Stadnan di Refugio—dios Su Percuracion Misericordioso
“E seis stadnan aki lo sirbi como refugio, pa cualkier persona cu inintencionalmente heridá un alma mortalmente, por hui bai ei.”—NUMERONAN 35:15.
1. Kico ta Dios su punto di bista di bida i culpa di sanger?
JEHOVA DIOS ta considerá bida humano sagrado. I bida ta den e sanger. (Levítico 17:11, 14) P’esei, Cain, e promé hende cu a nace riba tera, a bira culpabel di sanger ora el a asesiná su ruman Abel. Consecuentemente, Dios a bisa Cain: “E sanger di bo ruman ta sclamando na mi for dje suela.” E sanger cu a mancha e suela n’e esena dje asesinato a duna testimonio silencioso, pero elocuente, dje bida cu a ser kitá brutalmente. E sanger di Abel a sclama na Dios pa vengansa.—Génesis 4:4-11.
2. Con Jehova su respet pa bida a ser enfatisá despues dje Diluvio?
2 Dios su respet pa bida humano a ser enfatisá despues cu hustu Noe i su famia a sali for dje arca como sobrebibiente dje Diluvio mundial. N’e tempu ei Jehova a expandé e dieta di humanidad pa incluí carni di bestia pero no sanger. Tambe el a decretá: “Boso sanger di boso alma lo mi reclamá. For di man di tur criatura bibiente lo mi reclam’é; i for di man di hende, for di man di cada un cu ta su ruman, lo mi reclamá e alma di hende. Cualkier persona cu ta drama sanger di hende, su propio sanger lo ser dramá dor di hende, pasobra den imágen di Dios el a traha hende.” (Génesis 9:5, 6) Jehova a reconocé e derecho dje víctima su pariente di mas cercano pa mata e asesino ora e top’é.—Númeronan 35:19.
3. Ki énfasis e Ley di Moises a pone riba santidad di bida?
3 Den e Ley duná na Israel mediante profeta Moises, e santidad di bida a ser enfatisá bes tras bes. Por ehempel, Dios a manda: “Bo no mag mata.” (Exodo 20:13) Respet pa bida tabata evidente tambe den loke e Ley di Moises a bisa tocante un morto cu a enbolbé un muher embarasá. E Ley a specificá cu si e muher of su yu cu no a nace ainda a sufri un accidente fatal como resultado di un pelea entre dos homber, huesnan mester a evaluá e circunstancianan i e grado di premeditacion, pero e castigu por tabata “alma pa alma,” of bida pa bida. (Exodo 21:22-25) Sin embargo, un asesino israelita por a scapa di un of otro manera dje consecuencianan di su acto violento?
Asilo pa Asesinonan?
4. Pafó di Israel, cua lugánan di asilo a existí den pasado?
4 Den nacionnan diferente for di Israel, asilo a ser otorgá na asesinonan i otro criminalnan. Esaki tabata e caso na sitionan manera e tempel dje diosa Artémis na Efeso di antigwedad. Tin e siguiente informe relacioná cu lugánan similar: “Algun lugá sagrado a promové un aumento den e cantidad di criminalnan; i hopi biaha a bira necesario pa limitá e cantidad di asilonan. Na Aténas solamente cierto asilonan a ser reconocé pa ley como refugio (por ehempel, e tempel di Teseo pa catibunan); den e tempu di Tiberio e congregacionnan di bandidunan den lugánan sagrado a bira asina peligroso cu e derecho di Asilo a ser limitá na un par di stad (den e aña 22).” (The Jewish Encyclopedia, 1909, Volúmen II, página 256) Despues, iglesianan di cristiandad a bira lugánan di asilo, pero esaki tabatin tendencia di transferí poder for di autoridadnan civil n’e sacerdocio i a traha contra e administracion adecuá di husticia. Cu tempu a abolí e areglo aki pa motibu di casonan di abusu dje asilonan aki
5. Ki evidencia tin cu e Ley no a permití pa usa negligencia como base pa haña misericordia ora un hende a ser matá pa motibu di esei?
5 Entre e israelitanan, asesinonan cu a mata intencionalmente no a ricibí asilo. Asta un sacerdote levita cu a sirbi n’e altar di Dios mester a ser ehecutá si el a trama un asesinato. (Exodo 21:12-14) Ademas, e Ley no a permití pa usa negligencia como un base pa haña misericordia ora un hende a ser matá pa motibu di esei. Por ehempel, un hende mester a traha un heki p’e dak plat di su cas nobo. Sino, culpa di sanger lo a bini riba e cas si un hende a cai muri for dje dak. (Deuteronomio 22:8) Ademas, si e doño di un toro cu tin custumber di tira cachu a ser spiertá pero no a vigilá e animal i el a mata un hende, e doño dje toro tabata culpabel di sanger i e por a haña castigu di morto. (Exodo 21:28-32) Mas prueba di cu Dios ta considerá bida precioso ta bisto den e echo cu cualkier persona cu a heridá un ladron mortalmente tabata culpabel di sanger si esaki a sosodé di dia ora e intruso por a ser mirá i identificá. (Exodo 22:2, 3) Claramente, anto, Dios su regulacionnan perfectamente balansá no a permití asesinonan boluntario scapa pena capital.
