Kico Ta Sosodé cu e Alma ora Nos Muri?

“Un dje elementonan fundamental di filosofia i teologia cristian ta e doctrina cu e alma humano ta inmortal i lo sigui existí despues cu e hende muri i su curpa desintegrá.”—“NEW CATHOLIC ENCYCLOPEDIA.”

 1. Kico New Catholic Encyclopedia ta admití relacioná cu e alma cu ta keda na bida despues di morto?

SIN embargo, e obra di referencia citá ariba ta admití cu “den Bijbel no por dicerní unbes e nocion dje alma cu ta keda na bida despues di morto.” Kico anto Bijbel realmente ta siña tocante loke ta sosodé cu e alma ora nos muri?

E Mortonan Ta Inconciente

2, 3. Kico ta e condicion dje mortonan, i cua textonan bíblico ta revelá esaki?

² Eclesiástes 9:5, 10 ta haci cla den ki condicion e mortonan ta. Ei nos ta lesa: “E mortonan no sa nada . . . No tin actividad, ni plan, ni conocimentu ni inteligencia, den graf.” (Moffatt) Pues anto, morto ta un estado fuera di existencia. E salmista a skirbi cu ora un persona muri, “e ta bolbe na su suela; den e dia ei su pensamentunan en berdad ta perecé.”—Salmo 146:4.

³ Pues e mortonan ta inconciente, inactivo. Ora di pronunciá sentencia contra Adam, Dios a declará: “Stof bo ta i na stof lo bo bolbe.” (Génesis 3:19) Promé cu Dios a form’é for di stof di suela i a dun’é bida, Adam no a existí. Ora el a muri, Adam a bolbe n’e estado ei. Su castigu tabata morto, no un transferencia na un otro region.

E Alma Por Muri

4, 5. Duna ehempelnan for di Bijbel cu ta mustra cu e alma por muri.

⁴ Ora Adam a muri, kico a sosodé cu su alma? Wel, corda cu den Bijbel e palabra “alma” ta referí hopi bes simplemente na un persona. Pues ora nos bisa cu Adam a muri, nos ta bisando cu e alma cu yama Adam a muri. Esaki lo por zona straño pa un persona cu ta kere den inmortalidad di alma. Sin embargo, Bijbel ta declará: “E alma cu ta peca—e mes lo muri.” (Ezekiel 18:4) Levítico 21:1 ta papia di “un alma defuntu” (un “cadaver,” Jerusalem Bible). I Dios a taha e nazareonan di yega cerca “un alma morto” (“un curpa morto,” Lamsa).—Númeronan 6:6.

⁵ Na 1 Reynan 19:4 nos ta haña un referencia similar na alma. Elías, sumamente afligí, “a cuminsá pidi pa su alma muri.” Jónas tambe “a sigui pidi pa su alma muri, i bes tras bes el a bisa: ‘Mihó mi muri cu mi keda na bida.’ ” (Jónas 4:8) I Jesus a usa e frase “mata un alma,” loke The Bible in Basic English ta traducí “mata.” (Marco 3:4) Pues morto dje alma simplemente ta nificá morto dje persona.

“Saliendo” i ‘Bolbiendo’

 6. Kico Bijbel kier men ora e ta bisa cu Raquel su alma tabata “saliendo”?

⁶ Pero kico dje morto trágico di Raquel, cu a tuma lugá ora el a duna lus na su di dos yu? Na Génesis 35:18, nos ta lesa: “Segun su alma tabata saliendo (pasobra el a muri) el a yama su nomber Benoní; pero su tata a yam’é Benjamin.” E pasashi aki ta implicá cu Raquel tabatin un ser interno cu a sali bai ora el a muri? Absolutamente cu no. Corda, e palabra “alma” por referí tambe n’e bida cu un persona tin. Pues den e caso aki Raquel su “alma” no a nificá nada otro cu su “bida.” Ta p’esei otro Bijbelnan ta traducí e frase “su alma tabata saliendo” como “su bida tabata cabando” (Knox), “ku su último rosea” (Sosiedat Antiano di Beibel), i “su bida a bai for di dje” (Bible in Basic English). No tin ningun indicacion cu un parti misterioso di Raquel a sigui biba despues cu el a muri.

