Kon e Reskate Ta Salba Nos?

“Esun ku kere den e Yu tin bida eterno; ma esun ku no obedesé e Yu lo no mira bida, ma e furia di Dios ta keda riba dje.”​—JUAN 3:36.

1, 2. Kiko ta un di e motibunan pakiko a kuminsá publiká e revista akí?

“UN HENDE ku ta studia Beibel kuidadosamente no por laga di keda impreshoná ku e importansia ku e Palabra di Dios ta duna na e morto di Kristu.” Asina un artíkulo den e di kuater edishon di e revista akí a deklará na òktober 1879. E artíkulo a konkluí ku e pensamentu serio akí: “Laga nos tene kuidou ku tur loke ta rebahá e morto di Kristu, òf ku ta nenga ku e ta un ofrenda i rekonsiliashon pa piká.”​—Lesa 1 Juan 2:​1 i 2.

² Un di e motibunan pakiko a kuminsá publiká e revista akí na yüli 1879—ku e tempu ei tabata yama Zion’s Watch Tower—tabata pa defendé e siñansa bíbliko di e reskate. Su artíkulonan tabata ‘kuminda na e debido tempu,’ pasobra na kabamentu di siglo 19 un kantidat kresiente di miembro di kristiandat a kuminsá duda ku si en bèrdat e morto di Kristu por reskatá nos di nos pikánan. (Mat. 24:45) E tempu ei, hopi hende a kuminsá kere den e teoria di evolushon, un idea ku ta kontradisí e echo ku hende a pèrdè su kondishon perfekto. Segun evolushonistanan, hende di su mes ta birando mihó i no tin mester di un reskate. En bista di esei, e konseho ku apòstel Pablo a duna Timoteo ta na su lugá: “Warda loke a wòrdu konfiá na bo, evitando papiamentu profano i bano, i e argumentonan kontradiktorio ku ta bini di loke falsamente ta wòrdu yamá ‘konosementu’—lokual algun hende a profesá i asina a desviá for di e fe.”​—1 Tim. 6:​20, 21.

 3. Ki preguntanan nos lo bai konsiderá awor?

³ Sin duda, bo ta determiná pa no “desviá for di e fe.” Ku esei na mente, ta bon pa konsiderá e siguiente preguntanan: Pakiko mi mester di e reskate? Kiko el a kosta Yehova i Hesus? Kon mi por benefisiá di e provishon balioso akí ku por libra mi di e furia di Dios?

Nos Por Skapa di e Furia di Dios

4, 5. Kiko ta demostrá ku ketu bai e furia di Dios ta riba e mundu malbado akí?

⁴ Tantu Beibel komo historia di humanidat ta mustra ku for di tempu ku Adam a kai den piká, e furia di Dios ‘a keda riba’ humanidat. (Juan 3:36) Prueba di esaki ta e echo ku ningun ser humano no a logra skapa di morto. E gobernashon rival di Satanas no a logra hasi nèt nada pa protehá humanidat for di un seri largu di kalamidat, i ningun gobièrnu humano no a logra satisfasé e nesesidatnan básiko di tur nan siudadanonan. (1 Juan 5:19) Di manera ku te awe guera, krímen i pobresa ta asotá humanidat.

⁵ Ta bisto anto ku e bendishon di Yehova no ta riba e mundu malbado akí. Pablo a bisa ku “e furia di Dios ta keda revelá for di shelu kontra tur impiedat [òf, “maldat,” NW].” (Rom. 1:​18-20) P’esei, hende ku ta nenga di bandoná un bida ku ta desagradá Dios lo sufri e konsekuensianan di nan komportashon. Aktualmente, sirbidónan di Yehova ta proklamá su furia pa medio di e mensahenan di huisio ku nan ta ‘basha’ manera plaga riba e mundu di Satanas. Hopi di nos publikashonnan basá riba Beibel ta kontené e mensahenan ei.​—Rev. 16:1.

6, 7. Ki obra e kristiannan ungí ta dirigí, i ki oportunidat hende ku ta parti di e mundu di Satanas tin ainda?

⁶ Akaso ta muchu lat pa hende libra nan mes di e dominio di Satanas i risibí e aprobashon di Dios? Nò, pasobra e porta ku ta hiba na rekonsiliashon ku Yehova te ainda ta hanchu habrí. E kristiannan ungí, kendenan ta “embahadornan pa Kristu,” ta dirigiendo un sirbishi públiko pa medio di kua nan ta invitá hende di tur nashon pa “rekonsiliá ku Dios.”​—2 Kor. 5:​20, 21.

