Mediante Fe, Barak A Derotá un Ehérsito Poderoso

IMAGINÁ ku bo ta kara-kara ku un batayon di sòldá agresivo. Nan ta armá ku lo último den ekipo militar, i ta kla pa us’é. Abo ku bo kompañeronan ta práktikamente indefenso nan dilanti.

Barak, Débora i 10.000 israelita a eksperensiá esaki durante e periodo di e huesnan di Israel. E ehérsito enemigu tabata kananeonan enkabesá pa e komandante militar Sísara. Nan arsenal a inkluí garoshi ekipá ku kuchú di heru mortal na nan wilnan. E sitio tabata Seru Tabor i e yanura di Riu Kison. Loke a tuma lugá einan a mustra ku Barak tabata un bon ehèmpel di fe. Konsiderá e susesonan ku a hiba na e konfrontashon aki.

Israel A Sklama na Yehova

E buki di Huesnan ta konta kon Israel kada biaha tabata bandoná adorashon puru, i kiko tabata e konsekuensianan desastroso di tal akshon. Den kada kaso, nan tabata roga Dios sinseramente pa tene miserikòrdia di nan; Dios tabata nombra un salbadó, nan tabata wòrdu librá, anto despues nan tabata bolbe rebeldiá kontra Dios. Na armonia ku e patronchi ei, “e yunan di Israel a bolbe hasi maldat den bista di SEÑOR, despues di e morto di Aod [òf Ehut, un hues ku a salba nan for di opreshon moabita].” De echo, nan a ‘skohe diosnan nobo.’ Ku ki resultado? Yehova “a bende nan ku Jabin, rei di Kánaan, kende tabata reina na Hazor; i e komandante di su ehérsito tabata Sísara . . . I e yunan di Israel a sklama na SEÑOR, pasobra [Sísara] tabatin nuebeshen garoshi di heru, i el a oprimí e yunan di Israel severamente pa binti aña.”—Huesnan 4:1-3; 5:8.

E Skritura ta bisa relashoná ku bida den Israel: “[Den e dianan ei] e kamindanan grandi a keda bandoná, i biaheronan tabata pasa pa kamindanan yen di lorada. Bida di e kunukeronan a kaba.” (Huesnan 5:6, 7) E hendenan tabata morto spantá pa e trupanan di bandidu den garoshi. Un komentarista di Beibel a bisa: “Bida públiko na Israel a ser dominá pa miedu. Henter e komunidat aparentemente tabata paralisá i indefenso.” Anto manera nan a hasi hopi bes kaba, e israelitanan desanimá a sklama na Yehova pa yudansa.

Yehova A Nombra un Lider

E opreshon kananeo tabata un tempu di krísis nashonal pa Israel. Dios a usa profeta Débora pa transmití su huisionan i su instrukshonnan. Asina Yehova a otorg’é e privilegio di aktua manera un mama den Israel.—Huesnan 4:4; 5:7.

Débora a manda yama Barak i a bis’é: “Mira, SEÑOR, e Dios di Israel, a duna òrdu: ‘Marcha bai Seru Tabor, i hiba huntu ku bo dies mil hòmber di e yu hòmbernan di Nèftalí i di e yu hòmbernan di Zabulon. I lo mi hasi Sísara, komandante di e ehérsito di Jabin, bin serka bo na Riu Kison ku su garoshinan i su trupanan, i lo mi entreg’é den bo man.’” (Huesnan 4:6, 7) Dor di bisa ‘Yehova a duna òrdu,’ Débora a mustra bon kla ku e personalmente no a pretendé di tin outoridat riba Barak. Simplemente el a aktua komo e kanal via kua e òrdu divino a ser transmití. Kon Barak a reakshoná?

Barak a bis’é: “Si bo bai ku mi, mi ta bai, ma si bo no bai ku mi, mi no ta bai.” (Huesnan 4:8) Dikon Barak no tabata masha dispuesto pa aseptá e responsabilidat ku Dios a dun’é? Ta kobarde e tabata? Òf e no tabatin konfiansa den e promesanan di Dios? No ta asina. Barak no a nenga e asignashon, ni e no a desobedesé Yehova. Mas bien su reakshon a indiká ku el a sinti ku e no tabata sufisiente kapasitá pa e so kumpli ku loke Dios a mand’é hasi. E presensia di Dios su representante lo a garantisá guia divino i lo a duna tantu e komo su sòldánan mas konfiansa. P’esei, en bes di tabata un señal di debilidat, e kondishon ku Barak a stipulá tabata un indikashon di fe fuerte.

