Laga e Poder di Custumber Ta na Bo Beneficio

E HOMBER a biba 12 aña den un suburbio di Aténas. Tur dia despues di trabou, e tabata pasa e mésun caminda pa bai cas. Despues el a muda bai un otro suburbio na otro banda di stad. Un dia despues di trabou el a sali pa bai cas. Ta te ora el a hañ’é den su bario bieu el a realisá cu el a coge caminda robes. E poder di custumber a pone cu el a bai su cas bieu!

No ta nada straño cu tin bes hende ta yama e poder di custumber nos segundo naturalesa, un influencia cu ta afectá nos bida den maneranan poderoso. Den e sentido aki por compará custumber cu candela. Como lus, un candela por ta masha bon biní den scuridad, i e por keinta nos curpa i nos cuminda. Sin embargo, tambe candela por ta un enemigu feros cu ta destruí bida i pertenencia. Esei ta e caso tambe cu custumber. Si nan ta bon custumber, nan ta di gran beneficio. Pero tin cu por ta destructivo tambe.

Den caso di e homber mencioná den e introduccion, e poder di custumber a cost’é solamente e tempu cu el a keda pegá den e tráfico di stad. Ora ta trata di cosnan mas importante, custumber por duna nos éxito of hiba nos na calamidad. Considerá algun ehempel di bida real hañá den Bijbel cu ta mustra con custumber por yuda of stroba nos sirbishi na Dios i nos relacion cuné.

Ehempelnan Bíblico di Bon Custumber i Mal Custumber

Noe, Job i Daniel tabata bendicioná cu un bon relacion cu Dios. Bijbel ta elogiá nan pa “nan husticia.” (Ezekiel 14:14) Ta significativo cu e manera cu tur e tres hombernan ei a hiba nan bida ta mustra cu nan a desaroyá bon custumbernan.

Dios a manda Noe traha un arca, un barcu mas grandi cu un veld di futbol i mas haltu cu un edificio di cincu piso. Un proyecto grandi asina lo tabata abrumador pa cualkier trahadó di boto di antigwedad. Noe i shete miembro di su famia a construí e arca sin yudansa di ekipo moderno. Huntu cu esei, Noe a sigui predicá na su contemporáneonan. Nos por ta sigur cu el a percurá tambe pa e necesidadnan spiritual i físico di su famia. (2 Pedro 2:5) Pa Noe por a cumpli cu tur esaki, e mester tabatin bon custumber di traha. Tambe Noe a ser registrá den historia bíblico como un persona cu “a cana cu e Dios berdadero. . . . Noe a procedé na haci conforme cu tur loke Dios a mand’é.” (Génesis 6:9, 22; 7:5) Ya cu Bijbel a yama Noe un persona “sin culpa,” e mester a sigui cana cu Dios despues di Diluvio i asta despues cu e rebelion contra Jehova a surgi na Babel. Sí, Noe a sigui cana cu Dios te dia cu el a muri na edad di 950 aña.—Génesis 9:29.

Job su bon custumbernan a yuda hacié un homber “sin culpa i recto.” (Job 1:1, 8; 2:3) E tabatin e custumber di funcioná como e sacerdote di famia i a ofrecé sacrificio na fabor di su yunan despues di cada un di nan banketenan, pa por si acaso nan “‘a peca i a maldicioná Dios den nan curason.’ Esei tabata e manera cu semper Job tabata haci.” (Job 1:5) Custumbernan cu a drei rond dje adoracion di Jehova, sin duda tabatin un lugá prominente den e famia di Job.

Daniel a sirbi Jehova “cu constancia” durante henter su bida. (Daniel 6:16, 20) Ki bon custumbernan spiritual Daniel tabatin? Na promé lugá, e tabata haci oracion regularmente na Jehova. Maske tabatin un decreto real contra e práctica aki, “tres bes pa dia [Daniel] tabata cai na rudia i haci oracion i ofrecé alabansa dilanti su Dios, manera e tabata haci regularmente.” (Daniel 6:10) E no por a stop cu su custumber di resa na Dios, ni ora esei a pone su bida na peliger. No tin duda cu e custumber aki a fortalecé Daniel p’e por a hiba un bida di integridad excepcional na Dios. Probablemente, Daniel tabatin tambe e bon custumber di studia i meditá profundamente riba e promesanan emocionante di Dios. (Jeremías 25:11, 12; Daniel 9:2) E bon custumbernan aki sigur a yud’é wanta te na fin, coriendo e careda di bida fielmente te na su final.

