El A Perseverá Apesar di Desepshon

 1. Dikon henter Silo tabata yora?

SAMUEL por a sinti e doló ku tabata reina na Silo. Henter e stat tabata yora. Riba un solo dia, Israel a pèrdè 30.000 sòldá den un derota teribel na man di e filisteonan. I esaki a tuma lugá algun dia despues ku nan a pèrdè 4.000 sòldá den un otro bataya. Un kantidat inkontabel di hende muhé i mucha tabata yora morto di nan sernan kerí; nan tata, esposo, ruman i yu hòmber lo no bolbe kas mas.—1 Sam. 4:1, 2, 10.

2, 3. Ki seri di suseso trágiko a trese bèrgwensa riba Silo i pone e stat pèrdè su gloria?

² E tragedia akí tabata apénas unu mas den un seri di suseso trágiko. Tur kos a kuminsá ora ku Ofni ku Finees, e dos yu hòmbernan malbado di Sumo Saserdote Elí, a sali for di Silo ku e arka di pakto i a bai kuné na e kampo di bataya. E Arka tabata un kaha presioso ku a simbolisá Dios su presensia. Normalmente nan tabatiné den e Santísimo di e tabernakel, un tènt ku a sirbi komo tèmpel. E israelitanan a kere ku si nan tabatin e Arka huntu ku nan, esei lo a sirbi komo un talisman i duna nan viktoria. Esta bobo di nan parti! E filisteonan a vense e israelitanan, kapturá e Arka i mata Ofni ku Finees.—1 Sam. 4:3-11.

³ Pa siglonan, e Arka tabata den e tabernakel na Silo. Ki un gran onor esei tabata! Ma awor e no tabat’ei mas. Ora Elí, kende tabatin 98 aña, a tende e notisia ei, el a kai ku lomba for di su stul i muri. Su suegra, ku riba e dia ei a bira biuda, a muri durante parto. Su último palabranan tabata: “E gloria a bai for di Israel.” Sin e arka di pakto, Silo nunka mas lo tabata meskos.​—1 Sam. 4:12-22.

 4. Kiko nos ta bai analisá den e kapítulo akí?

⁴ Tur esaki lo mester tabata gòlpinan duru pa Samuel. Kon el a trata ku e desepshonnan akí? Su fe tabata sufisiente fuerte pa yuda un pueblo ku a pèrdè Yehova su protekshon i aprobashon? Nos tur awe por haña nos ku desepshon i gòlpi di bida ku ta pone nos fe na prueba. Pues laga nos wak kiko mas nos por siña for di e ehèmpel di Samuel.

5, 6.Riba kiko e relato di Beibel a enfoká pa un periodo di 20 aña, i kiko ­Samuel a hasi durante e tempu ei?

⁵ Na e haltura akí, Beibel ta kita atenshon for di Samuel i bai enfoká riba kiko a pasa ku e Arka sagrado. E relato ta konta nos kon e filisteonan a sufri pasobra nan a bai ku e Arka, i kon nan a haña nan obligá ta mand’é bèk. Ora Beibel bolbe dirigí atenshon na Samuel, a pasa entretantu un 20 aña. (1 Sam. 7:2) Kiko el a hasi tur e tempu ei? Nos no tin nodi di rei.

⁶ Nos ta lesa ku promé ku e periodo di 20 aña akí a kuminsá, “e palabra di Samuel a yega na henter Israel,” loke ta indiká ku e tabata instruí e pueblo. (1 Sam. 4:1) Despues di e periodo ei, el a sigui hasi meskos, pasobra nos ta lesa mas aleu ku tur aña Samuel tabatin kustumber di pasa bishitá tres stat di Israel pa atendé disputa i resolvé problema di e habitantenan. Kaba e tabata bai bèk Rama, kaminda e tabata biba. (1 Sam. 7:15-17) Ta bisto anto ku Samuel tabata okupá tur ora bai, i durante e 20 añanan ei, e tabatin hopi kos di hasi.

7, 8. (a) Ki mensahe Samuel a duna e pueblo despues di a traha 20 aña pa yuda nan? (b) Kon e pueblo a reakshoná riba e garantia ku Samuel a duna nan?