Nos por kompará Barak su reakshon ku esun di Moisés, Gideon i Jeremias. E hòmbernan aki tampoko no tabatin konfiansa den nan abilidat di kumpli ku e tareanan ku Dios a duna nan. Pero nan no a ser konsiderá ménos fiel debí na esei. (Eksodo 3:11–4:17; 33:12-17; Huesnan 6:11-22, 36-40; Jeremias 1:4-10) I kiko nos por bisa di e aktitut di Débora? E no a purba tuma kontròl. Al kontrario, el a keda un sirbidó modesto di Yehova. El a bisa Barak: “Siguramente mi ta bai ku bo.” (Huesnan 4:9) E tabata dispuesto pa laga su kas—un lugá di mayor siguridat—pa bai djòin Barak pa e bataya inminente. Débora tambe ta un bon ehèmpel di fe i kurashi.

Ku Fe Nan A Sigui Barak

E trupanan di Israel mester a topa na un seru notabel ku yama Tabor. E sitio tabata bon skohé. E tabata un punto di enkuentro lógiko pa e tribunan di Nèftalí i Zabulon, ku a biba den bisindario. Pues manera Dios a ordená, dies mil boluntario—i Débora—a subi e seru aki tras di Barak.

Tur esnan ku a djòin Barak mester tabatin fe. Yehova a primintí Barak viktoria riba e kananeonan, pero ta ki arma e israelitanan tabatin? Huesnan 5:8 ta bisa: “Ni un eskudo ni lansa no a wòrdu mirá den kuarenta mil na Israel.” Ke men ku e israelitanan tabatin masha tiki arma. Asina mes, lansa i eskudo sigur lo no por a para kontra garoshi di guera ekipá ku kuchú di heru na nan wilnan. Ora ku Sísara a tende ku Barak a subi Seru Tabor, mesora el a reuní tur su garoshinan i trupanan den e yanura di Riu Kison. (Huesnan 4:12, 13; NW) Sísara no a realisá ku ta kontra Dios Todopoderoso lo el a bringa.

Barak A Derotá e Ehérsito di Sísara

Ora ku e momentu di konfrontashon a yega, Débora a bisa Barak: “Lanta! Pasobra esaki ta e dia ku SEÑOR a entregá Sísara den bo man; mira, SEÑOR a bai bo dilanti.” Barak ku su sòldánan mester a baha for di Seru Tabor bai den e yanura, pero einan e garoshinan di Sísara lo tabatin un bentaha stratégiko riba nan. Kon abo lo a sinti si bo tabata den e ehérsito di Barak? Lo bo a kumpli umbes ku e òrdu, kòrdando ku ta for di Yehova el a bini? Barak ku su dies mil hòmbernan a obedesé. “I ku filo di spada SEÑOR a konfundí Sísara i tur su garoshinan i henter su ehérsito dilanti di Barak.”—Huesnan 4:14, 15.

Ku e apoyo di Yehova, Barak a derotá Sísara su ehérsito. E relato di e bataya no ta splika tur loke ku a sosodé. Sin embargo, e kantika di viktoria di Barak ku Débora ta bisa ku ‘shelu i nubia tabata gotia awa.’ Muy probablemente, un palu di áwaseru a pone e garoshinan di Sísara pega den lodo, dunando Barak bentaha riba su enemigu. Di e manera ei e kananeonan su arma prinsipal di atake a resultá di ta un desbentaha. Pa loke ta e kadavernan di e hòmbernan di Sísara, e kantika ta bisa: “Riu Kison a lastra nan bai kuné.”—Huesnan 5:4, 21.

E senario aki ta kreibel? E Riu Kison ta loke nan ta yama un wadi, un riu ku normalmente tin masha tiki awa. Pero despues di tormenta òf áwaseru pisá, tin hopi chèns ku e tipo di riunan ei ta krese diripiente i bira un koriente di awa rápido i peligroso. Durante Promé Guera Mundial, solamente 15 minüt di áwaseru riba e tera di klei den e mesun área ei supuestamente a pone na peliger e éksito di tur maniobra di kabayeria. Relatonan di e bataya na Seru Tabor entre Napoleon i e turkonan dia 16 di aprel 1799, ta bisa ku “hopi di e [turkonan] a hoga ora nan a purba skapa via di un parti di e yanura inundá pa Kison.”

Historiadó hudiu Flavio Hosefo ta bisa ku nèt ora ku e ehérsitonan di Sísara i Barak tabata a punto di topa, “un gran tormenta a baha for di shelu, ku un kantidat enorme di áwaseru i hagel, i bientu a supla e áwaseru den kara di e kananeonan, i a tapa nan bista asina tantu, ku nan flecha- i slengernan no a sirbi pa nada.”

