“Mira! mi ta traha tur cos nobo”

1-4. (a) Bo kier disfruta di participacion den cua actividad pintá riba capa dje foyeto aki? (b) Cua speranza glorioso ta wordu ofrecí na bo aki? (c) Cua ta algun texto bíblico cu ta duna apoyo na tal speranza?

MIRA tur hende feliz riba capa dje foyeto aki. Bo kier bira uno di nan? Bo ta contestá cu, ‘Sigur cu sí.’ Pasobra ei tin paz i armonía cu tur humanidad ta deseá. Hende di tur raza—pretu, blancu, geel—ta asociá hunto manera un solo famía. Ki gozo! Ki unidad! Claramente e hendenan ei no ta preocupánan cu veneno di bomba nuclear ni dje peliger di terrorismo. Avion djet di gera no ta borota cielo trankilu ariba dje parque bonita ei. No tin soldad, ni tanki di gera, ni scopet. Ni sikiera klop di poliz ta necesario pa mantene ordu. Gera i crimen simplemente no ta existi. I no tin scarcidad di cas, pasobra tur hende tin cas bonita cu ta di nan mes.

² Mira e muchanan! Ki un gozo pa wak nan hunga! Ki bestia tin pa nan hunga cuné! No tin mester di kouchi den e parque ei, pasobra tur bestia ta na paz cu hende i cu otro. Asta león i lamchi a bira amigo. Mira páhara cu color briyante cu ta bula p’aki i p’ayá, i scucha nan cantamento bonita hunto cu harimento di mucha na tur parti. No tin kouchi? No, pasobra tur tin libertad i gozo desenfrená den e tera ei. Sinti holor dushi di flor, tende sonido di awa dje rio, goza dje calor suave di solo. Anhela di saborea fruta den e macuto, pasobra esei ta lo mihor cu e tera por produci, lo mihor mes, manera tur loke hende por mira i goza den e glorioso hofi manera parque.

³ Hende ta puntra, ‘Pero, warda un rato, unda ta hende bieu? Nan, també, no tin derecho di disfruta dje associacion feliz?’ Realmente, hende ei mes ta bieu, pero nan a bira hoven atrobé. Den e parque ei ningun hende ta muri di behez. Hende hoven ta crece te cu nan ta hecha i no ta bira mas bieu. Sea cu nan tin 20 of 200 aña di edad, cada un dje miyones di hende cu ta biba den e parque ta alegra den e vigor di bida hoven, den salud perfecto. Bo ta puntra, ‘Miyones di hende?’ Sí, miyones, pasobra e parque ta wordu extendí te na tur nacion. Lo e abunda cu bida, paz, i boniteza te na extremidad mes dje tera, for di Hapón te na Andes, for di Hong Kong te na Mediterráneo. Pasobra e tera henter lo wordu transformá na un parque paradísico. Esei lo ser un Paradijs restorá mundialmente.

⁴ Bo a bisa, ‘Increíbel’? Pero, tuma na cuenta echo dunando prueba. Ta posibel pa bo i bo famía sobrebiba pasamento dje sistema di cosnan actual yen di dificultad i drenta den e Paradijs pintá riba e capa dje foyeto aki.a

E buki cu ta splica Paradijs

5. (a) Cua buki ta splica e cosnan aki? (b) Di ki manera esei ta un buki sobresaliente?

⁵ Tur e cosnan glorioso ei, i siguridad di nan, ta ser splicá den un buki, e buki di mas maraviyoso hamás skirbí. E ta ser yamá e Bijbel. Esei ta un buki di antigua mes, ya cu parti di dje tabata skirbí mas cu 3.500 aña pasá. També, esei ta e buki di mas moderno presentando conseho sano i práctico pa nos bida djawe. Profecía di dje ta duna speranza briyante pe futuro. Mas copia di dje a wordu bendí cu tur otro buki na existencia, mas cu 2.000.000.000 copia dje Bijbel henter of mayor parti di dje a wordu plamá den mas cu 1.810 idioma.

6. Kico ta distingi e Bijbel for di otro skirbimento cu hende ta considera santo?

⁶ Ningun otro buki santo tin un plamamento tanto universal, i mayor parti dje otronan no ta cerca su edad. Korán di religion mohamedano tin menos cu 1.400 aña di edad. Buda i Confusio a biba rond di 2.500 aña pasá, i nan skirbimento ta dje mesun edad. E Scritura di Sinto tabata componí den nan forma actual no mas cu 1.200 aña pasá. E Buki di Mormón tin solamente 160 aña di edad. Ningun buki santo asina por duna relato correcto dje pasado di humanidad durante su 6.000 aña, manera e Bijbel ta haci. P’sei, pa nos comprende e religion original, nos tin cu acudi ne Bijbel. Esei ta e único buki cu un mensahe universal pa tur humanidad.

7. Kico hende pensador a bisa dje Bijbel?

⁷ Hende pensador di tur nacion i di tur rango social di bida a aclama e sabiduría i boniteza di mensahe dje Bijbel. Sir Isaac Newton, e famoso científico i descubridor dje ley di gravidad, a bisa: “Ningun ciencia tin mihor testimonio cu e Bijbel.” Patrick Henry, e lider revolucionario americano cu tabata famoso pa su palabra “Dunámi libertad, of dunámi morto,” també a bisa: “E Bijbel tin mas balor cu tur otro buki na existencia.” Asta e gran sabí hindú Mohandas K. Gandhi a bisa e gobernante inglés di India: “Ora e país di bo i di mi ta conbini riba e siñanza cu Cristo a duna den su Sermón di Monte, nos por resolve problema, no solamente di nos país, sino problema di mundo henter.” Gandhi tabata papia di Mateo capítulo 5 te 7 den e Bijbel. Leza tal capítulo pa bo mes i mira si nan mensahe fuerte no ta emocionábo.

E Bijbel—un buki oriental

8, 9. (a) Pakico ta incorrecto pa yama e Bijbel un buki occidental? (b) Con e Bijbel a wordu skirbí, i durante cua periodo di tempo? (c) Pakico nos por yama e Bijbel un biblioteca? (d) Cuanto homber a wordu usá pa skirbi e Bijbel? (e) Ki testimonio algun djeseinan a duna tocante e Fuente dje Bijbel?

⁸ Contrario cu kerimento popular, e Bijbel no ta un producto di civilizacion europeo, tampoco e no ta glorifica tal civilizacion. Casi e Bijbel henter tabata skirbí den país oriental. Homber cu a skirbí tabata oriental. Mil aña promé cu Buda, na 1513 PEC, Moisés, cu a biba den Medio Oriente, tabata inspirá di Dios pa skirbi e promé buki di Bijbel yamá Génesis. Despues di tal principio, e Bijbel ta sigi un solo tema armonioso te na su buki final di Revelacion. E Bijbel a wordu completá na aña 98 EC, rond di 600 aña despues di Buda. Bo tabata sa cu e Bijbel ta componí di 66 diferente buki? Sí, e Bijbel so ta un biblioteca!

