Semper Tira Bo Carga Riba Jehova

HOPI hende awe ta sinti nan aplastá dor di carganan. Dificultadnan económico, problemanan angustioso di famia, problemanan di salú, dolor i sufrimentu debí na opresion i tirania, i un cantidad di otro afliccion ta cologá manera piedra di mulina rond di nan garganta. Ademas dje presionnan externo aki, algun hende tambe ta sinti nan cargá dor di un sintimentu cu nan no ta bal nada i un sintimentu di fracaso debí na nan mes imperfeccionnan. Hopi hende ta haña gana di stop di lucha por completo. Con ora carganan ta parce insoportabel bo por trata cu nan i superá nan?

Na un tempu Rey David di Israel a sinti cu e presion tabata casi insoportabel. Segun Salmo 55, el a bira extremadamente agitá dor di ansiedad debí na presion i hostilidad for di su enemigunan. El a sinti gran dolor di curason i temor. E por a solamente keha den su dolor. (Salmo 55:2, 5, 17) Sin embargo, apesar di tur su angustia, el a haña un manera pa trata cu su situacion i super’é. Con? El a acudí na su Dios pa apoyo. Su conseho na otronan cu tal bes ta sinti manera el a sinti tabata: “Tira bo carga riba Jehova mes.”—Salmo 55:22.

Kico e tabata kier men cu “tira bo carga riba Jehova mes”? Esei ta simplemente un asuntu di acudí na Jehova den oracion i expresá nos ansiedad? Of nos mes por haci algu pa yuda aliviá e situacion? Ki tal si nos ta sinti nos demasiado indigno pa acercá Jehova? Nos por haña sa kico David kier a men dor di repasá algun dje experencianan cu probablemente el a corda cla-cla ora el a skirbi e palabranan ei.

Haci Cosnan cu Jehova Su Poder

Bo ta corda con Goliat a hinca miedu den curason dje hombernan di guera di Israel? E homber gigante aki, mas cu 2,7 meter haltu, a spanta nan. (1 Samuel 17:4-11, 24) Pero David no tabatin miedu. Pakico? Pasobra e no a purba trata cu Goliat riba su mes forsa. Desde e tempu cu el a ser ungí como Israel su futuro rey, el a permití e spiritu di Dios dirigié i fortalec’é den tur loke el a haci. (1 Samuel 16:13) P’esei el a bisa Goliat: “Mi ta biniendo cerca bo cu e nomber di Jehova di ehércitonan, e Dios dje liñanan di bataya di Israel, kende bo a desafiá cu bofon. E dia aki Jehova lo entregá bo den mi man.” (1 Samuel 17:45, 46) David tabata ábil den lansa piedra usando slinger, pero nos por ta sigur cu Jehova su spiritu santu a guia i a haci mas mortal e piedra cu el a tira na Goliat.—1 Samuel 17:48-51.

David a enfrentá e desafio inmenso aki i a sali victorioso dor di tene confiansa cu Dios lo apoy’é i fortalec’é. El a desaroyá un relacion bon i di confiansa cu Dios. Sin duda esaki a ser fortalecé dor dje manera cu Jehova a libr’é anteriormente. (1 Samuel 17:34-37) Mescos cu David, abo por mantené un relacion personal fuerte cu Jehova i tene pleno confiansa cu e por i kier fortalecé i sostené bo den tur circunstancia.—Salmo 34:7, 8.

Haci Loke Bo Por pa Resolvé e Problema

Sin embargo, esaki no kier men cu nunca lo tin ocasionnan di intenso dolor, ansiedad i asta temor, manera Salmo 55 claramente ta mustra. Por ehempel, algun aña despues dje demostracion intrépido aki di confiansa den Jehova, David a experenciá gran temor confrontando su enemigunan. El a perde e fabor di Rey Saul i tabatin cu hui pa su bida. Purba imaginá e agitacion emocional cu esaki mester a causa David, e preguntanan cu esei mester a lanta den su mente en cuanto con Jehova su propósito lo bai ser realisá. Al fin i al cabo, el a ser ungí como e futuro rey di Israel, sin embargo at’é aki tratando di keda na bida como un fugitivo den mondi, persiguí manera un animal salbahe. Ora el a purba haña refugio den e stad di Gat, e pueblo natal di Goliat, el a ser reconocé. Cu ki resultado? E registro ta bisa cu “el a haña masha miedu.”—1 Samuel 21:10-12.

Pero e no a permití su miedu i ansiedad profundo stop e di acudí na Jehova pa yudansa. Segun Salmo 34 (skirbí a consecuencia dje experencia aki), David a bisa: “Mi a puntra cerca Jehova, i el a contestá mi, i for di tur mi sustunan el a librá mi. Esun afligí aki a yama, i Jehova mes a tende. I for di tur su angustianan El a salb’é.”—Salmo 34:4, 6.

