Capitulo 2

E Buki Cu Ta Revelá e Conocimentu di Dios

 1, 2. Pakico nos mester di guia di nos Creador?

TA SOLAMENTE razonabel cu nos Creador amoroso lo a percurá un buki di instruccion i guia pa humanidad. I bo no ta di acuerdo cu hende tin mester di guia?

² Mas cu 2.500 aña pasá, un profeta i historiador a skirbi: “No ta pertenecé na hende cu ta canando ni sikiera pa dirigí su paso.” (Jeremías 10:23) Awe, e veracidad dje declaracion ei ta mas bisto cu nunca. Pues, historiador William H. McNeill a skirbi: “E aventura di hende riba cara di e planeta aki tabata serinan di crísis i desorganisacion casi sin interupcion di e sociedad su ordu establecí.”

 3, 4. (a) Con nos tin cu abordá un studio di Bijbel? (b) Con nos lo sigui cu un examinacion di e Bijbel?

³ E Bijbel ta yena tur nos necesidad pa guia sabí. Ta cierto cu hopi hende ta keda aplastá ora nan examiná e Bijbel pa promé biaha. E ta un buki diki, i algun porcion di dje no ta fácil pa comprendé. Pero si bo a wordu duná un testament describiendo loke lo bo mester haci afin di ricibí un herencia balioso, lo bo no tuma e tempu pa studi’é cuidadosamente? Si bo a haña cierto partinan di e documento difícil pa comprendé, probablemente lo bo busca yudansa di un hende cu experencia den tal asuntunan. Pakico no abordá e Bijbel cu e mésun actitud? (Echonan 17:11) Tin mas enbolbí den e asuntu aki cu un herencia material. Manera nos a siña den e capítulo anterior, e conocimentu di Dios por hiba na bida eterno.

⁴ Laga nos examiná e buki cu ta revelá e conocimentu di Dios. Promé nos lo duna un descripcion general breve di e Bijbel. Despues nos lo considerá motibunan pakico hopi hende informá ta kere cu e ta e Palabra inspirá di Dios.

LOKE BIJBEL TA CONTENE

 5. (a) Kico e Scritura Hebreo ta contené? (b) Kico e Scritura Griego ta contené?

⁵ E Bijbel ta contené 66 buki den dos seccion, hopi bes yamá e Testament Bieu i e Testament Nobo. Trint’i nuebe buki di e Bijbel a ser skirbí principalmente na hebreo i 27 na griego. E Scritura Hebreo, consistiendo di Génesis te na Malakías, ta abarcá creacion como tambe e promé 3.500 aña di historia humano. Examinando e parti aki di e Bijbel, nos ta siña di Dios su trato cu e israelitanan—for di nan nacementu como un nacion den e siglo 16 P.E.C. te den siglo 5 P.E.C.a E Scritura Griego, conteniendo e bukinan di Mateo te Revelacion, ta enfocá riba e siñamentu i actividadnan di Jesucristo i su disipelnan durante e promé siglo E.C.

 6. Pakico nos mester studia henter e Bijbel?

⁶ Algun hende ta afirmá cu e “Testament Bieu” ta pa hudiunan i e “Testament Nobo” ta pa cristiannan. Pero segun 2 Timoteo 3:16, “tur Scritura ta inspirá pa Dios i probechoso.” P’esei, un studio adecuá di e Scritura mester incluí henter e Bijbel. Realmente, e dos partinan di e Bijbel ta complementá un e otro, mesclando armoniosamente pa desaroyá un tema general.

 7. Kico ta e tema di e Bijbel?

⁷ Kisas bo a bishitá sirbishinan religioso pa añanan i a yega di tende algun dje lesamentu di e Bijbel na bos haltu. Of kisas bo mes a lesa pasashinan for di dje. Bo tabata sa cu e Bijbel tin un tema comun for di Génesis te cu Revelacion? Sí, un tema armonioso ta pasa atrabes di henter e Bijbel. Kico e tema ei ta? Esei ta e vindicacion di Dios su derecho di goberná humanidad i e realisacion di su propósito amoroso pa medio di su Reino. Mas despues, nos lo mira con precis Dios lo cumpli cu e propósito aki.