⁹ Asina, durante un periodo di 1.600 aña desde e tempo di Moisés padilanti, mas cu 40 homber a participa den skirbimento dje relato armonioso dje Bijbel. Nan a duna testimonio di cu nan skirbimento tabata inspirá di un poder hopi mas halto cu hende mortal. Apóstol cristian Pablo a skirbi: “Tur Scritura ta inspirá di Dios i ta probechoso pa siñá, pa reprende, pa rectifica cosnan, pa disipliná den husticia.”b (2 Timoteo 3:16) I apóstol Pedro a splica: “Ningun profecía di Scritura ta brota di interpretacion privá. Pasobra e boluntad di hende no a produci profecía nunca, sino hende a papia di parti di Dios siendo hibá pe spiritu santo.”—2 Pedro 1:20, 21; 2 Samuel 23:2; Lucas 1:70.

10. (a) Con e Bijbel a yega te na nos dia? (b) Pakico nos por keda sigur cu nos tin ainda e texto original inspirá di Bijbel?

¹⁰ Sumamente notable, també, ta e manera cu e Bijbel a yega te ne dia djawe. Pa miles di aña, te cu nan a inventa drukmento rond di 500 aña pasá, nan a traha copia di Bijbel cu man. Ningun otro obra literario di tempo di antigua tabata copiá i recopiá asina diligentemente. E tabata copiá bez tras bez, pero semper cu sumo cuidao. Copista a haci poco error chikito so, i un comparacion di copia a establece e texto original inspirá di Dios. Un autoridad principal di manuscrito bíblico, Sir Frederic Kenyon, a bisa: “E último fundeshi pa cualkier duda di cu e Scritura a yega cerca nos manera nan tabata berdaderamente skirbí, a ser kitá awor.” Awe, tin na existencia ainda rond di 16.000 manuscrito dje Bijbel of parti di dje, algun cu a sigi existi for di siglo dos promé cu Cristo. Además, traduccion exacto a ser hací for di idioma hebreo, arameo, i griego den locual e Bijbel a wordu skirbí originalmente na casi tur idioma di mundo.

11. Cua descubrimento moderno ta di acuerdo cu e relato bíblico?

¹¹ Algun hende ta purba di desacredita e Bijbel bisando cu e no ta exacto. Sin embargo, na aña reciente arqueólogo a coba den ruina di stad di antigua den tera bíblico i a haya inscripcion i otro evidencia cu ta duna prueba conclusivo di cu hende i sitio mencioná den relato di mas antigua dje Bijbel realmente a existi. Nan a descubri hopi evidencia indicando un diluvio mundial, locual e Bijbel ta bisa a sosode mas cu 4.000 aña pasá, den dia di Noé. En cuanto esei, prinz Mikasa, un arqueólogo bien conocí, a bisa: “Realmente tabatin un diluvio? . . . E echo cu e diluvio realmente a sosode a ser probá convencientemente.”c

E Dios dje Bijbel

12. (a) Kico algun mofador ta bisa tocante Dios? (b) Pakico e Bijbel ta menciona Dios como Tata? (c) Con e nomber di Dios tá segun e Bijbel?

¹² Mescos cu hende ta tene mofa dje Bijbel, otronan ta tene mofa dje idea di existencia di Dios Todopoderoso. (2 Pedro 3:3-7) Nan ta puntra, ‘Con mi por kere den Dios ya cu mi no por miré? Tin prueba di berdadero existencia di un Creador invisibel, mas halto cu hende? Dios no ta den tur cos?’ Otronan ta bisa, ‘No ta existi ni Dios ni Buda.’ Sin embargo, e Bijbel ta mustra cu mescos cu nos tur a recibi bida for di un tata terrenal, asina també nos antepasado original a recibi bida for dje Tata celestial, of Creador, cu tin e nomber personal di Jehova.—Salmo 83:18; 100:3; Isaías 12:2; 26:4.

13. Jehova Dios a revela su mes na humanidad na cua dos manera?

¹³ Jehova Dios a revela su mes na humanidad na dos manera sobresaliente. E manera principal ta su uso di Bijbel, locual ta duna di conoce su berdad i su propósito eterno. (Juan 17:17; 1 Pedro 1:24, 25) E otro manera ta su uso di creacion. Door di wak cosnan maraviyoso rond di nan, hopi hende a yega di comprende cu mester tin un Dios Creador cu tin un gran personalidad reflehá den su obranan.—Revelacion 15:3, 4.

14. Kico e Bijbel ta bísanos tocante Jehova Dios?

¹⁴ Jehova Dios ta Autor di Bijbel. E ta e Gran Spiritu, existiendo pa tur eternidad. (Juan 4:24; Salmo 90:1, 2) Su nomber “Jehova” ta hala atencion na su propósito pa su creacion. Su propósito ta di vindica su gran nomber, destruyendo tur malbado i salbando esnan cu ta stimé pa nan por biba den Paradijs riba tera. (Éxodo 6:2-8; Isaías 35:1, 2) Siendo cu e ta Dios Todopoderoso, e tin e poder di haci esei. Como Creador di tur e universo, e ta hopi mas halto cu dios i ídolo nacional.—Isaías 42:5, 8; Salmo 115:1, 4-8.

15. Estudio di creacion di parti di hende inteligente a hiba na cua conclusion?

¹⁵ Durante siglonan reciente, homber di ciencia a dedica hopi tempo i studiamento na obra di creacion. Nan a yega na cua conclusion? Un pionero den e campo di electricidad, e físico inglés bien conocí, Lord Kelvin, a bisa: “Mi ta kere cu mientras mas cabalmente ciencia ta wordu studiá, mas leu e ta híbanos for di cualkier cos compará cu ateísmo.” Albert Einstein, e científico cu a nace na Europa, aunque e tabata conocí como ateísta, el a admiti: “Ta basta pa mi . . . medita riba estructura maraviyoso dje universo, di locual nos ta mira mashá poco, i purba humildemente di comprende sikiera e parti di mas chikito di inteligencia manifestá den naturaleza.” Arthur Holly Compton, un científico americano i ganador dje premio Nobel, a bisa: “E universo habriendo ordenadamente ta duna testimonio dje berdad dje declaracion mas mahestuoso hamás declará, esta, ‘Na principio Dios.’” El a cita e promé palabra dje Bijbel.

16. Con e universo ta engrandece e sabiduría i poder creativo di Dios?

¹⁶ Gobernante di nacion fuerte por gaba di nan inteligencia i logramento científico dominando espacio djafuera. Pero ki insignificante ta nan satélite di espacio ora nan ta wordu compará cu e luna cu ta den órbita rond dje tera, i planeta cu ta den órbita rond di solo! Ki chikito ta logramento di hende mortal na comparacion cu e creacion di Jehova Dios di miles di miyones di galaxia celestial, cada un conteniendo miles di miyones di solo mescos cu nos solo, i su agrupacion i ponimento di nan den espacio pa tanto tempo incontable! (Salmo 19:1, 2; Job 26:7, 14) No ta straño cu Jehova Dios ta mira hende como simplemente frominga, i nacion fuerte “como nada.”—Isaías 40:13-18, 22.

17. Pakico ta razonabel pa kere den un Creador?

¹⁷ Bo ta biba den un cas? Probablemente bo mes no a traha e cas, tampoco bo no sa ken a trahé. Sin embargo, e echo cu bo no ta conoce e constructor no ta preveníbo di acepta e echo cu un persona inteligente a trahé. Ta parce mashá bobo pa bo pensa cu e cas a traha su mes! Siendo cu e universo grandi, i tur loke tin den dje, a exigi infinitamente mas inteligencia pa su construccion, no ta razonabel pa bo conclui cu mester tin un Creador inteligente? Berdaderamente, solamente hende bobo ta bisa den nan curazón, “No ta existi Jehova.”—Salmo 14:1; Hebreo 3:4.

