Pregunta di Lektor

Ki sirkunstansianan a pone ku Huda a tene relashon seksual ku un muhé ku el a pensa ta un prostituta, manera Génesis 38:15 i 16 ta mustra?

Ounke Huda a tene relashon seksual ku un muhé ku é a kere tabata un prostituta, en realidat e muhé no tabata un prostituta. Segun Génesis kapítulo 38, loke a sosodé ta lo siguiente:

Promé ku Huda su primogénito a haña yu ku su kasá, Tamar, el a pèrdè su bida pasobra e “tabata malbado den bista di SEÑOR.” (Génesis 38:7) E tempu ei hende tabata sigui e kustumber di kasamentu di sua. Esaki a nifiká ku ora un hòmber a muri sin un heredero, su ruman hòmber mester a kasa ku e biuda i tene relashon kuné pa asina perkurá un heredero. Pero Onan, e segundo yu hòmber di Huda a nenga di kumpli ku su obligashon. P’esei el a muri komo resultado di huisio divino. Huda a manda su suegra bai bèk serka su mayornan te ora ku Huda su di tres yu hòmber, Sela, bira sufisiente grandi pa kasa kuné. Sin embargo, añanan a pasa sin ku Huda a laga Sela kasa ku Tamar. P’esei ora ku Huda su kasá a muri, Tamar a traha un plan p’e haña un heredero via Huda, e israelita ku tabata su suegro. El disfrasá su mes komo un prostituta di tèmpel i a bai sinta kantu di e kaya, kaminda e tabata sa ku Huda lo a pasa.

Huda no a rekonosé Tamar, i el a tene relashon kuné. Pa su servisio seksual, Tamar astutamente a optené algun opheto personal for di Huda, i despues el a usa esakinan pa proba ku ta Huda a sak’é na estado. Ora e bèrdat a sali na kla, Huda no a akus’é, ma humildemente el a bisa: “E ta mas hustu ku mi, pasobra mi no a dun’é na mi yu Sela.” I apropiadamente, Huda “no a tene relashon mas kuné.”—Génesis 38:26.

Huda a aktua robes dor di a keda sin duna su yu hòmber Sela na Tamar manera el a primintí. Tambe el a tene relashon ku un muhé ku el kere ta un prostituta di tèmpel. Esaki tabata kontrario ku Dios su propósito, ku ta rekerí pa hende tene relashon seksual solamente den matrimonio. (Génesis 2:24) Sin embargo, en realidat, Huda no a tene relashon ku un prostituta. Mas bien, inkonsientemente el a supstituí su yu hòmber Sela den e areglo di sua i asina a bira tata di un desendiente legítimo.

Pa loke ta Tamar, e echo ku el a tene relashon ku Huda no tabata un akto di inmoralidat. No mester a konsiderá su yunan ohochi komo yunan di fornikashon. Ora Boaz di Bètlehèm a kasa ku Rut e muhé moabita di akuerdo ku e areglo di matrimonio di sua, e ansianonan di Bètlehèm a papia bon di Tamar su yu hòmber Fares (Perez), bisando Boaz: “Ku bo kas ta manera e kas di Fares, kende Tamar a haña pa Huda, pa medio di e desendensia ku SEÑOR lo duna bo dor di e muhé hóben aki.” (Ruth 4:12) Tambe Fares ta ser menshoná entre e antepasadonan di Hesukristu.—Mateo 1:1-3; Lukas 3:23-33.