Famianan Piadoso di Pasado—Un Modelo pa Nos Tempu

E FAMIA—Nacionnan Uní a purba hacié e foco di atencion mundial. Di ki manera? Dor di declará aña 1994 e “Aña Internacional di Famia.” Aunke lidernan mundial, sociólogonan i conseheronan di famia tabata lihé pa lamentá tal cosnan manera e aumento den nacementu di yunan ilegítimo i cantidad haltu di divorcio, nan tabata slow pa bini cu solucionnan práctico i realístico pa tal problemanan.

Lo por ta cu e Bijbel tin solucionnan pa problemanan di famia? Pa algun persona e por parce ingenuo pa sugerí cu Bijbel lo por ta di yudansa den famianan djawe. Al fin i al cabo, e tabata skirbí siglonan pasá den un ambiente i cultura di Medio Oriente. Den mayor parti di mundu, bida a cambia drásticamente desde tempu bíblico. No obstante, Bijbel a ser inspirá dor di Jehova Dios, esun na ken tur famia ta debe su nomber. (Efesionan 3:14, 15; 2 Timoteo 3:16) Kico Bijbel ta bisa tocante problemanan di famia?

Jehova sa exactamente loke ta necesario pa haci bida di famia agradabel i satisfaciente. P’esei su Palabra, e Bijbel, tin hopi di bisa tocante bida di famia, algun den forma di amonestacion. Bijbel ta contené tambe ehempelnan di famianan cu a aplicá principionan piadoso. Como resultado, nan a disfrutá di berdadero intimidad i contentamentu. Laga nos tira un bistaso na bida di famia den tempu bíblico i mira cua lesnan nos por siña.

Hefatura—Algu Trabahoso?

Considerá, por ehempel, e asuntu di hefatura di famia. Den tempu dje patriarcanan, hombernan manera Abraham, Isaac i Jacob tabata “cabesnan di famia” indiscutibel. (Echonan 7:8, 9; Hebreonan 7:4) The New Manners and Customs of Bible Times, di Ralph Gower, ta bisa: “E famia tabata . . . un ‘reino chikitu’ cu a ser goberná dor dje tata. El a goberná riba esposa, yunan, nietunan i criánan—tur hende den e cas.” En berdad, e patriarcanan hopi bes tabatin autoridad riba famianan di nan yu hombernan tambe.—Compará cu Génesis 42:37.

Esaki no ta duna homber e permit pa oprimí nan esposa i yunan? Absolutamente cu no. Ta cierto cu Dios a bisa e promé muher, Eva: “Bo anhelo lo ta pa bo esposo i lo e dominá bo.” (Génesis 3:16) E palabranan ei a indicá con lo a bai cu muhernan casá en general, pero e palabranan ei no a describí con cosnan lo mester tabata entre Dios su adoradornan berdadero. Esposonan temeroso di Dios mester a tene na mente Jehova su propósito original. Jehova a traha muher pa ser homber su “yudante como un complemento di dje,” no su esclaba. (Génesis 2:20) Debí cu hombernan piadoso di tempu di ántes a reconocé nan mes sumision i responsabilidad na Dios, nan no a abusá di nan autoridad. Leu di trata nan esposanan i yunan como simpel esclabo, patriarcanan temeroso di Dios a demostrá berdadero amor i cariño na nan.

Un bistaso dje cariño cu yunan generalmente a ricibí ta ser duná na Génesis 50:23. Ei e ta bisa dje bisanietunan di Josef: “Nan a nace riba Josef su rudianan.” Aunke esaki por nificá simplemente cu Josef a reconocé e muchanan como su desendiente, e por indicá tambe cu cariñosamente el a hunga cu e muchanan, yayando nan riba su rudianan. Tatanan awe ta haci bon di demostrá nan yunan cariño similar.

Siendo cabesnan di famia, e patriarcanan temeroso di Dios tambe a percurá pa e necesidadnan spiritual di nan famia. Ora el a sali for di e arca despues dje Diluvio global, “Noe a cuminsá edificá un altar pa Jehova . . . i ofrecé ofrendanan kimá riba e altar.” (Génesis 8:20; compará cu Job 1:5.) E fiel patriarca Abraham a pone un bon ehempel dor di duna miembronan di famia instruccion personal. El ‘a manda su yunan i su famia despues di dje afin cu nan lo warda Jehova su caminda pa haci husticia i huicio.’ (Génesis 18:19) Hefatura amoroso a contribuí asina na e bienestar emocional i spiritual di famianan.