 7. Den ki sentido e alma dje yu homber resucitá dje biuda “a bolbe bek den dje”?

⁷ Ta mescos cu e resureccion di e yu homber di un biuda, registrá na 1 Reynan capítulo 17. Den versículo 22, nos ta lesa cu miéntras Elías tabata haci oracion riba e mucha homber, “Jehova a scucha e bos di Elías, di manera cu e alma dje mucha a bolbe bek den dje i el a biba.” Un biaha mas, e palabra “alma” ta nificá “bida.” P’esei, New American Standard Bible ta bisa: “E bida dje mucha a bolbe na dje i el a rebibá.” Sí, tabata bida, no algu misterioso, cu a bolbe n’e mucha homber. Esaki ta na armonia cu loke Elías a bisa mama dje mucha: “Mira, bo yu homber [henter e persona] ta bibu.”—1 Reynan 17:23.

E Dilema dje “Estado Intermedio”

 8. Kico hopi hende cu ta profesá di ta cristian ta kere cu lo sosodé durante e resureccion?

⁸ Hopi hende cu ta profesá di ta cristian ta kere cu lo tin un futuro resureccion na un tempu den cua lo uni e curpanan cu e almanan inmortal. E ora ei, lo entregá esnan resucitá na nan destino final: sea un recompensa pa esnan cu a hiba un bida recto of castigu pa e malbadonan.

 9. Kico e término “estado intermedio” ta nificá, i kico algun hende ta bisa ta sosodé cu e alma durante e periodo aki?

⁹ E concepto aki ta zona simpel. Pero esnan cu ta pega n’e creencia di inmortalidad di alma tin problema pa splica kico ta sosodé cu e alma entre e momento cu e hende muri i e momento di resureccion. Sí, pa siglonan e “estado intermedio” aki, manera hopi bes e ta ser yamá, a pone hende speculá. Algun hende ta bisa cu durante e periodo aki e alma ta bai purgatorio, caminda e por ser purificá di picánan no muchu grave, pa asina bira apto pa bai shelu.a

10. Pakico no ta bíblico pa kere cu despues di morto almanan ta keda pa un tempu den purgatorio, i con e experencia di Lázaro ta confirmá esaki?

¹⁰ Sin embargo, manera nos a mira, e alma no ta nada otro cu e persona. Ora e persona muri, e alma ta muri. Pues anto, no tin existencia conciente despues di morto. Sí, ora Lázaro a muri, Jesucristo no a bisa cu e tabata den purgatorio, limbo ni ningun otro “estado intermedio.” Mas bien, e único cos cu Jesus a bisa tabata: “Lázaro a pega soño.” (Juan 11:11, New English Bible) Claramente, pa Jesus, cu tabata sa e berdad tocante loke ta sosodé cu e alma ora nos muri, Lázaro tabata inconciente, fuera di existencia.

Kico Ta e Spiritu?

11. Di con e palabra “spiritu” no por ta referí na un parti di un persona, separá for dje curpa, cu ta sigui biba despues di morto?

¹¹ Bijbel ta bisa cu ora un persona muri, “su spiritu ta sali, e ta bolbe na su suela.” (Salmo 146:4) Esaki ta nificá cu un spiritu separá dje curpa literalmente ta sali bai i ta sigui biba despues cu un persona muri? Esei no por ta, pasobra e salmista ta sigui bisa: “Den e dia ei su pensamentunan en berdad ta perecé” (“tur su pensamentu ta caba,” NEB). Kico anto, ta e spiritu, i con e ta “sali” for di un persona ora e muri?