18. Kico ta mustra cu Dios ta un persona, i digno di ser alabá?

¹⁸ Maraviya glorioso tur rond di nos—flor, páhara, animal, e creacion maraviyoso yamá hende, e milagro di bida i di nacimento—tur esei ta duna testimonio dje Intelecto Maestro invisibel cu a produci nan. (Romano 1:20) Unda cu tin inteligencia, tin mente. Unda cu tin mente, tin persona. E intelecto supremo ta esei dje Persona Supremo, e Creador di tur cos bibiente, e Fuente mes di bida. (Salmo 36:9) E Creador en berdad ta digno di tur alabanza i adoracion.—Salmo 104:24; Revelacion 4:11.

19. (a) Pakico ningun nacion djawe por bisa cu Dios a dúnanan victoria den gera? (b) Pakico Dios no tin ningun parti den gera dje nacionan?

¹⁹ Tin hende cu a haya nan kerimento den Dios debilitá den experencia penoso di Gera Mundial II. Ne tempo ei cada nacion a inboca nan “Dios,” sea dje religion católico of protestante of di religion oriental. Hende por bisa cu “Dios” a duna victoria na algun nacion asina i a permiti derota di otronan? E Bijbel ta mustra cu ningun nacion asina a inboca e Dios berdadero. Jehova Dios, Creador di cielo i tera, no ta responsabel pe confusion i gera entre e nacionan. (1 Corintio 14:33) Su pensamento ta hopi mas halto cu pensamento di nacion político i militarista di mundo. (Isaías 55:8, 9) Di igual manera, e religion berdadero i adoracion di Jehova Dios no ta hunga papel den gera dje nacionan. Jehova Dios ta hopi mas halto cu dios nacionalista. Jehova ta único ya cu e ta e Dios di hende homber i muher amante di paz di tur nacion. Manera e Bijbel ta bisa: “Dios no ta haci distincion, sino den tur nacion hende cu ta temele i ta obra husticia ta aceptable pe.” (Echo 10:34, 35) Hende di tur nacion incliná na husticia ta siña e Bijbel awor i ta acepta e adoracion dje berdadero “Dios cu ta duna paz,” e Creador di tur humanidad.—Romano 16:20; Echo 17:24-27.

20. Kico ta mustra cu cristiandad no ta cristian i ta contra Dios?

²⁰ Algun hende ta siñala ne desacuerdo i hipocresía di religion di cristiandad, cu ta bisa cu nan ta sigi e Bijbel. També nan ta puntra, ‘Con mi por kere den e Dios dje Bijbel, ya cu nacion cu tin e Bijbel ta di esnan cu frenéticamente ta montona arma nuclear?’ E berdad tá cu, mientras cu e Bijbel semper ta e berdad, e nacionan di cristiandad a apartánan tanto leu for di cristianismo di Bijbel como nort pool ta apartá for di zuid pool. Nan ta hipócrita bisando cu nan ta sigi cristianismo. Nan tin e Bijbel, pero nan no ta obedece su siñanza. E presidente americano cu a duna ordu pa basha e promé bomba atómica riba Hiróshima a sclama un biaha: “Ohalá cu nos por haya Isaías of San Pablo!”—pa guia hende den e crisis mundial. Si e tabata di acuerdo cu Isaías di Bijbel, e nunca lo a basha e bomba atómica, pasobra Isaías a boga pa ‘batimento di spada na ploeg i lanza na chapi.’ Además, tabata Pablo dje Bijbel cu a declara: “Nos no ta haci gera segun loke nos tá den carni. Pasobra arma di nos gera no ta carnal.” (Isaías 2:4; 2 Corintio 10:3, 4) Pero, en bez di sigi e conseho sabí di Bijbel, nacion di cristiandad ta enbolbénan den carreda di armamento di suicidio. Cualkier reclamo cu nan ta haci yamando nan mes cristian cu ta obedece e Bijbel ta falso. Nan tin cu para dilanti dje huicio di Dios pasobra nan no ta haci su boluntad.—Mateo 7:18-23; Sofonías 1:17, 18.

Creacion i milagro di Jehova Dios

21. Pakico ta razonabel pa no duda milagro di Dios?

²¹ Jehova Dios ta haci creacion i milagro. Bo nunca a pensa tocante hacimento di awa bira sanger, partimento di Lamá Corá, nacimento di Jesus di birgen, i otro milagro mencioná den e Bijbel? Siendo cu hende tin facultad intelectual limitá, probablemente hende nunca por comprende con algun milagro asina a sosode, no mas cu nan por comprende completamente e milagro di salimento i drentamento di solo tur dia. E creacion di hende tabata un milagro. Hende djawe no a mira e milagro, pero nan sa cu esei a sosode, pasobra nan ta na bida awe dunando prueba di dje. En berdad, tur cos bibiente i e universo henter ta compone un milagro continuo. Pues, nos tin cu tene duda ora e Bijbel, e Palabra di Dios, ta bisa cu el a haci un cierto milagro na un cierto tempo, aunque no tin mester dje mesun milagro den e dia djawe?

22. Duna detaye dje promé creacion di Dios.

²² Tur creacion di Jehova Dios ta milagroso i maraviyoso! Sin embargo, net su promé creacion tabata esun di mas maraviyoso cu tur. Esei tabata e creacion di un Yiu spiritual, su “primogénito.” (Colosense 1:15) E Yiu celestial tabata yamá “Palabra.” Siglonan incontable despues di su creacion, el a bini na mundo i tabata yamá e “homber, Cristo Jesus.” (1 Timoteo 2:5) Anto tabata bisá di dje: “Pues e Palabra a bira carni i a biba cerca nos, i nos a haya bista di su gloria, un gloria tal como ta pertenece na yiu unigénito di tata; i e tabata yen di bondad inmerecida i berdad.”—Juan 1:14.

23. (a) Con nos por splica e relacion entre Dios i su Yiu? (b) Kico Jehova Dios a crea, usando su Yiu?

²³ E relacion di Jehova Dios cu su Yiu por ta compará cu esei di un doño i hefe di fábrica i su yiu, unda yiu ta yuda traha artículo cu e tata a dibuha. Usando su Yiu primogénito i trahador compañé, Jehova Dios a crea hopi otro persona spiritual, yiunan di Dios. Mas tardi, eseinan a alegra di mira e Yiu di Jehova Dios, su Obrero Maestro, produci cielo material i e tera riba locual nos ta biba. Bo ta duda cu tal cosnan tabata creá? Miles di aña despues, Jehova a puntra un homber fiel: “Unda bo a hayábo ora mi a funda e tera? Bisámi, si en berdad bo ta conoce comprendimento. Ora strea di madrugá a sclama gozosamente hunto, i tur yiu di Dios a cuminza grita den aplauso?”—Job 38:4, 7; Juan 1:3.

24. (a) Cua creacion terrenal di Jehova Dios ta sobresaliente, i di ki manera? (b) Pakico ta irrazonabel pa bisa cu hende a evoluciona for di bestia?