⁷ E komportashon inmoral i korupto di e yunan di Elí a suak e fe di e pueblo. Komo resultado, gran parti di e hendenan a bai adorá dios falsu. Despues di a pasa 20 aña trahando duru pa yuda e israelitanan spiritualmente, Samuel a bisa nan: “Si boso bolbe serka SEÑOR ku henter boso kurason, kita e diosnan estranhero i e Astarot for di meimei di boso i dirigí boso kurason na SEÑOR i sirbi e so, e lo libra boso for di man di e filisteonan.”—1 Sam. 7:3.

⁸ E “man di e filisteonan” tabata oprimí e hendenan sin kompashon. Komo ku e ehérsito di Israel tabata kasi kompletamente destrosá, e filisteonan a pensa ku nan lo por a maltratá e pueblo di Dios sin haña kastigu. Pero Samuel a garantisá e israelitanan ku e situashon ei lo a kambia si nan a bolbe serka Yehova. Nan lo tabata dispuesto pa hasi esei? Sí! Nan a deshasí di nan diosnan falsu i a kuminsá ‘sirbi Yehova so.’ Samuel sin duda a keda hopi kontentu, i el a manda yama henter e pueblo pa reuní na Mizpa, un stat den e region montañoso pa nort di Herúsalèm. Einan e hendenan a yuna i mustra Yehova ku nan a arepentí di tur nan aktonan di idolatria.—Lesa 1 Samuel 7:4-6.

 9. E filisteonan kier a probechá di ki oportunidat, i kon e pueblo di Dios a reakshoná?

⁹ Pero e filisteonan a tende di e reunion grandi akí, i nan a mir’é komo un bon chèns pa lansa un atake. Pues, nan a manda nan ehérsito Mizpa pa kaba ku e pueblo di Yehova. Ora e israelitanan a tende di e peliger ku tabata menasá nan, nan a spanta sinfin i a pidi Samuel roga Yehova pa nan. El a bai di akuerdo, i huntu ku su orashon el a ofresé un sakrifisio. Durante e seremonia sagrado ei, e ehérsito filisteo a ataká Mizpa. Yehova a kontestá e orashon di Samuel i, na moda di papia, a ekspresá su indignashon: El a laga strena, òf bos, zona masha duru riba kabes di e filisteonan, lokual a kousa un gran konfushon den nan.—1 Sam. 7:7-10.

10, 11. (a) Dikon e bos ku Yehova a laga zona riba e ehérsito filisteo mester tabata algu ekstraordinario? (b) Kon e bataya ku a kuminsá na Mizpa a terminá?

¹⁰ Awor bon, e filisteonan ei tabata guereronan balente i kurtí den bataya. Nan no tabata mucha chikitu ku ta kore bai skonde serka mama ora nan tende bos zona, pero tòg nan a hui bai. Pues, e zonido di bos akí lo mester tabata algu sin presedente. Dikon nan a spanta asina tantu? Akaso tabata e zonido “duru”? Ta ònferwagt e bos a zona meimei di un shelu blou, òf e bos a keda resoná masha duru den e serunan? En todo kaso, nan a keda tur konfundí i morto spantá; na lugá di ataká, nan mes a bira blanko di atake. E hòmbernan di Israel a sali for di Mizpa, persiguí e filisteonan pa basta kilometer i derotá nan na un lugá zùitwèst di Herúsalèm.—1 Sam. 7:11.

¹¹ E bataya ei a marka un kambio den e historia di Israel. Durante e restu di e dianan ku Samuel a sirbi komo hues, e filisteonan a keda pèrdè tereno, i e pueblo di Dios a rekuperá poder riba un stat tras di otro.—1 Sam. 7:13, 14.

12. Den ki sentido Samuel a “hasi loke tabata hustu,” i kua ta e kualidatnan ku a yud’é logra esei?

¹² Hopi siglo despues, apòstel Pablo a menshoná Samuel entre e huesnan i profetanan ku a “hasi loke tabata hustu.” (Heb. 11:32, 33) Samuel a hasi loke tabata bon i hustu den bista di Dios i a yuda otro hende hasi meskos. I el a logra esei pasobra, apesar di desepshon, el a sigui hasi su trabou fielmente miéntras ku el a spera ku pasenshi riba Yehova pa drecha e situashon. Ademas, Samuel a demostrá di ta un hende masha gradisidu. Despues di e viktoria na Mizpa, el a laga traha un monumento pa konmemorá e manera ku Yehova a protehá su pueblo.—1 Sam. 7:12.