12. Kico Bibjel ta implicá cu e palabra na hebreo i na griego traducí como “spiritu”?

¹² Den Bijbel e palabranan traducí como “spiritu” (na hebreo: rú·ag; na griego: pneu·ma) básicamente ta nificá “rosea.” Pues, en bes di bisa “su spiritu ta sali,” e traduccion di R. A. Knox ta usa e frase “e rosea ta bandoná su curpa.” (Salmo 145:4, Knox) Pero e palabra “spiritu” ta implicá hopi mas cu e acto di hala rosea. Por ehempel, ora di describí e destruccion di alma humano i di bestia tempu cu e Diluvio mundial a tuma lugá, Génesis 7:22 ta bisa: “Tur loke tabatin e rosea dje forsa [of, spiritu; na hebreo: rú·ag] di bida activo den nan nanishi, esta, tur loke tabata riba tera secu, a muri.” Pues, “spiritu” por referí na e forsa di bida cu ta activo den tur criatura bibiente, tantu di hende como di bestia, i cu ta ser sostené dor di halamentu di rosea.

13. Den ki manera por compará e spiritu cu coriente eléctrico?

¹³ Pa ilustrá esei: Coriente eléctrico ta pone un aparato traha. Si e coriente stop, e aparato ta stop di funcioná. E coriente riba su mes no ta bai cuminsá funcioná como un aparato. Di igual manera, ora un persona muri, su spiritu ta stop di animá e celnan di curpa. E no ta bandoná e curpa i pasa bai pa un otro region.—Salmo 104:29.

14, 15. Con e spiritu ta bolbe na Dios ora nos muri?

¹⁴ Pakico anto, Eclesiástes 12:7 ta declará cu ora un persona muri, “e spiritu mes ta bolbe na e Dios berdadero cu a dun’é”? Esaki ta nificá cu e spiritu literalmente ta biaha dor di espacio te den presencia di Dios? No ta esei e kier men. Corda, e spiritu ta e forsa di bida. Una bes e forsa di bida a bai, ta Dios so tin e abilidad di restor’é. Pues e spiritu “ta bolbe na e Dios berdadero” den e sentido cu cualkier speransa pa un bida den futuro pa e persona ei awor ta keda completamente den man di Dios.

¹⁵ Dios so por restorá e spiritu, of forsa di bida, poniendo un persona bolbe bek na bida. (Salmo 104:30) Pero Dios tin intencion di haci esei?

[Nota]

[Kuadro na página 23]

Recuerdonan di un Bida Anterior

SI NADA no ta keda na bida despues di morto dje curpa, kico anto dje recuerdonan di un bida anterior cu algun hende ta afirmá di tin?

Nikhilananda, erudito riba e tereno di hinduismo, ta bisa cu ‘no por demostrá experencianan despues di morto cu lógica.’ Teólogo Hans Küng, den su discurso “Modelonan di Creencia den Eternidad den Religionnan,” ta señalá: “Ningun dje relatonan​—⁠di cua mayoria ta bini di mucha of for di paisnan caminda hende ta kere den reencarnacion​—⁠di recuerdonan di un bida anterior por ser verificá.” E ta agregá: “Mayoria di [e investigadónan cu ta trahando seriamente i científicamente riba e tereno ei] ta admití cu e experencianan cu nan a establecé no ta percurá e base pa un prueba realmente convincente di cu tin un ripiticion di bida terenal.”

Kico awor si bo ta sinti cu bo tin recuerdonan personal di un bida anterior? Sintimentunan asina lo por ta debí na vários factor. Hopi dje informacion cu nos ta ricibí ta wardá den un of otro skina scondí di nos mente subconciente pasobra nos no tin uso directo of inmediato p’e. Ora recuerdonan lubidá bini ariba, algun hende ta interpretá esakinan como evidencia di un bida anterior. No obstante, echo ta cu nos por verificá solamente experencianan dje bida cu nos ta hiba awor. Mayoria hende bibu riba tera no ta corda mes di a biba anteriormente; ni nan no ta pensa cu nan lo por tabatin un bida anterior.