Mustra cu Bo Ta Interesá

Dje coresponsal di Spierta! na Cánada

Hopi hende di edad na Cánada ta sinti un agonia cu ta pone nan cometé suicidio na un cantidad alarmante. Un informe den e korant Vancouver Sun ta comentá cu miéntras 1 di cada 200 intento di suicidio entre hóbennan ta resultá den morto, e proporcion ta 1 di cada 4 pa hende riba 65 aña. I nan ta kere cu asta “ta raportá ménos suicidio di loke realmente ta tuma lugá entre hende grandi, pasobra por ta difícil pa distinguí suicidio for di causanan natural cerca hende di edad cu problemanan serio di salú.”

Pakico hopi hende grandi ta perde gana di biba? Oluwafemi Agbayewa, sikiatra n’e Universidad di British Columbia, un experto riba e cuestion di suicidio entre hende di edad, ta señalá depresion, isolacion social i soledad como factornan cu ta contribuí na esei. Gerry Harrington, director dje Centro di Informacion i Educacion di Suicidio na Calgary, Alberta, ta comentá cu segun hende su edad ta subi, nan ta “perde nan respet, nan autoridad, nan control. . . . Di ripiente, ningun hende no ta puntra pa nan opinion mas. Demasiado hende grandi ta bai para den cas di cuido cu nada otro di haci sino sinta, hunga carta i wak television.” Loke ta haci e sintimentu aki pió ta e echo cu sociedad ta pone un balor haltu riba vigor hubenil i tambe riba independencia, productividad i rapides—net e característicanan cu ta mengua segun cu edad ta subi.

Sin embargo, den bista di Jehova Dios, hende di edad tin hopi balor. Nos por mira evidencia di cu e ta comprendé nan necesidadnan emocional hopi bon, den su mandamentu n’e pueblo di antiguo Israel: “Bo mester lanta para pa cabei blancu, i bo tin cu mustra consideracion p’e persona di un homber bieu, i bo mester ta den temor di bo Dios.”—Levítico 19:32.

Pues anto, con nos por “mustra consideracion” pa hende di edad? Aunke kisas palabranan di sabiduria no ta sali constantemente for di nan boca i behes ta haci cu nan imperfeccionnan ta bira mas bisto, nan ta merecé nos respet. Mustra cu bo ta interesá den nan. Duna nan e dignidad, onor i reconocimentu dor di haci uso di nan perspicacia i sabiduria, foral si nan a laga e spiritu di Dios dirigí nan bida huntu cu un comprendimentu exacto di su Palabra.

E Palabra di Dios ta siña hopi cos mas riba e tópico di mustra interes i onor na hende di edad. Pa mas informacion, por fabor, skirbi e publicadónan dje revista aki i pidi nan e buki E Secreto pa Felicidad den Famia.