 8. Kico e Bijbel ta revelá tocante e personalidad di Dios?

⁸ Ademas di describí Dios su propósito, e Bijbel ta revelá su personalidad. Por ehempel, for di e Bijbel nos ta siña cu Dios tin sintimentu i cu e decisionnan cu nos tuma ta import’é. (Salmo 78:40, 41; Proverbionan 27:11; Ezekiel 33:11) Salmo 103:8-14 ta bisa cu Dios ta “misericordioso i bondadoso, tardá pa rabia i abundante den bondad amoroso.” E ta trata nos cu compasion, ‘cordando cu nos ta trahá di meramente stof’ i ta bolbe na stof ora nos muri. (Génesis 2:7; 3:19) Ki cualidadnan maraviyoso e ta manifestá! Esaki no ta e clase di Dios cu bo kier adorá?

 9. Di ki manera e Bijbel ta duna nos un bista cla di Dios su normanan, i con nos por beneficiá di tal conocimentu?

⁹ E Bijbel ta duna nos un bista claro di Dios su normanan. Esakinan tin biaha ta ser declará como leynan. Sin embargo, mas tantu biaha, nan ta ser reflehá den principionan siñá pa medio di ehempelnan práctico. Dios a laga skirbi cierto sucesonan den historia di Israel di antigua pa nos beneficio. E relatonan franco aki ta mustra kico ta pasa ora hende obra na armonia cu Dios su propósito, como tambe e resultado tristu ora nan scoge nan mes caminda. (1 Reynan 5:4; 11:4-6; 2 Crónicanan 15:8-15) Lesando tal relatonan di bida real indudablemente lo toca nos curason. Si nos trata na visualisá e sucesonan registrá, nos por identificá nos mes cu e personanan enbolbí den nan. Pues, nos por beneficiá for di bon ehempelnan i por evitá e trampanan cu a atrapá e malechornan. Sin embargo, e pregunta vital aki ta exigí un contesta: Con nos por ta sigur cu loke nos lesa den e Bijbel ta realmente inspirá di Dios?

BO POR CONFIA E BIJBEL?

10. (a) Pakico algun hende ta sinti cu e Bijbel ta ouderwets? (b) Kico 2 Timoteo 3:16, 17 ta bisa nos tocante e Bijbel?

¹⁰ Kisas bo a nota cu hopi buki cu ta ofrecé conseho ta bira ouderwets den solamente un par di aña. Kico awor di e Bijbel? E ta hopi bieu, i casi 2.000 aña a pasa desde cu su último palabranan a ser skirbí. P’esei algun hende ta pensa cu e no ta aplicabel den nos tempu moderno. Pero si e Bijbel ta inspirá di Dios, su consehonan lo ta semper al dia apesar di su edad haltu. E Scritura lo mester ta ketu bai “probechoso pa siña, pa reprendé, pa rectificá cosnan, pa disipliná den husticia, pa e homber di Dios por ta completamente capas, completamente ekipá pa tur bon obra.”—2 Timoteo 3:16, 17.

11-13. Pakico nos por bisa cu e Bijbel ta práctico pa nos dia?

¹¹ Un examinacion cuidadoso ta revelá cu e Bijbel su principionan ta aplicabel mes tantu awor como nan tabata ora nan a ser skirbí na principio. Por ehempel, ora ta trata di naturalesa humano, e Bijbel ta reflehá un comprendimentu penetrante cu ta aplicabel na tur generacion di humanidad. Nos por mira esaki fácilmente den Jesus su Sermon riba Ceru, hañá den e buki di Mateo, capítulonan 5 te cu 7. E sermon aki a impresioná e defuntu lider di India Mohandas K. Gandhi asina tantu, cu segun informe, el a bisa un oficial Británico: “Ora bo pais i mi pais obra di acuerdo cu e siñansanan cu Cristo a trece den e Sermon riba Ceru aki, nos lo a resolvé no solamente e problemanan di nos pais, sino esnan di henter mundu.”

¹² Nada straño cu hende ta keda impresioná dor di Jesus su siñansanan! Den e Sermon riba Ceru, el a mustra nos e caminda na berdadero felicidad. El a splica con pa resolvé pleitunan. Jesus a percurá instruccion en cuanto con pa haci oracion. El a indicá e actitud di mas sabí pa tin pa cu necesidadnan material i a duna e Regla di Oro pa un relacion adecuá cu otronan. Con pa detectá engaño religioso i con pa tin un futuro sigur tambe tabata entre e puntonan tratá den e sermon aki.

