Religion ta satisface bo necesidad?

AIRE, awa, cuminda, cas​—⁠hende na tur parti ta reconoce eseinan como necesidad humano. Sin eseinan privacion i morto ta enfrentábo. Sin embargo, leu den pasado Moisés, e lider israelita, a hala atencion na un otro necesidad humano, un necesidad asta mas importante cu cuminda of awa. Moisés a bisa: “No ta di pan so hende ta biba sino hende ta biba di tur expresion dje boca di Jehova.”​—⁠Deuteronomio 8:⁠3.

Cu su palabra profundo, Moisés a mustra e importancia di satisface nos necesidad religioso of spiritual. El a indica cu nos bida mes ta depende di satisfaccion di nan! Durante nan dwalmento pa 40 aña den desierto, israelita a biba literalmente pa medio di ‘expresion dje boca di Jehova.’ Nan a sobrebiba loke di otro manera por a ser un experencia fatal. Conforme cu e mandamento di Dios, un cuminda yamá maná a cai milagrosamente foi cielo. Awa a sali for di barranca pa satisface nan sed. Pero, Dios a haci mas cu atende na nan necesidad física. Moisés a bisa: “Mescos cu tata ta corrigi yiu, Jehova bo Dios a corrigíbo.”​—⁠Deuteronomio 8:​4, 5; Éxodo 16:​31, 32; 17:​5, 6.

Israelita no tabata lagá pa decidi pa nan mes loke tabata bon of malu, den un sentido moral of religioso. Nan a recibi e guía di Dios mes. El a dúnanan e Ley mosaico, un lista di ley notable cu a detayá un dieta saludable, un lista di ley estricto tocante limpieza, i principio moral i religioso sano. Asina Dios a promove e salud i bienestar spiritual di Israel. Nan a biba di ‘tur expresion dje boca di Jehova.’

Asina Israel a para na contraste claro cu otro nacion. Den e tempo di Moisés Egipto a goberna como e poder mundial principal. E tabata un tera mashá religioso. Segun e World Book Encyclopedia: “Egipcio di antigua a kere cu varios dios i diosa a influenciá tur aspecto di naturaleza i tur actividad humano. P’sei nan a adora hopi dios. . . . Den cada stad i pueblo egipcio, e pueblo a adora nan mes dios special además di dios principal.”

Tal adoracion di un cantidad di dios a satisface e necesidad spiritual di egipcio? No. Egipto a bira un tera yen di supersticion i costumber sexual degradante. Leu di promove bida i salud, e moda di biba egipcio a resulta den “enfermedad malu.” (Deuteronomio 7:15) No ta straño, anto, cu e Bijbel ta menciona dios di Egipto cu desprecio, yamando nan “imagen fies.”​—⁠Ezekiel 20:​7, 8.

Un situacion similar ta existi awe. Casi tur hende tin por lo menos un sorto di fe religioso; poco hende por yama nan mes hende sin dios. Pero, claramente religion en general no ta satisface e necesidad spiritual di humanidad. Problema di gera, racismo, morto di hamber, i pobreza sin fin por existi awe si hende berdaderamente ta biba “di cada expresion dje boca di Jehova”? Di ningun manera! Sin embargo, mashá poco hende ta considera un cambio di nan religion. Sí, algun hende ni sikiera ta dispuesto pa papia tocante religion of presta atencion na otro idea religioso!

Por ehempel, un homber den Ghana, Westáfrica, a bisa un predicador cristian: “Mi ta kere cu Dios a revela su mes na nos cu ta africano mediante sacerdote i sacerdotisa poderoso cu nos tin, mescos cu el a revela su mes na hudío mediante nan profeta. Ta un lástima cu algun africano no ta reconoce nan mes sacerdote sino mas bien ta papia tocante Jesús, Mohamed, i otronan.”

Den hopi arreglo social tradicional di Africa, hende ta mira cristianismo como e religion di hende blancu pa hende blancu​—⁠un sistema di stranhería cu ta haci hopi mas daño cu bon. Pero, un actitud di mente cerá por yuda of stroba bo esfuerzo pa satisface bo necesidad spiritual? Un proverbio africano ta bisa: “Bo no ta hinca bo dos man den e tayó di cuminda simplemente pa motibo cu bo tin hamber.” Tal costumber di come ta falta cortesía i també ta peligroso​—⁠specialmente si bo no sa kico tin den e tayó! Sin embargo, hopi hende ta scoge nan religion, no riba base di examinacion cuidadoso, sino riba e base di emocion of tradicion di famía.

E adoracion cu ta satisface bo necesidad spiritual mester ta “un sirbishi sagrado cu bo facultad di razoná.” (Romano 12:⁠1) E mester ta un decision informá i inteligente. P’sei, láganos examina e cuestion di scogimento di un religion desde e perspectiva africano. Pero, loke ta sigi ta di interés pa lector na tur parti.

[Caption on page 3]

Moisés a mustra e importancia di satisface nos necesidad spiritual

[Caption on page 4]

Experencia di africano cu misionero di cristiandad a cera e mente di algun africano ne Bijbel