Nos Yunan—Un Herensia Presioso

“Mira, yunan ta un herensia di SEÑOR; e fruta di barika ta un rekompensa.”—SALMO 127:3.

 1. Kon e promé beibi humano por a nase?

KONSIDERÁ e susesonan milagroso ku Yehova Dios a hasi posibel dor di e manera ku el a krea e promé hòmber i muhé. Tantu e tata komo e mama, Adam ku Eva, a kontribuí ku un parti di nan mes ku a desaroyá den matris di Eva i a bira un hende nobo kompletamente formá: e promé beibi humano. (Génesis 4:1) Te ku awe, e manera ku un yu ta ser konsebí i nase ta algu ku ta impreshoná nos sinfin i hopi hende ta deskribí esei komo simplemente un milager.

 2. Dikon lo bo bisa ku loke ta sosodé den matris di un muhé na estado ta un milager?

² Den mas o ménos 270 dia, e sèl original ku a wòrdu kreá den e mama despues di e mama su union ku e tata, ta krese bira un beibi ku ta konsistí di míles di miónes di sèl. E sèl original ei ta kontené e instrukshonnan nesesario pa produsí mas ku 200 tipo di sèl. Siguiendo e instrukshonnan maravioso ei ku ta bai mas ayá di loke hende por komprondé, e sèlnan aki ku ta asombrosamente kompliká ta desaroyá presis den e órden i manera korekto pa krea un persona nobo i bibu.

 3. Dikon hopi hende ku ta pensa lógiko ta di akuerdo ku ta Dios mester ta responsabel pa e nasementu di un ser humano nobo i bibu?

³ Pues, segun bo, ken realmente a traha e beibi? Definitivamente ta Esun ku na promé lugá a kreá bida. E salmista bíbliko a kanta: “Rekonosé ku [Yehova], é ta Dios. E ta esun ku a traha nos, i no ta nos a traha nos mes.” (Salmo 100:3) Mayornan, boso sa bon-bon ku no ta boso tabata asina genial pa por a trese un kos tan presioso manera boso yu na mundu. Ta solamente un Dios ku sabiduria infinito por ta responsabel pa e formashon milagroso di un ser humano nobo i bibu. Pa míles di aña, hende ku ta pensa lógiko a duna e Magnífiko Kreadó krédito pa e formashon di un yu den matris di su mama. Abo tambe ta hasi esei?—Salmo 139:13-16.

 4. Ki defisiensia humano nunka nos por kulpa Yehova di dje?

⁴ Pero akaso Yehova ta un Kreadó sin sintimentu ku simplemente a start un proseso biológiko pa hende hòmber i hende muhé por produsí desendiente manera nan mes? Tin hende sin sintimentu, pero Yehova sí nunka no ta asina. (Salmo 78:38-40) Beibel ta bisa na Salmo 127:3: “Mira, yunan ta un herensia di SEÑOR; e fruta di barika ta un rekompensa.” Laga nos ban konsiderá kiko un herensia ta, i kiko e ta demostrá.

Un Herensia i un Rekompensa

 5. Dikon yu ta un herensia?

⁵ Un herensia ta manera un regalo. Hopi biaha mayornan ta traha masha duru pa nan por laga un herensia atras pa nan yunan. E herensia por ta konsistí di plaka, propiedat òf kisas un opheto di balor spesial. En todo kaso, un herensia ta muestra di un mayor su amor. Beibel ta bisa ku e herensia ku Dios a duna mayornan ta nan yunan. Nan ta un regalo ku Dios a duna mayornan den su amor. Si bo ta un mayor, lo bo bisa ku bo akshonnan ta mustra ku bo ta mira bo yunan komo un regalo ku e Kreadó di universo a konfia bo kuné?