¹³ Den e Sermon riba Ceru i atrabes dje resto di su páginanan, Bijbel claramente ta bisa nos kico pa haci i kico pa evitá afin di mehorá nos circunstancia personal den bida. Su conseho ta asina práctico cu un educador a ser conmové pa bisa: “Apesar di ta un consehero di scol secundario cu gradonan académico i di doctorado i a lesa un gran cantidad di buki riba salú mental i sicologia, mi a descubrí cu e Bijbel su conseho riba tal cosnan manera teniendo un matrimonio exitoso, previniendo delincuencia hubenil i con pa gana i mantené amistad ta hopi mas superior cu cualkier cos cu mi a yega di lesa i studia na universidad.” Ademas di ta práctico i al dia, e Bijbel ta confiabel.

EXACTO I CONFIABEL

14. Kico ta mustra cu e Bijbel ta científicamente exacto?

¹⁴ Aunke e Bijbel no ta un buki di instruccion di ciencia, e ta científicamente exacto. Por ehempel, na un tempu cu mayoria hende tabata kere cu e tera tabata plat, e profeta Isaías a referí na dje como un “círculo” (hebreo, chugh, locual aki ta carga e idea di “globo”). (Isaías 40:22) E idea di un tera rondó no tabata ampliamente aceptá te cu miles di aña despues di Isaías su dia. Ademas, Job 26:7—skirbí mas cu 3.000 aña pasá—ta declará cu Dios ta “cologando e tera riba nada.” Segun un escolástico bíblico a bisa: “Con Job por tabata sa e berdad, demostrá dor di astronomia, cu e tera ta cologá sin un sosten visibel den espacio bashí, ta un cuestion cu esnan cu ta nenga e inspiracion di e Scritura Santu no ta resolvé fácilmente.”

15. Con confiansa den e Bijbel ta ser fortalecé dor di su estilo di registro?

¹⁵ E estilo dje registronan hañá den e Bijbel tambe ta fortalecé nos confiansa den e buki hopi bieu aki. Distinto di mitonan, e sucesonan tratá den e Bijbel ta relacioná cu personanan i fechanan specífico. (1 Reynan 14:25; Isaías 36:1; Lucas 3:1, 2) I miéntras cu historiadornan di antigua casi semper a exagerá e victorianan di nan gobernantenan i a sconde nan derotanan i fayonan, e escritornan bíblico tabata franco i onesto—asta tocante nan mes picánan serio.—Númeronan 20:7-13; 2 Samuel 12:7-14; 24:10.

UN BUKI DI PROFECIA

16. Cua ta e prueba mas fuerte cu e Bijbel ta inspirá di Dios?

¹⁶ Cumplimentu di profecianan ta duna evidencia conclusivo cu e Bijbel ta inspirá di Dios. E Bijbel ta contené hopi profecia cu a ser cumplí en detaye. Ta bisto, cu gewoon hende no por ta responsabel pa esakinan. Kico, anto, tin tras di e profecianan aki? E Bijbel mes ta bisa cu “profecia no tabata trecí na ningun tempu dor di boluntad di hende, sino hombernan a papia di parti di Dios ora nan a ser hibá pa spiritu santu,” of Dios su forsa activo. (2 Pedro 1:21) Considerá algun ehempel.

17. Cua profecianan a profetisá e caida di Babilonia i con esakinan a ser cumplí?

¹⁷ E caida di Babilonia. Tantu Isaías como Jeremías a profetisá Babilonia su caida na man di e medo i personan. Remarcablemente, Isaías su profecia tocante e suceso aki tabata registrá un 200 aña promé cu Babilonia a ser conkistá! E siguiente aspectonan di profecia ta awor asuntunan histórico bon documentá: e secamentu dje Riu Eufrátes dor di desviamentu di su awanan pa un lago artificial (Isaías 44:27; Jeremías 50:38); un falta negligente di siguridad na Babilonia su portanan di riu (Isaías 45:1); i e conkista dor di e gobernante yamá Ciro.—Isaías 44:28.