²⁴ Cu transcurso di tempo, Jehova Dios a crea cosnan bibiente material riba tera, mata, palu, flor, piscá, páhara, i animal. (Génesis 1:11-13, 20-25) Anto Dios a bisa su Obrero Maestro: “Láganos traha homber den nos imagen, segun nos semehanza . . . I Dios a procede di crea homber den su imagen, den imagen di Dios el a creé; macho i hembra el a tráhanan.” (Génesis 1:26, 27) Siendo cu e homber original tabata creá den imagen i semehanza di Dios, cu gran atributo di Dios di amor, sabiduría, husticia, i poder, e tabata mashá superior cu bestia. Homber ta den un clase apartá for di bestia pasobra nan por razona, nan por planea pa futuro, i nan tin e capacidad di adora Dios. Bestia no tin intelecto pa nan razona, sino nan ta biba cu instinto. Ta ki irrazonabel pa bisa cu no ta existi Creador sino cu e creacion humano cu tin don ricu i inteligencia a evolucioná mas ariba for di bestia inferior cu no tin inteligencia!—Salmo 92:6, 7; 139:14.

25, 26. (a) Cua gran posibilidad tabata poní dilanti hende? (b) Pakico no tabatin problema di yena e tera cu demasiado hende?

²⁵ Dios a pone hende den “un hofi den Eden, parti pariba.” Esei tabata un hofi di placer, mescos cu e hofi riba capa dje foyeto aki, aunque tabatin dos hende so, Adam i su esposa. E Paradijs original no ta existi mas, ya cu e tabata destruí den e diluvio di dia di Noé. Pero su sitio aproximado ta conocí den Medio Oriente, pasobra cierto rio mencioná den e Bijbel cu a corre door di dje ta existi te ne dia djawe. (Génesis 2:7-14) Homber tabatin e gran oportunidad di usa e hofi como centro for di locual nan por a plama i cultiva e tera henter, i hacié un paradijs mundial.—Isaías 45:12, 18.

²⁶ Siendo cu tanto Dios como su Yiu tabata trahador, Dios també a duna hende trabao pa haci riba tera. (Juan 5:17) El a bisa Adam i Eva, e promé homber i muher: “Sea fructífero i bira hopi i yena e tera i dominé, i tene dominio riba piscá di lamá i di bestia bulador di cielo i di tur creacion bibiente cu ta move riba tera.” (Génesis 1:28) Esei kier men cu hende tabatin cu rende, yena e tera, anto sigi rende te cu e tera a yena i a pasa over? No. Ora hende ta bisábo yena un copi cu te, bo no ta sigi basha te cu e copi ta pasa over i ta basha riba tur e mesa. Bo ta yena e copi anto bo ta para. Di igual manera, Jehova Dios a bisa hende, “Yena e tera,” indicando su propósito di laga hende yena e tera comodamente, anto reproduccion di humanidad aki riba tera lo para. Esei no por a presenta ningun problema den un arreglo social humano perfecto. Ta solamente den e mundo di hende imperfecto djawor cu demasiado poblacion ta haci problema presenta.

Cosnan malu—pakico Dios ta permitínan?

27. Cua pregunta ta exigi un contesta awor?

²⁷ Siendo cu e propósito di Dios ta di traha paradijs riba tera, di ki manera e tera djawe ta tanto yen di maldad, sufrimento, i tristeza? Siendo cu Dios ta Todopoderoso, pakico el a permiti tal situacion existi pa tanto tempo? Tin speranza di un fin di tur nos dificultad? Kico e Bijbel ta bisa?

28. Con rebelion a drenta den e hofi di Paradijs?

²⁸ E Bijbel ta mustra cu dificultad pa humanidad a cuminza ora un yiu spiritual di Dios a rebela contra e soberanía di Jehova, of contra su dominio. (Romano 1:20; Salmo 103:22) Sin duda e angel ei tabata hunto cu esnan cu a alegra ora nan a mira e creacion di hende. Pero despues cudishi i orguyo a saca raíz den su curazón, i e deseo a tenté di hiba Adam i Eva pa adoré en bez di nan Creador, Jehova Dios. Usando colebra pa papia, mescos cu buikspreker ta haci popchi papia, e angel a tenta Eva pa desobedece Dios Todopoderoso. Anto su esposo Adam a sigié den desobedencia.—Génesis 2:15-17; 3:1-6; Santiago 1:14, 15.

29. (a) Cua cuestion a presenta pa ser determiná? (b) Con Dios a enfrenta e desafío? (c) Con bo por participa den dunamento di contesta ne mofa di Satanás?

²⁹ E angel rebelioso a yega di ser yamá “colebra original.” (Revelacion 12:9; 2 Corintio 11:3) També e ta ser yamá Satanás, cu kier men “Opositor,” i Diabel, cu kier men “Calumniador.” El a lanta cuestion tocante lo correcto i husticia dje gobernacion di Jehova riba tera, i a reta Dios cu awor e, Satanás, por aparta tur humanidad for dje adoracion berdadero. Dios a permiti Satanás mas cu 6.000 aña pa haci esfuerzo pa cumpli cu su reto, afin cu e cuestion riba e soberanía di Jehova por ta decidí pa tur eternidad. Gobernacion di hende independiente di Dios a faya miserablemente. Pero homber i muher di fe, entre locual Jesus tabata un ehempel sobresaliente, a warda integridad na Dios bao di prueba di mas severo, vindicando Jehova i dunando prueba cu e Diabel ta mentiroso. (Lucas 4:1-13; Job 1:7-12; 2:1-6; 27:5) Abo, també, por ta un wardador di integridad. (Proverbio 27:11) Pero Satanás no ta e único enemigo cu ta flíginos. Cua otro enemigo tini?

E enemigo—morto

30. Kico e Scritura ta bisa tocante e castigo duná na hende pa nan desobedencia?

³⁰ Dios a declara e castigo pa desobedencia, esta, morto. Lezando sentencia pe promé muher, Jehova Dios a bisa: “Lo mi aumenta mashá e dolor di bo embarazo; cu dolor di parto lo bo produci yiu, i bo deseo anheloso lo ser pa bo esposo, i lo e dominábo.” El a bisa e homber Adam: “Cu sodor di bo frenta lo bo come pan te cu bo ta bolbe ne tera, for di locual bo a wordu tumá. Pasobra bo ta stof i lo bo bolbe na stof.” (Génesis 3:16-19) E pareha desobediente tabata sacá for di Paradijs di felicidad na un tera no cultivá. Cu transcurso di tempo nan a muri.—Génesis 5:5.

31. Kico ta picá, i esei a resulta den kico pa humanidad?

³¹ Tabata solamente despues cu nan a cai for di marca di perfeccion cu Adam i Eva a cuminza produci yiu. Tur hende djawe ta nan desendiente den imperfeccion, i p’sei tur ta muri. Un skirbidor di Bijbel a splica esei cu e sigiente palabra: “Pa medio di un solo homber picá a drenta den mundo i morto pa medio di picá, i asina morto a plama na tur hende pasobra nan tur a peca.” Kico ta “picá”? Esei ta di no alcanza e marca di perfeccion of lo completo. Jehova Dios no ta aproba di nada cu no ta perfecto ni no ta duné bida. Siendo cu tur hende a hereda picá i imperfeccion for dje promé homber Adam, morto a “reina como rey” riba nan. (Romano 5:12, 14) Hende pecador ta muri, mescos cu bestia ta muri.—Eclesiastés 3:19-21.

