Capitulo Cincu

Nan Fe A Pasa e Prueba di Candela

 1. Kico hopi hende ta pensa tocante debocion na Dios i na nan patria?

BO MESTER ta deboto na Dios of na e pais caminda bo ta biba? Hopi hende lo contestá: ‘Mi ta duna homenahe na tur dos. Mi ta adorá Dios di acuerdo cu loke mi religion ta dicta; pero tambe mi ta hura lealtad na mi patria.’

 2. Con e rey di Babilonia a fungi como un figura religioso i tambe político?

² Awe e liña entre debocion religioso i patriotismo por parce vago, pero den antiguo Babilonia e distincion ei casi no tabata existí mes. Sí, asuntu civil i sagrado tabata asina mará den otro, cu tabatin biaha no por a distinguí nan for di otro. Profesor Charles F. Pfeiffer ta skirbi: “Den antiguo Babilonia e rey a sirbi como Sumo Sacerdote i tambe gobernante civil. El a efectuá sacrificio i a determiná con e bida religioso di su súbditonan mester ta.”

 3. Kico ta mustra cu Nabucodonosor tabata un homber masha religioso?

³ Tuma rey Nabucodonosor. Su nomber mes ta nificá “O Nebo, Protehá e Heredero!” Nebo tabata e dios babilónico di sabiduria i agricultura. Nabucodonosor tabata un homber masha religioso. Manera nos a comentá anteriormente, el a construí i a embeyecé e tempelnan di masha hopi dios babilónico i e tabata specialmente deboto na Marduk, na ken el a duna e mérito pa su victorianan militar.a Parce tambe cu Nabucodonosor a dependé pisá riba divinacion pa formulá su plannan di bataya.—Ezekiel 21:18-23.

 4. Describí e ambiente religioso di Babilonia.

⁴ En realidad, un ambiente religioso a prevalecé den henter Babilonia. E stad tabatin mas cu 50 tempel, caminda nan tabata adorá un gran variedad di dios i diosa, entre nan e trinidad di Anu (e dios di shelu), Enlil (e dios di tera, aire i tormenta) i Ea (e dios riba e awanan). Un otro trinidad a consistí di Sin (e dios di luna), Shamash (e dios di solo) i Istar (e diosa di fertilidad). Magia, bruheria i astrologia tabatin un lugá prominente den adoracion babilónico.

 5. Ki reto e ambiente religioso di Babilonia tabata pa exiliado hudiu?

⁵ Pa e exiliadonan hudiu, biba meimei di hende cu a venerá hopi dios, tabata un tremendo reto. Siglonan promé, Moises a spierta israelita cu si nan scoge pa rebelá contra e Dunador Supremo di Ley, nan lo mester carga consecuencianan teribel. Moises a bisa nan: “Jehova lo pone bo marcha, abo i bo rey cu lo bo establecé riba bo, bai un nacion cu bo no a conocé, ni abo ni bo antepasadonan; i ei lo bo tin cu sirbi otro diosnan, di palu i di piedra.”—Deuteronomio 28:15, 36.

 6. Pakico biba den Babilonia tabata un desafio special pa Daniel, Hananías, Misael i Azarías?

⁶ Awor e hudiunan a haña nan mes precis den e situacion pertá ei. Lo a bai ta difícil pa warda integridad na Jehova, foral pa Daniel, Hananías, Misael i Azarías. A scoge e cuater hóbennan hebreo aki special pa ricibí entrenamentu pa traha den gobiernu. (Daniel 1:3-5) Corda cu asta a duna nan nomber babilónico—Béltsasar, Sadrac, Mesac i Abednego—probablemente pa influenciá nan pa adaptá na nan ambiente nobo.b Nan puesto haltu, cu tabata den bista público, lo a pone cu si nan a nenga di adorá e diosnan dje pais, hende lo a ripará esei unbes, i lo el a asta parce un forma di traicion.

UN IMAGEN DI ORO TA PRESENTA UN MENASA

 7. (a) Describí e imágen cu Nabucodonosor a lanta. (b) Kico tabata e propósito dje imágen?