Hombernan cristian awe ta sigui e modelo aki. Nan ta ehercé hefatura den asuntunan di adoracion dor di yuda nan famianan cumpli cu e rekisitonan di Dios i dor di nan mes pone un bon ehempel. (Mateo 28:19, 20; Hebreonan 10:24, 25) Mescos cu e patriarcanan, esposo i tatanan cristian tambe ta tuma e tempu pa duna instruccion personal na nan miembronan di famia.

Tumando Accion Decisivo

Ora cu finalmente el a caba di paga un debe enorme na su suegro, e patriarca Jacob a puntra: “Ki dia lo mi por haci algu tambe pa mi mes cas?” (Génesis 30:30) Mescos cu tur tata, Jacob a sinti e presion di satisfacé e necesidadnan material di su famia i el a traha duru pa haci esaki. Génesis 30:43 ta bisa: “E homber a sigui aumentá mas i mas i gran cantidad di tou i di criá muher i di criá homber i camel i buricu a bira di dje.”

Sin embargo, algun aña despues, despues cu Jacob a muda pa e tera di Canan, aparentemente e no tabata conciente cu su yu muher Dina a desaroyá e custumber peligroso di asociá cu e cananeonan pagano.a (Génesis 34:1) Tambe el a keda sin actua ora el a haña sa dje presencia di artículonan religioso pagano cerca su hendenan di cas. Di tur manera, despues dje violacion trágico di Dina dor di un cananeo, Jacob a tuma accion decisivo. “Kita e diosnan stranhero cu tin meimei di boso i limpia boso mes,” el a manda.—Génesis 35:2-4.

Tatanan cristian mester ta vigilante relacioná cu e spiritualidad di nan famia. Si tin menasanan serio pa e bienestar spiritual dje famia, tal como e presencia di literatura inmoral of música insaludabel na cas, nan mester tuma accion decisivo.

Interesantemente, muhernan di fe manera Sara, Rebeca i Raquel tambe a ehercé un influencia significante den e famia. Aunke nan tabata sumiso na nan esposonan, nan no a ser privá di tuma e iniciativa ora esei tabata apropiado i necesario. Por ehempel, Exodo 4:24-26 ta conta nos cu ora Moises i su famia tabata bayendo Egipto, “Jehova [“e angel di Jehova,” Version Setenta] a topa nan i a sigui busca un manera pa mat’é [e yu homber di Moises].” Claramente, e yu homber di Moises tabata den peliger di ser ehecutá debí cu Moises a keda sin circuncid’é. Zipora a tuma accion rápido i a circuncidá su yu homber. Consecuentemente, e angel a lagu’é bai. Esposanan cristian awe tambe por tuma e iniciativa ora e situacion ta haci esaki apropiado.

Instruccion Paternal bou dje Ley di Moises

Na 1513 P.E.C., e era di patriarca a terminá ora Israel a bira un nacion. (Exodo 24:3-8) Tatanan a sigui sirbi como cabesnan di famia. Sin embargo, ley di famia a bira subordiná na e Ley nacional cu Dios a duna Moises i cu a ser administrá dor di huesnan nombrá. (Exodo 18:13-26) E sacerdocio levítico a tuma over e aspectonan sacrificial di adoracion. Tog, e tata a sigui hunga un papel importante. Moises a spierta: “E palabranan aki cu mi ta mandando bo awe mester resultá di ta riba bo curason; i bo mester inculcá nan den bo yu i papia di nan ora bo ta sinta den bo cas i ora bo ta cana riba caminda i ora bo ta bai drumi i ora bo ta lanta.”—Deuteronomio 6:6, 7.

E Ley a percurá ocasionnan, manera e Pascu hudiu, durante cua instruccion lo por a ser duná tantu formalmente como informalmente. Segun cu e fecha di Pascu hudiu, 14 di nisan, a acercá, famianan hudiu tabata cuminsá prepará pa nan biahe di custumber pa Jerusalem. (Deuteronomio 16:16; compará cu Lucas 2:41.) Cua mucha lo no a bira excitá cu tal preparacionnan? E biahe mes lo tabata un deleite. Pa e tempu ei e temporada di awaceru a terminá i e solo di primavera a cuminsá saca e frialdad di winter for di aire. Segun cu e sneu di Ceru di Hermon a dirti, e Riu Jordan lo a desbordá.