32. Con e Bijbel ta splica e morto cu nos a hereda?

³² Kico ta “morto”? Morto ta lo contrario cu bida. Dios a ofrece hende e posibilidad di bida sin fin riba tera si el a obedece. Pero, el a desobedece, i e castigo tabata morto, foi tino, sin existencia. Dios no a bisa nada tocante hibamento di bida di hende na region spiritual ni na un “fierno” di candela si nan a desobedece i a muri. El a duna hende e spiertamento: “Lo bo muri positivamente.” Tabata e Diabel, asesino di hende, cu a gaña, bisando: “Bo positivamente lo no muri.” (Génesis 2:17; 3:4; Juan 8:44) Loke tur hende a hereda for di Adam ta morto, birando mescos cu stof.—Eclesiastés 9:5, 10; Salmo 115:17; 146:4.

33. (a) Cua futuro glorioso ta spera humanidad i e tera? (b) Jehova Dios ta cumpli cu cua tres cos importante usando su Yiu?

³³ Pues, anto, no tin ningun futuro pa hende cu ta muri? Tin un futuro maraviyoso! E Bijbel ta mustra cu e propósito di Dios pa establece un tera paradísico pa tur humanidad, incluyendo hende cu a muri caba, lo no faya nunca. Jehova Dios a bisa: “Cielo ta mi trono, i e tera ta banki pa mi pia.”“Lo mi glorifica e lugar mes di mi pia.” (Isaías 66:1; 60:13) For di abundancia di su amor, Jehova a manda su Yiu, e Palabra, ne tera, pe mundo di humanidad por gana bida pa medio di dje. (Juan 3:16; 1 Juan 4:9) Tin tres cos importante pa nos splica awor cu Jehova Dios lo haci mediante su Yiu, esta, (1) percuracion di liberacion di hende for di poder di morto; (2) berdadero restoracion di hende morto na bida; i (3) establecimento di un gobierno perfecto riba tur humanidad.

Liberacion for di morto

34, 35. (a) Na cua solo manera hende por ta rescatá for di morto? (b) Kico ta rescate?

³⁴ Desde tempo di antigua, profeta di Dios a expresa nan confianza, no den inmortalidad di hende, sino den e speranza di cu Dios lo “recobránan” for di morto. (Oseas 13:14) Pero, con hende por ta liberá for di cadena di morto? E husticia perfecto di Jehova ta exigi ‘alma pa alma, wowo pa wowo, djente pa djente.’ (Deuteronomio 19:21) P’sei, siendo cu Adam a duna herencia di morto na tur humanidad, desobedeciendo Dios boluntariamente i asina perdiendo su perfeccion di bida humano, un otro hende perfecto tabatin cu bira sustituto pa Adam, entregando su bida perfecto, cumprando loke Adam a perde.

³⁵ E ley husto di paga un prijs correspondiente tabata aceptá na tur parti durante e pasado. E expresion usá comunmente ta di “paga rescate.” Kico ta rescate? Esei ta “prijs pagá pa recobra un persona of cos for di hende cu ta detene e persona of cos como preso. P’sei, ta wordu bisá cu prisionero di gera of esclabo ta rescatá ora nan ta ser libertá, cambiá pa algo di balor. . . . Cualkier cos cu ta sirbi como sustituto of ta ser pagá como pago pe persona, esei ta su rescate.”d Desde e picá di Adam, tur humanidad ta manera prisionero di gera of esclabo, den cadena di imperfeccion i morto. Pa libertánan, percuracion di rescate tabata necesario. Pa evita cualkier pleitu awor of despues en cuanto e husticia dje prijs di rescate, tabata necesario pa sacrifica un bida humano perfecto, esta, un bida exactamente igual cu e bida di Adam.

36. Con Jehova Dios a percura un bida humano perfecto como rescate?

³⁶ Sin embargo, unda tal bida humano perfecto por ta hayá? Tur hende, como desendiente di Adam imperfecto, a nace imperfecto. “Ningun di nan di algun manera por salba sikiera un ruman, ni duna na Dios un rescate pe.” (Salmo 49:7) Pa satisface e necesidad, Jehova Dios, motivá pa su amor profundo pa humanidad, realmente a percura su precioso Yiu “primogénito” pa bira e sacrificio necesario. Dios a transporta e bida perfecto di su Yiu spiritual, e Palabra, ne matriz di un birgen hudía, María. E jufrow a concibí i na debido tempo a duna luz na un yiu, cu tabata yamá “Jesus.” (Mateo 1:18-25) E Creador di bida lógicamente por a haci tal milagro maraviyoso.

37. Con Jesus a demonstra su amor pa tur hende cu ta desea bida?

³⁷ Jesus a crece i a bira homber, presentando su mes na Jehova, i tabata bautizá. Anto Dios a comisioné pé haci su boluntad. (Mateo 3:13, 16, 17) Siendo cu e bida terrenal di Jesus a bini di cielo i tabata perfecto, e por a sacrifica su bida humano perfecto, usando esei pa libra humanidad for di morto. (Romano 6:23; 5:18, 19) Manera Jesus a bisa: “Mi a bini pa nan por tin bida i tiné na abundancia.” “Ningun hende tin amor mayor cu esei, cu e hende cu ta entrega su alma na fabor di su amigonan.” (Juan 10:10; 15:13) Ora Satanás a laga mata Jesus riba e staca di tormento, Jesus a sometele ne morto cruel, sabiendo cu hende eherciendo fe por gana bida eterna door di tal percuracion di rescate.—Mateo 20:28; 1 Timoteo 2:5, 6.

Restoracion na bida

38. Con e Yiu di Dios tabata restorá na bida, i kico ta duna prueba di esei?

³⁸ Aunque su enemigonan a maté, e Yiu di Dios nunca a perde su derecho di bida humano perfecto, pasobra el a warda integridad na Dios. Pero, siendo morto den graf, con Jesus por a usa e cos di balor, su derecho di bida humano, na fabor di humanidad? Tabata ei mes cu Jehova Dios a haci otro milagro, e promé milagro dje sorto ei. Dia tres dje morto di Jesus den graf, Jehova Dios a lanté for di morto como un persona spiritual i inmortal. (Romano 6:9; 1 Pedro 3:18) Pa Jesus establece kerimento den su resureccion, na varios ocasion el a materializá curpa humano i a presenta pa su disípelnan, na un tempo 500 i mas di nan. Ningun di eseinan, ni apóstol Pablo cu tabata ciegá despues pa un presentacion di Jesus glorificá, tabatin cualkier motibo pa duda e milagro di su resureccion.—1 Corintio 15:3-8; Echo 9:1-9.

39. (a) Con Jesus ta usa e balor di su sacrificio, i primeramente na fabor di ken? (b) Jesus a papia di cua otro milagro grandi?