18. Con profecia bíblico a ser cumplí den subida i caida di “e rey di Grecia”?

¹⁸ E subida i caida di “e rey di Grecia.” Den un vision, Daniel a mira un chubat’i cabritu dal un chubat’i carné tumba abou, kibrando su dos cachunan. Anto, e cabritu su cachu grandi a ser kibrá i cuater cachu a lanta na su lugá. (Daniel 8:1-8) Daniel a haña e splicacion: “E chubat’i carné cu bo a mira cu tabata poseé e dos cachunan ta representá e reynan di Medo i Persia. I e chubat’i cabritu yen di lana ta representá e rey di Grecia; i en cuanto e cachu grandi cu tabatin meimei di su wowonan, esei ta representá e promé rey. I ya cu esun ei a ser kibrá, di manera cu a lanta finalmente cuater na lugá di dje, tin cuater reino di su nacion cu lo lanta, pero no cu su poder.” (Daniel 8: 20-22) Di acuerdo cu e profecia aki, rond di dos siglo despues, “e rey di Grecia,” Alehandro e Grandi, a tumba e Imperio Medo-Persia di dos cachu. Alehandro a muri na 323 P.E.C., i a ser eventualmente reemplasá dor di cuater di su generalnan. Sin embargo, ningun di e siguiente reinonan aki por a igualá e poder di Alehandro su imperio.

19. Cua profecianan a haña cumplimentu den Jesucristo?

¹⁹ E bida di Jesucristo. E Scritura Hebreo ta contené cantidad di profecianan cu a haña cumplimentu den e nacementu, ministerio, morto i resureccion di Jesus. Por ehempel, mas cu 700 aña di antemano, Mikéas a profetisá cu e Mesías, of Cristo, lo a nace na Betlehem. (Mikéas 5:2; Lucas 2:4-7) Mikéas su contemporáneo Isaías a profetisá cu e Mesías lo ser golpiá i scupí. (Isaías 50:6; Mateo 26:67) Cincu cien aña di antemano, Zacarías a profetisá cu e Mesías lo a ser traicioná pa 30 pida di plata. (Zacarías 11:12; Mateo 26:15) Mas cu mil aña di antemano, David a profetisá di circunstancianan relacioná cu e morto di Jesus e Mesías. (Salmo 22:7, 8, 18; Mateo 27:35, 39-43) I mas of ménos cincu siglo di antemano, Daniel su profecia a revelá na ki tempu e Mesías lo a aparecé como tambe e largura di su ministerio i e tempu di su morto. (Daniel 9:24-27) Esaki ta djis un muestra di e profecianan cumplí den Jesucristo. Lo bo haña cu ta recompensador pa lesa hopi mas tocante Jesucristo despues.

20. E Bijbel su registro perfecto di profecia cu a ser cumplí mester duna nos cua confiansa?

²⁰ Hopi otro profecianan di Bijbel di largu alcanse a ser cumplí caba. ‘Pero,’ lo bo puntra, ‘con esaki ta afectá mi bida?’ Wel, si un hende a bisá bo e berdad pa hopi aña, lo bo duda di dje di ripiente ora e bisá bo un cos nobo? No! Dios a bisa e berdad atrabes di henter e Bijbel. Esaki lo no mester edificá bo confiansa den loke Bijbel ta primintí, tal como su profecianan en cuanto un binidero paradijs terenal? En berdad, nos por tin e mésun confiansa cu Pablo tabatin, un di Jesus su disipelnan di promé siglo, kende a skirbi cu ‘Dios no por gaña.’ (Tito 1:2) Ademas, ora nos lesa e Scritura i ta aplicá su conseho, nos ta eherciendo sabiduria cu hende no por logra riba nan mes, pasobra e Bijbel ta e buki cu ta revelá e conocimentu di Dios cu ta hiba na bida eterno.

“DESAROYA UN ANHELO” PA E CONOCIMENTU DI DIOS

21. Kico lo bo mester haci si algun cos cu bo ta siña for di e Bijbel ta parce aplastante?

²¹ Segun cu bo ta studia e Bijbel, probablemente lo bo siña cosnan cu ta diferenciá for di loke bo a ser siñá den pasado. Lo bo asta haña cu algun di bo custumbernan religioso kerí no ta agradá Dios. Lo bo siña cu Dios tin normanan mas haltu di loke ta bon i malu cu esnan comun den e mundu permisivo aki. Esaki por parce aplastante na principio. Pero tene pacenshi! Cuidadosamente examiná e Scritura pa haña e conocimentu di Dios. Sea habrí pa e posibilidad cu e Bijbel su conseho lo por rekerí un ahuste den bo pensamentu i accionnan.

