HESUS SU MORTO I RESUREKSHON Kiko Nan Por Nifiká pa Bo?

“SEÑOR Dios a kohe e hòmber i a pon’é den e Hòfi di Edén pa kultiv’é i kuid’é. I SEÑOR Dios a ordená e hòmber, bisando: ‘Di tur palu di e hòfi bo mag kome libremente, ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.’”—Génesis 2:15-17.

Dios a pone e promé hòmber, Adam, den e Hòfi di Edén, un paradeis riba tera ku tabata yen di bestia i mata bunita. Adam por a kome libremente di e palunan di fruta. Pero Yehova Dios a bis’é klaramente ku ta di ún palu so e no tabatin mag di kome, i el a spièrt’é ku si e kome di dje lo e muri.

Kiko Adam a komprondé ku e spièrtamentu ei? Wèl, e tabata sa kiko morto ta pasobra el a mira bestia muri. Si Dios a krea Adam pa e muri despues di tempu, e spièrtamentu ku Dios a dun’é lo no tabatin sentido. Adam a komprondé ku si e obedesé Dios i no kome for di e palu ei, lo e biba pa semper, pues lo e no a muri nunka.

Tin hende ta pensa ku e fruta di e palu tabata un símbolo di relashon seksual. Pero esei no ta lógiko pasobra Yehova tabata ke pa Adam ku su kasá, Eva, tabata ‘fruktífero i multipliká, i yena e tera i hasi esaki someté na nan.’ (Génesis 1:28) Pues, ta for di un palu literal nan no tabatin mag di kome. Yehova a yam’é “e palu di konosementu di bon i malu” pasobra el a representá e derecho ku Dios tabatin di disidí kiko ta bon i kiko ta malu pa hende. Si Adam lo a keda sin kome di e palu, lo el a demostrá obedensia na Dios i apresio pa tur loke su Kreador a dun’é i hasi p’e.

“[Dios] a bisa Adam: ‘Pasobra bo a . . . kome for di e palu di kual mi a ordená bo, bisando: ‘Lo bo no kome di dje,’ . . . ku sodó di bo frenta lo bo kome pan, te ora bo bolbe na tera, pasobra for di dje bo a wòrdu tumá; pasobra stòf bo ta, i na stòf lo bo bolbe.’”—Génesis 3:17, 19.

Adam a kome di e palu ku Dios a prohibié di kome di dje. E akto di desobedensia akí tabata algu masha serio. De echo, ku e akto di rebeldia akí, Adam a mustra un gran falta di rèspèt i a menospresiá tur loke Yehova a hasi p’e. Ora Adam a kome e fruta prohibí, el a rechasá Yehova i a skohe pa ta independiente di Dios. Esaki a trese konsekuensianan desastroso.

Ku tempu, Adam a muri nèt manera Yehova a bisa. Dios a forma Adam “di e stòf di tera” i a bis’é ku e lo “bolbe na tera.” Adam no a sigui biba den un otro forma òf region. Ora el a muri, el a bira meskos ku e stòf ku Dios a usa pa form’é.—Génesis 2:7; Eklesiástes 9:5, 10.

“Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.”—Romanonan 5:12.

E desobedensia òf piká di Adam a trese konsekuensianan te den nos tempu. Ora Adam a peka, el a pèrdè, no djis un bida kòrtiku di 70 òf 80 aña, sino e posibilidat di biba pa semper. Ademas, el a pèrdè un bida perfekto, i tur su desendientenan a heredá imperfekshon.

Nos tur ta desendiente di Adam. I ta pa su motibu nos a heredá un kurpa imperfekto sin ku nos tabata ke. P’esei nos ta hasi piká i ku tempu nos ta muri. Apòstel Pablo a deskribí e situashon lamentabel akí ora el a bisa: “Ami ta karnal, bendí komo esklabo di piká. Pober di mi! Ken lo libra mi di e kurpa ku ta hiba mi na e morto akí?” Pablo mes a kontestá su pregunta: “Mi ta gradisí Dios ku lo e hasi esaki pa medio di Hesukristu, nos Señor!”—Romanonan 7:14, 24, 25.

“E Tata a manda su Yu komo Salbador di mundu.”—1 Huan 4:14.