³⁹ Despues di 40 dia Jesus resusitá a subi te ne presencia mes di Dios den cielo, pa presenta ei e balor di su sacrificio humano perfecto como liberacion pa humanidad. “Pero e homber ei a ofrece un solo sacrificio pa picá pa semper i a sinta na man drechi di Dios, dje ora ei padilanti sperando te cu su enemigonan lo ser poní como banki pa su pia.” (Hebreo 10:12, 13) E proménan pa ser libertá mediante su rescate ta un “trupa chikito” di cristian fiel “cu ta pertenece na Cristo.” (Lucas 12:32; 1 Corintio 15:22, 23) Eseinan ta ser “cumprá for di den humanidad,” i p’sei den e resureccion nan ta bira socio spiritual di Cristo den cielo. (Revelacion 14:1-5) Sin embargo, kico dje gran cantidad di humanidad cu awor ta drumi morto den nan graf? Ora e tabata riba tera, Jesus a bisa cu su Tata a duné autoridad di huzga i duna bida. El a agrega: “No straña riba esei, pasobra e ora ta bini den locual tur esnan cu ta den graf memorial lo tende su boz i lo sali, . . . pa un resureccion.” (Juan 5:26-29) Jesus lo restora eseinan na bida den Paradijs riba tera.

40, 41. (a) Splica exactamente loke kier men “resureccion”. (b) Pakico nos por tene fe den e promesa di Dios dje resureccion?

⁴⁰ Tuma nota dje palabra di Jesus, “No straña riba esei.” No obstante, con hende morto pa mashá tempo por ta librá for di morto i ser restorá na bida? Nan curpa no a bolbe bira stof? Algun molecuul cu a compone nan curpa tal bez a drenta den otro cos bibiente, tal como mata i bestia. Sin embargo, resureccion no kier men huntamento hunto dje mesun elemento químico atrobé. Resureccion kier men cu Dios ta recrea e mesun persona, cu e mesun personalidad. Dios ta produci un curpa nobo for di elemento dje tera, i den e curpa e ta pone e mesun característica, e mesun calidadnan distinto, e mesun memoria, e mesun moda di biba cu e persona a forma te ne tempo di nan morto.

⁴¹ Tal bez tabata bo experencia cu e cas cu bo a stima mashá hopi a kima. Pero, ta fácil pa bo bolbe traha e mesun cas, pasobra e imagen di tur detaye stimá di dje ta keda mashá claro den bo memoria. Siguramente, anto, Dios cu ta Creador di memoria por recrea hende cu el a warda den su memoria pasobra e ta stímanan. (Isaías 64:8) P’sei mes e Bijbel ta usa e expresion “graf memorial.” Ora e debido tempo di Dios ta yega pa restora hende morto na bida atrobé, lo e haci e milagro, net manera el a haci e milagro di crea e promé hende, solamente ne tempo ei lo e haci e milagro hopi bez.—Génesis 2:7; Echo 24:15.

42. Pakico bida eterna riba tera ta posibel i sigur?

⁴² Dios lo restora humanidad na bida, cu e prospecto di nunca muri i caba riba tera. Pero, di ki manera bida eterna riba tera ta posibel? Esei ta posibel i ta sigur pasobra esei ta e boluntad i propósito divino. (Juan 6:37-40; Mateo 6:10) E único motibo cu hende ta muri i ta caba awe ta cu nan a hereda morto for di Adam. Sin embargo, ora nos ta tuma na cuenta e variedad infinito di cosnan maraviyoso riba tera pe gozo di hende segun e boluntad divino, un bida cortico di menos cu cien aña ta demasiado cortico! Ora Dios a duna e tera ne yiunan di hende, su propósito tabata pa hende sigi biba pa disfruta dje riqueza magnífico di su creacion, no pa cien aña so, ni pa mil aña, sino pa semper!—Salmo 115:16; 133:3.

E gobierno perfecto di paz

43. (a) Ki necesidad tini pa un gobierno perfecto? (b) Ki propósito Jehova Dios tini en cuanto esei?

⁴³ Door cu nos promé mayornan a rechaza e ley di Dios, gobierno humano a cai bao di poder di Satanás. Apropiadamente, e Bijbel ta yama Satanás “e dios dje sistema di cosnan aki.” (2 Corintio 4:4) Gera, crueldad, corrupcion, i falta di firmeza di gobierno di hende ta duna prueba di esei. Liga di Nacion i Nacion Uní no a saca paz for di confusion. Humanidad ta sclama pa un gobierno di paz. No ta razonabel pe Creador, cu tin e propósito di restora Paradijs riba tera, també percura un gobierno perfecto pe Paradijs? Esei ta exactamente e propósito di Jehova Dios. E Rey cu ta representele den e gobierno ta su “Prinz di Paz,” Cristo Jesus, i “lo no tin fin di abundancia dje gobernacion di prinz ni di paz.”—Isaías 9:6, 7.

44. (a) Unda e gobierno lo ta situá? (b) Ken ta componele?

⁴⁴ E Bijbel ta mustra cu e gobierno perfecto lo ta den cielo. Desde tal sitio bentahoso, e Rey Jesucristo por efectivamente goberna tur e tera den husticia. Además, e lo tin gobernante socio den e gobierno celestial invisibel. Nan ta wordu escogí for di hende fiel, sigidor di Jesus cu a pega na dje durante dificultad i na ken e ta bisa: “Mi ta cera un pacto cu boso, net manera mi Tata a cera un pacto cu mi, pa un reino.” (Lucas 22:28, 29) Solamente poco hende di humanidad ta wordu hibá na cielo pa goberna cu Cristo Jesus. Esei ta similar cu nacion djawe, unda poco hende so ta wordu eligí pa goberna den bestuur college of parlamento. E Bijbel ta mustra cu Jesucristo lo tin 144.000 gobernante socio so. P’sei, e Reino di Dios, of gobierno celestial, ta consisti di Cristo Jesus i 144.000 hende hibá na cielo for di tera. (Revelacion 14:1-4; 5:9, 10) I kico dje tera? Salmo 45:16 ta bisa cu e Rey lo nombra “prinz den tur e tera.” Cielo lo nombra “prinz” humano, of superintendente gobernante debí na nan debocion profundo na principio di husticia.—Compara cu Isaías 32:1.

45, 46. (a) Ki tema principal e predicamento di Jesus tabatin riba tera? (b) Pakico e gobierno perfecto no a wordu establecí un bez? (c) Di ki manera 1914 EC tabata un aña sobresaliente den profecía i den sosodimento di mundo?

⁴⁵ Na ki tempo i di ki manera e gobierno perfecto ta wordu establecí? Ora Jesus tabata riba tera e Reino tabata e tema principal di su predicacion. (Mateo 4:17; Lucas 8:1) Pero, e no a establece e Reino ne tempo ei, ni na su resureccion. (Echo 1:6-8) Asta ora el a subi na cielo, e tabatin cu spera ainda pe tempo siñalá di Jehova. (Salmo 110:1, 2; Hebreo 1:13) Profecía bíblica ta mustra cu e tempo siñalá a yega na 1914 EC. Sin embargo, hende ta puntra, ‘En bez di un gobierno perfecto, 1914 no a marca principio di mas afliccion mundial?’ Esei ta exactamente e punto importante! Tin un conexion estrecha entre binimento dje Reino di Dios i sosodimento catastrófico di aña reciente, manera nos ta bai mira awor.

