“For di Su Serunan Bo Por Saka Koper”

E KOLEKSHON akí, ku nan a deskubrí na mart 1961, tabata konsistí di mas ku 400 opheto, mayoria di nan di koper. Nan tabata skondí den un sker den baranka, lorá den un mat di richi. Den nan tabatin un surtido di korona, sèpter, hèrmènt i arma. E deskubrimentu akí ta di interes spesial pa lektornan di Beibel ya ku Génesis 4:22 ta referí na Tubal-kain komo un “trahadó di tur hèrmènt di bròns i heru.”a

Ainda tin hopi pregunta relashoná ku e orígen i historia di e tesoro akí. Ma e deskubrimentu akí ta demostrá ku for di hopi tempu pasá hende di teranan bíbliko tabata sa kon pa saka koper for di piedra, smèlt e i traha kos kuné.

Ora e israelitanan tabata kla pa drenta e Tera Primintí, Moises a bisa nan: “For di su serunan bo por saka koper.” (Deuteronomio 8:7-9) Arkeólogonan a deskubrí un kantidat di mina i lugá di smèlt koper na Israel i Hordan, manera Feinan, Timna i Khirbat en-Nahas. Kiko e lugánan ei ta revelá?

E tera di Feinan i e tera di Timna ta yen di buraku, kaminda mineronan tabata saka koper durante un periodo di por lo ménos 2.000 aña. Te awe, ken ku pasa ei banda por haña pida pida piedra ku pik bèrdè di koper plamá rònt. E mineronan di antigwedat tabata koba den e kapanan mas ariba di e barankanan ku hèrmèntnan di piedra pa saka koper. Ora nan no por a haña mas koper parti ariba, nan tabata usa hèrmènt di metal pa koba tùnel i bai buska koper ku tabata mas hundu. E buki bíbliko di Yòb ta deskribí e trabou di koba den mina. (Yòb 28:2-11) Esaki tabata trabou duru; de echo, for di siglo tres te ku sinku, outoridatnan romano tabata sentensiá e kriminalnan di mas notorio i otro prezunan na trabou fòrsá den e minanan di koper di Feinan.

Na Khirbat en-Nahas (ku ta nifiká “Ruinanan di Koper”) nan a haña restunan di koper prosesá, loke ta indiká ku un tempu nan tabata smèlt koper na gran eskala einan. Arkeólogonan ta kere ku nan tabata trese piedra ku ta kontené koper for di e minanan di Feinan i Timna, ku tabata situá ei banda. Pa saka e koper for di e piedra, nan tabata usa pipa di blas i pòmp di pia pa hisa e temperatura di e karbonnan kayente te na 1.200 grado Celsius, durante ocho pa dies ora. Por lo general, pa kada kilo di koper nan tabata smèlt sinku kilo di piedra, ku despues nan por a usa pa traha vários opheto.

Na Seru di Sinaí, Yehova Dios a duna instrukshon spesífiko pa usa e metal lombrante akí ku nan a haña den serkania di e seru pa konstruí e tabernakel. Tambe nan mester a usa koper mas despues den e tèmpel ku nan mester a konstruí na Herúsalèm. (Éksodo, kapítulo 27) Kisas e israelitanan tabata sa kon pa traha ku metal promé ku nan a bai Egipto, òf tal bes nan a siña esei tempu nan tabata einan. Despues ku nan a sali for di Egipto, nan por a traha un bisé di oro. Tambe nan por a traha hopi artíkulo di koper ku nan mester a usa den sirbishi di tèmpel—manera e ponchera grandi, wea, panchi, skòp i fòrki.—Éksodo 32:4.

Mas despues den nan biahe dor di desierto, tal bes banda di Punon (probablemente loke awe ta Feinan), un área riku na koper, e israelitanan a keha tokante e mana i falta di awa. Komo kastigu, Yehova a manda kolebra venenoso riba nan, i hopi di nan a muri. Despues ku nan a arepentí, Moises a hasi un palabra pa nan, i Yehova a mand’é traha un kolebra di koper i pon’é na haltu riba un staka. E relato ta bisa: “A sosodé ku si un kolebra a morde un hende, ora ku el a mira na e kolebra di bròns, el a keda na bida.”—Numbernan 21:4-10; 33:43.

Rei Sálomon a usa masha hopi koper den konstrukshon di e tèmpel na Herúsalèm. Gran parti di esei el a haña di su tata, rei David, kende a bini ku e koper akí komo botin for di Siria. (1 Krónikanan 18:6-8) E “laman di metal bashá,” esta, e tobo enorme ku e saserdotenan tabata usa pa laba nan kurpa, tabatin un kapasidat di 66.000 liter i kisas a pisa den kareda di 30 tòn. (1 Reinan 7:23-26, 44-46) Tambe tabatin dos pilá di koper enorme na kada banda di e entrada di e tèmpel. Nan tabata 8 meter haltu, i parti ariba nan tabatin un korona rònt di 2 meter haltu. E pilánan tabata hòl di paden. Nan bandanan tabata 7,5 centimeter diki, ku un diameter di 1,7 meter. (1 Reinan 7:15, 16; 2 Krónikanan 4:17) Imaginá bo kuantu koper e hendenan mester a usa pa traha djis e ophetonan akí!

Hende komun den tempu di Beibel tambe tabata usa koper den nan bida di tur dia. Por ehèmpel, Beibel ta papia di arma, kadena, instrumento musikal i porta trahá di koper. (1 Samuel 17:5, 6; 2 Reinan 25:7; 1 Krónikanan 15:19; Salmo 107:16) Hesus a papia di plaka di “koper” i apòstel Pablo a menshoná “Aleksander, e artesano di koper.”—Mateo 10:9; 2 Timoteo 4:14.

Ainda arkeólogonan i historiadónan tin ku kontestá hopi pregunta relashoná ku e orígen di ophetonan di koper den tempu di Beibel, i tambe e misterio di e tesoro di Nahal Mishmar. No opstante, echo ta ku, manera Beibel ta konfirmá, e tera ku e israelitanan a heredá en bèrdat tabata ‘un bon tera, ku for di su serunan nan por a saka koper.’—Deuteronomio 8:7-9.