Un Bida Nobo pa Nos Antepasadonan

BIJBEL, e Palabra di Dios, ta siña cu tur hende ta pasa automáticamente pa un bida cu ta sigui den e region di spiritu ora nan muri? No, e no ta siña esei. Bijbel ta presentá un speransa maraviyoso di bida despues di morto, pero no den e manera cu hopi hende ta pensa.

Considerá loke Bijbel ta bisa tocante nos promé antepasado, Adam. Jehova a form’é “for di stof dje tera.” (Génesis 2:7) Adam tabatin e oportunidad di biba pa semper den felicidad riba tera. (Génesis 2:16, 17) Sin embargo, el a rebelá contra su Creador amoroso, i e resultado tabata morto.

Unda Adam a bai ora el a muri? Dios a bis’é: “[Lo] bo bolbe n’e suela, pasobra for di dje bo a ser tumá. Pasobra stof bo ta i na stof lo bo bolbe.”—Génesis 3:19.

Unda Adam tabata promé cu Jehova a cre’é for di stof? Ningun caminda. E no tabata existí. Pues ora Jehova a bisa cu Adam lo a “bolbe n’e suela,” e por a nificá solamente cu Adam lo a bira sin bida atrobe, mescos cu stof. Adam no a ‘pasa over’ p’e bira e fundador di un mundu di spiritunan di antepasado. Tampoco e no a pasa pa un bida di gloria den cielu ni pa un eternidad di sufrimentu den un lugá di tormento. E único transicion cu el a haci tabata for di bida pa un estado sin bida, for di un estado di existencia pa unu di inexistencia.

Kico dje resto di humanidad? E desendientenan di Adam tambe ta stop di existí ora nan muri? Bijbel ta contestá: “Tur [tantu hende como bestia] ta bai na un solo lugá. Nan tur a yega di existí di stof, i nan tur ta regresando na stof.”—Eclesiástes 3:19, 20.

Condicion dje Mortonan

Sí, e mortonan ta sin bida, incapas pa tende, mira, papia of pensa. Por ehempel, Bijbel ta bisa: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto . . . Nan amor i nan odio i nan yalursheid a perecé caba.” Tambe Bijbel ta declará: “No tin trabou ni formacion di proyecto ni conocimentu ni sabiduria den Sheol [graf], e lugá na unda bo ta bai.”—Eclesiástes 9:5, 6, 10.

P’esei, segun e Palabra di Dios, miéntras cu hende ta na bida, nan ta conciente di morto. Sin embargo, ora nan muri, nan no ta conciente di nada. Nan no ta para banda di nan propio cadaver, observando loke ta ser hací cuné. Den e condicion di inexistencia no tin ni placer ni dolor, tampoco goso ni pena. E mortonan no ta conciente di pasamentu di tempu. Nan ta den un estado inconciente mas profundo cu cualkier soño.

Job, un sirbidor di Dios di tempu antiguo, tabata sa cu hende no a sigui biba despues di morto. Tambe el a comprendé cu sin Dios su intervencion, lo no tin speransa di bini bek na bida atrobe. Job a bisa: “Un homber físicamente capacitá ta muri i ta drumi vencí; i un homber terenal ta saca su último rosea, i na unda e ta? [E] tin cu cai drumi i no ta lanta ariba.” (Job 14:10, 12) Job siguramente no a spera cu ora el a muri lo el a uni cu su antepasadonan den un mundu di spiritu.

E Speransa di Resureccion

Ya cu e bibunan ta stop di existí ora nan muri, e pregunta crucial ta esun cu Job a haci ora el a pasa na puntra: “Si un homber físicamente capacitá muri e por biba atrobe?” Job mes a duna e contesta aki: “Tur e dianan di mi sirbishi obligatorio [tempu den graf] lo mi spera, te ora mi relevo yega. Lo bo [Jehova] yama, i ami mes lo respondé bo. Pa e obra di bo mannan lo bo sinti un anhelo.”—Job 14:14, 15.