13. (a) Kua ta e kualidatnan ku nos tin mester si nos ke imitá Samuel? (b) Ki ora bo ta pensa ta bon pa kuminsá kultivá e kualidatnan ei?

¹³ Abo tambe ke ‘hasi loke ta hustu’ den bista di Yehova? Si ta asina, imitá Samuel su pasenshi, su humildat i su aktitut gradisidu. (Lesa 1 Pedro 5:6.) Kua di nos no tin mester di e kualidatnan ei? Ta bon ku Samuel a kultivá e kualidatnan ei na un edat relativamente yòn, pasobra den su behes el a konfrontá desepshonnan muchu mas grandi, manera nos ta bai mira awor.

14, 15. (a) Samuel a hañ’é ku ki desepshon grandi ora el a “bira bieu”? (b) Samuel a neglishá su debernan di tata manera Elí a hasi? Splika esei.

¹⁴ E siguiente biaha ku Beibel ta menshoná Samuel, ya el a “bira bieu” i tabatin mester di yudansa ku e trabou di husga e pueblo. Pues, el a nombra su dos yu hòmbernan adulto, Yoël ku Abdías, pa sirbi komo hues. Pero lamentablemente, nan a laga su kara na bèrgwensa. Samuel tabata hustu i onesto, pero su yu hòmbernan no a sigui su ehèmpel. Al kontrario, nan a usa nan posishon pa nan mes probecho i a kometé inhustisia i aseptá soborno.—1 Sam. 8:1-3.

¹⁵ Un dia, e ansianonan di Israel a bin keha lo siguiente serka e profeta di edat: “Bo yunan no ta kana den bo kamindanan.” (1 Sam. 8:4, 5) Samuel tabata sa di e problema? Beibel no ta bisa. Pero kontrali na Elí, Samuel sí no a neglishá su debernan di tata. Yehova a skual i kastigá Elí pasobra e no a korigí su yunan ora nan a hasi malu i pasobra el a onra nan mas ku el a onra Dios. (1 Sam. 2:27-29) Pero Yehova no a konstatá esei serka Samuel.

16. Ki doló mayornan ku tin yu rebelde ta sinti, i kon e ehèmpel di Samuel por duna nan konsuelo i guia?

¹⁶ E relato no ta bisa kon Samuel a sintié ora el a haña sa di e mal komportashon di su yunan. Pero hopi mayor por imaginá nan e bèrgwensa, e preokupashon, tristesa òf desepshon ku esei ta kousa. Awe, masha hopi yu ta lanta kontra e outoridat i disiplina di nan mayornan. (Lesa 2 Timoteo 3:1-5.) Abo ta sufri pa motibu di un yu ku no ta mustra rèspèt ni sumishon? Den tal kaso, e ehèmpel di Samuel lo por duna bo konsuelo i guia. E no a laga e mal komportashon di su yunan kit’é for di su kaminda di fieldat. No lubidá ku ora palabra i disiplina no ta yuda, bo fiel ehèmpel komo mayor lo por toka e kurason di bo yu. Ademas, meskos ku Samuel, abo komo mayor semper tin e oportunidat di laga bo Tata, Yehova Dios, sintié orguyoso di bo.

17. Kiko e ansianonan di Israel a eksigí di Samuel, i kon el a reakshoná?

¹⁷ E yunan di Samuel hamas lo por a imaginá nan ku nan golosidat i egoismo lo tabatin konsekuensia asina grandi. Despues di a hala atenshon na nan mal komportashon, e ansianonan di Israel a pidi Samuel: “Awor nombra un rei pa nos pa husga nos, manera tur otro nashon tin.” Samuel a tuma esaki komo un rechaso di su persona? Kon ku bai bini, pa dékadanan el a husga e pueblo komo representante di Yehova. Awor nan tabata ke pa un rei manda riba nan, no un simpel profeta manera Samuel. Tur e nashonnan rònt di nan tabatin rei, i e israelitanan tambe tabata ke un rei! Kon Samuel a reakshoná? Nos ta lesa ku “esaki tabata desagradabel den bista di Samuel.”—1 Sam. 8:5, 6.