Naturalmente, Jehova a apoy’é. Sin embargo tuma nota cu David no a djis sinta man crusá i warda pa Jehova rescat’é. El a reconocé e necesidad p’e haci tur loke e tabata por bou dje circunstancianan pa sali for dje situacion difícil. El a duna reconocimentu na Jehova su man den su liberacion, pero e mes a tuma accion, fingiendo locura di manera cu e rey di Gat no a mat’é. (1 Samuel 21:14–22:1) Nos tambe mester haci tur loke nos por pa trata cu situacionnan opresivo i superá nan, en bes di djis warda pa Jehova rescatá nos.—Santiago 1:5, 6; 2:26.

No Agregá Mas na Bo Carganan

David a siña un otro les, unu doloroso, mas despues den su bida. Kico esei tabata? Cu tin biaha nos ta agregá mas na nos mes carganan. Despues dje victoria riba e filisteonan, cosnan a bai malu pa David ora el dicidí di muda e arca di pacto na Jerusalem. E relato histórico ta conta nos: “Anto David i henter e pueblo cu tabata cuné a lanta i a bai na Baale-Huda pa trece for di einan e arca dje Dios berdadero . . . Sin embargo, nan a laga e arca dje Dios berdadero core riba un garoshi nobo, . . . i Uzah i Ahió, e yunan di Abinadab, tabata dirigí e garoshi nobo.”—2 Samuel 6:2, 3.

Usando un garoshi pa transportá e Arca a violá tur e instruccionnan cu Jehova a duna relacioná cu esei. A ser bisá claramente cu e único cargadornan autorisá, e levitanan kohatita, mester a carga e Arca riba nan scouder, usando stacanan pasá dor di e renchinan specialmente trahá na e Arca. (Exodo 25:13, 14; Númeronan 4:15, 19; 7:7-9) Ignorando e instruccionnan aki a hiba na calamidad. Ora e bacanan cu tabata hala e garoshi casi a lagu’é cai abou, Uzah, kende probablemente tabata un levita pero siguramente no un sacerdote, a rek man pa wanta e Arca p’e no cai i a ser matá dor di Jehova pa su falta di reverencia.—2 Samuel 6:6, 7.

David como rey mester a carga algun responsabilidad pa esaki. Su reaccion ta mustra cu asta esnan cu tin un bon relacion cu Jehova de bes en cuando por reaccioná robes na situacionnan difícil. Promé David a rabia. Despues el a haña miedu. (2 Samuel 6:8, 9) Su relacion di confiansa cu Jehova a ser poné na prueba severamente. Esaki tabata un ocasion ora cu aparentemente el a faya di tira su carga riba Jehova, dor di no a sigui su mandamentunan. Esei por ta e situacion cu nos tin biaha? Nos a yega di culpa Jehova pa problemanan cu ta resultá debí cu nos ta ignorá su instruccionnan?—Proverbionan 19:3.

Tratando cu e Carga di Culpa

Despues, David a crea un carga inmenso di culpa pa su mes dor di peca gravemente contra Jehova su normanan moral. Na e ocasion aki David a renunciá su responsabilidad pa dirigí su hombernan den bataya. El a keda na Jerusalem miéntras nan a sali bai bringa. Esaki a hiba na problema serio.—2 Samuel 11:1.

Rey David a mira e bunita Bat-seba bañando. E tabatin relacion inmoral cuné, i Bat-seba a sali na estado. (2 Samuel 11:2-5) Pa purba tapa e malconducta, el a haci areglo pa Bat-seba su esposo, Urías, bolbe na Jerusalem for dje campo di bataya. Urías a nenga di tin relacion sexual cu su esposa miéntras cu Israel tabata enbolbé den bataya. (2 Samuel 11:6-11) Awor David a recurí na medionan malbado i tramposo pa tapa su picá. El a haci areglo pa Urías su compañeronan soldat bandoná Urías durante bataya den un posicion vulnerabel di manera cu lo el a ser matá. Un picá abominabel i tristu!—2 Samuel 11:12-17.

Naturalmente, cu tempu David mester a duna cuenta pa su picá, i el a ser exponé. (2 Samuel 12:7-12) Purba imaginá e peso dje tristesa i culpa cu David mester a sinti ora el a realisá e enormidad di loke el a haci como resultado di su pasion. E por a ser aplastá dor di su mes sintimentu di fracaso, specialmente dor cu probablemente e tabata un homber emocional i sensibel. Por ta mashá bon cu el a sinti cu e no ta bal absolutamente nada!

