Canta Alabanza pa Jehova

“Lagámi canta pa Jehova, pasobra el a ser sumamente halzá.”​—⁠ÉXODO 15:⁠1.

 1. Cua atributo i calidad di Jehova ta dúnanos motibo pa alabé?

DIESTRES bez Salmo 150 ta duna e mandamento di alaba Jehova of Jah. E último versículo ta proclama: “Tur loke ta hala rosea​—⁠lagué alaba Jah. Boso alaba Jah!” (Salmo 150:⁠6) Como Testigo di Jehova, nos sa cu Jehova ta merece nos alabanza. E ta Soberano Universal, e Haltísimo, e Rey di eternidad, nos Creador, nos Benefactor. E ta sin igual, único, incomparable, sin par, di hopi manera. E ta omnisiente, omnipotente, perfecto den husticia, i e personificacion di amor. Mas cu tur otro, e ta bon; e ta leal. (Lucas 18:19; Revelacion 15:​3, 4) E ta merece nos alabanza? Di tur manera!

 2. Cua motibo nos tin pa expresa gratitud na Jehova?

² Jehova ta merece no solamente nos adoracion i alabanza sino també nos gratitud i agradicimento pa tur loke el a haci pa nos. E ta Dunador di “tur bon regalo i di tur don perfecto.” (Santiago 1:17) E ta e Origen, e Fuente, di tur bida. (Salmo 36:⁠9) Tur loke nos ta disfruta como miembro dje raza humano ta bini di dje, pasobra e ta nos Magnífico Creador. (Isaías 42:⁠5) També, e ta Dunador di tur bendicion spiritual cu ta yega cerca nos mediante su spiritu, su organizacion, i su Palabra. Nos ta haya pordón di picá riba e base di su percuracion di su Yiu como nos rescate. (Juan 3:16) Nos tin e speranza dje Reino dje ‘cielo nobo i tera nobo den locual husticia lo biba.’ (2 Pedro 3:13) Nos tin e asociacion excelente cu otro hende cristian. (Romano 1:​11, 12) Nos tin e onor i bendicion di ser su testigonan. (Isaías 43:10-12) I nos tin e privilegio precioso di oracion. (Mateo 6:​9-13) Berdaderamente, nos tin hopi motibo pa duna agradicimento na Jehova Dios!

Manera den cua nos por alaba Jehova

 3. Menciona varios manera pa nos alaba Jehova i expresa nos gratitud na dje.

³ Como sirbidor deboto di Jehova Dios, con nos por alabé i expresa nos gratitud? Nos por haci esei cu nos participacion den e ministerio cristian​—⁠duna testimonio di cas pa cas, haci rebishita, conduci estudio bíblico, i participa den e dunamento di testimonio riba caya. També, nos por alabé dunando testimonio informal ki ora cu oportunidad ta presenta. Además, nos por alaba Jehova cu nos conducta recto, asta cu nos moda nechi i modesto di bistí i tene nos cabei. Hopi bez Testigo di Jehova a recibi elogio door di ser ehemplar asina. Además, nos por alaba Jehova i agradicié den oracion.​—⁠Mira 1 Crónica 29:​10-13.

 4. Cua ta un manera di mas bonita pa nos alaba nos Tata celestial amoroso?

⁴ Adicionalmente, un manera di mas bonita pa nos alaba nos amoroso Tata celestial ta di halzé i birtud di dje cu melodioso cantica di alabanza. Hopi músico i compositor ta di acuerdo di cu e instrumento musical di mas bonita ta e boz di hende. Maestro di música clásica a aspira di compone ópera pasobra tin tanto satisfaccion den scuchamento di boz di hende halzá den cantamento.

 5. Pa cua motibo nos mester tuma nos cantamento di cantica di alabanza na serio?

⁵ Cuanto Jehova Dios mester goza scuchamento di cantamento di hende, specialmente ora nan ta canta cantica di alabanza i gratitud! Siguramente, anto, nos mester tuma na serio nos cantamento di cantica di alabanza na varios reunion cu nos ta celebra​—⁠na reunion di congregacion, na asamblea di circuito, na dia special di asamblea, na asamblea di districto, i na asamblea internacional. Nos buki di cantica ta abunda cu melodía berdaderamente gozoso, e boniteza di locual hende djafó a elogiá frecuentemente. Mientras mas nos ta enbolbénos den e spiritu di cantamento di cantica di alabanza, mas nos ta causa gozo pa otro hende i beneficio pa nos mes.