Cu otro palabra, aunke Job lo a pasa pa inexistencia, Dios lo no a lubid’é. Job tabatin fe cu e tempu lo yega ora Jehova Dios lo ‘yam’é’ bek na bida pa medio di un resureccion.

Jesucristo, e Yu di Dios, a mustra cu Job su speransa den e resureccion tabata unu realístico. Jesus a proba cu e mortonan por ser lantá. Con? Dor cu e mes a resucitá hende morto! E no tabata presente pa resucitá Job, pero ora e tabata riba tera Jesus a resucitá e yu di un biuda for dje stad di Nain. Tambe Jesus a lanta na bida e yu muher di 12 aña di edad di un homber yamá Jairo. I el a resucitá su amigu Lázaro, kende tabata morto pa cuater dia.—Lucas 7:11-15; 8:41, 42, 49-56; Juan 11:38-44.

Ademas di efectuá e milagernan aki, Jesus a papia di un gran resureccion den futuro. El a bisa: “E ora ta bini den cua tur esnan cu ta den graf memorial lo tende su bos i lo sali.” (Juan 5:28, 29) Despues, apostel Pablo, kende Jehova a usa pa resucitá un homber hóben, tambe a expresá fe den un futuro resureccion. El a bisa: “Mi tin speransa en cuanto Dios . . . cu lo bai tin un resureccion di tantu e hustunan como e inhustunan.”—Echonan 20:7-12; 24:15.

E referencianan bíblico aki na un futuro resureccion no ta relacioná cu un bida cu ta sigui den e region di spiritu. Nan ta señalá n’e tempu ora miyones dje mortonan lo regresá na bida den curpa físico aki mes riba tera. Esnan resucitá aki lo no ta hende cu no tin memoria di nan bida anterior riba tera. Nan lo no nace di nobo como baby. Na lugá di esei, nan lo ta e mésun personanan cu nan tabata ora nan a muri, poseendo e mésun memoria i personalidad. Nan lo por ser reconocé dor di nan mes i dor di otro hende. Lo ta ki un goso ora e hendenan aki uni atrobe cu nan amigu i famianan! I lo ta ki excitante pa topa nos antepasadonan!

Resureccion na Bida den Cielu

Jesus no a bisa cu algun hende lo bai cielu? Sí, el a bisa esei. Riba e anochi promé cu el a ser matá, el a bisa: “Den e cas di mi Tata tin hopi habitacion. . . . mi ta bai mi caminda pa prepará un lugá pa boso. Tambe, si mi bai mi caminda i prepará un lugá pa boso, mi ta bini atrobe i lo ricibí boso na cas cerca mi mes, pa unda cu mi ta boso tambe por ta.” (Juan 14:2, 3) Jesus tabata papiando cu su fiel apostelnan, pero su palabranan no ta nificá cu tur bon hende ta bai cielu.

Jesus a mustra cu esnan resucitá na cielu mester cumpli cu mas rekisitonan cu djis biba bon. Un rekisito ta pa tin conocimentu exacto di Jehova i di su propósitonan. (Juan 17:3) Otro rekisitonan ta pa ehercé fe den Jesucristo su sacrificio di rescate i obedecé Dios. (Juan 3:16; 1 Juan 5:3) Un otro rekisito mas ta pa “nace di nobo” como un cristian bautisá ungí cu Dios su spiritu santu. (Juan 1:12, 13; 3:3-6) Un otro rekisito pa bida celestial ta pa wanta mescos cu Jesus a wanta, demostrando di ta fiel na Dios asta te na morto.—Lucas 22:29; Revelacion 2:10.

Tin un motibu pa tal rekisitonan haltu. Esnan resucitá na cielu tin un trabou importante di haci. Jehova sa cu gobiernunan humano nunca lo por manehá asuntunan riba tera exitosamente. P’esei el a haci areglo pa un gobiernu of Reino celestial, cu lo goberná riba humanidad. (Mateo 6:9, 10) Jesus lo ta Rey dje Reino ei. (Daniel 7:13, 14) Algun hende selectá for di tera i resucitá na cielu lo goberná cuné. Bijbel a profetisá cu esnan resucitá aki lo bira “un reino i sacerdotenan pa nos Dios, i nan [lo] reina como rey riba e tera.”—Revelacion 5:10.