 6. Ku ki propósito Dios a kapasitá hende pa haña yu?

⁶ Yehova a duna e regalo aki ku e propósito di pobla tera ku e desendientenan di Adam ku Eva. (Génesis 1:27, 28; Isaias 45:18) Yehova no a krea kada ser humano individualmente, manera el a hasi ku e miónes di angelnan. (Salmo 104:4; Revelashon 4:11) Mas bien, Dios a skohe pa krea hende ku e kapasidat di produsí yu ku lo a parse nan mayornan den maneranan fásil pa identifiká. Ta realmente un privilegio maravioso pa un mama i tata produsí i kuida un persona nobo asina! Komo mayor, boso ta gradisí Yehova ku el a hasi posibel pa boso disfrutá di e herensia presioso aki?

Siña for di e Ehèmpel di Hesus

 7. Na kontraste ku algun mayor, kon Hesus a mustra interes i kompashon pa “e yunan di hende”?

⁷ Lamentablemente, no ta tur mayor ta konsiderá yu komo un rekompensa. Hopi mayor ta mustra tiki kompashon pa nan yunan. Mayornan asina no ta reflehá e aktitut di Yehova ni di su Yu. (Salmo 27:10; Isaias 49:15) Na kontraste, konsiderá e interes ku Hesus tabatin den mucha chikí. Beibel ta bisa ku asta promé ku Hesus a bin na tera komo hende—tempu ku e tabata un persona spiritual poderoso den shelu—su “delisia tabata den e yunan di hende.” (Proverbionan 8:31) Su amor pa hende tabata asina grandi ku boluntariamente el a duna su bida komo reskate di manera ku nos lo por haña bida eterno.—Mateo 20:28; Juan 10:18.

 8. Kon Hesus a pone un bon ehèmpel pa mayornan?

⁸ Ora Hesus tabata riba tera el a pone un ekselente ehèmpel pa mayornan. Konsiderá kiko el a hasi. El a dediká tempu na mucha, asta ora ku e tabata hopi drùk i bou di preshon. El a wak nan hunga riba plenchi na marshe i a usa aspektonan di nan komportashon den su siñansa. (Mateo 11:16, 17) Durante Hesus su último biahe pa Yerusalèm, e tabata sa ku lo e mester a sufri i ser matá. P’esei ora hende a bin ku nan yunan chikí serka dje, su disipelnan a purba manda e muchanan bai. Kisas nan kier a spar Hesus di mas strès. Pero Hesus a skual su disipelnan. Mustrando su “delisia” den mucha chikí, el a bisa: “Laga e muchanan bin serka mi; no stroba nan.”—Marko 10:13, 14.

 9. Dikon loke nos ta hasi kisas ta asta mas importante ku loke nos ta bisa?

⁹ Nos por siña for di Hesus su ehèmpel. Ora un mucha bin serka nos, asta si kisas nos ta drùk, kon nos ta reakshoná? Manera Hesus? Loke mucha tin mester, spesialmente di nan mayornan, ta nèt loke Hesus tabata dispuesto pa duna nan: tempu i atenshon. Ta bèrdat ku palabranan manera “mi ta stima bo” ta importante. Pero akshon ta bisa mas ku palabra. Bo amor ta mas bisto na loke bo ta hasi, ku na loke bo ta bisa. Ta dor di duna bo yunan kuido, tempu i atenshon bo ta mustra ku bo ta stima nan. Sin embargo, hasiendo tur e kosnan ei kisas no ta produsí resultadonan konkreto, a lo ménos no dje lihé manera lo bo ta spera. Pasenshi ta nesesario. Nos por siña haña pasenshi si nos imitá e manera ku Hesus a trata ku su disipelnan.