6. Con e ley di ‘bida pa bida’ a ser satisfacé den Israel antiguo?
6 Si un asesinato a ser cometé den Israel di antigwedad, e sanger dje víctima mester a ser vengá. E ley di ‘bida pa bida’ a ser satisfacé ora e asesino a ser matá dor di “e vengador di sanger.” (Númeronan 35:19) E vengador tabata e persona asesiná su pariente masculino di mas cercano. Pero kico di matadornan inintencional?
Jehova Su Percuracion Misericordioso
7. Ki percuracion Dios a haci pa esnan cu a mata un hende inintencionalmente?
7 Pa esnan cu a mata un hende accidentalmente of inintencionalmente, Dios amorosamente a percurá stadnan di refugio. Relacioná cu esakinan, Moises a ser bisá: “Papia cu e yunan di Israel, i bo tin cu bisa nan, ‘Boso ta bai crusa e Jordan pa bai n’e tera di Canan. I boso tin cu scoge stadnan cu ta cumbiniente pa boso. Como stadnan di refugio nan lo sirbi pa boso, i e matador cu inintencionalmente heridá un alma mortalmente mester hui bai ei. I e stadnan mester sirbi boso como refugio for dje vengador di sanger, pa e matador no muri te ora cu e ta pará dilanti e asamblea pa huicio. I e stadnan cu boso lo duna, e seis stadnan di refugio, lo ta na boso disposicion. Tres stad boso lo duna na e banda aki dje Jordan, i tres stad boso lo duna den e tera di Canan. Como stadnan di refugio nan lo sirbi . . . pa cualkier persona cu inintencionalmente heridá un alma mortalmente, por hui bai ei.’ ”—Númeronan 35:9-15.
8. Unda e stadnan di refugio tabata situá, i con matadornan inintencional a ser yudá pa alcansá nan?
8 Ora e israelitanan a drenta e Tera Primintí, obedientemente nan a establecé seis stad di refugio. Tres dje stadnan aki—Kédes, Síkem i Hébron—tabata situá n’e parti west di Riu Jordan. Parti oost dje Jordan tabatin e stadnan di refugio di Gólan, Rámot i Bézer. E seis stadnan di refugio tabata cumbinientemente situá riba careteranan cu a ser mantené den bon condicion. Na lugánan apropiado banda dje careteranan aki, tabatin indicacionnan cu e palabra “refugio.” E indicacionnan aki a mustra den direccion dje stad di refugio, i e matador cu no a mata intencionalmente a core pa su bida na esun di mas cerca. Ei e por a haña proteccion for dje vengador di sanger.—Hosué 20:2-9.
9. Pakico Jehova a percurá e stadnan di refugio, i pa ken su beneficio nan a ser percurá?
9 Pakico Dios a percurá stadnan di refugio? Nan a ser percurá p’e tera no ser contaminá cu sanger inocente i pa culpa di sanger no bini riba e pueblo. (Deuteronomio 19:10) Pa ken su beneficio e stadnan di refugio a ser percurá? E Ley a declará: “Pa e yunan di Israel i pa e residente stranhero i pa e poblador meimei di nan e seis stadnan aki lo sirbi como refugio, pa cualkier persona cu inintencionalmente heridá un alma mortalmente, por hui bai ei.” (Númeronan 35:15) Pues, pa ta imparcial i pa sirbi finnan di husticia alabes lagando lugá pa misericordia, Jehova a bisa e israelitanan pa apartá stadnan di refugio pa matadornan inintencional cu tabata (1) israelitanan nativo, (2) residentenan stranhero den Israel, of (3) pobladornan di otro paisnan cu tabata biba den e tera.
10. Pakico nos por bisa cu e stadnan di refugio tabata un percuracion misericordioso cu Dios a haci?
10 Ta notabel cu asta si un individuo tabata un matador inintencional, e mester a ser matá bou di Dios su decreto: “Cualkier persona cu ta drama sanger di hende, su propio sanger lo ser dramá dor di hende.” P’esei, tabata solamente mediante un percuracion misericordioso di Jehova Dios cu un matador inintencional por a hui na un dje stadnan di refugio. Aparentemente, hende en general a sinti simpatia pa cualkier persona cu tabata huyendo for dje vengador di sanger, pasobra nan tur tabata conciente cu nan por a cometé inintencionalmente un delitu similar i tabatin mester di refugio i misericordia.