Yehova a perkurá un medio pa kaba ku e efektonan di piká i libra nos di e kastigu di morto eterno. Kiko el a hasi? Yehova a manda su Yu stimá for di shelu p’e nase riba tera komo un hòmber perfekto, meskos ku Adam. Kontrali na Adam, Hesus “no a kometé piká.” (1 Pedro 2:22) P’esei e no a heredá e kastigu di morto, i lo e por a asta keda biba riba tera pa semper.

Pero en bes di esei, Yehova a permití Hesus su enemigunan mat’é. Despues di tres dia, Yehova a resusitá Hesus komo un kriatura spiritual pa e por a bai shelu bèk. Den shelu, Hesus a presentá e balor di su bida humano perfekto na Dios. Asina Hesus por a haña bèk loke Adam a pèrdè pa su mes i su desendientenan. Yehova a aseptá e sakrifisio ei, i esei a hasi posibel pa tur hende ku pone fe den Hesus por biba pa semper.—Romanonan 3:23, 24; 1 Huan 2:2.

Di e manera ei, Hesus a kumpra loke Adam a pèrdè. Hesus a muri pa nos por haña bida eterno. Beibel ta bisa: “Hesus . . . a sufri te na morto i pa medio di e bondat inmeresí di Dios el a eksperensiá morto pa tur hende.”—Hebreonan 2:9.

Loke Yehova a perkurá ta bisa hopi di dje. Pa motibu ku su norma di hustisia ta asina haltu, ta imposibel pa hende imperfekto libra nan mes. Sinembargo, su amor i miserikòrdia a motiv’é pa kumpli ku e norma di hustisia ku e mes a stipulá, maske esaki lo a nifiká ku e mester a duna su mes Yu komo preis di reskate.—Romanonan 5:6-8.

“Kristu a ser lantá for di morto, e promé fruta di esnan ku a bai sosegá. Pasobra ya ku morto a bini pa medio di un hende, resurekshon di e mortonan tambe ta bini pa medio di un hende. Meskos ku den Adam tur ta muri, asina tambe den Kristu tur lo haña bida.”—1 Korintionan 15:20-22.

Sin duda, Hesus a biba i muri riba tera. Pero ki evidensia tin ku el a resusitá? Un prueba palpabel ta ku, despues ku el a resusitá, hopi hende a mir’é na vários okashon i [na diferente] momento. Un biaha el a aparesé na mas ku 500 hende. Apòstel Pablo a skirbi tokante esei den su promé karta na e kristiannan di Korinto. El a bisa ku algun di e hendenan ei tabata na bida ainda, indikando asina ku nan por a duna testimonio di loke nan a mira i tende.—1 Korintionan 15:3-8.

Ora Pablo a skirbi ku Kristu tabata “e promé fruta” di esnan ku a resusitá, e tabata ke men ku otro hende tambe lo lanta for di morto. Hesus mes a bisa ku lo yega e tempu ku “tur esnan ku ta den graf . . . lo sali afó.”—Huan 5:28, 29.

“Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”—Huan 3:16.

E promé kapítulonan di Beibel ta konta nos na ki tempu hende a kuminsá muri i kon Paradeis a bai pèrdí. E último kapítulonan di Beibel ta konta di e tempu ku morto lo disparsé i kon Dios lo restorá Paradeis riba tera. Ora e dia ei yega, hende lo por disfrutá pa semper di un bida felis i produktivo. Revelashon 21:4 ta bisa ku “lo no tin morto mas.” Pa garantisá nos ku nos por konfia den e promesa ei, versíkulo 5 ta deklará: “E palabranan akí ta digno di konfiansa i bèrdat.” Yehova ta kapas pa kumpli ku tur loke e primintí.

Abo ta kere ku “e palabranan akí ta digno di konfiansa i bèrdat”? Si bo kontesta ta sí, siña mas tokante Hesukristu i pone fe den dje. Si bo hasi esei, lo bo haña Dios su aprobashon. For di awor Dios lo bendishoná bo rikamente, i lo bo tin e speransa di biba pa semper den un paradeis riba tera kaminda lo no tin morto mas, “ni tristesa ni sklamashon ni doló lo no tin mas.”