⁴⁶ Pa mas cu 35 aña promé cu 1914, Toren di Vigilancia (na inglés, awor e revista religioso di mas plamá den mundo) a hala atencion na 1914 como un aña cu profecía bíblica a indica. Tal profecía a cuminza haya cumplimento notable na 1914. Un profecía tabata esei di Jesus mes, declará 1.900 aña pasá, tocante “e siñal” cu lo presenta ne fin dje sistema di cosnan i cu ta duna prueba cu Jesus ta presente invisiblemente cu poder di reino. Contestando e pregunta di su disípelnan tocante e “siñal,” el a bisa: “Nacion lo lanta contra nacion i reino contra reino, i lo tin scarcidad di cuminda i temblor den un lugar tras di otro. Tur esei ta principio di dolor di afliccion.” (Mateo 24:3, 7, 8) Na cumplimento notable, e promé dje geranan mundial a cuminza na 1914, treciendo destruccion siete bez mas grandi cu tur 900 gera dje 2.500 aña promé! Dolor di afliccion a sigi te awor. Bo a experimenta destruccion di gera, scarcidad di cuminda, of cualkier temblor grandi cu a plaga mundo desde 1914? Si ta asina, bo ta testigo ocular dje “siñal” dje “tempo di fin” dje sistema di cosnan aki.—Daniel 12:4.

47. Con sosodimento na cumplimento dje “siñal” a intensificá na añanan reciente?

⁴⁷ E “dolor di afliccion” a aumentá debí na Gera Mundial II, locual tabata cuater bez mas destructivo cu Gera Mundial I, i e “dolor” a sigi den e época nuclear, cumpliendo cu e sigiente profecía di Jesus: “Riba tera ansha dje nacionan, sin conoce e salida . . . , mientras cu hende ta desmaya di miedu i di anticipacion di loke ta bini riba e tera habitá.” (Lucas 21:25, 26) Tin aumento di crimen i di maldad, di desobedencia i di delincuencia di yiu, i també aumento di hende cu ta biba sin Dios i di inmoralidad—tal desaroyo alarmante també tabata profetizá como marca dje “último dianan” dje mal sistema di cosnan aki.—2 Timoteo 3:1-5; Mateo 24:12.

48. Ken ta responsabel pa calamidad riba tera, i pakico nan a aumenta desde 1914?

⁴⁸ Sin embargo, si e gobierno celestial tabata establecí den 1914, pakico tin tanto ansha den mundo? Satanás e Diabel ta esun cu ta responsabel. Ora Cristo a recibi poder di Reino, su promé acto tabata di haci gera contra Satanás den cielo invisibel. Como resultado, Satanás, “cu ta gaña tur e tera habitá,” tabata tirá abao na becindario dje tera hunto cu su angelnan. Sabiendo cu su destruccion ta yegando cerca, e ta instiga gran dificultad riba tera. Pues, “ai di tera i di lamá, pasobra e Diabel a baha cerca boso, mashá rabiá, sabiendo cu e tin poco tempo mas.”—Revelacion 12:7-9, 12.

49. (a) Kico lo sosode hende cu ta “destrui e tera”? (b) Con Jehova Dios lo ehecuta su “decision hudicial” riba e nacionan?

⁴⁹ Tal tempo di calamidad lo caba? Sí!—ora e gobierno di cielo, e Reino di Dios Todopoderoso, ta drenta den accion pa “destrui esnan cu ta destrui e tera.” (Revelacion 11:18; Daniel 2:44) Dios nunca lo permiti poder político, ni cristian falso, ni ningun otro hende destrui su bon trabao, e tera, cu nan invento nuclear. Mas bien, e ta declara: “Mi decision hudicial ta di reuni e nacionan, pa mi hunta hunto e reinonan, pa mi basha riba nan mi denunciacion, tur mi rabia ardiente.” (Sofonías 3:8) Jehova Dios, mediante su Cristo, lo usa gran forza cu e ta controla den universo mandando destruccion aplastante riba tur hende cu ta sigi Satanás riba tera. Esei lo ta na escala mundial, similar den grandeza cu e diluvio dje dia di Noé.—Jeremías 25:31-34; 2 Pedro 3:5-7, 10.

50. (a) Kico ta “Armagedón”? (b) Ken so lo sobrebiba Armagedón?

⁵⁰ Den e Bijbel e destruccion di nacion malbado ta ser yamá e bataya di Dios di Armagedón. (Revelacion 16:14-16) Solamente hende manso, hende cu ta busca Jehova i husticia, por sobrebiba Armagedón pa drenta den e sistema nobo di paz di Dios. (Sofonías 2:3; Isaías 26:20, 21) E Bijbel ta bisa tocante tal hende: “Pero e mansonan mes lo tene e tera den nan poder, i nan en berdad lo haya nan gozo exquisito den e abundancia di paz.” (Salmo 37:11) E gran trabao di restora Paradijs riba tera lo cuminza ne tempo ei!

Educacion pa drenta den Paradijs

51. Pakico ta necesario pa bo dal paso awor?

⁵¹ Bo tin gusto di biba den Paradijs? Si bo ta contestá cu ‘Sí,’ lo bo keda emocioná pa sa cu ora Jesus a menciona e tempo di dificultad djawe i e “siñal” di su binidero destruccion, el a agrega, “E generacion ei lo no pasa di ningun manera te cu tur e cosnan ei ta sosode.” Por lo menos algun hende dje generacion cu a mira e “principio di dolor di ansha” na 1914 lo sigi biba pa mira Paradijs restorá riba tera. (Mateo 24:3-8, 34) Sin embargo, un echo tristu tá cu mayor parti di hende djawe ta riba e camina hanchu cu ta hiba na destruccion. (Mateo 7:13, 14) Ta keda poco tempo pa nan cambia. Ki agradicido bo por keda cu Jehova Dios a percura un spiertamento na ora! Door cu Jehova Dios kier pa bo haya bida, e por yudábo dal e paso correcto.—2 Pedro 3:9; Ezekiel 18:23.

52. Kico bo mesté pa bo tuma un decision sabí en cuanto religion?

⁵² Bo necesidad urgente awor ta di gana conocimento exacto. (1 Timoteo 2:4; Juan 17:3) Unda bo por hayé? Bo por hayé den cualkier religion? Algun hende ta bisa cu tur religion ta hiba hende ne mesun destino, mescos cu tur camina di montaña ta hiba na top. Ki equibocacion nan ta haci! Pa haya e camina correcto, montanero ta usa mapa, i nan ta paga guía. Di igual manera, tin un solo religion cu ta siña e berdad cu ta hiba na bida eterna, i guía ta necesario pa hayé.—Echo 8:26-31.

53. (a) Pa bo gana bida eterna, kico bo tin cu sigi haci? (b) Bo por tin cu vence cua tentacion di parti di Satanás?