Huesnan 5:20 ta deklará: “For di shelu e streanan tabata bringa, for di nan kurso nan tabata bringa kontra Sísara.” Kon e streanan a bringa kontra Sísara? Tin hende ta konsiderá ku e deklarashon aki ta referí na yudansa divino. Otronan ta di opinion ku e teksto ta referí na yudansa angelikal, yobida di meteorit òf Sísara su konfiansa den pronóstikonan astrológiko ku a resultá falsu. Siendo ku Beibel no ta splika den ki manera presis e streanan a bringa den e bataya aki, nos por konkluí simplemente ku e deklarashon aki ta indiká ku tabatin un òf otro forma di intervenshon divino na fabor di e ehérsito di Israel. Sea kual sea e kaso, e israelitanan a probechá plenamente di e situashon. “Barak a persiguí e garoshinan . . . i henter e ehérsito di Sísara a muri pa medio di filo di spada; no a keda ni ún.” (Huesnan 4:16) Kon a para ku komandante Sísara?

E Opresor A Wòrdu Entregá den Man di un Muhé

Beibel ta bisa: “Awor Sísara [a bandoná e bataya i] a hui na pia bai na e tènt di Jael, esposa di Heber e keneo, pasobra tabatin pas entre Jabin, rei di Hazor, i e kas di Heber e keneo.” Jael a invitá Sísara—kende tabata morto kansá—pa drenta den su tènt, i a dun’é lechi pa bebe i a tap’é, di manera ku el a pega soño. Anto Jael “a kohe un staka di tènt i a kohe un martin den su man,” kosnan ku un hende ku ta biba den tènt tabata usa regularmente. Kaba el “a bai ketu-ketu serka dje i a klaba e staka den su sintí; i esaki a pasa dor èn dor bai den suela, pasobra e tabata morto na soño i masha kansá. Asina el a muri.”—Huesnan 4:17-21.

E ora ei Jael a sali pa bai kontra Barak i a bis’é: “Bin, i lo mi mustra bo e hòmber ku bo ta buska.” E relato ta sigui bisa: “I el a drenta bai paden kuné, i mira, Sísara tabata drumí morto ku e staka di tènt den su sintí.” E eksperensia ei sigur a fortalesé Barak su fe masha hopi! Pasobra mas promé Débora a bis’é: “E onor di e biahe ku bo ta bai hasi lo no ta pa bo, pasobra SEÑOR lo bende Sísara ku un muhé.”—Huesnan 4:9, 22.

Loke Jael a hasi tabata un akto di traishon? Yehova no a konsider’é asina. E kantika di viktoria di Barak ku Débora a yama Jael “esun di mas bendishoná di e muhénan ku ta biba den tènt.” E kantika ei ta yuda nos haña e punto di bista korekto di Sísara su morto. E kantika ta deskribí kon Sísara su mama ta warda ansiosamente pa e regresá for di e bataya. E mama ta puntra: “Dikon su garoshi ta tarda pa bin?” Anto e mama “su prensèsnan di mas sabí” ta purba trankilis’é dor di bisa ku sigur Sísara lo ta okupá ta parti e botin di bataya: pañanan bunita bòrdá i hende muhé pa e hòmbernan. E damanan aki ta puntra: “Ta parti nan no ta parti e botin? Un mucha muhé, dos mucha muhé pa kada guerero; pa Sísara un botin di paña di diferente koló, un botin di paña bòrdá, . . . paña di koló, bòrdá na tur dos banda, pa garganta di e sakeadó?”—Huesnan 5:24, 28-30.

Lès pa Nos

E relato di Barak ta siña nos un lès importante. Ken ku saka Yehova for di den su bida lo hañ’é ku problema i frustrashon. Esnan ku repentí i bolbe bèk na Dios i ehersé fe den dje lo por wòrdu librá di vários tipo di opreshon. Anto nos tambe no mester kultivá e spiritu di obedensia? Asta ora Dios su rekisitonan ta parse di bai kontra rasonamentu humano, nos por tin e konfiansa ku su instrukshonnan semper ta pa nos bienestar eterno. (Isaias 48:17, 18) Ta solamente dor di ehersé fe den Yehova i obedesé instrukshon divino, Barak a logra “pone ehérsitonan stranhero hui.”—Hebreonan 11:32-34.

E konklushon konmovedor di e kantika di Débora ku Barak ta: “Laga tur bo enemigunan peresé, o SEÑOR; ma laga esnan ku ta stima [Yehova] ta manera solo ku ta sali den tur su forsa.” (Huesnan 5:31) Definitivamente esaki lo resultá di ta asina ora ku Yehova trese un fin na e mundu malbado di Satanas!

[Plachi na página 29]

Yehova a usa Débora pa manda yama Barak

[Plachi na página 31]

Riu Kison ta desbordá

[Rekonosementu]

Pictorial Archive (Near Eastern History) Est.

[Plachi na página 31]

Seru Tabor