Huida pa Refugio
11. Den Israel antiguo, kico un hende por a haci si el a mata un co-trahador accidentalmente?
11 Un ilustracion por wel aumentá bo aprecio pa Dios su areglo misericordioso pa refugio. Imaginá cu bo tabata un homber cu ta kap palu den Israel antiguo. Suponé cu e cabes dje hacha a bula sali di ripiente for dje cabu i heridá un co-trahador mortalmente. Kico lo bo a haci? Wel, e Ley a cubri net e situacion aki. Indudablemente, lo bo probechá dje percuracion aki cu Dios a haci: “Esaki ta e caso dje matador cu lo por hui [na un stad di refugio] i tin cu biba: Ora e heridá su próhimo sin sa di esei i no tabata odi’é anteriormente; of ora e bai mondi cu su próhimo pa recogé palu, i el a hisa su man pa dal cu e hacha pa kap e palu, i e heru a slip for dje cabu di palu, i el a dal su próhimo i el a muri, e mes tin cu hui na un dje stadnan aki i e tin cu biba.” (Deuteronomio 19:4, 5) Sin embargo, asta si bo a bai na un stad di refugio, lo bo no ta liber di tur responsabilidad pa loke a sosodé.
12. Ki procedura lo a sigui despues cu un matador inintencional a alcansá un stad di refugio?
12 Aunke bo a ser ricibí hospitalariamente, lo bo tin cu presentá bo caso n’e ancianonan n’e porta dje stad di refugio. Despues di drenta e stad, lo bo a ser mandá bek pa ser husgá dilanti e ancianonan cu ta representá e congregacion di Israel n’e portanan dje stad cu tin hurisdiccion riba e área unda e matamentu a tuma lugá. Einan lo bo tin un oportunidad pa proba bo inocencia.
Ora Matadornan A Ser Husgá
13, 14. Kico ta algun cos cu e ancianonan lo kier a haci sigur di dje durante e huicio di un matador?
13 Durante e huicio dilanti e ancianonan n’e porta dje stad di hurisdiccion, indudablemente cu gratitud lo bo a ripará cu hopi énfasis a ser poné riba bo conducta previo. E ancianonan lo a evaluá cuidadosamente bo relacion cu e víctima. Bo tabata odia e hende, bo a drumi ward’é, i a dal’e mata deliberadamente? Si ta asina, e ancianonan lo tabatin cu entregá bo n’e vengador di sanger, i lo bo a muri. E hombernan responsabel aki lo tabata conciente dje rekisito di Ley cu ‘culpa pa sanger inocente mester ser eliminá for di Israel.’ (Deuteronomio 19:11-13) Na comparacion, den un accion hudicial awe, ancianonan cristian mester conocé e Scritura bon, actuando na armonia cuné miéntras nan ta tuma e malechor su actitud i conducta anterior na cuenta.
14 Investigando bondadosamente, e ancianonan dje stad lo kier a haña sa si bo tabata loer e víctima. (Exodo 21:12, 13) Bo a atak’é for di un lugá di sconde? (Deuteronomio 27:24) Bo tabata cushi asina tantu di rabia contra e persona cu bo a recurí na un of otro plan astuto pa mat’é? Si ta asina, lo bo a merecé morto. (Exodo 21:14) Specialmente e ancianonan mester a sa si tabatin enemistad, of odio, entre abo i e víctima. (Deuteronomio 19:4, 6, 7; Hosué 20:5) Laga nos bisa cu e ancianonan a hañá bo inocente i a debolbé bo n’e stad di refugio. Ki gradicidu lo bo tabata pa e misericordia cu nan a mustra na bo!
Bida den e Stad di Refugio
15. Ki rekisitonan a ser imponé riba un matador inintencional?
15 Un matador inintencional mester a permanecé den e stad di refugio of dentro di un distancia di 1.000 codo (rond di 450 meter) pafó di su murayanan. (Númeronan 35:2-4) Si el a desviá fuera dje punto ei, e por a topa e vengador di sanger. Bou dje circunstancianan ei, e vengador lo por a mata e matador sin haña castigu. Pero e matador no a ser mará na cadena of encarcelá. Como residente dje stad di refugio, e tabatin cu siña un fishi, ser un trahador i sirbi como un miembro útil di sociedad.
