Yehova Ta Bo Porshon?

“Buska promé e reino di Dios i su hustisia, i tur e kosnan akí lo wòrdu añadí na boso.”—MAT. 6:33.

1, 2. (a) Ken “e Israel di Dios” menshoná den Galationan 6:16 ta representá? (b) Ken “e diesdos tribunan di Israel” den Mateo 19:28 ta representá?

ORA bo lesa e nòmber Israel den Beibel, kiko ta bini na bo mente? Bo ta pensa riba Jakòb, yu di Isaak, kende despues a haña e nòmber Israel? Òf bo ta pensa riba Jakòb su desendientenan, e nashon di Israel di antigwedat? I kiko di Israel spiritual, “e Israel di Dios,” esta e 144.000 personanan ku Dios a ungi ku spiritu santu pa bira rei i saserdote den shelu? (Gal. 6:16; Rev. 7:4; 21:12) Pero tin un otro uso spesial pa e nòmber Israel. Laga nos ban wak esei na Mateo 19:28.

² Hesus a bisa: “Den e regenerashon [esta, dia tur kos bira nobo], ora ku e Yu di hende lo sinta riba e trono di su gloria, boso ku a sigui mi tambe lo sinta riba diesdos trono i husga e diesdos tribunan di Israel.” Den e versíkulo akí, “e diesdos tribunan di Israel” ta e hendenan ku lo biba pa semper den Paradeis riba tera. E 144.000 lo sirbi komo nan hues i saserdote.

3, 4. Kon esnan ungí ta demostrá ku Yehova ta nan porshon?

³ Meskos ku e saserdotenan i e levitanan di pasado, e ungínan awe tambe ta mira nan sirbishi komo un privilegio i ta hasi Dios nan porshon. (Num. 18:20) Esnan ungí no ta spera di haña un teritorio òf lugá aki riba tera komo poseshon. Mas bien, nan ta antisipá e dia ku nan lo ta rei i saserdote den shelu huntu ku Hesukristu. Manera Revelashon 4:10 i 11 ta mustra, nan lo sigui sirbi Yehova den shelu. Den shelu tambe Yehova lo ta nan porshon, òf herensia.—Eze. 44:28.

⁴ Miéntras ku e rumannan ungí ta riba tera, nan ta demostrá na e manera ku nan ta biba ku Yehova ta nan porshon. Nan sirbishi na Yehova ta e kos di mas importante pa nan. Apòstel Pedro a bisa: “Hasi boso sumo posibel pa boso yamamentu i skohementu ta sigur.” (2 Ped. 1:10, NW) Kon nan ta hasi esei? Wèl, nan ta pone fe den e sakrifisio di reskate di Kristu i ta siguié kontinuamente. Maske nan no tin e mesun sirkunstansianan ni abilidat, tòg nan no ta usa nan limitashonnan komo preteksto pa djis hasi lo mínimo den Dios su sirbishi. Al kontrario, nan ta pone Dios su sirbishi na promé lugá den nan bida i ta hasi tur loke nan por den su sirbishi. Ta mas ku klaru ku Yehova ta nan porshon, i nan ta un bon ehèmpel pa esnan ku tin e speransa di biba pa semper riba tera.

5. Kon tur kristian por tin Yehova komo nan porshon, i dikon esei por ta un desafio?

⁵ Sea ku nos tin e speransa di biba den shelu òf riba tera, nos mester ‘nenga nos mes, hisa nos staka di tormento i sigui Kristu.’ (Mat. 16:24) Miónes di hende ku tin e speransa di biba den Paradeis riba tera ta adorá Dios i ta sigui Kristu di e manera ei. Nan no ta keda satisfecho ku djis hasi un tiki den Dios su sirbishi si nan sa ku nan por hasi mas. Hopi di nan a simplifiká nan bida i a bira pionero. Otronan ta hasi esfuerso pa traha pionero un par di luna pa aña. I esnan ku no por traha pionero tambe ta hasi tur nan esfuerso den sirbishi. Nan ta manera Maria, kende a basha zeta perfumá riba Hesus. Hesus a bisa: “El a hasi un bon obra na mi. . . . El a hasi loke e tabata por.” (Mar. 14:6-8) Tin biaha no ta fásil pa nos hasi tur loke nos por, pasobra henter e mundu ta bou di kontròl di Satanas. Pero tòg, nos ta hasi tur nos esfuerso i ta konfia den Yehova. Nos lo bai trata awor kuater área spesífiko den kua nos lo por demostrá ku Yehova ta nos porshon.

