LÈS 34

Kiko Nos Por Hasi pa Mustra Yehova Ku Nos Ta Stim’é?

Edishon Imprimí

Bo kurso di Beibel a yuda bo stima Dios mas ainda? Lo bo tin gana di hasi bo amistat kuné mas fuerte? Si esei ta e kaso, kòrda ku ora Yehova mira bo amor p’e krese, su amor pa bo tambe lo krese i lo e kuida bo mas ainda. Kon bo por mustra Yehova ku bo ta stim’é?

1. Kon nos ta mustra Yehova ku nos ta stim’é?

Nos ta mustra Yehova ku nos ta stim’é ora nos ta obedes’é. (Lesa 1 Huan 5:3.) Yehova no ta obligá ningun hende pa obedes’é. Al kontrario, e ta duna kada un di nos e oportunidat pa skohe si nos ke obedes’é òf nò. Dikon e ta hasi esei? Yehova ke pa nos ta “obediente di kurason.” (Romanonan 6:17) Ku otro palabra, e no ke pa bo obedes’é pasobra bo ta sinti bo obligá pa hasi esei, sino pasobra bo ta stim’é. Sekshon 3 i 4 di e buki akí lo yuda bo mira ku bo por mustra Yehova ku bo ta stim’é ora bo hasi loke ta agrad’é i evitá loke e ta odia.

2. Dikon por ta difísil pa bo mustra Yehova ku bo ta stim’é?

Beibel ta bisa: “Un persona hustu ta hañ’é ku hopi difikultat.” (Salmo 34:19) Nos tur ta lucha ku nos propio imperfekshonnan. Ademas, nos tin ku trata ku problema ekonómiko, inhustisia i otro difikultat. Ora nos ta pasa den difikultat, por ta difísil pa hasi loke Yehova ta pidi di nos. Esei ta asina pasobra ta mas fásil pa hasi loke no ta bon ku obedesé Yehova. Pero ora bo konfia den Yehova i hasi loke e ta bisa, bo ta mustr’é ku bo ta stim’é mas ku tur otro kos. Di e manera ei, lo bo mustra ku bo ta leal na dje i Yehova na su turno tambe lo ta leal na bo. Hamas lo e bandoná bo.—Lesa Salmo 4:3.

KIKO MAS NOS POR SIÑA?

Laga nos wak dikon Yehova ta bira kontentu ora nos ta obedes’é i kiko por yuda nos keda leal na dje.

3. Un akusashon ku ta enbolbé bo

Den e buki Yòb, nos ta mira ku Satanas a lansa un akusashon kontra Yòb i tur otro hende ku ke sirbi Yehova. Lesa Yòb 1:1, 6–2:10. Despues, analisá e siguiente preguntanan:

Segun Satanas, pa ki motibu Yòb tabata obedesé Yehova?—Wak Yòb 1:9-11.
Ki akusashon Satanas a lansa kontra tur hende, inkluso abo?—Wak Yòb 2:4.

Lesa Yòb 27:5b. Despues, analisá e siguiente pregunta:

Kon Yòb a demostrá ku di bèrdat e tabata stima Yehova?

Satanas ta desafiá Yehova. E ta kuestioná integridat di Yòb, kende ta yen di blufein. Ademas, e ta kuestioná integridat di un ruman muhé ku ta sirbi Yehova den nos tempu. — Yòb a demostrá ku e tabata stima Yehova ora el a keda leal na dje

Nos ta demostrá ku nos ta stima Yehova ora nos keda leal na dje

4. Hasi Yehova su kurason kontentu

Lesa Proverbionan 27:11. Despues, analisá e siguiente preguntanan:

Kon Yehova ta sinti ora nos hasi loke ta sabí i obedes’é? Dikon Yehova ta sinti asina?

5. Bo por keda leal na Yehova

Nos amor pa Yehova ta motivá nos pa papia ku otro hende tokante dje. Ademas, komo ku nos ke ta leal na Yehova, nos lo papia tokante dje asta ora no ta fásil. Pasa e VIDIO. Despues, analisá e siguiente preguntanan:

VIDIO: Defendé Bo Fe Apesar di Oposishon (5:09)

Bo sa haña difísil pa papia ku otro hende tokante Yehova?
Den e vidio, kiko a yuda Grayson vense su miedu?

Ta mas fásil pa nos ta leal na Yehova ora nos ta stima loke e ta stima i odia loke e ta odia. Lesa Salmo 97:10. Despues, analisá e siguiente preguntanan:

Si bo pensa riba tur loke bo a siña te ku awor, kiko ta algun kos ku Yehova ta stima i kiko ta algun kos ku e ta odia?
Kon bo por siña stima loke ta bon i odia loke ta malu?

6. Ora nos ta obedesé Yehova, esei ta benefisiá nos

Semper ta mihó pa nos obedesé Yehova. Lesa Isaías 48:17, 18. Despues, analisá e siguiente preguntanan:

Bo ta pensa ku Yehova semper sa loke ta mihó pa nos? Dikon bo ta pensa esei?
Kon bo a benefisiá te ku awor di bo kurso di Beibel i di tur loke bo a siña tokante Yehova, e Dios berdadero?

LOKE HENDE SA BISA: “Dios no ta wòri ku loke mi ta hasi.”