Sin embargo, David rápidamente a reconocé su eror, admitiendo na e profeta Natan: “Mi a peca contra Jehova.” (2 Samuel 12:13) Salmo 51 ta conta nos con el a sinti i con el a suplicá Jehova Dios pa limpi’é i pordon’é. El a pidi den oracion: “Labá mi cabalmente di mi eror, i hací mi limpi asta di mi picá. Pasobra ami mes conocé mi transgresionnan, i mi picá ta dilanti mi constantemente.” (Salmo 51:2, 3) Debí cu e tabata berdaderamente arepentí, e por a bolbe desaroyá su relacion fuerte i íntimo cu Jehova. David no a sigui concentrá riba su sintimentunan di remordimentu i di ta sin balor. El a tira su carga riba Jehova dor di humildemente admití su culpa, demostrando berdadero arepentimentu, i haciendo oracion intensamente pa Jehova su pordon. El a bolbe gana Dios su fabor.—Salmo 51:7-12, 15-19.

Tratando cu Traicion

Esaki ta hiba nos na e episodio cu a impulsá David pa skirbi Salmo 55. E tabata bou di gran tension emocional. “Mi curason mes ta cu dolor fuerte den mi,” el a skirbi, “i e terornan di morto mes a cai riba mi.” (Salmo 55:4) Kico a causa e dolor aki? Absalom, yu homber di David, a traha un complot pa horta e reino for di David. (2 Samuel 15:1-6) E traicion aki di su propio yu tabata basta duru caba pa soportá, pero loke a hacié pió tabata cu David su consehero di mas confiá, un homber yamá Ahitofel, a uni cu e conspiracion contra David. Ahitofel ta esun cu David ta describí na Salmo 55:12-14. Como resultado dje conspiracion i traicion, David mester a hui for di Jerusalem. (2 Samuel 15:13, 14) Ki angustia esaki mester a caus’é!

Tog, e no a permití su emocion i tristesa intenso debilitá su confiansa den Jehova. El a haci oracion na Jehova pa frustra e plannan dje conspiradornan. (2 Samuel 15:30, 31) Atrobe nos ta mira cu David no a simplemente warda pasivamente pa Jehova haci tur e trabou. Tan pronto cu e oportunidad a presentá su mes, el a haci loke e tabata por pa trata na kibra e conspiracion contra dje. El a manda un otro di su conseheronan, Husai, bek na Jerusalem pa pretendé cu e ta uni cu e conspiracion, aunke, en realidad, el a bai pa sabote’é. (2 Samuel 15:32-34) Cu Jehova su apoyo, e plan aki a funcioná. Husai a wanta Absalom suficiente tempu pa David reagrupá i bira organisá pa defendé su mes.—2 Samuel 17:14.

Atrabes di henter su bida David lo mester a apreciá mashá e cuido protectivo i tambe e pacenshi di Jehova i cu e ta dispuesto pa pordoná! (Salmo 34:18, 19; 51:17) Tabata cu e antecedente aki cu David cu confiansa ta animá nos pa den nos tempu di angustia acudí na Jehova pa yudansa, pa ‘tira nos carga riba Jehova.’—Compará cu 1 Pedro 5:6, 7.

Desaroyá i Mantené un Relacion Fuerte i di Confiansa cu Jehova

Con nos ta haña e clase di relacion cu David tabatin cu Jehova, un relacion cu a sosten’é den tempu di gran prueba i tribulacion? Nos ta desaroyá un relacion asina dor di ser studiantenan diligente dje Palabra di Dios, e Bijbel. Nos ta laga Jehova instruí nos tocante su leynan, principionan i personalidad. (Salmo 19:7-11) Segun nos ta meditá riba e Palabra di Dios, nos ta hala mas i mas cerca di dje i ta siña confi’é implícitamente. (Salmo 143:1-5) Nos ta profundisá i fortalecé e relacion ei segun cu nos ta asociá cu co-adoradornan pa sigui ser instruí dor di Jehova. (Salmo 122:1-4) Nos ta intensificá nos relacion cu Jehova mediante oracion sincero.—Salmo 55:1.

Ta cierto cu David, mescos cu nos, tabatin su momentonan di depresion ora cu su relacion cu Jehova no tabata mes fuerte cu e lo mester tabata. Opresion por pone nos “actua manera loco.” (Eclesiástes 7:7) Pero Jehova ta mira loke ta sosodiendo, i e sa loke tin den nos curason. (Eclesiástes 4:1; 5:8) Nos mester haci esfuerso pa mantené nos relacion cu Jehova fuerte. E ora ei, sea cual sea e carganan cu nos tin cu hiba, nos por dependé riba Jehova pa aliviá e presion of pa duna nos e fortalesa pa trata cu nos situacion i super’é. (Filipensenan 4:6, 7, 13) Esei ta un asuntu di keda cerca di Jehova. Ora David a haci esaki, e tabata absolutamente a salbo.

P’esei, sea cual sea bo circunstancianan, David ta bisa, semper tira bo carga riba Jehova. E ora ei nos lo experenciá e berdad dje promesa: “E mes lo sostené bo. Nunca lo e permití e hustu tambaleá.”—Salmo 55:22.