⁷ Apòstel Pablo a bisa ku Hesus “ta libra nos di e furia ku lo bini.” (1 Tes. 1:10) Na Armagedón, e rabia di Yehova lo resultá den destrukshon eterno di pekadó ku ta nenga di repentí. (2 Tes. 1:​6-9) Ken lo skapa? Beibel mes ta kontestá: “Esun ku kere den e Yu tin bida eterno; ma esun ku no obedesé e Yu lo no mira bida, ma e furia di Dios ta keda riba dje.” (Juan 3:36) Sí, ora e sistema akí yega na su fin, tur hende ku ta na bida i ku ta pone fe den Hesus i den e reskate lo skapa di e konsekuensianan di e dia final di e furia di Dios.

Kon e Reskate Ta Funshoná?

 8. (a) Ki futuro magnífiko Adam ku Eva tabatin nan dilanti? (b) Kon Yehova a demostrá ku e ta un Dios di hustisia perfekto?

⁸ Dios a krea Adam ku Eva komo hende perfekto. Si nan a keda obediente na dje, ora asin’akí tera lo tabata yen di nan desendientenan felis ku ta biba huntu ku nan den Paradeis. Ma lamentablemente, nos promé mayornan a disidí di desobedesé e mandamentu di Dios. Komo konsekuensia di esei, Dios a sentensiá nan na morto eterno i a saka nan for di e Paradeis original. Pa ora Adam ku Eva a haña yu, humanidat ya tabata den gara di piká, i ku tempu e promé hòmber i muhé a bira bieu i muri. Esaki ta demostrá ku Yehova ta fiel na su palabra. Ademas, e ta un Dios di hustisia perfekto. Yehova a spièrta Adam ku si e kome di e fruta prohibí, esei lo a resultá den su morto, i asina a sosodé tambe!

9, 10. (a) Dikon e desendientenan di Adam ta muri? (b) Kon nos por skapa di morto eterno?

⁹ Komo desendiente di Adam, nos a heredá un kurpa imperfekto ku tin e tendensia di peka i ku ta kondená na morto. Ora Adam a peka, tur ser humano tabata, na moda di papia, den su paden ainda, di manera ku e sentensia di morto a konta pa nos tambe. Si Yehova a anulá e proseso di bira bieu i muri sin paga un reskate, lo e no tabata fiel na su palabra. Básikamente, Pablo a papia pa nos tur ora el a bisa: “Nos sa ku Lei ta spiritual; ma ami ta di karni, bendí komo esklabo na piká. Hende miserabel ku mi ta! Ken lo libra mi di e kurpa di morto akí?”​—Rom. 7:​14, 24.

¹⁰ Ta Yehova Dios so por a perkurá e base legal—ku lo a kumpli ku su normanan di hustisia—pa medio di kua e por a pordoná nos nos pikánan i libra nos di e kastigu di morto eterno. El a hasi esaki ora el a manda su Yu stimá for di shelu pa e nase komo un hende perfekto ku por a duna su bida komo un reskate pa nos. Distinto for di Adam, Hesus sí a keda perfekto. E “no a kometé piká.” (1 Ped. 2:22) P’esei, Hesus tabatin e potensial di bira tata di un rasa humano perfekto. Ma na lugá di esei, el a permití e enemigunan di Dios mat’é, di manera ku e por a adoptá e desendientenan pekaminoso di Adam i habri kaminda pa nan pone fe den dje pa haña bida eterno. E Skritura ta splika: “Ta ún Dios so tin, i ún mediadó tambe entre Dios i hende, e hende Kristu Hesus, kende a duna su mes komo e preis di reskate pa tur hende.”​—1 Tim. 2:​5, 6.

11. (a) Kon nos por ilustrá e benefisionan di e reskate? (b) Te kon leu e benefisionan di e reskate ta yega?