Hesus Su Pasenshi i Kariño

10. Kon Hesus a siña su disipelnan un lès di humildat, i e tabatin éksito na promé instante?

¹⁰ Hesus tabata konsiente di e kompetensia konstante ku tabatin entre su disipelnan pa haña fama i importansia. Un dia, despues ku el a yega na Kapernaum ku su disipelnan, el a puntra nan: “‘Ta kiko boso tabata diskutí na kaminda?’ Ma nan a keda ketu, pasobra na kaminda nan a diskutí ku otro kual di nan tabata esun di mas grandi.” En bes di skual nan severamente, Hesus ku pasenshi a duna nan un ehèmpel práktiko den un esfuerso pa siña nan humildat. (Marko 9:33-37) E lès ei a produsí e resultado deseá? No mesora. Un seis luna despues, Santiago ku Juan a urgi nan mama pa pidi Hesus puestonan prominente den e Reino. Un biaha mas, Hesus ku pasenshi a korigí nan manera di pensa.—Mateo 20:20-28.

11. (a) Ki tarea di kustumber e apòstelnan di Hesus no a hasi ora nan a yega den un sala ariba huntu ku Hesus? (b) Kiko Hesus a hasi, i su esfuerso tabatin éksito na e okashon ei?

¹¹ Poko despues tabata Pasku di aña 33 di nos era, i Hesus a reuní den privá ku su apòstelnan pa selebrá esei. Ora nan a yega den e sala ariba, ni un di e 12 apòstelnan no a tuma e inisiativa pa hasi e servisio di kustumber di laba e pianan tur na stòf di e otronan, un tarea humilde ku normalmente un kriá òf un hende muhé den kas a hasi. (1 Samuel 25:41; 1 Timoteo 5:10) Lo mester a duel Hesus hopi pa mira ku su disipelnan a sigui demostrá ku nan ta aspirá rango i posishon! P’esei Hesus a laba pia di kada un di nan i despues a pidi nan sinseramente pa sigui su ehèmpel di sirbi otro. (Juan 13:4-17) Akaso nan a hasi esei? Beibel ta bisa ku mas despues e anochi ei “tambe a lanta un diskushon entre nan tokante kual di nan tabata wòrdu konsiderá di ta esun di mas grandi.”—Lukas 22:24.

12. Kon mayornan lo por imitá Hesus den nan esfuerso pa instruí nan yunan?

¹² Mayornan, ora boso yunan no ta hasi kaso di boso konseho, boso ta komprondé kon Hesus lo mester a sinti? Tuma nota ku Hesus no a stòp di purba yuda su apòstelnan, ounke nan tabata slow pa korigí nan faltanan. Su pasenshi ku tempu a duna fruta. (1 Juan 3:14, 18) Mayornan, boso ta hasi bon di imitá Hesus su amor i pasenshi, i nunka stòp ku boso esfuersonan pa instruí boso yunan.

13. Dikon mayornan no mester kore ku un yu na moda brutu ora ku e ta hasi pregunta?

¹³ Muchanan mester sinti ku nan mayornan ta stima nan i ta interesá den nan. Hesus kier a sa kiko su disipelnan tabata pensa, p’esei el a skucha nan ora nan tabatin pregunta. El a puntra nan kiko nan tabata pensa di sierto asuntunan. (Mateo 17:25-27) Sí, pa por siña mucha bon, nos mester skucha nan ku atenshon i berdadero interes. Pues anto, un mayor mester resistí e inklinashon ku ora un yu kier bin puntr’é un kos, e ta kore kuné na moda brutu dor di bisa: “Aworakí nò. Bo no ta mira ku mi ta bezig?” Si di bèrdat e mayor ta okupá, e mester bisa e mucha ku lo e papia kuné tokante e asuntu despues. Anto mayornan mester hasi sigur ku nan ta papia riba e asuntu tambe despues. Asina e mucha lo sinti ku e mayor realmente ta interesá den dje, i lo e ta mas dispuesto pa konfia e mayor su kosnan.

