Beibel ta revelá ku e arka di Noe “a keda wantá riba e serunan di Ararat.” (Génesis 8:4) E region di Ararat ta inkluí un punta haltu ku awor yama Seru di Ararat den parti ost di Turkia, pegá ku e fronteranan di Armenia i Iran.

Tabatin hopi ekspedishon pa e área akí en buska di e arka di Noe. Nan a hiba na algun deklarashon interesante wèl, pero tòg no na ningun prueba definitivo. Potrètnan fasinante saká for di laira, pidanan di palu ku nan a haña na breu i informenan di hende ku ta pretendé di a mira e arka, a stimulá hende pa bai en buska di pruebanan mas palpabel. Sinembargo, e búskeda no tabata nada fásil. Un posibel lugá ku nan ta menshoná hopi biaha ta keda un 4.600 meter haltu na barika di Seru di Ararat. Ademas, debí na tenshonnan polítiko den e área ei, no ta tur biaha ekspedishonnan stranhero ta haña pèrmit pa subi e seru.

Apesar di esei, hopi hende interesá den e arka ta ansioso pa mira mas ekspedishon na e sitio. Nan ta kere ku ainda tin partinan intakto di e arka riba Seru di Ararat, skondí durante gran parti di aña bou di sneu ku eis. Segun nan, ta solamente den añanan ku tin zomer kayente lo tin speransa pa mira e arka i yega na dje.

Vários informe a stimulá e speransa ei. Hosefo, un historiadó hudiu di e promé siglo di nos era, a referí na vários historiadó mas promé kuné ku a menshoná ku ainda e arka tabata visibel den e region haltu di serunan di Ararat. Asta nan a bisa ku hende tabata tuma pidanan di palu di e arka tur na breu komo suvenir. Un di e hòmbernan ku Hosefo a sita tabata Beroso, un skirbidó di historia di Babilonia di siglo 3 promé ku nos era.

Durante siglo 20, un di e informenan mas fasinante a bini di un hòmber di Armenia, George Hagopian. El a konta kon komo mucha, na prinsipio di dékada di 1900, e tabata bishitá e arka huntu ku su tio, i ku asta el a subi riba e arka. Hagopian a muri na 1972, ma te ainda su deklarashonnan tin hopi hende tur emoshoná i asombrá.

Un Berdadero Motibu pa Fe?

Tin bon motibu pa kere ku eksploradónan a deskubrí e arka òf ku nan lo hasi esei un dia? Kisas, pero ta parse ku tin mas motibu pa duda ku nan lo haña e arka. Pa kuminsá, kòrda ku Beibel no ta bisa na unda presis e arka a bin para ora ku e awanan di diluvio a baha. E ta bisa simplemente “e serunan di Ararat.”

Ta natural ku eksploradónan i hende ku ta spekulá ta konsentrá riba e punta di mas haltu den e region. Sinembargo, e Skritura no ta bisa spesífikamente ku Dios a laga e arka bin para riba punta di Seru di Ararat, ku awe ta un punta di seru masha friu i masha haltu mes na kasi 5.000 meter riba nivel di laman.a No lubidá ku Noe ku su famia a keda biba vários luna den e arka despues ku esaki a baha riba tera. (Génesis 8:4, 5) Ademas, ta improbabel ku despues ku nan i e tantísimo bestianan ku tabatin na bordo a sali for di e arka, ku nan lo mester a baha for di un seru haltu asina, manera subidónan di seru profeshonal djawe. Pues, podisé e tereno kaminda e arka a bin para tabata mas aksesibel ku loke algun eksploradó djawe ta imaginá nan, i tòg sufisiente haltu pa kuadra ku e deskripshon di Génesis 8:4 i 5. I sin importá unda e arka a bin para den e region di Ararat, lo e no a disparsé entretantu for di siglonan pasá, sea pasobra el a putri òf pasobra hende a piki e palunan bai kuné?