Nan A Haci e Boluntad di Jehova

Fe di Mayornan A Ser Recompensá

PA E israelitanan, e nacementu di un yu homber tabata motibu di gran alegria. Esei a nificá cu e liña di desendencia lo a sigui i cu e herencia di tera lo a keda den e famia. Pero rond di aña 1593 P.E.C., hañamentu di un yu homber por a parce mas un maldicion cu un bendicion p’e hebreonan. Pakico? Pasobra e fárao di Egipto, temiendo e crecementu rápido dje poblacion hudiu den e teritorio bou di su dominio, a manda pa mata tur nan yu hombernan recien nací.—Exodo 1:12, 15-22.

Tabata durante e atake horibel aki pa cometé genocidio cu Amram i Jokebed, un matrimonio hebreo, a bira mayor di un bunita yu homber. Ta fácil pa imaginá con nan goso lo a ser dominá pa temor ora nan a corda e decreto di fárao. Sin embargo, segun cu Amram i Jokebed tabata wak nan baby, nan a determiná firmemente pa no bandon’é, irespecto e consecuencianan.—Exodo 2:1, 2; 6:20.

Actuando den Fe

Pa tres luna largu Amram i Jokebed a tene nan baby scondí. (Exodo 2:2) Sin embargo, esaki tabata un rísico ya cu e hebreonan i e egipcionan tabata biba pegá banda di otro. Cualkier persona hañá ta trata na burla dje decreto di fárao probablemente lo a ser castigá cu morto—i e baby tambe lo a muri. Kico, anto, e mayornan deboto aki por a haci pa tene nan yu homber i nan mes na bida?

Jokebed a recogé algun stengel di papiro. Papiro ta un stengel hol fuerte, parecido na bambu, i e tin un troncon di tres banda mas o ménos mes diki cu un dede. E por alcansá un haltura di te cu 6 meter. E egipcionan tabata usa e mata aki pa traha papel, mat, paña di bela, sandalia i botonan leve.

Jokebed a usa e stengelnan pa traha un macutu suficiente grandi pa contené su baby. Siguientemente el a hunta breu i asfalt pa lijm e macutu i pa hacié ‘waterproef.’ Despues Jokebed a pone su baby den e macutu i a pon’é meimei dje matanan di richi na oriya di Riu Nilo.—Exodo 2:3.

E Baby Ta Ser Descubrí

E yu muher di Jokebed, Miriam, a posicioná su mes ei cerca pa mira kico lo a pasa siguientemente. Anto e yu muher di fárao a bini na Nilo pa baña.a Tal bes Jokebed tabata sa cu e prinses tabatin custumber di bini n’e parti aki di Nilo i a laga e macutu intencionalmente caminda e por a ser descubrí fácilmente. Con cu bai bin, no a tarda muchu cu e yu muher di fárao a ripará e macutu poné entre e matanan di richi, anto el a yama un di su criánan pa trec’é. Ora el a mira e mucha den dje ta yora, el a haña duele di dje. El a ripará cu esaki tabata un baby hebreo. Sin embargo, con e por a laga mata un mucha asina bunita? Ademas di bondad humano, e yu muher di fárao kisas tabata bou di influencia dje creencia popular egipcio cu pa hende por drenta shelu nan mester tabatin un registro di actonan di bondad durante nan bida.b—Exodo 2:5, 6.

Miriam, kende tabata vigilando for di un distancia, a acercá e yu muher di fárao. “Bo kier mi bai i yama specialmente pa bo un menchi for dje muhernan hebreo pa e por duna e mucha pechu pa bo?” el a puntra. E prinses a contestá: “Bai!” Miriam a core bai cerca su mama. Pronto despues, Jokebed tabata pará dilanti e yu muher di fárao. “Tuma e mucha aki huntu cu bo i dun’é pechu pa mi,” e prinses a bis’é, “i ami mes lo duná bo bo salario.” Por ta masha bon cu n’e momentonan ei e yu muher di fárao a realisá cu Jokebed tabata e mama dje baby.—Exodo 2:7-9.

Jokebed a tene su yu te ora el a stop di bebe lechi na pechu.c Esaki a duna Jokebed hopi oportunidad precioso pa siñ’é tocante e Dios berdadero, Jehova. Despues Jokebed a hiba e mucha bek p’e yu muher di fárao, kende a yama e mucha Moises, cu ta nificá “salbá for di awa.”—Exodo 2:10.

Les pa Nos

Amram i Jokebed a probechá plenamente dje oportunidad corticu cu nan tabatin pa siña nan yu e principionan di adoracion puru. Awe mayornan mester haci mescos. En berdad, ta imperativo pa nan haci esei. Satanas e Diabel “ta cana rond manera un leon cu ta gruña, buscando un hende pa devorá.” (1 Pedro 5:8) Lo e tin masha gana di haña como su víctimanan hóbennan precioso—mucha homber i mucha muher—cu tin e prospecto di bira excelente sirbidornan di Jehova. Satanas no tin simpatia pa hóbennan! En bista di esaki, mayornan sabí ta entrená nan yunan chikitu pa teme e Dios berdadero, Jehova.—Proverbionan 22:6; 2 Timoteo 3:14, 15.

Na Hebreonan 11:23, e esfuerso di Amram i Jokebed pa sconde nan yu chikitu durante e promé tres lunanan di su bida ta ser registrá como un obra di fe. E dos mayornan temeroso di Dios aki a demostrá confiansa den Jehova su poder salbador dor di nenga di bandoná nan yu, i pa esaki nan a ser bendicioná. Nos tambe mester mustra apego na Jehova su ley i principionan, cu e confiansa cu kico cu Jehova permití bini riba nos, eventualmente lo obra pa nos bienestar i felicidad eterno.—Romanonan 8:28.

[Nota]