⁷ Evidentemente, den un intento pa fortalecé e unidad di su imperio, Nabucodonosor ta lanta un imágen di oro riba e yanura di Dura. E tabata 60 codo (27 meter) haltu i 6 codo (2,7 meter) hanchu.c Tin hende ta kere cu e imágen tabata gewoon un pilar of un obelisco. Por ta e tabatin un pedestal masha haltu mes riba cua tabatin un estatua enorme den forma di un hende, podisé representando Nabucodonosor mes of e dios Nebo. Sea cual sea e caso, e monumento haltu aki tabata un símbolo dje Imperio Babilónico. Como tal, e propósito tabata pa hende mir’é i vener’é.—Daniel 3:1.

 8. (a) Ken rey a yama na e inauguracion dje imágen, i kico tur presente mester a haci? (b) Kico lo tabata e castigu pa nenga di buig dilanti e imágen?

⁸ P’esei, Nabucodonosor a haci areglo pa tene un ceremonia di inauguracion. El a reuní tur sátrapa, prefecto, gobernadó, consehero, tesorero, hues, magistrado di polis i tur administradó dje distritonan hurisdiccional. Un anunciadó oficial a sclama: “Na boso ta ser bisá, o pueblonan, gruponan nacional i idiomanan, cu ora boso tende e zonido dje cachu, e fluit, e cítara, e harpa triangular, e instrumento di cuerde, e doedelzak i tur sorto di instrumento musical, boso cai abou i adorá e imágen di oro cu rey Nabucodonosor a lanta. I ken cu no cai abou i adorá, lo ser tirá mesora den e fornu di candela ardiente.”—Daniel 3:2-6.

 9. Kico buigmentu dilanti e imágen cu Nabucodonosor a lanta ta parce di a nificá?

⁹ Tin hende ta kere cu Nabucodonosor a areglá e ceremonia aki pa asina forsa e hudiunan comprometé nan adoracion na Jehova. Probablemente esaki no tabata e caso, pasobra parce cu a yama funcionarionan gubernamental so pa e ocasion. Pues, e único hudiunan presente lo tabata esnan cu a traha den gobiernu. Ta parce anto cu buigmentu dilanti e imágen tabata un ceremonia intencioná pa fortalecé e solidaridad entre e funcionarionan gubernamental. Erudito John F. Walvoord ta comentá: “Na un banda un exhibicion asina di funcionario tabata un bromamentu cu e poder di Nabucodonosor su imperio i na otro banda e tabata importante den duna reconocimentu na e diosnan cu segun e babilonionan tabata esnan cu a duna nan e victorianan.”

JEHOVA SU SIRBIDONAN TA NENGA DI COMPROMETE

10. Pakico hende no-hudiu no tabatin problema pa cumpli cu e mandamentu di Nabucodonosor?

¹⁰ Apesar di nan debocion na vários dios patrono, mayoria di esnan reuní dilanti e imágen di Nabucodonosor lo no tabatin ningun problema cu nan concenshi pa ador’é. Un erudito di Bijbel a splica: “Nan tur tabatin custumber di adorá ídolo, i e echo cu nan a adorá un dios, no a stroba nan di duna homenahe na un otro tambe.” El a sigui bisa: “Esei a cuadra cu e punto di bista prevalente di hende idólatra, esta, cu tabata existí hopi dios . . . i cu no tabata malu pa rindi homenahe na e dios di cualkier pueblo of pais.”

11. Pakico Sadrac, Mesac i Abednego a nenga di buig dilanti e imágen?

¹¹ Sin embargo, pa e hudiunan esei tabata henteramente otro. Jehova, nan Dios, a manda nan: “Bo no mag traha pa bo mes un imágen grabá of un forma parecido na cualkier cos cu ta den shelu ariba of cu ta riba tera abou of cu ta den awa bou di tera. Bo no mag buig pa nan ni ser tentá pa sirbi nan, pasobra ami, Jehova bo Dios, ta un Dios cu ta exigí debocion exclusivo.” (Exodo 20:4, 5) P’esei, ora música a cuminsá i esnan reuní a cai na suela dilanti e imágen, tres hóben hebreo—Sadrac, Mesac i Abednego—a keda pará.—Daniel 3:7.