18. Kon Yehova a konsolá Samuel i a la bes revelá e gravedat di e piká di Israel?

¹⁸ Samuel a presentá e asuntu den orashon na Yehova. Wak kon Yehova a reakshoná: “Skucha bos di e pueblo den tur loke nan ta bisa bo, pasobra no ta abo nan a rechasá, sino ta ami nan a rechasá di ta rei riba nan.” Esei tabata un gran konsuelo pa ­Samuel. Pero ki un gran insulto kontra e Dios Todopoderoso! Yehova a bisa su profeta pa spièrta e israelitanan ku si nan tin un hende komo rei, esei lo sali nan karu. Pero nan a keda para ariba: “Nò, tòg mester tin un rei riba nos.” Wèl, Yehova a skohe un rei pa nan i a manda Samuel bai ungié, i manera semper, Samuel a obedes’é.—1 Sam. 8:7-19.

19, 20. (a) Ku ki aktitut Samuel a obedesé e instrukshon pa ungi Saul komo rei di Israel? (b) Kon Samuel a sigui yuda e pueblo di Yehova?

¹⁹ Pero ku ki aktitut Samuel a obedesé Dios? Di mala gana i djis pa formalidat? El a laga desepshon venená su kurason i a bira amargá? Hopi hende lo a reakshoná asina, pero Samuel sí no. El a ungi Saul i a rekonosé ku ta Dios a skoh’é. El a asta duna Saul un sunchi pa yam’é bonbiní i pa mustra su sumishon na dje komo e rei nobo. Ademas, el a bisa e pueblo: “Boso ta mira esun ku SEÑOR a skohe? Siguramente no tin ningun hende manera é den henter e pueblo.”—1 Sam. 10:1, 24.

²⁰ Samuel semper a mantené un aktitut positivo. En bes di konsentrá riba e debilidatnan di e hòmber ku Yehova a skohe, el a wak su bon kualidatnan. I en bes di stèns riba e aprobashon di un pueblo kaprichoso, el a konsentrá riba mantené su integridat na Dios. (1 Sam. 12:1-4) Ademas, el a sigui kumpli fielmente ku su asignashon: El a spièrta e pueblo di Dios pa e peligernan spiritual ku nan tabata konfrontá i a animá nan pa no bira lomba pa Yehova. Su konseho a konmové nan asina tantu ku nan a roga Samuel pa resa pa nan. El a duna nan e bunita kontesta akí: “Leu sea di mi di peka kontra SEÑOR dor di stòp di hasi orashon pa boso; ma lo mi instruí boso den e kaminda bon i rekto.”—1 Sam. 12:21-24.

21. Kon e ehèmpel di Samuel por yuda nos si un dia nos keda desepshoná pasobra un otro ruman a haña un privilegio?

²¹ Bo a yega di sinti bo desepshoná pasobra nan a duna un otro ruman un puesto òf privilegio ku abo a ferwagt di haña? E ehèmpel di Samuel ta un bon rekordatorio pa hamas nos laga yalusí, envidia òf renkor saka rais den nos kurason. (Lesa Proverbionan 14:30.) No lubidá ku Dios tin sufisiente trabou ku por duna kada un di su sirbidónan gran satisfakshon.

22. Kua tabata algun bon kualidat ku Saul tabatin na prinsipio?

²² Saul en bèrdat tabatin bon kualidat; e tabata un hòmber remarkabel. E tabata haltu i di aparensia impreshonante. Tambe e tabata un persona ku kurashi i masha ingenioso, i na prinsipio e tabata modesto i sin pretenshon. (1 Sam. 10:22, 23, 27) Banda di e bon kualidatnan ei, e tabatin un don presioso mas: boluntat liber, es desir, e kapasidat di skohe su mes rumbo den bida i tuma su propio desishonnan. (Deu. 30:19) El a hasi bon uso di e don ei?

23. Kua ta e promé bon kualidat ku Saul a pèrdè, i kon el a demostrá ku e tabata bira mas i mas arogante?

²³ Lamentablemente, hopi biaha ora un hende haña gloria i poder, e promé kualidat ku e ta pèrdè ta modestia. No a tarda mashá ku Saul a bira arogante. El a skohe pa no obedesé e òrdunan di Yehova ku e tabata haña via Samuel. Un biaha, Saul a kansa di warda i a ofresé un sakrifisio ku Samuel tabata bai ofresé. Samuel a skual e i a profetisá ku e reinado lo no a keda den e famia di Saul. En bes di siña un lès for di e disiplina, Saul a kometé pikánan mas grave di desobedensia.—1 Sam. 13:8, 9, 13, 14.