22. Pakico bo ta studiando e Bijbel i con bo por yuda otronan comprendé esaki?

²² Amigu i famianan cu bon intencion lo por oponé bo studio di Bijbel, pero Jesus a bisa: “Tur, anto, cu confesá union cu mi dilanti hende, ami tambe lo confesá union cuné dilanti mi Tata cu ta den cielu; pero ken cu nengá mi dilanti hende, ami tambe lo nengu’é dilanti mi Tata cu ta den cielu.” (Mateo 10:32, 33) Algun hende kisas ta teme cu lo bo bira enbolbí den un culto of cu lo bo bira un fanático. Sin embargo, en realidad bo ta simplemente haciendo esfuerso pa gana conocimentu exacto di Dios i di su berdad. (1 Timoteo 2:3, 4) Pa yuda otronan comprendé esaki, sea razonabel, no discutidor, ora bo ta papia cu nan tocante loke bo ta siñando. (Filipensenan 4:5) Corda cu hopi hende ta ser ganá “sin un palabra” ora nan mira evidencia cu conocimentu bíblico realmente ta beneficiá hende.—1 Pedro 3:1, 2.

23. Con bo por “desaroyá un anhelo” pa e conocimentu di Dios?

²³ Bijbel ta insta nos: “Como criaturanan recien nací, desaroyá un anhelo pa e lechi no adulterá cu ta pertenecé na e palabra.” (1 Pedro 2:2) Un criatura ta dependé riba nutricion di su mama i ta insistí riba yenamentu di e necesidad ei. Di igual manera, nos ta dependé riba conocimentu for di Dios. “Desaroyá un anhelo” pa su Palabra dor di sigui cu bo studio. En berdad, haci’é bo meta pa lesa e Bijbel diariamente. (Salmo 1:1-3) Esaki lo trece bendicion ricu pa bo, pasobra Salmo 19:11 ta bisa di Dios su leynan: “Den wardamentu di nan tin un recompensa grandi.”

[Nota]

TEST BO CONOCIMENTU

Den ki maneranan e Bijbel ta único?

Pakico bo por confia e Bijbel?

Kico ta probá bo cu e Bijbel ta Dios su Palabra inspirá?

[Kuadro na página 14]

BIRA FAMILIARISA CU BO BIJBEL

Birando familiarisá cu e Bijbel no mester ta difícil. Usa su tabla di contenido pa siña e órden i lugá dje bukinan bíblico.

E bukinan di Bijbel tin capítulonan i versículonan pa referencia fácil. E division di capítulo a ser agregá durante siglo 13, i un imprimidor frances di siglo 16 aparentemente a dividí e Scritura Griego den e versículonan usá actualmente. E promé Bijbel completo cu tabatin number tantu pa capítulo como pa versículo tabata un edicion frances, publicá na 1553.

Ora scrituranan ta ser citá den e buki aki, e promé number ta indicá e capítulo, i e siguiente ta indicá e versículo. Por ehempel, e cita “Proverbionan 2:5” ta nificá e buki di Proverbionan, capítulo 2, versículo 5. Dor di busca e textonan citá, pronto lo bo sintí bo confortabel hañando textonan di Bijbel.

E mihó manera pa bira familiarisá cu e Bijbel ta dor di les’é diariamente. Na principio, esaki por parce un desafio. Pero si bo lesa tres pa cincu capítulo pa dia, dependiendo di nan largura, lo bo completá lesamentu di e Bijbel completo den un aña. Pakico no cuminsá awe?

[Kuadro na página 19]

BIJBEL—UN BUKI UNICO

• E Bijbel ta “inspirá di Dios.” (2 Timoteo 3:16) Aunke hende a skirbi e palabranan, Dios a dirigí nan pensamentunan, di manera cu e Bijbel ta realmente “e palabra di Dios.”—1 Tesalonicensenan 2:13.

• E Bijbel a ser skirbí durante un periodo di 16 siglo, dor di aproximadamente 40 contribuidor di diferente antecedente. No obstante, e producto final ta armonioso for di principio te fin.

• E Bijbel a sobrebibí mas controversia cu cualkier otro buki. Durante e Edad Media, hendenan a ser kimá na staca simplemente pa motibu di ta poseé un copia di e Scritura.

• E Bijbel ta na promé lugá como e buki mas bendí na mundu. El a ser traducí, den su totalidad of en parte, den mas cu 2.000 idioma. Miles di miyones di copia a ser imprimí, i casi no tin un lugá riba tera caminda un copia di Bijbel no por ser hañá.

• E porcion mas bieu di e Bijbel ta data bek te na siglo 16 P.E.C. Esaki ta promé cu e aparicion di e Rig-Veda hindú (rond di 1300 P.E.C.), of e “Cánon di Tres Macutu” budista (siglo cincu P.E.C.), of e Koran islámico (siglo siete E.C.), como tambe e Nihongi shinto (720 E.C.).

[Plachi di henter página 20]