Sikem—E Stad den e Vaye

PROFUNDO den curason dje tera cu Dios a scoge pa su pueblo, situá entre Ceru di Ebal i Ceru di Gerizim, tin e stad di Síkem. Tabata aki—casi cuater mil aña pasá—cu Jehova a primintí Abraham: “Na bo simia mi ta bai duna e tera aki.”—Génesis 12:6, 7.

Na armonia cu e promesa aki, Abraham su nietu Jacob a campa na Síkem i a construí un altar cu el a yama “Dios ta e Dios di Israel.” Probablemente Jacob a coba un pos den e área aki pa suministrá awa na su famia i tou di bestia, un pos cu siglonan despues lo a bira conocí como e “fuente di Jacob.”—Génesis 33:18-20, nota; Juan 4:5, 6, 12.

Sin embargo, no ta tur e miembronan dje famia di Jacob a mustra celo pa adoracion berdadero. Dina, su yu muher, a busca compañeronan entre e mucha muhernan cananeo di Síkem. Dina, cu e tempu ei ainda tabata yong, a bandoná e siguridad dje tentnan di su famia i a cuminsá bishitá e stad ei den cercania, formando amistadnan ei.

Con e hombernan hóben dje stad lo a mira e bírgen hóben aki cu regularmente tabata bishitá nan stad—aparentemente no-compañá? Yu di un cabesante di tribu “a mir’é i e ora ei a tum’é i a drumi cuné i a viol’é.” Pakico Dina a exponé su mes na peliger dor di asociá cu e cananeonan inmoral? Tabata pa motibu cu el a sinti cu e tabatin mester dje compania di mucha muhernan di su mes edad? E tabata mes cabesura i independiente cu algun di su ruman hombernan? Lesa e relato di Génesis, i purba comprendé e angustia i bergwensa cu Jacob i Lea mester a sinti debí n’e consecuencianan trágico dje bishitanan di nan yu muher na Síkem.—Génesis 34:1-31; 49:5-7; mira tambe La Atalaya di 15 di juni, 1985, página 31.

Casi 300 aña despues, e resultadonan di ignorá guia teocrático un biaha mas a bini padilanti. Na Síkem, Hosué a organisá un dje asambleanan di mas memorabel den historia israelita. Imaginá e esena den e vaye. Mas cu un miyon hende—homber, muher i mucha—perteneciendo na seis tribu di Israel ta pará enfrente di Ceru di Gerizim. Na otro banda dje vaye, rond dje mésun cantidad for dje otro seis tribunan ta pará enfrente di Ceru di Ebal.a I ei mas abou, banda dje arca dje pacto i entre e dos masanan di israelita, ta pará e sacerdotenan i Hosué. Ki un esena!—Hosué 8:30-33.

Elevando riba e multitud enorme aki, e dos cerunan ta ofrecé un contraste skerpi di bunitesa i desolacion. E partinan ariba dje barica di ceru di Gerizim ta mustra berde i fértil, miéntras cu esnan di Ebal ta pa gran parti shinishi i bashí. Bo por sinti e zonido di excitacion segun cu e israelitanan ta spera e momento pa Hosué papia? Tur zonido ta resoná den e teater natural aki.

Durante e cuater pa seis oranan cu Hosué ta tuma pa lesa ‘e buki dje ley di Moises,’ e pueblo tambe ta participá. (Hosué 8:34, 35) Aparentemente, e israelitanan enfrente di Gerizim ta bisa Amen! despues di cada un dje bendicionnan, miéntras e Amen! di esnan enfrente di Ebal ta enfatisá cada maldicion. Tal bes e aparencia desolá dje Ceru di Ebal ta sirbi pa recordá e pueblo dje resultado desastroso di desobedencia.

“Maldicioná ta esun cu ta trata su tata of su mama cu desprecio,” Hosué ta spierta. Cu un solo bos, mas cu un miyon stem ta respondé: “Amen!” Hosué ta warda e zonido manera donder dje contesta aki caba na nada promé cu e sigui: “Maldicioná ta esun cu ta hala atras e marca di frontera di su semehante.” Un biaha mas e seis tribunan, compañá pa hopi residente stranhero ta grita: “Amen!” (Deuteronomio 27:16, 17) Si bo tabata ei, lo bo por a lubidá e reunion ei tené entre e cerunan? E necesidad pa obedencia lo no a ser grabá permanentemente den bo mente?

Djis promé cu el a muri rond di 20 aña despues, un biaha mas Hosué a yama e nacion huntu na Síkem pa nan fortificá nan determinacion. El a pone dilanti nan e escoho cu tur hende tin cu haci. “Boso mes scoge awe ken boso lo sirbi,” el a bisa. “Pero en cuanto ami i mi cas, nos lo sirbi Jehova.” (Hosué 24:1, 15) Evidentemente, e asambleanan fortalecedor di fe aki na Síkem a haci un impresion profundo. Pa hopi aña despues di Hosué su morto, e israelitanan a imitá su ehempel fiel.—Hosué 24:31.

Rond di 15 siglo despues ora Jesus tabata sosegando bou dje sombra di Ceru di Gerizim, un combersacion conmovedor a tuma lugá. Cansá di un biahe largu, Jesus tabata sintá n’e fuente di Jacob ora un muher samaritano cu un poron di awa a yega cerca. E muher a keda masha sorprendí ora Jesus a pidié poco awa pa bebe, ya cu hudiu no tabata papia cu samaritano, pió ainda bebe for di nan poronnan. (Juan 4:5-9) Jesus su siguiente palabranan a sorprend’é asta mas ainda.

“Tur hende cu ta bebe for dje awa aki lo haña sed atrobe. Ken cu bebe for dje awa cu ami lo dun’é di ningun manera lo haña sed hamas, pero e awa cu ami lo dun’é lo bira den dje un fuente di awa brotando pa duna bida eterno.” (Juan 4:13, 14) Imaginá e interes dje muher den e promesa ei, pasobra sacamentu di awa for dje pos hundu aki tabata un tarea pisá. Jesus a splica mas aleu cu apesar di nan importancia histórico, ni Jerusalem ni Ceru di Gerizim tabata sitionan religioso esencial pa acercá Dios. Actitud di curason i conducta, no sitio, tabata loke a conta. “Berdadero adoradornan lo adorá e Tata cu spiritu i cu berdad,” el a bisa. “En realidad, e Tata ta busca hende asina pa ador’é.” (Juan 4:23) Ki un consuelo e palabranan ei mester tabata! Un biaha mas e vaye aki a bira e lugá unda hende a ser urgí pa sirbi Jehova.

Awe e stad di Nablus ta situá banda dje ruinanan di Síkem di antigwedad. Ceru di Gerizim i Ceru di Ebal ainda ta dominá e vaye, parando como testigonan silencioso dje sucesonan di pasado. Ainda bo por bishitá e pos di Jacob na pia dje cerunan aki. Segun cu nos ta meditá riba e sucesonan cu a tuma lugá ei, nan ta recordá nos dje importancia di sostené adoracion berdadero, mescos cu Hosué i Jesus a siña nos haci.—Compará cu Isaías 2:2, 3.

[Nota]

[Rekonosementu pa Potrèt na página 31]

Pictorial Archive (Near Eastern History) Est.