⁵³ Testigo di Jehova a percura e foyeto aki pa yudábo. El a yudábo caba comprende algun berdad básico di Bijbel, no ta berdad? Sin duda bo a confirma pa bo mes cu cada punto ta fundá riba e Palabra inspirá di Dios. Awor, pa bo sigi progresa te na bo meta, bo tin cu siña mas. Mescos cu educacion seglar correcto ta necesario pa prepara hende pa nan bida den e arreglo social djawe, asina també educacion bíblico apropiado ta necesario pa prepara hende pa drenta den e sociedad cu lo sobrebiba pa sigi biba den e Paradijs riba tera. (2 Timoteo 3:16, 17) Satanás por purba di destraébo, haciendo hende íntimo oponébo of usa tentacion pa bo cai den materialismo egoísta of den inmoralidad. No entrega na Satanás. Bo siguridad i tur e futuro di bo i di bo famía ta depende di bo studiamento mas leu den e Bijbel.—Mateo 10:36; 1 Juan 2:15-17.

54. Cua otro percuracion pa educacion Jehova Dios a haci den bo becindario?

⁵⁴ Además di sigi den bo estudio actual di Bijbel, tin un otro manera pa bo siña. Hende den bo becindario cu ta interesá den educacion bíblico ta asisti regularmente na reunion den Salón di Reino local. Tur hende cu ta asisti ei ta haya instruccion di Bijbel i ta purba sinceramente di bira mihor hende. Nan ta recibi hende nobo un bez, bisando, “Bam, i láganos subi te ne montaña di Jehova [su lugar di adoracion] . . . i lo e instruínos tocante su camina, i nos lo camna den su berea.” (Isaías 2:3) Bon motibo pa asisti na reunion bíblico ta wordu splicá den Hebreo 10:24, 25, cu ta bisa: “Láganos considera un e otro pa conmove otro na amor i bon obra, sin bandona reunimento di nos hunto, manera e costumber di algun, sino anima otro, i tanto mas ora boso ta mira e dia yegando cerca.”

55. (a) Di ki manera e organizacion di Jehova Dios ta distinto di otro organizacion? (b) Di ki manera Testigo di Jehova ta uní manera ningun otro pueblo?

⁵⁵ Ora bo ta asociábo cu e organizacion di Jehova Dios, bo por haya un ambiente mashá distinto di esei di tempel i di misa. No tin pidimento di placa, no tin calumnia ni pleitu, ni ningun discriminacion debí na pasado di famía of estado financiero. E calidad mas sobresaliente di Testigo di Jehova ta amor. Di promé, nan ta stima Jehova Dios, i di dos, nan ta stima otro hende. Esei ta e marca di cristian berdadero. (Mateo 22:37-39; Juan 13:35) Bo tin cu asisti na nan reunion pa bo confirma esei pa bo mes. Sin duda lo bo keda impresioná cu nan unidad. Tin mas cu tres miyón Testigo di Jehova mundialmente den mas cu 200 tera. Sin embargo, Testigo di Jehova den tur e tera ta sigi e mesun programa den nan reunion. I door di publica literatura den hopi idioma alabez, den nan reunion simanal mayor parti di Testigo di Jehova den tur e mundo ta studia e mesun artículo bíblico poco ora tras di otro. E unidad dje organizacion di Jehova Dios ta un milagro di dia djawe den e mundo desuní aki.

56. (a) Cua beneficio bo por recibí asociando cu e organizacion di Jehova Dios? (b) Ora problema ta presenta, con bo mester reacciona? (c) Pakico ta importante pa bo dedica bo bida na Jehova Dios?

⁵⁶ Ora bo ta asociábo regularmente cu e pueblo di Jehova Dios, bo tin cu bistíbo cu e “personalidad nobo” i cultiva e fruta dje spiritu di Dios—“amor, gozo, paz, gran pacenshi, bondad, husticia, fe, suavedad, dominio propio.” (Colosense 3:10, 12-14; Galatio 5:22, 23) Esei por dunábo un contentamento profundo. Tal bez bo tin cu vence problema de bez en cuando door cu bo ta biba den un mundo corrupto i també debí na bo mes imperfeccion. Pero, Jehova Dios lo yudábo. Su Palabra ta duna siguranza na hende cu sinceramente ta purba di agradé: “No keda ansioso riba nada, sino den tur cos via oracion i súplica hunto cu agradicimento duna di conoce boso peticion na Dios; i e paz di Dios cu ta sobrepasá tur pensamento lo warda boso curazón i boso facultad mental mediante Cristo Jesus.” (Filipense 4:6, 7) E amor di Jehova Dios lo atraébo, di manera cu bo ta haya deseo di sirbié. Testigo di Jehova ta keda contentu pa mustrábo con bo por dedica bo bida ne Dios di amor i bira un testigo privilegiá di dje. (Salmo 104:33; Lucas 9:23) Sí, esei ta un privilegio. Imaginábo! Como un adorador di Jehova Dios, bo por haci esfuerzo pa alcanza e meta di bida eterna den Paradijs aki riba tera.—Sofonías 2:3; Isaías 25:6, 8.

57. (a) Den e sistema nobo, cua relacion íntimo lo tini entre Dios i humanidad? (b) Cua ta algun bendicion cu bo por goza ne tempo ei?

⁵⁷ Sigi, anto, studiando i creciendo den amor i aprecio di Jehova Dios, di su Yiu, i dje gobierno celestial di husticia. Dunando detaye dje gobierno di Dios i dje bendicion cu e lo drama riba humanidad, e profecía bíblica ta bisa: “Mira! e tent di Dios ta cerca humanidad, i lo e biba cerca nan, i nan lo ta su pueblo. I Dios mes lo ta cu nan.” “Dios mes,” cu ta tanto mas halto cu gobernacion egoísta i ruinoso di hende djawe, lo ta mashá cerca hende como un Tata bondadoso di tur hende cu ta stimé i ta adoré den e sistema nobo. En berdad, lo tin un solo religion, e berdadero adoracion di Jehova Dios, i su adoradornan lo disfruta dje relacion íntimo di yiu cu Tata. Lo e demonstra su mes di ser ki un Tata amoroso! “I lo e seca tur lágrima di nan wowo, i lo no existi morto mas, ni yoramento ni sclamamento ni dolor lo no existi mas. E cosnan di antes a pasa forbij.”—Revelacion 21:3, 4.

58. Pakico bo por keda sigur cu Jehova Dios lo ‘traha tur cos nobo’?

⁵⁸ Asina e gran milagro di establece un tera paradísico bao dje gobierno celestial perfecto lo ser lográ. Esei ta tanto cierto como e echo cu solo lo sali i drenta mañan. Pasobra promesa di Jehova Dios, Creador di cielo i tera, ta semper “berdadero i fiel.” E mes ta esun cu ta declara for di su trono den cielo: “Mira! mi ta traha tur cos nobo.”—Revelacion 21:5.

Como repaso dje foyeto aki, con bo ta contesta e sigiente preguntanan?

Di ki manera e Bijbel ta sobresaliente?

Kico bo a siña tocante Dios?

Ken ta Cristo Jesus?

Ken ta Satanás e Diabel?

Pakico Dios ta permiti existencia di maldad?

Pakico hende ta muri?

Hende morto ta den ki estado?

Kico ta e rescate?

Na unda i di ki manera e resureccion ta tuma lugar?

Kico ta e Reino, i kico lo e haci?

Ki “siñal” tini dje “conclusion dje sistema di cosnan”?

Con bo por preparábo pa bida eterna den Paradijs?

[Nota]

[Plachinan na página 13]

Como un creacion, hende ta hopi mas superior cu bestia

[Plachi na página 18]

Jesus tabata igual cu e homber perfecto Adam