Cantamento di alabanza pa Jehova den tempo bíblico

 6. Con israelita a expresa aprecio pa nan liberacion na Lamá Corrá?

⁶ E Palabra di Dios ta bísanos cu Moisés i otro israelita a canta triunfantemente ora nan tabata librá for di ehército di Faraó na Lamá Corrá. Nan cantica a cuminza cu e palabra: “Lagámi canta pa Jehova, pasobra el a ser sumamente halzá. El a tira cabai i ginete den lamá. Jah ta mi forza i fortaleza, siendo cu e ta sirbi pa mi salbacion. Esei ta mi Dios, i lo mi elogié.” (Éxodo 15:​1, 2) Nos por wel imagina e entusiasmo i gozo di israelita ora nan a canta tal palabra despues di nan liberacion milagroso!

 7. Cua otro ocasion notable e Scritura Hebreo ta mencioná di israelita alabando Jehova den cantamento?

⁷ Den 1 Crónica 16:​1, 4-36, nos ta leza cu nan a alaba Jehova cantando i tocando instrumento musical ora David a trece e Arca na Jerusalem. Esei tabata berdaderamente un ocasion gozoso. També tabatin cantamento di alabanza pa Jehova cu música instrumental ne tempo cu rey Salomón a dedicá e tempel den Jerusalem. Nos ta leza den 2 Crónica 5:​13, 14: “A sosode cu asina cu trompetero i cantante tabata manera uno haciendo hende tende un solo sonido alabando i agradiciendo Jehova, i asina cu nan a hiza e sonido cu trompet i cimbal i cu instrumento di cantica i cu alabanza pa Jehova, ‘pasobra e ta bon, pasobra te na tempo indefinitivo ta su bondad amoroso,’ e cas mes a yena cu nubia, i cas mes di Jehova, i sacerdote no por a para i ministrá pa motibo dje nubia; pasobra e gloria di Jehova a yena e cas di e Dios berdadero.” Kico esei ta mustra? Cu Jehova tabata scucha tal alabanza melodioso i també a gusté, segun cu e nubia sobrenatural a indica. Despues, tabatin cantamento di dos coro ne tempo di inauguracion di muraya di Jerusalem den e tempo di Nehemías.​—⁠Nehemías 12:​27-42.

 8. Kico ta mustra cu israelita a tuma cantamento na serio?

⁸ Realmente, cantamento tabata un parti asina importante di adoracion den e tempel cu 4.000 levita tabata apartá pa sirbishi musical. (1 Crónica 23:​4, 5) Eseinan a compañá e cantantenan. Música, specialmente cantante, a ocupa un lugar importante den adoracion, no necesariamente pa inculca asunto mas importante dje Ley, sino pa percura e spiritu apropiado pa adoracion. Esei a yuda israelita adora Jehova cu spiritu. Tuma nota dje preparacion i atencion prestá na detaye cu tabata dedicá na tal rasgo: “E cantidad di nan hunto cu nan rumanan entrená den cantamento pa Jehova, tur experto, a yega di ser dos cien i ochentiocho.” (1 Crónica 25:⁠7) Tuma nota ki serio nan a tuma e cantamento di alabanza pa Jehova. Nan tabata entrená den cantamento i tabata experto!

 9. E Scritura Griego Cristian ta duna cua énfasis na cantamento?

⁹ Biniendo ne promé siglo di nos era común, kico nos ta haya? Jesús, riba anochi di su traicion, cu tanto cos importante den su mente, toch el a sinti e necesidad di conclui su celebracion dje pascu hudío i e institucion di Conmemoracion di su morto cu cantamento di alabanza pa Jehova. (Mateo 26:30) També, nos ta leza cu “rond di meianochi,” Pablo i Silas, despues di a ser zutá i encarcelá, “tabata reza i alaba Dios cu cantica; sí, prisionero tabata téndenan.”​—⁠Echo 16:⁠25.

Cantamento di alabanza​—⁠un parti importante di nos adoracion

10. E Palabra di Dios ta duna cua mandamento en cuanto alabanza di dje den cantamento?

¹⁰ Tal bez bo ta kere cu e cantamento di cantica di alabanza no ta suficientemente importante pa bo presta atencion na dje di curazón? Si ta asina, bo no mester reevaluá e asunto, den bista dje importancia cu Jehova Dios i Jesucristo ta duna cantamento di alabanza? Sí, e Palabra di Dios ta yen di mandamento pa alaba Jehova i canta alabanza pe! Por ehempel, den Isaías 42:​10, nos ta leza: “Canta pa Jehova un cantica nobo, su alabanza for di extremo dje tera, boso cu ta baha na lamá i na loke ta yené, isla i boso cu ta habitánan.”​—⁠Mira també Salmo 96:1; 98:⁠1.

11. Apóstol Pablo a duna cua conseho en cuanto cantamento?

¹¹ Apóstol Pablo tabata sa cu cantamento por hiza nos spiritu, p’sei el a consehános dos biaha tocante e asunto. Nos ta leza den Efesio 5:​18, 19: “Sigi yena boso cu e spiritu, papiando cu boso mes cu salmo i alabanza pa Dios i cantica spiritual, cantando i compañando boso cu música den boso curazón pa Jehova.” I den Colosense 3:​16, nos ta leza: “Laga e palabra di Cristo biba den boso ricamente den tur sabiduría. Sigi siña i conseha otro cu salmo, alabanza pa Dios, cantica spiritual cu gracia, cantando den boso curazón pa Jehova.”