16. (a) Pa cuantu tempu e matador inintencional lo mester a permanecé den e stad di refugio? (b) Pakico e morto dje sumo sacerdote a haci posibel pa un matador bandoná e stad di refugio?
16 Pa cuantu tempu e matador inintencional tabatin cu permanecé den e stad di refugio? Posiblemente p’e resto di su bida. En todo caso, e Ley a declará: “E tin cu biba den su stad di refugio te na morto dje sumo sacerdote, i despues di morto dje sumo sacerdote e matador por regresá n’e tera di su posesion.” (Númeronan 35:26-28) Pakico e morto dje sumo sacerdote a permití e matador inintencional bandoná e stad di refugio? Wel, e sumo sacerdote tabata un dje personanan di mas prominente den e nacion. P’esei su morto lo tabata un suceso asina notabel cu lo el a bira conocí atrabes di tur e tribunan di Israel. E ora ei tur refugiado den e stadnan di refugio lo por a regresá nan cas liber di peliger na man dje vengadornan di sanger. Pakico? Pasobra e Ley di Dios a decretá cu e oportunidad dje vengador pa mata e matador a expirá cu e morto dje sumo sacerdote, i tur hende tabata sa esaki. Si e pariente mas yegá a venga e morto despues di esei, lo e tabata un asesino i finalmente lo a paga e castigu pa asesinato.
Efectonan Duradero
17. Kico tabata e probabel efectonan dje restriccionnan imponé riba e matador inintencional?
17 Kico tabata e probabel efectonan dje restriccionnan imponé riba e matador inintencional? Nan tabata un recordatorio cu el a causa morto di un hende. Probablemente, pa semper lo e mira bida humano como sagrado. Ademas, lo tabata difícil p’e lubidá cu el a ser tratá misericordiosamente. Siendo cu misericordia a ser mustrá na dje, e siguramente lo kier a mustra misericordia na otronan. E areglo di stadnan di refugio cu nan restriccionnan tambe a beneficiá e pueblo en general. Con asina? Esei siguramente mester a graba den nan mente cu nan no mester tabata descuidá of indiferente pa cu bida humano. Dje manera ei cristiannan mester ser recordá dje necesidad pa evitá descuido cu por resultá den un morto accidental. Anto, tambe, Dios su areglo misericordioso pa stadnan di refugio mester impulsá nos pa mustra misericordia ora ta apropiado pa haci asina.—Santiago 2:13.
18. Den ki maneranan Dios su areglo pa stadnan di refugio tabata probechoso?
18 Jehova Dios su percuracion di stadnan di refugio tabata probechoso tambe den otro maneranan. E pueblo no a forma gruponan di guardia pa persiguí un matador suponiendo cu e ta culpabel promé cu e ser husgá. Mas bien, nan a consider’é inocente di asesinato premeditá, asta yudand’e pa yega un stad asina sano i salbo. Ademas, e percuracion pa stadnan di refugio tabata net contrario cu e areglonan di tempu moderno di pone asesinonan den prizon i institutonan di reformacion, unda nan ta ser sostené financieramente dor dje público i hopi biaha ta bira criminalnan mas peligroso debí na nan asociacion estrecho cu otro malechornan. Den e areglo di stad di refugio, no tabata necesario pa edificá, mantené i vigilá prizonnan costoso tur na muraya i bara di heru for di cua prezunan asina tantu biaha ta busca manera di scapa. En efecto, e matador a busca e “prizon” i a keda eiden durante e tempu specificá. Tambe e mester tabata un trahador, haciendo asina algu pa beneficiá su próhimo.
19. Ki preguntanan ta presentá relacioná cu e stadnan di refugio?
19 Misericordioso, en berdad, tabata Jehova su areglo dje stadnan di refugio di Israel p’e proteccion di matadornan inintencional. E percuracion aki siguramente a promové respet pa bida. Sin embargo, e stadnan antiguo di refugio tin nificacion pa hende cu ta biba den siglo 20? Nos por ta culpabel di sanger dilanti Jehova Dios sin realisá cu nos mester di su misericordia? E stadnan di refugio di Israel tin cualkier importancia actual pa nos?
Con Lo Bo Contestá?
◻ Con Jehova ta mira bida humano?
◻ Ki percuracion misericordioso Dios a haci pa matadornan inintencional?
◻ Con un matador por a gana acceso na un stad di refugio, i pa cuantu tempu e mester a keda einan?
◻ Kico tabata e probabel efectonan dje restriccionnan imponé riba e matador inintencional?
[Mapa na página 12]
Israel su stadnan di refugio tabata situá cumbinientemente
(For fully formatted text, see publication)
KEDES Riu Jordan GOLAN
SIKEM RAMOT
HEBRON BEZER