 6. Pakico ta importante pa meditá riba loke nos ta lesa?

⁶ Sin embargo, ta importante pa digerí cuminda bon una bes nos a mand’é abou. Pues nos tin cu meditá riba loke nos ta lesa. (Salmo 77:11, 12) Por ehempel, ora nos ta lesa e buki E homber mas importante cu hamás a biba, cada capítulo ta haña mas balor si nos para ketu i puntra nos mes: ‘Ki faceta dje personalidad di Cristo mi ta mira den e relato aki, i con mi por imit’é den mi mes bida?’ Meditacion asina lo permití nos aplicá loke nos ta siña. Anto, ora nos tin cu tuma un decision, nos lo por puntra nos mes kico Jesus lo a haci. Si nos tuma nos decision na armonia cu esaki, nos ta duna evidencia cu nos berdaderamente tin rais den Cristo.

 7. Kico mester ta nos punto di bista di cuminda spiritual sólido?

⁷ Pablo tambe ta urgi nos pa tuma “cuminda sólido,” e berdadnan mas profundo dje Palabra di Dios. (Hebreonan 5:14) Nos promé meta en coneccion cu esaki lo por ta pa lesa Bijbel completo. Tambe tin temanan mas specífico di studio, manera e sacrificio di rescate di Cristo, e vários pactonan cu Jehova a cera cu su pueblo of algun dje mensahenan profético den Bijbel. Tin un abundancia di material cu lo yuda nos absorbá i digerí e cuminda spiritual sólido ei. Kico ta e meta di gana un conocimentu asina? E ta, no pa duna nos motibu di gaba, sino pa edificá nos amor pa Jehova i pa hala nos mas cerca dje. (1 Corintionan 8:1; Santiago 4:8) Si nos adkerí e conocimentu aki ansiosamente, aplik’é na nos mes i us’é pa yuda otro hende, nos di berdad lo ta imitando Cristo. Esaki lo yuda nos saca bon rais den dje.

Bo Ta ‘Ser Edificá den Cristo’?

 8. Kico kier men ser ‘edificá den Cristo’?

⁸ P’e siguiente aspecto di cana den union cu Cristo, Pablo ta pasa lihé di un cuadro visual pa otro—di un mata pa un edificio. Ora nos pensa riba un edificio den construccion, nos no ta pensa riba e fundeshi so, sino tambe riba henter e structura cu nos por mira cla-cla, cu a ser lográ cu basta trabou duru. Mescos tambe, nos tin cu traha duru pa desaroyá cualidad i custumbernan manera di Cristo. Trabou duru asina no ta keda sin ser ripará, manera Pablo a skirbi na Timoteo: ‘Laga bo progreso ser manifestá na tur hende.’ (1 Timoteo 4:15; Mateo 5:16) Cua ta algun actividad cristian cu ta edificá nos?

 9. (a) Pa nos por imitá Cristo den nos ministerio, kico ta algun meta práctico cu nos por fiha? (b) Con nos sa cu Jehova kier pa nos disfrutá di nos ministerio?

⁹ Jesus a comisioná nos pa predicá i siña otronan e bon nobo. (Mateo 24:14; 28:19, 20) El a pone e ehempel perfecto, dunando testimonio cu curashi i di un manera eficas. Naturalmente, nos nunca lo por hacié mes bon cu el a hacié. Sin embargo, apostel Pedro ta pone e meta aki pa nos: “Santificá Cristo como Señor den boso curason, semper cla pa presentá un defensa dilanti tur hende cu ta exigí di boso un motibu p’e speransa den boso, pero haciendo esei huntu cu un genio suave i respet profundo.” (1 Pedro 3:15) Si bo no ta sinti cu bo ta “semper cla pa presentá un defensa,” no desesperá. Fiha metanan razonabel cu lo yudá bo progresá gradualmente yega n’e norma ei. Preparacion delantá por permití bo varia bo presentacion of incluí un of dos texto den dje. Bo por fiha metanan pa laga mas literatura bíblico, pa haci mas rebishita, of pa cuminsá un studio di Bijbel. E énfasis no mester ta estrictamente riba cantidad—manera cantidad di ora, literatura lagá, of studio—sino riba calidad. Poniendo metanan razonabel i haciendo esfuerso pa alcansá nan, por yuda nos disfrutá di duna di nos mes den e ministerio. Esei ta loke Jehova kier, esta, pa nos sirbié “cu alegria.”—Salmo 100:2; compará cu 2 Corintionan 9:7.

10. Kico ta algun otro obra cristian cu nos tin cu efectuá, i con esakinan ta yuda nos?

¹⁰ Tambe tin obranan cu nos ta efectuá den e congregacion cu ta edificá nos den Cristo. Esun di mas importante ta esun di mustra amor pa otro, pasobra esaki ta e marca di identificacion di cristiannan berdadero. (Juan 13:34, 35) Ora nos ta studiando ainda, hopi di nos ta pega na nos maestro, i esei ta algu masha natural. Sin embargo, nos por sigui awor Pablo su conseho pa “hancha” nos mes dor di siña conocé otronan den e congregacion? (2 Corintionan 6:13) E ancianonan tambe mester di nos amor i aprecio. Dor di cooperá cu nan, busca i aceptá nan conseho bíblico, nos lo haci nan trabou duru muchu mas fácil. (Hebreonan 13:17) Na mésun tempu, esaki lo yuda nos ser edificá den Cristo.