¹¹ Laga nos usa un ilustrashon pa splika kon e reskate ta funshoná. Un banko korupto ta kometé froude i ta pone hopi hende pèrdè tur nan plaka di spar, i asina nan ta kai den debe. E doñonan di e banko, meresidamente, ta risibí un sentensia di hopi aña di prizòn. Pero kiko di e víktimanan inosente? Awor ku nan a bira pober, nan so no por sali for di nan situashon. E úniko solushon ta si un hòmber bondadoso i riku tuma e banko over i debolbé nan tur e plaka ku nan a spar pa asina nan por paga nan debenan. Di e mesun manera, Yehova Dios i su Yu stimá a kumpra e desendientenan di Adam i a kanselá nan debe di piká a base di e sanger dramá di Hesus, i esei a duna humanidat e posibilidat di haña un bida perfekto bèk. P’esei Juan Boutista por a bisa di Hesus: “Ata e Lamchi di Dios ku ta kita piká di mundu!” (Juan 1:29) E mundu di humanidat kende nan piká ta ser eliminá ta inkluí tantu e bibunan komo e mortonan.

Kiko e Reskate A Kosta Yehova i Hesus?

12, 13. Kiko nos por siña di e doló ku Abraham a sinti ora e tabata prepará pa sakrifiká Isaak?

¹² Ounke nos no por komprondé kompletamente kuantu e reskate a kosta nos Tata selestial i su Yu stimá, Beibel ta kontené algun relato di bida real ku por yuda nos haña un bon idea sí. Por ehèmpel, imaginá bo kon Abraham lo mester a sintié ora el a hasi su biahe di tres dia pa e tera di Moria, riba òrdu di Dios, kende a bis’é: “Tuma bo yu hòmber awor, bo úniko yu, kende bo ta stima, Isaak, i bai na e tera di Moria, i ofres’é aya komo un ofrenda kimá riba un di e serunan ku lo mi bisa bo di dje.”​—Gén. 22:​2-4.

¹³ Pensa tambe kon angustiá Abraham lo mester tabata ora ku nan a yega na e lugá indiká i e mester a mara Isaak su man ku su pia i pon’é drumi riba e altar ku Abraham mes a traha. Su kurason lo mester a hasi hopi doló na momento ku el a hisa e kuchú ku intenshon di mata su yu! Pensa awor riba Isaak. Imaginá bo kon é lo mester a sintié ora e tabata drumí riba e altar, wardando riba e inmenso doló ku e hinká di e kuchú skèrpi lo a kous’é i ku lo a hiba na su morto. Ounke e angel di Yehova a para Abraham nèt na tempu, loke e hòmber akí i su yu a hasi na e okashon ei ta yuda nos komprondé ki duru lo mester tabata pa Yehova p’e permití e kompinchinan di Satanas mata su Yu. E manera ku Isaak a kooperá ku Abraham tambe ta ilustrá bon kon dispuesto Hesus tabata pa sufri i muri pa nos.​—Heb. 11:​17-19.

14. Ki suseso den e bida di Jakòb ta yuda nos komprondé kiko e reskate a kosta Yehova?

¹⁴ Un suseso mas ku ta ilustrá kuantu e reskate a kosta Yehova ta loke a sosodé den e bida di Jakòb. Di tur Jakòb su yunan, esun ku mas el a stima tabata Hosé. Lamentablemente, e rumannan di Hosé a envidi’é i odi’é. Un dia Jakòb a manda Hosé bai wak konta ku su rumannan, kendenan tabata kuida e tou di Jakòb mas o ménos 100 kilometer nort di nan kas na Hebròn. Apesar di e odio ku su rumannan tabatin kontra dje, tòg e tabata dispuesto pa bai. Imaginá bo kiko Jakòb lo mester a sinti ora su yunan a trese e pañanan di Hosé tur manchá na sanger! El a sklama: “Ta mi yu hòmber su túnika. Un bestia salbahe a devor’é; siguramente el a sker Hosé na pida-pida!” Jakòb a keda tur kibrá i a yora Hosé pa hopi dia. (Gén. 37:​33, 34) Ta bèrdat ku Yehova no ta reakshoná riba un situashon manera hende imperfekto ta reakshoná. Ma ora nos meditá riba e suseso akí den e bida di Jakòb, e por yuda nos haña un idea kon Dios lo mester a sinti su mes ora nan a maltratá su Yu stimá i mat’é kruelmente akí riba tera.

Kon Nos Ta Benefisiá di e Reskate?

15, 16. (a) Kon Yehova a mustra ku el a aseptá e reskate? (b) Kon bo a benefisiá di e reskate?