Na contraste, a bai Dina malu debí na un mal custumber. E “tabatin e custumber di bishitá e yu muhernan dje pais,” cu no tabata adoradó di Jehova. (Génesis 34:1) E custumber aki cu a parce inofensivo, a hiba na desaster. Di promé, el a ser violá dor di Síkem, un yoncuman cu hende a considerá “esun mas onorabel di henter e cas di su tata.” Despues, e sed pa vengansa di dos ruman homber di Dina a pone nan mata tur homber den henter un stad. Esta un resultado teribel!—Génesis 34:19, 25-29.

Con nos por haci sigur cu nos custumbernan lo beneficiá nos i no perhudicá nos?

Haciendo Uso di Custumber

Un filósofo a yega di skirbi cu ‘custumber ta bira destino.’ Pero no tin nodi ta asina. Bijbel ta mustra masha cla cu nos por scoge pa cambia nos mal custumbernan i cultivá esnan bon.

Bon custumber ta haci un bida cristian mas eficas i cu un ritmo cu ta mas fácil pa mantené. Alex, un cristian di Grecia, ta bisa: “E custumber di pega na un programa pa cumpli cu vários tarea ta scapa mi hopi tempu balioso.” Theophilus, un anciano cristian ta mustra cu e custumber di planea cos ta yud’é pa ta mas eficas. E ta bisa: “Mi ta plenamente convencí cu si no tabata p’e custumber di planea bon, lo mi no por a cumpli cu mi obligacionnan cristian exitosamente.”

Bijbel ta urgi nos como cristian pa “sigui cana ordenadamente den e mésun rutina aki.” (Filipensenan 3:16) Un rutina ta encerá un manera acustumbrá di haci algu segun un procedura establecí. E bon custumbernan ei ta beneficiá nos pasobra nos no tin cu gasta tempu pa deliberá riba cada paso, pasobra ya caba dor di poder di custumber nos a establecé un bon patronchi cu nos ta sigui. Custumbernan fuerte ta bira algu cu nos ta haci casi automáticamente. Mescos cu custumber di core auto safe ta pone cu den un instante un shofer por tuma decision cu ta salba bida ora e hañ’é cu peliger riba caminda, asina bon custumbernan por yuda nos tuma decision apropiado lihé segun cu nos ta cana riba e caminda cristian.

Un escritor ingles, Jeremy Taylor, a expres’é asin’akí: “Custumber ta yu di accion.” Si nos tin bon custumber, nos por haci loke ta bon sin masha dificultad. Por ehempel, si como minister cristian nos tin e custumber di participá regularmente den e trabou di predicá, nos ta haña cu ta mas fácil i mas dushi pa sali den sirbishi di veld. Relacioná cu e apostelnan nos ta lesa cu “tur dia den e tempel i di cas pa cas nan a sigui sin stop siñando i declarando e bon nobo tocante e Cristo, Jesus.” (Echonan 5:42; 17:2) Di otro banda, si ta de bes en cuando so nos ta participá den e ministerio, kisas nos lo ta nervioso i lo tin mester di mas tempu pa cai den e ritmo cu lo laga nos sinti nos mes cómodo den e actividad cristian vital aki.

Mescos ta e caso cu otro aspectonan di nos rutina cristian. Bon custumber por yuda nos pa ta regular den ‘lesa e Palabra di Dios di dia i anochi.’ (Hosué 1:8; Salmo 1:2) Un cierto cristian tin e custumber di lesa Bijbel 20 pa 30 minuut promé cu e bai drumi. E ta ripará cu asta ora e ta cansá, i e bai drumi sin lesa Bijbel, e no por drumi bon. E tin cu lanta i atendé e necesidad spiritual ei. Tambe e bon custumber aki a yud’é cu pa vários aña caba e por a lesa Bijbel completo den un aña.