12. Cua ehempel nos tin di cu nos canticanan ta yúdanos siña i conseha un e otro?

¹² Tuma nota cu den cada caso Pablo a menciona cantamento bez tras bez ora el a menciona ‘salmo, alabanza pa Dios, cantica spiritual, cantamento cu música den boso curazón.’ També, el a introduci su palabra dirigí na colosense, bisando cu dje manera ei nos por “siña i conseha otro.” I nos siguramente ta haci esei, manera nos por mira den título mes di nos cantica​—⁠“Tur creacion, alaba Jehova!” (númber 5), “Sea firme, inmovible!” (númber 10), “Sea gozoso pe speranza di Reino!” (númber 16), “No teme nan!” (númber 27), “Alaba Jehova nos Dios!” (númber 100), pa menciona algun ehempel so.

13. Con e “sclabo fiel i prudente” a mustra e importancia di cantamento como un parti di nos adoracion?

¹³ Na armonía cu tal mandamento, “e sclabo fiel i prudente” a haci arreglo pa nos reunion​—⁠di congregacion, asamblea di circuito, dia special di asamblea, asamblea di districto, i asamblea internacional​—⁠cuminza i termina cu cantamento di cantica di alabanza. (Mateo 24:45) Además, cantica ta riba e programa pa ser cantá na otro tempo durante tal reunion. Siendo cu nos reunion generalmente ta cuminza cu e cantamento di un cantica di alabanza, nos no tin cu percura pa ser puntual, na ora pa participa den tal parti di nos adoracion? I siendo cu reunion ta termina cu cantamento, nos no mester keda te ne cantica final i e oracion cu ta sigié un bez?

14. Cua ehempel nos tin di scogimento di cantica apropiado pa nos programa?

¹⁴ Cantica den nos reunion ta ser escogí cuidadosamente pa armoniza cu e programa. Por ehempel, ne asamblea di districto “Siñanza Divino” na 1993, cantica númber 191, “Haci e berdad di bo mes,” cu ta anima hende cristian pa opone Satanás, e mundo, i e carni pecaminoso, a sigi un bez e tres discurso cu a trata cu tal enemigo. Di igual manera, cantica númber 164, “Yiu, regalonan precioso di Dios,” cu ta abunda cu conseho pa mayornan, a sigi net despues di un discurso enfatizando obligacion di mayornan pa entrená nan yiunan. Cantica númber 70, “Sea manera Jeremías,” tabata promé cu un serie di discurso basá riba profecía di Jeremías. I despues di un simposio riba varios aspecto di nos sirbishi di Reino a bini cantica númber 156, “Mi sí kier,” un cantica mashá relacioná cu sirbishi. Nan ta eherce e mesun cuidao pa scoge cantica pe Estudio di Toren di Vigilancia, i Reunion di Sirbishi, i e Scol di Ministerio Teocrático. Ta di comprende cu ora anciano ta duna discurso público i ta indica e cantica pa canta na principio dje programa, nan mester scoge un cantica cu ta apropiado pe tema dje discurso.

15. Con e presidente dje reunion por aumenta aprecio pe cantica pa canta?

¹⁵ Ora nan ta anuncia e cantica pa canta, e presidente por aumenta aprecio pe cantica mencionando su título of tema. Nos no ta canta cifra sino tema bíblico. També, e por yuda e congregacion aprecia e cantica mas si e ta menciona e texto skirbí bao dje título. Anto també, algun comentario ta apropiado, tal como e cantamento di tur hende conforme cu e spiritu dje cantica.

Mustra aprecio pe bondad di Jehova cu cantamento

16. Con nos por drenta den e spiritu di nos canticanan?

¹⁶ Siendo cu letra di nos cantica di alabanza ta yen di nificacion, nos tin cu concentrá riba e palabra ora nos ta cántanan. Nos kier drenta den e spiritu di cada cantica. Algun cantica, tal como esnan cu ta trata cu amor, un fruta di spiritu, ta di curazón. (Galatio 5:22) Nos ta canta eseinan cu intensidad i calor. Otronan ta gozoso, i nos mester purba di cántanan cu felicidad. Otronan ainda ta cantica vigoroso di marcha, i nos mester canta eseinan cu entusiasmo i confianza fuerte. Den nos Scol di Ministerio Teocrático, nos ta ser consehá pa expresa calor i sintimento i també entusiasmo den nos presentacion. Ta asta mas importante pa desplega calor, sintimento, i entusiasmo ora nos ta canta e canticanan.