14. Kiko mayornan por siña for di Hesus relashoná ku mustramentu di kariño na nan yunan?

¹⁴ Akaso ta apropiá pa mayornan mustra nan kariño dor di pasa nan brasa rònt di nan yunan su skouder i dor di tene nan den nan brasa? Un biaha mas mayornan por siña for di Hesus. Beibel ta bisa ku “el a tuma nan den su brasa i a bendishoná nan, poniendo su mannan riba nan.” (Marko 10:16) Kon bo ta kere ku e muchanan a reakshoná? Sin duda esei a laga nan sinti bon, i a atraé nan na Hesus! Mayornan, si tin berdadero kariño i amor entre boso i boso yunan, nan lo ta mas dispuesto pa aseptá boso esfuerso pa disipliná nan i siña nan.

E Asuntu di Kuantu Tempu pa Mucha

15, 16. Menshoná un konsepto popular den kriamentu di yu, i kiko aparentemente a motivá e konsepto ei?

¹⁵ Tin hende a kuestioná si ta di bèrdat muchanan tin mester di hopi tempu i atenshon amoroso di nan mayornan. Un konsepto den kriamentu di yu ku ekspertonan a promové ku masha éksito ta e asina yamá tempu di kalidat. Segun esnan ku ta boga pa e idea aki, mucha no tin mester di muchu tempu di nan mayornan, basta ku e poko tempu ku e mayornan ta dediká na nan ta bale la pena, pues tempu yená ku aktividatnan bon planiá i prepará. Pero di bèrdat e konsepto aki di tempu di kalidat ta un bon idea? Ta ku bienestar di e muchanan na mente e idea aki a lanta?

¹⁶ Un eskritor ku a papia ku hopi mucha a bisa ku e kos ku muchanan “tabata kier mas di nan mayornan ta mas tempu,” huntu ku “pleno atenshon.” Un punto interesante ta ku un profèser di universidat a komentá: “E ekspreshon [tempu di kalidat] a lanta dor ku mayornan tabata sinti nan kulpabel. Hende tabata duna nan mes un èksküs pa pasa ménos tempu ku nan yunan.” Ta kuantu tempu mayornan lo mester dediká na nan yunan?

17. Kiko yunan mester haña di nan mayornan?

¹⁷ Beibel no ta bisa kuantu tempu. Sin embargo, Beibel a urgi mayornan israelita pa papia ku nan yunan ora nan tabata den nan kas, ora nan a kana riba kaminda, ora nan a bai drumi i ora nan a lanta. (Deuteronomio 6:7) Esaki ta nifiká klaramente ku mayornan tin ku komuniká ku nan yunan i siña nan konstantemente tur dia.

18. Kon Hesus a probechá di oportunidatnan pa instruí su disipelnan, i kiko mayornan por siña for di esaki?

¹⁸ Hesus a instruí su disipelnan ku éksito segun ku el a kome ku nan, biaha ku nan i asta rilèks ku nan. Pues, el a probechá di tur oportunidat pa siña nan. (Marko 6:31, 32; Lukas 8:1; 22:14) Den mesun manera, mayornan kristian mester ta alerta pa usa tur oportunidat pa establesé i mantené bon komunikashon ku nan yunan i instruí nan den e kaminda di Yehova.

Kiko pa Siña Yu i Kon pa Hasié

19. (a) Kiko mas ta nesesario fuera di dediká tempu na yunan? (b) Kiko prinsipalmente mayornan tin ku siña nan yunan?

¹⁹ Pero djis pasa tempu ku bo yunan i asta siña nan no ta basta. Pa bo kria nan ku éksito bo mester tene kuenta ku algu mas. Ta masha importante tambe kiko bo ta siña nan. Tuma nota kon Beibel ta enfatisá ta kiko esaki mester ta. E ta bisa: “E palabranan aki, ku mi ta ordená bo awe . . . , siña nan ku tur diligensia na bo yunan.” Ta kiko ta “e palabranan aki” ku nos mester siña nos yunan? Evidentemente, nan ta e palabranan ku a kaba di ser menshoná, esta: “Stima SEÑOR bo Dios ku henter bo kurason, ku henter bo alma i ku tur bo forsa.” (Deuteronomio 6:5-7) Hesus a bisa ku di tur Dios su mandamentunan, esaki ta esun di mas importante. (Marko 12:28-30) Pues mayornan tin ku siña nan yunan prinsipalmente tokante Yehova Dios, i splika nan dikon ta e so meresé nos amor i deboshon kompletu.

