E Siñansa di Trinidat Ta Bíbliko?

▪ Tin hopi manera ku hende ta splika e siñansa di Trinidat. Un di nan ta: “Tin tres Dios—Dios Tata, Dios Yu i Spiritu Santu. Tur ta todopoderoso; niun no tin komienso ni fin, i niun no ta mas ku otro. Huntu nan ta forma ún solo Dios.” Pero, e siñansa akí tin base bíbliko?

Algun hende sa usa Mateo 28:19 pa proba ku e siñansa akí ta bíbliko. Beibel Santu, por ehèmpel, ta tradusí e versíkulo ei asin’akí: “P’esei, bai i hasi tur e nashonnan disipel di mi, i batisá nan den nòmber di e Tata i di e Yu i di e Spiritu Santu.” En bèrdat e teksto ta menshoná tantu e Tata, e Yu komo spiritu santu. Pero, e no ta bisa sí ku nan ta tres persona den ún. Kòrda tambe ku tempu ku Hesus a duna e mandato na Mateo 28:19, el a dun’é na su disipelnan, kendenan tabata hudiu. Awor ki konsepto e hudiunan tabatin di Dios?

Wèl, ora Dios a duna e nashon di Israel e Lei ku despues a bira parti di e Skritura, el a prohibí nan di tin “otro dios [su] dilanti.” (Deuteronomio 5:7) Awor, ta kuantu persona tabata papia ku e israelitanan na e okashon ei? Deuteronomio 6:4 ta bisa bon kla: “Tende, o Israel! SEÑOR ta nos Dios, SEÑOR ta ún!” Pues, ta ún persona a papia i no tres den ún. E tempu ei, Yehova a kaba di libra e israelitanan for di Egipto, kaminda hende tabata adorá yen di dios trinitario, manera por ehèmpel Osiris, Isis i Horus. (Wak e plachi na man robes.) P’esei, Yehova a ordená e israelitanan pa adorá ún Dios so. Dikon tabata importante pa nan obedesé e mandamentu akí? Segun Rabi Dr. J. H.  Hertz: “E mandato kla akí pa adorá un solo Dios ta bai direktamente kontra politeismo . . . Anto Shema no ta apoyá e doktrina di Trinidat ku e kredo di kristiandat ta promové, pasobra e doktrina akí ta kontra e siñansa ku tin un solo Dios.”a

Siendo ku Hesus mes tabata un hudiu di nasementu, e tambe a ser instruí pa sigui e mandamentu akí. Despues ku el a kaba di batisá, Satanas a purba persuadié pa adorá é en bes di Yehova. Pero Hesus a bis’é: “Bai for di aki, Satanas! Pasobra ta pará skirbí: ‘Ta Yehova bo Dios bo tin ku adorá, i ta na e so bo tin ku rindi sirbishi sagrado.’” (Mateo 4:10; Deuteronomio 6:13) Nos por saka por lo ménos dos lès for di e relato akí: Promé: lo no tabatin ningun sentido pa Satanas purba tenta Hesus pa e adorá é si Hesus mes tabata Dios. Di dos: Hesus a mustra bon kla ku ta ún Dios so nos mester adorá, pasobra el a bisa ku ta “e so” bo tin ku adorá. Si e tabata parti di un Trinidat, lo el a bisa “nos.”

Ora hende siña konosé Dios i ke sirbié, nan ta ser batisá “den nòmber di e Tata i di e Yu i di spiritu santu.” (Mateo 28:19) Nan ta aseptá e outoridat di Yehova i ta komprondé ki papel Hesus tin den kumplimentu di Yehova su propósito. (Salmo 83:18; Mateo 28:18) Ademas, nan ta komprondé kon spiritu santu, e forsa aktivo di Dios, ta funshoná.—Génesis 1:2; Galationan 5:22, 23; 2 Pedro 1:21.

Pa hopi siglo, e siñansa di Trinidat a konfundí hende. Di otro banda, Hesus sí a siña su siguidónan e bèrdat i a yuda nan kultivá un bon relashon ku Yehova, “e úniko Dios berdadero.”—Huan 17:3.

[Nota]

[Rekonosementu pa Potrèt na página 12]

Musée du Louvre, Paris