12. Di kico cierto caldeonan a acusá e tres hebreonan, i pakico?

¹² E echo cu tres funcionario hebreo a nenga di adorá e imágen a haci cierto caldeonan furioso. Mesora, nan a bai cerca rey i “a acusá e hudiunan.”d Nan no tabata interesá den un splicacion. Nan tabata kier pa castigá e hebreonan pa nan deslealtad i traicion, p’esei e acusadónan a bisa: “Tin cierto hudiunan cu bo a nombra riba e administracion dje distrito hurisdiccional di Babilonia: Sadrac, Mesac i Abednego; e hombernan físicamente fuerte aki no a presta atencion na bo, o rey, nan no ta sirbi bo propio diosnan, i e imágen di oro cu bo a lanta nan no ta adorá.”—Daniel 3:8-12.

13, 14. Con Nabucodonosor a reaccioná riba e posicion cu Sadrac, Mesac i Abednego a tuma?

¹³ Esta frustrá Nabucodonosor mester a sintié pasobra e tres hebreonan a desobedecé su ordu! A keda claro cu e no a logra combertí Sadrac, Mesac i Abednego den apoyadónan leal dje Imperio Babilónico. Acaso e no a educá nan den e sabiduria dje caldeonan? Wel, el a asta cambia nan nomber! Pero si Nabucodonosor a kere cu un educacion grandioso lo a siña nan un estilo nobo di adoracion of cu cambia nan nomber lo a cambia nan identidad, e tabata mal ekibocá. Sadrac, Mesac i Abednego a keda sirbidónan leal di Jehova.

¹⁴ Rey Nabucodonosor tabata furioso. Mesora el a manda yama Sadrac, Mesac i Abednego cerca dje. El a puntra: “Berdad ta asina, o Sadrac, Mesac i Abednego, cu boso no ta sirbi mi propio diosnan, i e imágen di oro cu mi a lanta boso no ta adorá?” Sin duda, Nabucodonosor a expresá e palabranan aki den un tono di no por kere cu ta asina. Lo e mester a pensa: ‘Con por ta cu tres homber di sano huicio ta keda sin haci caso di un mandamentu asina simpel, i riba dje, unu cu a carga un castigu asina severo pa desobedencia?’—Daniel 3:13, 14.

15, 16. Ki chens Nabucodonosor a duna e tres hebreonan?

¹⁵ Nabucodonosor tabata dispuesto pa duna e tres hebreonan un chens mas. E di: “Awor, si boso ta cla di manera cu ora boso tende e zonido dje cachu, e fluit, e cítara, e harpa triangular, e instrumento di cuerde, i e doedelzak i tur sorto di instrumento musical, boso cai abou i adorá e imágen cu mi a traha, bon. Pero si boso no adorá, lo tira boso mesora den e fornu di candela ardiente. I ken ta e dios cu por rescatá boso for di mi man?”—Daniel 3:15.

¹⁶ Ta parce cu e les dje imágen dje soño (registrá den Daniel capítulo 2) no a laga un impresion duradero riba Nabucodonosor su mente i curason. Kisas el a lubidá caba loke e mes a declará na Daniel: “Boso Dios ta un Dios di diosnan i un Señor di reynan.” (Daniel 2:47) Awor a parce cu Nabucodonosor ta desafiá Jehova, bisando cu ni sikiera E lo por a salba e hebreonan for dje castigu cu a spera nan.