11. Ki punto di bista realista nos mester tin di bautismo?

¹¹ Bautismo ta un ocasion excitante! Sin embargo, nos no mester verwagt cu tur momento di bida despues di esei ta mésun emocionante. Gran parti di nos edificacion den Cristo ta enbolbé “cana ordenadamente den e mésun rutina aki.” (Filipensenan 3:16) Esei no ta nificá un estilo di bida laf, monótono. Simplemente e ta nificá cana bai dilanti den un liña stret, cu otro palabra, edificá bon custumbernan spiritual i sigui nan dia tras dia, aña den aña afó. Corda, “esun cu a wanta te na fin ta esun cu lo ser salbá.”—Mateo 24:13.

Bo Ta Ser “Stabilisá den e Fe”?

12. Kico kier men ser “stabilisá den e fe”?

¹² Den su di tres frase cu ta describí nos canamentu den union cu Cristo, Pablo ta urgi nos pa ser “stabilisá den e fe.” Un version ta traducí e texto como “confirmá relacioná cu e fe,” pasobra e palabra griego cu Pablo a usa por nificá “confirmá, garantisá i haci legalmente irevocabel.” Segun cu nos ta crece den conocimentu, nos ta haña mas motibu pa mira cu nos fe den Jehova Dios ta bon fundá i, de facto, legalmente establecí. E resultado ta un aumento den nos stabilidad. Ta bira mas i mas difícil pa Satanas su mundu desviá nos. Esaki ta pone nos corda e amonestacion di Pablo pa “sigui padilanti na madures.” (Hebreonan 6:1) Madures i stabilidad ta cana samsam cu otro.

13, 14. (a) Ki menasanan contra nan stabilidad e cristiannan di promé siglo na Colósas a enfrentá? (b) Kico tal bes a preocupá apostel Pablo?

¹³ E cristiannan di promé siglo na Colósas a enfrentá menasanan contra nan stabilidad. Pablo a spierta: “Tene cuidou: kisas por tin un hende cu lo hiba boso como su víctima mediante e filosofia i engaño bano segun e tradicion di hende, segun e cosnan elemental dje mundu i no segun Cristo.” (Colosensenan 2:8) Pablo no tabata kier p’e colosensenan, kendenan a bira súbdito den “e reino dje Yu di [Dios] su amor,” ser hibá, of apartá for di nan condicion spiritual bendicioná. (Colosensenan 1:13) Engañá dor di kico? Pablo a señalá na “filosofia,” e único biaha cu e palabra aki ta aparecé den Bijbel. Acaso e tabata papia dje filósofonan griego, manera Plato i Sócrates? Aunke esakinan a presentá un menasa pa cristiannan berdadero, den e dianan ei e palabra “filosofia” tabatin un uso amplio. Generalmente el a referí na hopi grupo i scol di cierto liña di pensamentu—asta esnan religioso. Por ehempel, hudiunan di promé siglo manera Josefo i Filo a yama nan mes religion un filosofia—kisas pa hacié mas atractivo.

¹⁴ Algun filosofia cu lo por a preocupá Pablo tabata di caracter religioso. Mas despues den e mésun capítulo di su carta n’e colosensenan, el a dirigí su mes na esnan cu tabata siña pa “no toca, ni purba, ni mishi,” refiriendo asina na rasgonan dje Ley di Moises cu e morto di Cristo a terminá. (Romanonan 10:4) Huntu cu filosofianan pagano, e otro influencianan ei a afectá e congregacion i nan a menasá su spiritualidad. (Colosensenan 2:20-22) Pablo a spierta contra filosofia cu tabata parti di “e cosnan elemental dje mundu.” E instruccion falsu ei tabata di orígen humano.

15. Con nos por evitá di ser desviá dor di e ideanan no-bíblico cu hopi biaha nos ta confrontá?

¹⁵ Promocion di idea i pensamentu humano cu no ta basá firmemente riba e Palabra di Dios por ta un menasa pa stabilidad cristian. Awe nos mester tene cuidou cu e menasanan ei. Apostel Juan a urgi: “Stimánan, no kere tur expresion inspirá, sino pone e expresionnan inspirá na prueba pa mira si nan ta originá di Dios.” (1 Juan 4:1) Pues si un compañero di scol purba convencé bo cu den e era moderno aki no ta pas mas pa biba segun normanan di Bijbel, of si un bisiña tin tendencia di influenciá bo pa adoptá un actitud materialista, of si un colega di trabou sutilmente ta pone presion riba bo pa violá bo concenshi entrená dor di Bijbel, of asta si un compañero creyente ta expresá su mes den un manera crítico i negativo tocante otronan den e congregacion basá riba su mes opinion, no djis absorbá loke nan bisa. Sefta loke no ta na armonia cu e Palabra di Dios. Segun cu nos ta haci esei, nos lo mantené nos stabilidad segun cu nos ta cana den union cu Cristo.