24. (a) Kon Saul a desobedesé Yehova den e guera kontra Amalek? (b) Kon Saul a reakshoná riba e disiplina, i kiko tabata Yehova su desishon?

²⁴ Via Samuel, Yehova a duna Saul òrdu pa bringa kontra Amalek. E mester a destruí tur nan propiedatnan i ehekutá nan rei malbado, Agag. Pero Saul a spar e bida di Agag i lo mihó di e botin. Ora Samuel a bin korigí Saul, e por a mira kuantu Saul a kambia. En bes di aseptá e disiplina ku humildat, el a para pusta boka ku e profeta; el a bini ku èksküs pa hustifiká su mes i a trata di minimisá su fout. El a asta tira falta riba e pueblo! Un di e èksküsnan tabata ku el a tuma parti di e botin pa ofres’é komo sakrifisio na Yehova. Samuel a kontest’é ku e palabranan bon konosí: “Mira, obedesé ta mihó ku sakrifisio.” Ku kurashi, Samuel a skual e rei i a inform’é di Yehova su desishon: Lo e kita e reino for di Saul i dun’é na un otro hòmber, unu mihó kuné.a—1 Sam. 15:1-33.

25, 26. (a) Dikon Samuel a yora Saul, i kon Yehova a korigié na un manera suave? (b) Ki lès Samuel a siña ora el a bai e kas di Isaí?

²⁵ Samuel a keda masha tristu pa e fayonan ku Saul a kometé. El a pasa henter un anochi ta sklama na Yehova tokante esei, i mas despues el a keda yora Saul. Samuel a mira asina tantu potensial den Saul, asina tantu bon kualidat, i awor el a keda tur desilushoná. E hòmber ku e tabata konosé a kambia; el a pèrdè su mihó kualidatnan i a bira kontra Yehova. Samuel no kier a ni mir’é mas. Pero ku tempu, Yehova a korigí Samuel na un manera suave, bisando: “Te ki dia bo ta keda yora Saul, siendo ku mi a rechas’é komo rei riba Israel? Yena bo kachu ku zeta i bai; lo mi manda bo serka Isaí e bètlehemita, pasobra mi a skohe un rei pa mi mes for di su yu hòmbernan.”—1 Sam. 15:34, 35; 16:1.

²⁶ Pa Yehova kumpli ku su boluntat, e no ta dependé di hende imperfekto, ku por ta leal awe i desleal mañan. Si un hende ku el a skohe bira infiel, e ta buska un otro pa kumpli ku Su boluntat. Pues, Samuel a stòp di yora Saul. Riba òrdu di Yehova, el a bai na kas di Isaí na Bètlehèm pa ungi e rei nobo. Einan el a sera konosí ku vários yu impreshonante di Isaí. Pero for di e promé yu, Yehova a spièrta Samuel pa wak mas leu ku djis nan aparensia. (Lesa 1 Samuel 16:7.) Por último, Samuel a sera konosí ku esun mas yòn, David, i é tabata esun ku Yehova a skohe.

27. (a) Kiko a yuda Samuel su fe bira mas fuerte? (b) Kiko ta loke mas bo ta apresiá di e ehèmpel di Samuel?

²⁷ Durante Samuel su último añanan di bida, e por a mira bon kla ku Yehova su desishon di pone David na lugá di Saul tabata korekto. Saul a bira un apóstata dominá pa yalusí i odio asesino. I David, en kambio, a demostrá bunita kualidatnan, manera kurashi, integridat, fe i lealtat. Samuel tabata yegando na fin di su bida, ma su fe a sigui bira mas fuerte. El a mira ku Yehova por yuda nos rekuperá di kualke desilushon i superá nos difikultatnan, i ku e por transformá kualke desepshon òf gòlpi di bida den un bendishon. Finalmente, Samuel a muri ku kasi 100 aña. E tabatin un bida remarkabel i a laga atras un registro intachabel di sirbishi fiel na Yehova. Nada straño ku henter Israel a yora su morto! Sirbidónan di Yehova awe ta hasi bon di puntra nan mes: ‘Mi ta imitá e fe di Samuel?’