17. Con Sadrac, Mesac i Abednego a reaccioná riba e oferta di rey?

¹⁷ Sadrac, Mesac i Abednego no tabatin nodi bolbe pensa riba e asuntu. Mesora nan a contestá: “O Nabucodonosor, nos no tin nodi contestá bo un palabra bek den e asuntu aki. Si tin cu sosodé asina, nos Dios cu nos ta sirbi por rescatá nos. For dje fornu di candela ardiente i for di bo man, o rey, lo e rescatá nos. Pero si no, sabi esaki, o rey, cu bo diosnan no ta esnan cu nos ta sirbi, i e imágen di oro cu bo a lanta nos lo no adorá.”—Daniel 3:16-18.

DEN E FORNU DI CANDELA!

18, 19. Kico a sosodé ora a tira e tres hebreonan den e fornu di candela?

¹⁸ Furioso, Nabucodonosor a manda su sirbidónan keinta e fornu shete biaha mas tantu cu ta custumber. Anto el a manda “cierto hombernan físicamente fuerte di energia vital” pa mara Sadrac, Mesac i Abednego, i tira nan den e “fornu di candela ardiente.” Nan a cumpli cu rey su ordunan, i a tira e tres hebreonan den candela, mará i completamente bistí, podisé pa asina nan por kima asta mas lihé. Sin embargo, ta Nabucodonosor su compinchinan mes ta esnan cu e vlamnan di candela a mata.—Daniel 3:19-22.

¹⁹ Pero algu extraordinario a sosodé. Aunke Sadrac, Mesac i Abednego tabata meimei dje fornu di candela, e vlamnan no tabata kima nan. Imaginá bo Nabucodonosor su sorpresa! A tira nan den un candela ardiente, bon mará, pero tog ainda nan tabata na bida. Sí, nan tabata asta cana rond libremente den e candela! Pero Nabucodonosor a ripará un cos mas. “No ta tres homber físicamente fuerte nos a tira mará meimei dje candela?” el a puntra su alto funcionarionan real. “Sí, o rey,” nan a contestá. Nabucodonosor a sclama: “Mira! Mi ta contemplá cuater homber físicamente fuerte ta cana rond libremente meimei dje candela, i nan no ta sufri ningun daño, i e aparencia dje di cuater ta parce un yu dje diosnan.”—Daniel 3:23-25.

20, 21. (a) Kico Nabucodonosor a ripará tocante Sadrac, Mesac i Abednego ora nan a sali for dje fornu? (b) Kico Nabucodonosor a hañ’é obligá ta reconocé?

²⁰ Nabucodonosor a acercá porta dje fornu di candela. El a grita: “Sadrac, Mesac i Abednego, sirbidónan dje Dios Haltísimo, sali pafó i bini aki!” E tres hebreonan a cana sali for di meimei dje candela. Sin duda, tur hende cu tabata testigo dje milager aki—entre otro e sátrapa, prefecto, gobernadó i alto funcionarionan—a keda babucá. Tabata como si fuera e tres hóbennan aki nunca no a ni drenta e fornu! E holó di candela no a pega na nan, i ni un drachi riba nan cabes no a kima.—Daniel 3:26, 27.

²¹ Awor rey Nabucodonosor a hañ’é obligá ta reconocé cu Jehova ta e Dios Haltísimo. El a declará: “Bendicioná sea e Dios di Sadrac, Mesac i Abednego, kende a manda su angel i a rescatá su sirbidónan cu a confia den dje i cu a cambia e palabra mes di rey i a entregá nan curpa, pasobra nan no kier a sirbi ni no kier a adorá ningun dios en absoluto, cu excepcion di nan mes Dios.” Anto rey a agregá e spiertamentu severo aki: “For di mi ta sali un ordu, cu mester kap na pida-pida cualkier pueblo, grupo nacional of idioma cu bisa algu malu contra e Dios di Sadrac, Mesac i Abednego, i mester combertí su cas den un w.c. público; ya cu no ta existí un otro dios cu por libra manera esun aki.” Cu esei, a restorá e tres hebreonan na e fabor di rey i nan a “prosperá den e distrito hurisdiccional di Babilonia.”—Daniel 3:28-30.