Nos Ehempel, Jesucristo, tabatin e custumber di asistí na reunionnan caminda Bijbel a ser considerá. “Segun su custumber riba dia di sabat, el a drenta e snoa, i a lanta pa lesa.” (Lucas 4:16) Pa loke ta Joe, un anciano cu tin un famia grandi i cu tin cu traha te lat, custumber a yuda producí den dje un necesidad i deseo pa asistí n’e reunionnan regularmente. E ta bisa: “E custumber aki ta yuda mi sigui padilanti, ya cu e ta duna mi e fortalesa spiritual cu mi tin tantu mester di dje pa por tin éxito den trata cu tarea difícil i cu problema.”—Hebreonan 10:24, 25.

Den e careda cristian pa alcansá bida, e custumbernan ei ta indispensabel. Un informe for di un pais caminda hende a persiguí e pueblo di Jehova, ta bisa: “Esnan cu tin bon custumbernan spiritual i un aprecio profundo p’e berdad no tin problema pa para firme ora nan haña nan cu prueba, pero esnan cu den “tempu faborabel” ta falta reunion, ta iregular den sirbishi di veld i ta comprometé nan fe den cosnan chikitu, hopi bes ta cai ora nan haña nan cu prueba ‘ardiente.’”—2 Timoteo 4:2.

Evitá Mal Custumber, Probechá di Esnan Bon

Hende a yega di bisa cu ‘un persona mester cultivá solamente e custumbernan cu e kier laga domin’é.’ Mal custumber en berdad ta un doño opresivo. Sin embargo, bo por stop cu e custumbernan ei.

Tabatin un tempu cu Stella tabata adicto na wakmentu di television. E ta admití: “Tras di tur mal custumber cu mi tabatin, generalmente tin un motibu ‘inocente.’” Esei tabata e caso cu su wakmentu di mas di television. E tabata bisa su mes cu lo e wak television djis como “un manera pa relahá un tiki” of pa “un cambio di rutina.” Pero su hábito a bai for di man, i tabata ten’é dilanti television pa oranan largu. “Como mínimo, e mal hábito aki a stroba mi progreso spiritual,” e ta bisa. Cu esfuerso i determinacion, finalmente el a baha e cantidad di tempu cu e tabata dedicá na wak television i a bira mas selectivo. Stella ta bisa: “Semper mi ta purba corda pakico mi kier a stop cu e hábito aki, i mi ta dependé riba Jehova pa mi cumpli cu mi decision firme.”

Un cristian cu yama Charalambos ta mustra cu ta e mal custumber di posponé cos, a strob’é di progresá spiritualmente. “Ora mi a realisá cu e custumber di posponé cos ta perhudicial, mi a cuminsá traha pa cambia mi bida. Ora mi pone meta, mi ta planea specíficamente con i ki dia lo mi cuminsá traha pa logra nan. E solucion tabata pa ser regular den cumpli cu mi decisionnan i loke mi a planea, i esei a keda un bon custumber te awe.” Sí, bon custumber ta e mihó remplaso pa mal custumber.

Nos asociacion tambe por pone nos desaroyá sea bon custumber of mal custumber. Mescos cu bon custumber ta pega, mal custumber tambe ta pega. Mescos cu “mal asociacion ta daña custumbernan útil,” asina tambe bon asociacion lo por duna nos ehempel di custumbernan saludabel cu nos por imitá. (1 Corintionan 15:33) Mas importante ainda, custumbernan por sea fortalecé of debilitá nos relacion cu Dios. Stella ta bisa: “Si nos tin bon custumber, nan ta haci nos lucha pa sirbi Jehova mas fácil. Si nan ta perhudicial, nan ta obstaculisá nos esfuersonan.”

Cultivá bon custumber, i laga nan guia bo. Nan lo ta un forsa poderoso i beneficioso den bo bida.

[Plachi na página 19]

Mescos cu candela, custumber por ta beneficioso of destructivo

[Plachi na página 21]

Jesus tabatin e custumber di ta den snoa riba sabat pa lesa e Palabra di Dios

[Plachinan na página 22]

Bon custumber spiritual ta fortalecé nos relacion cu Dios