Beibel Ta un Fuente Konfiabel di e Bèrdat

Atraves di historia, hende di diferente rasa i kultura a yega na e konklushon ku Beibel ta papia bèrdat. Aktualmente tin miónes di hende ta apliká Beibel su konsehonan den nan bida. Pero tin hopi hende ta konsiderá Beibel un buki ouderwets ku yen di kuenta. Kiko abo ta pensa? Bo por haña e bèrdat den Beibel?

Kon bo por haña sa ku Beibel ta konfiabel? Wèl, imaginá ku durante hopi aña un amigu semper a papia bèrdat. Sigur lo bo konsider’é un hende konfiabel, no ta bèrdat? Kiko di Beibel? E ta manera un amigu konfiabel ku semper ta papia bèrdat? Laga nos wak algun ehèmpel.

Eskritor Onesto

E eskritornan di Beibel tabata asina onesto ku hopi biaha nan a papia di nan propio foutnan i defektonan. Por ehèmpel, profeta Yonas a konta kon el a desobedesé Dios. (Yonas 1:1-3) Na fin di e buki ku ta karga su nòmber, Yonas a konta kon Dios a korigié, pero e no a hala indebido atenshon na su mes; e no a bisa kon e mes a kambia su aktitut. (Yonas 4:1, 4, 10, 11) E sinseridat di e eskritornan di Beibel ta mustra ku nan tabata profundamente interesá den e bèrdat.

Konseho Práktiko

Semper Beibel ta duna konseho práktiko pa nos bida di tur dia? Sigur ku sí. Wak por ehèmpel ki konseho Beibel ta duna nos pa nos por tin un bon relashon ku otro hende. “Tur loke boso ke pa hende hasi ku boso, boso tambe mester hasi ku nan.” (Mateo 7:12) “Un kontesta suave ta kita rabia, ma un palabra skèrpi ta lanta rabia.” (Proverbionan 15:1) En bèrdat, e konsehonan di Beibel ta mes práktiko awe ku tempu nan a ser skirbí.

Su Historia Ta Konfiabel

Atraves di aña, hopi deskubrimentu arkeológiko a komprobá eksistensia di vários hende, lugá i suseso menshoná den Beibel. Laga nos wak, por ehèmpel, un detaye interesante. Beibel ta bisa ku den tempu di Nehemías, hende di Tiro (esta, e fenisionan di e stat lehano Tiro) ku tabata biba na Herúsalèm “tabata trese piská i tur sorto di merkansia.”—Nehemías 13:16.

Tin prueba pa konfirmá esei? Sí, arkeólogonan a deskubrí ophetonan di Fenisia na Israel, loke ta indiká ku den pasado e dos nashonnan akí tabata hasi negoshi ku otro. Ademas, na Herúsalèm, e arkeólogonan a deskubrí restu di piská di Mediteráneo. E arkeólogonan ta kere ku komersiante di otro parti a trese e piskánan. Despues di analisá tur prueba, un eksperto a yega na e siguiente konklushon: “Tur kos ta parse di indiká ku loke Nehemías 13:16 ta bisa ta bèrdat, esta ku hende di Tiro a bende piská na Herúsalèm.”

Sientífikamente Konfiabel

Aunke Beibel ta prinsipalmente un buki religioso i históriko, e ta eksakto ora e ta papia di asuntu sientífiko. Laga nos wak un ehèmpel.

Un 3.500 aña pasá, Beibel a bisa ku tera ta kologá “riba nada.” (Yòb 26:7) Esaki ta kompletamente diferente for di e dos mitonan di e tempu ei ku tabata bisa ku tera ta drif riba awa òf ku un turtuga grandi ta karg’é. Un 1.100 aña despues ku e buki di Yòb a ser skirbí, hende a sigui kere ku tera no por ta djis kologá den espasio i ku mester tin algu ta karg’é. Ta solamente tresshen aña pasá, na 1687, Isaac Newton a publiká su obra tokante gravedat i a splika ku un forsa invisibel ta mantené tera na su lugá den espasio. E deskubrimentu sientífiko akí ta konfirmá ku loke Beibel a bisa mas ku 3.000 aña pasá ta bèrdat.

Su Profesianan Ta Konfiabel

Kon konfiabel e profesianan di Beibel ta? Laga nos wak un ehèmpel: e profesia di Isaías tokante e kaida di Babilonia.

Profesia: Den siglo 8 promé ku Kristu, e eskritor di Beibel, Isaías, a profetisá ku Babilonia—ku despues lo a bira e kapital di un imperio poderoso—lo a ser konkistá i ku tempu ningun hende lo no a biba einan mas. (Isaías 13:17-20) Isaías asta a menshoná nòmber di e hòmber ku lo a konkistá Babilonia: Siro. Ademas, Isaías a deskribí Siro su strategia, esta ku lo el a laga e riunan “seka.” Isaías a profetisá tambe ku lo a laga e portanan di e stat habrí.—Isaías 44:27–45:1.

Su Kumplimentu: Un 200 aña despues ku Isaías a skirbi e profesia ei, un rei di Persia a ataká Babilonia. Kon e yama? Su nòmber tabata Siro. Dikon tabata asina difísil pa Siro i su ehérsito drenta Babilonia? Wèl, e stat tabata bon protehá pa su murayanan i Riu Eufrátes tabata pasa rònt di dje. P’esei, Siro i su ehérsito a koba un kanal na e parti mas ariba di e riu pa e awa desviá bai den un muras. Ora e nivel di awa a baha te na nan bèl di pia, nan a pasa dor di dje. Anto pa straño ku por parse, e babilonionan a laga e portanan di e stat habrí! Asina Siro i su ehérsito a logra drenta Babilonia i a konkist’é.

Pero ainda ta falta un detaye ku mester a kumpli: E stat a keda sin ningun habitante? Pa algun siglo, hende a sigui biba einan. Pero aktualmente, e ruinanan di Babilonia, ku ta keda serka di Bagdad, ta konfirmá ku e profesia a kumpli te den e último detaye. Sí, Beibel ta konfiabel ora e ta papia tokante loke lo bai sosodé den futuro.