FE I E PRUEBA DI CANDELA AWE

22. Con sirbidónan di Jehova di tempu actual ta enfrentá circunstancianan parecido na esnan di Sadrac, Mesac i Abednego?

²² Awe, adoradó di Jehova ta enfrentá circunstancianan parecido na esnan di Sadrac, Mesac i Abednego. Ta cierto cu e pueblo di Dios tal bes no ta exiliado den un sentido literal. Sin embargo, Jesus a bisa cu su siguidónan lo “no ta parti di mundu.” (Juan 17:14) Nan ta “stranhero” den e sentido cu nan no ta adoptá custumber, actitud i prácticanan no-bíblico dje hendenan rond di nan. Manera apostel Pablo a skirbi, cristiannan tin cu “stop di ser formá segun e sistema di cosnan aki.”—Romanonan 12:2.

23. Con e tres hebreonan a demostrá firmesa, i con cristiannan djawe por sigui nan ehempel?

²³ E tres hebreonan a nenga di ser formá segun e sistema babilónico. Asta instruccion detayá den e sabiduria di caldeo no a pone nan desviá. Nan posicion den e asuntu di adoracion tabata innegoshabel; ta na Jehova nan tabata leal. Awe cristiannan mester ta mésun firme. Nan no tin cu tene bergwensa cu nan ta distinto for di hende den mundu. Sí, “mundu ta pasa bai i tambe su deseo.” (1 Juan 2:17) Pues lo ta bobo i inútil pa conformá na e sistema di cosnan muribundo aki.

24. Compará cu e posicion dje tres hebreonan, kico ta e posicion di cristiannan berdadero?

²⁴ Cristiannan mester ta alerto contra tur forma di idolatria, incluso su formanan sutil.e (1 Juan 5:21) Sadrac, Mesac i Abednego a para obedientemente i cu respet dilanti e imágen di oro, pero nan a realisá cu buig dilanti dje tabata mas cu djis un gesto di respet. Esei tabata un acto di adoracion, i si nan a tuma parti den dje nan lo a pone Jehova rabia. (Deuteronomio 5:8-10) John F. Walvoord ta skirbi: “En realidad esei tabata un saludamentu di bandera, aunke, debí n’e interrelacion entre lealtad religioso i nacional, e por tabatin conotacion religioso tambe.” Awe, cristiannan berdadero ta tuma un posicion mésun firme contra idolatria.

25. Ki les abo a siña for dje relato di bida real di Sadrac, Mesac i Abednego?

²⁵ E relato bíblico di Sadrac, Mesac i Abednego ta duna tur hende cu ta decididu pa rindi debocion exclusivo na Jehova, un bon les práctico. Evidentemente, apostel Pablo tabatin e tres hebreonan aki na mente ora el a papia di hopi hende cu a ehercé fe, entre otro esnan cu “a detené forsa di candela.” (Hebreonan 11:33, 34) Jehova lo recompensá tur cu imitá tal fe. El a libra e tres hebreonan for dje fornu di candela, pero nos por ta sigur cu lo e resucitá tur esnan leal cu perde nan bida como wardadó di integridad i lo bendicioná nan cu bida eterno. Di tur manera, Jehova “ta warda alma di esnan lealnan na dje; e ta libra nan for di man dje malbadonan.”—Salmo 97:10.

[Nota]

KICO BO A SACA AFO?

• Di con Sadrac, Mesac i Abednego a nenga di buig dilanti e imágen cu Nabucodonosor a lanta?

• Con Nabucodonosor a reaccioná riba e posicion cu e tres hebreonan a tuma?

• Con Jehova a recompensá e tres hebreonan pa nan fe?

• Kico abo a siña dor di presta atencion na e relato di bida real di Sadrac, Mesac i Abednego?

[Plachi di henter página 68]

[Plachi na página 70]

1. Toren di tempel (zigurat) na Babilonia

2. Tempel di Marduk

3. Plakat di brons representando e diosnan Marduk (banda robes) i Nebo (banda drechi) pará riba dragon

4. Medayon di Nabucodonosor, renombrá pa su proyectonan di construccion

[Plachi di henter página 76]

[Plachi di henter página 78]