20. Kiko Dios a manda mayornan di pasado siña nan yunan?

²⁰ Sin embargo, “e palabranan aki” ku Dios ta urgi mayornan pa siña nan yunan ta enserá mas ku simplemente stima Dios ku henter bo ser. Den e kapítulo anterior di Deuteronomio, lo bo nota ku Moisés a ripití e leinan ku Dios a skirbi riba tabla di piedra, e Dies Mandamentunan. E leinan aki a inkluí mandamentunan pa no gaña, no hòrta, no mata i no kometé adulterio. (Deuteronomio 5:11-22) Pues, Dios a mustra mayornan di e tempu ayá e importansia di inkulká balornan moral den nan yunan. Mayornan kristian djawe tambe mester siña nan yunan na un manera similar pa nan por yuda e muchanan haña un futuro sigur i felis.

21. Kiko Beibel ke men ku e instrukshon pa “inkulká” e palabra di Dios den mente di mucha?

²¹ Tuma nota ku mayornan ta haña instrukshon kon pa siña nan yunan “e palabranan” òf mandamentunan aki: “Siña nan ku tur diligensia na bo yunan.” E palabra hebreo tradusí aki komo ‘siña ku tur diligensia’ ta nifiká “inkulká,” esta, “siña dor di ripitishon òf konseho: enkurashá òf graba den mente.” Pues básikamente, Dios ta bisa mayornan pa nan tin un programa planiá pa siña nan yunan for di Beibel ku e propósito spesífiko di inkulká òf graba asuntunan spiritual den nan mente.

22. Kiko Dios a manda mayornan israelita hasi pa asina instruí nan yunan, i kiko esaki a nifiká?

²² Pa un programa planiá asina bira posibel, e mayornan mester tuma e inisiativa. Beibel ta bisa: “Mara nan [esta, “e palabranan aki,” òf e mandamentunan di Dios] komo un señal na bo man i komo un banchi na bo frenta. Skirbi nan riba e kozeinnan-di-porta di bo kas i riba bo portanan di kurá.” (Deuteronomio 6:8, 9) Esaki no ke men ku mayornan mester skirbi e leinan di Dios literalmente riba kozein di nan porta òf mara un kopia di nan na man di nan yunan òf na nan frenta. Mas bien, e punto ta ku konstantemente mayornan mester kòrda nan yunan tokante Dios su siñansanan. Nan mester siña nan yunan na un manera asina regular i konstante ku ta komo si fuera Dios su siñansanan semper ta den bista di e muchanan.

23. Kiko nos lo konsiderá den e lès di otro siman?

²³ Kiko ta algun kos hopi importante ku mayornan mester siña nan yunan? Dikon ta di sumo importansia awe pa siña mucha i tambe entrená nan pa protehá nan mes? Ki yudansa tin disponibel awor pa mayornan pa yuda nan siña nan yunan na un manera efektivo? Den e siguiente artíkulo nos lo konsiderá e preguntanan aki i otro preguntanan mas ku ta interesá hopi mayor.

Kon Lo Bo Kontestá?

• Dikon mayornan mester konsiderá nan yunan presioso?

• Kiko mayornan i otro hende por siña di Hesus?

• Kuantu tempu mayornan mester dediká na nan yunan?

• Kiko mester siña yunan, i kon mester siña nan esei?

[Plachi na página 10]

Ki lès mayornan por saka for di Hesus su manera di siña?

[Plachinan na página 11]

Ki ora i kon mayornan israelita mester a siña nan yunan?

[Plachinan na página 12]

Mayornan mester tene e siñansanan di Dios den bista di nan yunan