“Brotando Over cu Fe den Gradicimentu”

16. Kico ta e di cuater aspecto di cana den union cu Cristo, i ki pregunta nos por haci?

¹⁶ E di cuater aspecto di cana den union cu Cristo cu Pablo ta mencioná ta cu nos ta ‘brota over cu fe den gradicimentu.’ (Colosensenan 2:7) E palabra “brotando over” ta trece na nos mente un riu cu ta saliendo for di su oriyanan. Esaki ta duna e idea cu pa nos como cristian, nos gradicimentu mester ta algu continuo of habitual. Cada un di nos por puntra nos mes: ‘Mi ta gradicidu?’

17. (a) Pakico nos por bisa cu nos tur tin hopi motibu pa cua nos mester ta gradicidu, asta den tempu difícil? (b) Kico ta algun regalo di Jehova pa cua abo ta sintí bo specialmente gradicidu?

¹⁷ Realmente, nos tur tin hopi motibu pa brota over cu gradicimentu na Jehova tur dia. Asta den e condicionnan di mas malu, por tin algun cos simpel cu ta duna momentonan di alivio. Por ehempel, un amigu ta mustra empatia. Un ser kerí ta duná bo un caricia trankilisante. Un bon sosiegu anochi ta yudá bo recobrá energia. Un cuminda delicioso ta calma dolor di hamber. Cantamentu di para, harí di un mucha, briyo di un shelu blou, un brisa refrescante—tur esakinan i mas ta cosnan cu nos por experenciá riba un solo dia. Ta masha fácil pa considerá regalonan asina como algu gewoon. Nan tur no ta merecé un danki? Nan tur ta bini di Jehova, e Fuente di “tur bon don i tur regalo perfecto.” (Santiago 1:17) I el a duna nos donnan cu ta haci esnan mencioná ariba nada na comparacion. Por ehempel, bida mes. (Salmo 36:9) Ademas, el a duna nos un oportunidad pa biba pa semper. Pa por percurá e don aki, Jehova a haci e sacrificio supremo di manda su Yu unigénito, “esun pa ken e tabatin cariño special.”—Proverbionan 8:30; Juan 3:16.

18. Con nos por mustra Jehova cu nos ta gradicidu na dje?

¹⁸ Ki cierto anto e palabranan dje salmista ta: “Ta bon pa duna gradicimentu na Jehova.” (Salmo 92:1) Di igual manera, Pablo a recordá e cristiannan na Tesalónica: “Relacioná cu tur cos, duna gradicimentu.” (1 Tesalonicensenan 5:18; Efesionan 5:20; Colosensenan 3:15) Cada un di nos por tuma e determinacion pa ta mas gradicidu. Nos oracionnan no mester consistí solamente di peticionnan na Dios relacioná cu nos necesidadnan. Esakinan tin nan lugá apropiado. Pero imaginá cu bo tin un amigu cu ta papia cu bo solamente ora e mester di algu di bo! Pues, pakico no haci oracion na Jehova djis pa gradicié i alab’é? Cuantu e oracionnan ei lo mester ta agrad’é ora e observá e mundu malagradecí aki for di shelu! Un beneficio secundario ta cu oracionnan asina lo por yuda nos enfocá riba e aspectonan positivo di bida, recordando nos di ki bendicioná nos realmente ta.

19. Con e palabranan cu Pablo a usa na Colosensenan 2:6, 7 ta indicá cu nos tur por sigui mehorá den cana cu Cristo?

¹⁹ No ta remarcabel cuantu guia sabí nos por saca for di un solo pasashi dje Palabra di Dios? E conseho di Pablo pa sigui cana cu Cristo ta algu cu nos cada un mester kier tuma na pechu. Laga nos keda determiná anto pa saca ‘rais den Cristo,’ ser “edificá den dje,” “stabilisá den e fe,” i ‘brota over cu gradicimentu.’ Conseho asina ta specialmente vital pa esnan recien bautisá. Pero e ta aplicá na nos tur. Pensa riba con un rais principal ta sigui crece bai abou ketu bai i con un edificio den construccion ta sigui bai haltu. Di manera cu nos nunca ta caba di cana cu Cristo. Tin hopi espacio pa crece. Jehova lo yuda nos i lo bendicioná nos, pasobra e kier pa nos sigui cana cuné i cu su Yu stimá pa semper.

Con Lo Bo Contestá?

◻ Kico cana den union cu Cristo ta encerá?

◻ Kico kier men saca ‘rais den Cristo’?

◻ Con nos por ser ‘edificá den Cristo’?

◻ Pakico ta asina importante pa ta “stabilisá den e fe”?

◻ Ki motibunan nos tin pa ‘brota over cu gradicimentu’?

[Plachi na página 10]

Kisas e raisnan di un palu no ta visibel, pero nan ta suministrá alimento p’e palu i ta ankr’é firmemente