Riba caminda, tatanan por a siña nan yunan no solamente e geografia di nan pais sino tambe e abundancia di historia conectá cu sitionan cu kisas nan ta pasa banda di dje. Esakinan kisas a incluí Cerunan di Ebal i di Gerizim, caminda e maldicion i bendicionnan dje Ley a ser lesá. Kisas tambe nan ta pasa Betel, caminda Jacob tabatin su vision dje trapi celestial. Ki consideracionnan emocionante lo a resultá di esei! Segun cu e biahe a progresá i biaheronan for di otro partinan dje pais lo a djoin e gruponan di famia, tur lo a disfrutá di asociacion edificante.

Finalmente e famia lo a drenta Jerusalem, “e perfeccion di beyesa.” (Salmo 50:2) Escolástico Alfred Edersheim ta bisa: “Hopi di e peregrinonan aki lo mester a acampá pafó dje murayanan dje stad. Esnan cu a keda den e stad a ser acomodá grátis.” Sí, hóbennan hebreo a ricibí un les personal den amor fraternal i hospitalidad. Congresonan anual di Testigonan di Jehova ta sirbi un propósito similar awe.

Diescuater di nisan finalmente lo a yega. E bestia di Pascu lo a ser matá i di rooster pa vários ora. Cerca di meianochi e famia lo a come e lamchi, pan sin zuurdeeg i yerbanan marga. Segun custumber un yu lo a puntra: “Kico e acto aki ta nificá pa boso?” Tatanan e ora ei lo a duna instruccion formal, bisando: “Esei ta e sacrificio dje pascu na Jehova, kende a pasa forbij e casnan dje yunan di Israel den Egipto tempu el a trece plaga riba e egipcionan, pero a libra nos casnan.”—Exodo 12:26, 27; 13:8.

Rey Sálomon di Israel a bisa: ‘Tin un tempu pa hari i un tempu pa bula rond.’ (Eclesiástes 3:4) A permití muchanan israelita tempu pa recreo. Jesucristo aparentemente a wak muchanan hunga riba e plasanan di mercado. (Zacarías 8:5; Mateo 11:16) I no tabata straño pa mayornan cu recurso material areglá reunionnan agradabel di famia caminda tabatin cantamentu, bailamentu i comementu. (Lucas 15:25) Mayornan cristian awe di igual manera ta tuma e iniciativa pa percurá recreo i asociacion saludabel pa nan yunan.

Mama i Yunan den e Sociedad Hudiu

Ki papel mamanan a hunga bou dje Ley di Moises? Proverbionan 1:8 ta manda: “Scucha, mi yu, na e disiplina di bo tata i no bandoná e ley di bo mama.” Dentro dje structura di autoridad di su esposo, e esposa hudiu tabata aplicá den e bida di famia rekisitonan cu Dios a duna. E mama mester a ser onrá dor di su yunan, asta despues cu el a bira bieu.—Proverbionan 23:22.

E mama tambe tabatin un parti grandi den e entrenamentu di su yunan. El a percurá pa un baby casi su so te ora cu e baby tabata suficiente grandi pa ser kitá for di pechu, sin duda resultando den un laso íntimo di mama cu yu. (Isaías 49:15) Miéntras cu tatanan tabata siña nan yu hombernan un ofishi, mamanan tabata siña nan yu muhernan e abilidadnan doméstico. Mamanan tabatin tambe un influencia profundo riba nan yu hombernan. Por ehempel, e rey Lemuel a beneficiá di “e mensahe di peso cu su mama a dun’é como coreccion.”—Proverbionan 31:1.

Un esposa hudiu capas tambe a disfrutá di basta libertad pa “vigilá con e asuntunan di su cas ta marcha.” Segun Proverbionan 31:10-31, e por a cumpra artículonan di cas, haci inversionnan di compra i benta di propiedad i asta manehá un negoshi chikitu. Pa e esposo apreciativo, su balor tabata “hopi mas cu di coralnan”!

Un Modelo pa Awe

Den tempu bíblico e areglo di famia tabata probechoso pa e crecementu emocional i spiritual di tur su miembronan. Tatanan mester a ehercé nan autoridad amorosamente pa beneficiá nan famia. Nan mester a hiba delantera den adoracion. Tantu tata como mama a mustra interes den nan yunan—siñando i entrenando nan, adorando huntu cu nan i percurando recreo pa nan. Mamanan piadoso a resultá di ta yudantenan balioso, respetando e hefatura di nan esposo i na mésun tempu tumando iniciativa na fabor di nan famia. Yunan obediente a trece goso na nan mayornan i na Jehova Dios. En berdad, e famia temeroso di Dios den tempu bíblico tabata un modelo excelente pa nos dia.

[Notanan]

[Plachi na página 23]

Bo famia por ta mes felis cu e famianan cu a adorá Jehova den tempu bíblico