¹⁵ Yehova a resusitá su Yu fiel ku un kurpa spiritual glorioso. (1 Ped. 3:18) Despues di esei, Hesus a aparesé pa 40 dia largu na su disipelnan, durante kua el a fortalesé nan fe i prepará nan pa un gran kampaña di predikashon den futuro. Kaba, el a subi na shelu, kaminda el a ofresé Dios e balor di su sanger dramá pa us’é na fabor di su siguidónan berdadero, kendenan tin fe den e balor di su sakrifisio di reskate. Yehova Dios a mustra ku el a aseptá e reskate di Kristu ora el a enkargá Hesus pa drama spiritu santu riba su disipelnan ku tabata huntu na Yerusalèm riba dia di Pentekòste di aña 33.​—Echo. 2:33.

¹⁶ E siguidónan ungí akí di Kristu a kuminsá urgi e hendenan mesora pa batisá den nòmber di Hesukristu pa haña pordon di nan pikánan i asina skapa di e furia di Dios. (Lesa Echonan 2:​38-40.) For di e dia históriko ei te ku awe, Yehova a hala miónes di hende di tur nashon serka dje pa nan por tin un bon relashon kuné a base di nan fe den e sakrifisio di reskate di Hesus. (Juan 6:44) Awor ku nos a yega na e punto akí di nos konsiderashon, ta keda dos pregunta mas pa kontestá: Akaso un di nos a haña e speransa di bida eterno pa motibu di nos bon obranan? I unabes ku nos a risibí e speransa maravioso akí, nos por pèrd’é?

17. Kon bo mester mira e maravioso privilegio di por ta amigu di Dios?

¹⁷ Bon mirá, ningun hende no meresé e reskate. Pero awe, miónes di hende, pa motibu di nan fe den dje, ta bira amigu di Dios, ku e speransa di biba pa semper den un paradeis riba tera. Ma e echo ku nos ta bira amigu di Yehova no ta un garantia ku nos lo mantené e amistat ei kuné. Si nos ke skapa di e binidero dia di furia di Dios, nos tin ku sigui mustra nos apresio profundo pa “e reskate ku Kristu Hesus a paga.”​—Rom. 3:24, NW; lesa Filipensenan 2:12.

Sigui Demostrá Fe den e Reskate

18. Kiko demostrá fe den e reskate ta enserá?

¹⁸ E teksto sentral di e artíkulo akí, Juan 3:36, ta indiká ku kere, òf demostrá fe, den Señor Hesukristu ta nifiká tambe ser obediente na dje. Apresio pa e reskate mester motivá nos pa biba na armonia ku e siñansanan di Hesus, inkluso loke el a siña hende tokante normanan di moralidat. (Mar. 7:​21-23) “E furia di Dios ta bini” riba tur hende ku no ke stòp di praktiká fornikashon, di konta chiste vulgar i di kometé ‘tur sorto di impuresa,’ lokual ta enserá e kustumber di wak pornografia.​—Efe. 5:​3-6.

19. Den ki maneranan positivo nos por mustra nos fe den e reskate?

¹⁹ Nos apresio pa e reskate mester motivá nos pa keda okupá ku loke ta “santu i deboto.” (2 Ped. 3:11) Laga nos apartá sufisiente tempu pa hasi orashon riba un base regular i ku empeño, i tambe pa studia Beibel, asistí na reunion, adorá Yehova komo famia i partisipá ku entusiasmo den e trabou di prediká e Reino. Anto “no laga di hasi bon i di kompartí ku otro; pasobra sorto di sakrifisionan asina ta agradá Dios.”​—Heb. 13:​15, 16.

20. Ki futuro bendishon tur hende ku ta sigui demostrá fe den e reskate lo risibí?

²⁰ Ora Yehova baha su furia riba e mundu malbado akí, nos lo keda hopi kontentu ku nos a demostrá fe den e reskate i a mustra apresio kontinuo p’e. I den e mundu nobo ku Dios a primintí, nos lo ta eternamente gradisidu pa e provishon maravioso akí ku a libra nos di e furia di Dios.​—Lesa Juan 3:16; Revelashon 7:​9, 10, 13, 14.

Kon Lo Bo Kontestá?

• Pakiko nos mester di e reskate?

• Kiko e reskate a kosta Yehova i Hesus?

• Ki benefisionan e reskate ta trese kuné?

• Kon nos ta demostrá fe den e sakrifisio di reskate di Hesus?

[Plachi na página 19]

E porta ku ta hiba na rekonsiliashon ku Yehova ta hanchu habrí

[Plachinan na página 21]

Ora nos meditá riba e susesonan akí relashoná ku Abraham, Isaak i Jakòb, nos por haña un idea kiko e reskate lo mester a kosta Yehova i Hesus