Nan A Haci e Boluntad di Jehova

Un Acto di Pordon Ta Habri e Caminda pa Salbacion

E DIES yu hombernan di Jacob cu tabata pará dilanti e promé minister di Egipto tabatin un secreto spantoso. Añanan promé, nan a bende nan mitar ruman homber Josef como esclabo, i a palabrá pa bisa nan tata cu ta un bestia feros a mat’é.—Génesis 37:18-35.

Awor, un 20 aña despues, un hamber severo a pone cu e dies hombernan aki a bini Egipto pa cumpra grano. Pero cosnan no a bai masha fácil. E promé minister, cu tabata a la bes e administradó di cuminda, a acusá nan di spionahe. El a cera un di nan den prizon i a exigí e sobrá pa bai cas i bini bek cu nan ruman homber mas chikitu, Benjamin. Ora nan a haci esei, e promé minister a traha un complot p’e arestá Benjamin.—Génesis 42:1–44:12.

Huda, un dje yu hombernan di Jacob, a protestá bisando: ‘Si nos bai cas bek sin Benjamin, nos tata lo muri.’ Anto a sosodé algu cu ni Huda ni su compañeronan di biahe no a spera. Despues cu e promé minister a manda tur hende, fuera di e yunan di Jacob, sali for dje sala, el a grita yora. Anto, ora el a bin calma el a bisa nan: “Mi ta Josef.”—Génesis 44:18–45:3.

Misericordia i Salbacion

“Mi tata ta bibu ainda?” Josef a puntra su mitar rumannan. Nan no a contestá. Claro cu Josef su rumannan no tabata sa kico pa bisa. Nan mester a bira loco di contentu of nan mester tabatin miedu? Al fin i al cabo, tempu nan tabata 20 aña mas yong, nan a bende e homber aki como esclabo. Josef tabatin e poder pa cera nan den prizon, manda nan cas sin cuminda of—nan no kier a ni pensa mes—ehecutá nan! Cu bon motibu, Josef su mitar rumannan “no tabata por a contest’é nada, pasobra nan a keda perturbá, pa motibu di dje.”—Génesis 45:3.

Mesora Josef a pone e hombernan aki sinti nan mes cómodo. “Bini mas cerca mi, por fabor,” el a bisa. Nan a obedec’é. Anto e di: “Mi ta Josef, boso ruman cu boso a bende na Egipto. Pero awor no sinti boso tristu ni no rabia cu boso mes pasobra boso a bende mi aki; pasobra Dios a manda mi dilanti boso pa conserbacion di bida.”—Génesis 45:4, 5.

Josef no a extendé misericordia sin base. Ya caba el a mira evidencia di nan repentimentu. Por ehempel, ora Josef a acusá su mitar rumannan di spionahe, el a tende nan bisa otro: “Sin duda nos ta culpabel en cuanto nos ruman . . . Ta p’esei e angustia aki a bini riba nos.” (Génesis 42:21) Ademas, Huda a ofrecé p’e bira esclabo na lugá di Benjamin pa asina e hóben por a bai bek cerca su tata.—Génesis 44:33, 34.

Pues, Josef tabatin motibu pa extendé misericordia. Sí, el a realisá cu esei lo por a resultá den salbacion di henter su famia. P’esei, Josef a bisa su mitar rumannan pa bai bek cerca nan tata, Jacob, i bis’é: “Esaki ta loke bo yu homber Josef, a bisa: ‘Dios a nombra mi señor riba henter Egipto. Baha bini cerca mi. No tarda. I bo tin cu biba den e tera di Gosen, i bo tin cu keda cerca di mi, abo i bo yunan i e yunan di bo yunan i bo carnénan i bo bacanan i tur loke bo tin. I ami lo percurá cuminda pa bo einan.’”—Génesis 45:9-11.

E Josef Mayor

Por yama Jesucristo e Josef Mayor pasobra tin similaridadnan notabel entre e dos hombernan aki. Mescos cu Josef, e rumannan di Jesus, desendientenan di Abraham, a maltrat’é. (Compará cu Echonan 2:14, 29, 37.) Sin embargo, tur dos homber a experenciá un cambio extraordinario. Cu tempu, Josef su státus como esclabo a cambia pa di promé minister; ta fárao so, como su cabes, tabata mas haltu cuné. Asina tambe, Jehova a lanta Jesus for di morto i a hals’é na un posicion superior, “na e man drechi di Dios.”—Echonan 2:33; Filipensenan 2:9-11.

Como promé minister, Josef por a distribuí cuminda na tur hende cu a bini Egipto pa cumpra grano. Awe, e Josef Mayor tin riba tera e clase di esclabo fiel i discreto mediante ken e ta distribuí cuminda spiritual “n’e debido tempu.” (Mateo 24:45-47; Lucas 12:42-44) Sí, esnan cu bini cerca Jesus “lo no tin hamber mas ni sed mas . . . pasobra e Lamchi, cu ta meimei dje trono, lo pastoreá nan, i lo guia nan na fonteinnan di awa di bida.”—Revelacion 7:16, 17.

Les pa Nos

Josef ta un excelente ehempel den mustra misericordia. Segun husticia estricto, lo mester a castigá esnan cu a bend’é como esclabo. En cambio, sentimentalismo lo por a impuls’é pa djis pasa por alto di nan falta. Josef no a haci niun di dos. En bes di esei, Josef a test e repentimentu di su mitar rumannan. Anto, ora el a mira cu nan tabatin duele di berdad, el a pordoná nan.

Nos por imitá Josef. Ora un persona cu a peca contra nos mustra cu en berdad el a cambia, nos tin cu pordon’é. Naturalmente, nunca nos no mester laga puru sentimentalismo ciega nos pa malecho serio. Di otro banda, nos no mester permití sintimentunan di rencor stroba nos di reconocé echonan di berdadero repentimentu. P’esei, laga nos “sigui soportá otro i pordoná otro libremente.” (Colosensenan 3:13) Dor di haci asina, nos ta imitá nos Dios, Jehova, kende ta “cla pa pordoná.”—Salmo 86:5; Mikéas 7:18, 19.