17. (a) Nos no kier haya cua reprendimento duná na israelita infiel ser aplicá na nos cantamento? (b) Cua resultado tin ora nos ta tuma na serio e conseho cu nos canticanan ta contene?

¹⁷ Si nos ta canta cantica di alabanza cu nos pensamento riba otro cos, sin aprecia completamente e nificacion dje palabra, nos lo no ta parecido di israelita infiel cu a recibi reprendimento pasobra, mientras cu nan a alaba Dios cu nan lip, nan curazón tabata leu foi dje? (Mateo 15:⁠8) Nos no kier pa tal reprendimento aplica na nos manera di canta cantica di alabanza, no ta berdad? Door di canta cantica di alabanza cu aprecio, nos por estimula no solamente nos mes sino també hende cu ta rond di nos den Salón di Reino, incluyendo hovenan. Sí, si tur hende cu ta canta den nos Salón di Reino ta tuma na serio e conseho cu tal cantica ta contene, esei lo ser un animacion fuerte pa ser celoso den e ministerio i evita trampa di malecho.

18. E cantamento di cantica di alabanza a tene cua efecto riba un cierto hende muher?

¹⁸ Bez traz bez, hende djafó ta keda impresioná pa nos cantamento di cantica di alabanza. Anteriormente E Toren di Vigilancia a publica lo sigiente: “Mustrando cu [nos] cantamento por yuda també pa edifica hende den un conocimento exacto di Jehova Dios ta un experencia di un hende muher cu tabata bautizá ne asamblea di 1973 ‘Victoria Divino’, Yankee Stadium, New York. El a haci su promé bishita na un Salón di Reino local riba su mes cuenta i a keda pe dos reunion. Ora e congregacion a canta . . . ‘Fiha bo bista riba e premio!’ tanto e palabra como e manera cu nan tabata cantá a impresioné asina tanto cu el a decidi cu esei ta e lugar unda e kier keda. Despues el a acercá un ruman i a pidi un estudio bíblico, i a haci progreso rápido te cu el a bira un testigo cristian di Jehova.”

19. Cua animacion final ta ser duná en cuanto cantamento di cantica di alabanza cu tur nos alma?

¹⁹ Na casi tur reunion di nos, tin relativamente poco oportunidad pe auditorio expresa nan sintimento i aprecio. Pero nos tur por expresa nos sintimento tocante e bondad di Jehova participando di curazón den cantamento di cantica di alabanza. Además, ora nos ta reuni hunto, nos no tin un bon beis? Pues, nos mester tin gana di canta! (Santiago 5:13) Realmente, te ne grado cu nos ta aprecia e beneficencia di Jehova i su bondad inmerecida, nos lo canta alabanza di dje cu tur nos alma.

Con bo ta contestá?

◻ Menciona dos motibo básico pa alaba Jehova Dios.

◻ Menciona varios manera pa nos alaba Jehova Dios.

◻ Cua ta un manera di mas bonita pa nos alaba Jehova Dios?

◻ Cua ehempel bíblico tin dje alabanza di Jehova den cantamento?

◻ Con nos por canta cantica di alabanza cu aprecio?

[Kuadro na página 11]

Canta e Canticanan!

Ta parce cu algun ruman tin un poco dificultad pa siña varios cantica. Sin embargo, algun congregacion no a contra cu ningun problema grandi den e cantamento dje mayor parti di tal cantica. Kizás un poco mas esfuerzo so ta tur loke ta necesario pa siña loke na principio por parce straño. Despues di conoce tal cantica, hopi bez e congregacion ta apreciánan mas cu esnan cu no ta exigi ningun esfuerzo pa siña. Anto tur hende den e congregacion por cántanan cu confianza! Sí, nan por canta tur cantica!

[Kuadro na página 12]

Canta Cantica di Alabanza na Get-together Social

Nos cantamento di cantica di alabanza no tin cu ser limitá na Salón di Reino. Pablo i Silas a canta alabanza pa Jehova ora nan tabata den prisón. (Echo 16:25) I disípel Santiago a bisa: “Tin algun cu ta síntinan contentu? Lagué canta alabanza pa Dios.” (Santiago 5:​13, nota) Den get-together social tur hende ta den bon beis. Pues, pakico no canta cantica di alabanza? Esei por ta specialmente gozoso si tin tocamento di piano of guitarra hunto cu e cantamento. Toch, tin grabacion di piano riba caset di cantica di alabanza; hopi ruman tin album di tal caset. Nan no solamente ta bon pa usa pa cantamento sino també ta bonita pa música di fondo.

[Caption on page 8]

Despues di nan liberacion na Lamá Corrá, Israel a expresa nan gozo cu cantamento

[Caption on page 10]

Cantamento gozoso ta un parti di adoracion cristian djawe