Gran cantidad di hende lo yena e rekisitonan pa un resureccion celestial? No. Aunke no ta pa nan mes falta, mayoria di esnan cu ta drumi den morto no ta cualificá. Hopi di nan tabatin poco of ningun oportunidad pa siña e berdad tocante Jehova i su propósitonan. Nan a biba i a muri sin ningun conocimentu di Jesucristo of dje Reino di Dios.

Jesus a yama esnan cu lo a bai cielu un “trupa chikitu.” (Lucas 12:32) Despues a ser revelá cu e cantidad di esnan “cumprá for dje tera” pa goberná cu Cristo den cielu lo ta 144.000. (Revelacion 14:1-3; 20:6) Aunke 144.000 ta un cantidad suficiente grandi pa ocupá e ‘hopi habitacionnan’ na cua Jesus a referí, e ta chikitu na comparacion cu e miles di miyónes di hende cu a bini for di Adam.—Juan 14:2.

Sucesonan Promé cu e Resureccion Terenal

Laga nos repasá loke nos a considerá te asina leu. Segun Bijbel, esnan cu muri ta sin bida den morto te ora nan ser resucitá dor di Jehova Dios. Algun ta ser resucitá na bida den cielu, unda nan lo goberná cu Jesucristo den e gobernacion di Reino. Mayoria hende lo ser resucitá riba tera, pa bira súbditonan dje Reino ei.

E resureccion terenal ta un dje medionan cu Jehova lo usa pa cumpli cu su propósito p’e tera. Jehova a cre’é “pa ser habitá.” (Isaías 45:18) E mester a bira e cas permanente di humanidad. P’esei, e salmista a canta: “En cuanto e cielunan, na Jehova e cielunan ta pertenecé, pero e tera el a duna n’e yunan di hende.”—Salmo 115:16.

Promé cu e resureccion na bida riba tera cuminsá, cambionan grandi mester tuma lugá. Probablemente lo bo ta di acuerdo cu no tabata e propósito di Dios p’e tera yena cu guera, polucion, crímen i violencia. E problemanan aki ta ser causá dor di hende cu no tin respet pa Dios ni pa su leynan hustu. P’esei, e Reino di Dios lo “causa ruina na esnan cu ta ruinando e tera”—un paso principal pa efectuá su boluntad riba tera. (Revelacion 11:18) E Reino lo destruí tur e malbadonan, lagando e hustunan biba riba e tera pa semper.—Salmo 37:9, 29.

Paradijs riba Tera

Esnan cu ta ser resucitá riba un tera limpi lo ta hende di genio suave i atento cu ta haci loke ta corecto. (Compará cu Mateo 5:5.) Bou dje supervision amoroso dje Reino di Dios, nan lo hiba un bida felis den siguridad. Bijbel ta duna e maraviyoso bistaso delantá aki di condicionnan cu lo prevalecé n’e tempu ei: “[Dios] lo seca tur lágrima di nan wowo, i morto lo no existí mas, tampoco lo tin mas lamento ni sclamacion ni dolor. E cosnan anterior a pasa forbij.”—Revelacion 21:4.

Sí, e tera lo ser transformá den un paradijs. (Lucas 23:43) Pensa kico esei lo nificá! Lo no tin mester mas di hospital ni cas di cuido. Den Paradijs, esnan cu awor ta ser afligí p’e efectonan di behes lo ta fuerte i saludabel atrobe. (Job 33:25; Isaías 35:5, 6) Lo no tin cas casa mortuoria, santana ni kelder mas. Pa medio di su Reino, Jehova lo “traga morto pa semper.” (Isaías 25:8) Bendicionnan asina siguramente por nificá un bida nobo pa nos i pa nos antepasadonan.

[Plachi na página 7]

Esnan resucitá riba tera lo ta súbditonan dje Reino