Buska Promé e Reino di Dios

6. (a) Kon hende den mundu ta demostrá ku e bida akí so ta nan porshon? (b) Dikon ta mas mihó pa imitá David?

⁶ Hesus a siña su siguidónan pa buska promé e Reino i e hustisia di Dios. Hende den mundu tin e tendensia di buska nan propio interes promé. Beibel ta yama nan “hòmbernan di mundu, kende nan parti ta den e bida akí.” (Lesa Salmo 17:1 i 13-15.) E hendenan akí no ta interesá den nan Kreador. Hopi di nan ta interesá únikamente den hiba un bida kómodo, kria un famia i laga un herensia pa nan yunan. E bida akí so ta nan porshon. Pero David sí tabata interesá den traha “un bon nòmber” serka Yehova. Despues, su yu Salomon a rekomendá tur hende pa hasi esei. (Ekl. 7:1) Meskos ku Asaf, David tabata sa ku ta muchu mas mihó pa e tin Yehova komo su Amigu ku pone su propio interesnan na promé lugá den bida. Esei ta loke a hasi David felis. Den nos tempu, hopi kristian ta demostrá ku nan sirbishi na Yehova ta mas importante ku nan trabou. Nan ta demostrá ku Yehova ta nan porshon.

7. Kon un ruman hòmber a buska e Reino promé?

⁷ Laga nos wak e ehèmpel di Jean-Claude, kende ta biba na Repúblika Sentroafrikano. Jean-Claude ta un ansiano kasá i e tin tres yu. Den su pais ta difísil pa haña trabou, i p’esei mayoria di hende lo move shelu i tera pa keda ku nan trabou. Un dia, e manager di Jean-Claude a bis’é ku e tin ku kuminsá traha tur anochi, di 6:30 p.m. padilanti. Jean-Claude a splik’é ku fuera di perkurá pa e nesesidatnan material di su famia, e mester perkurá pa nan bienestar spiritual tambe. El a bis’é tambe ku e mester yuda e kongregashon. E manager a bis’é: “Si bo tin e suerte di tin un trabou, bo mester lubidá tur otro kos, asta bo kasá, bo yunan i bo problemanan. Bo mester dediká bo bida na bo trabou, na nada otro. Bo tin ku skohe: bo religion òf bo trabou.” Kiko abo lo a hasi? Jean-Claude tabata sa ku si e pèrdè su trabou, Yehova mes lo a perkurá p’e; Yehova lo ta su porshon. E tabata sa ku tòg lo e tin hopi di hasi den e trabou di Señor i ku Yehova lo yud’é perkurá pa e nesesidatnan material di su famia. Pues, el a bai e siguiente reunion. Despues di esei, el a prepará pa bai trabou, aunke e no tabata sa sigur ku e tabatin su trabou ainda. Nèt e ora ei el a haña un yamada di telefòn. Nan a kita e manager for di trabou, pero nos ruman sí a keda ku su trabou.

8, 9. Kon nos por imitá e saserdotenan i e levitanan i demostrá ku Yehova ta nos porshon?

⁸ Kisas abo tambe a yega di haña bo den un situashon asina i podisé bo a puntra bo mes, ‘Kon lo mi por kumpli ku mi responsabilidat di perkurá pa mi famia?’ (1 Tim. 5:8) Pero sea ku esei a yega di sosodé ku bo òf nò, probablemente bo sa di eksperensia ku nunka lo bo keda desapuntá si bo tin Dios komo bo porshon i si bo ta pone su sirbishi na promé lugá den bo bida. Ora Hesus a bisa su disipelnan pa buska promé e Reino di Dios, el a primintí nan ku “tur e kosnan akí”—manera entre otro kuminda, ko’i bebe i paña—“lo wòrdu añadí na [nan].”—Mat. 6:33.

⁹ Pensa un ratu riba e levitanan, kendenan no a haña un teritorio komo herensia. Nan trabou prinsipal tabata pa guia e nashon di Israel den adorashon puru, i p’esei nan mester a konfia ku Yehova tabata nan porshon i ku lo el a perkurá pa nan nesesidatnan material. (Num. 18:20) Maske ku awendia nos no ta sirbi na un tèmpel literal manera e saserdotenan i e levitanan, nos por imitá nan i konfia ku Yehova lo perkurá pa nos. Mas serka e fin yega, mas konfiansa nos mester tin ku Dios lo perkurá pa nos.—Rev. 13:17.

Buska Promé e Hustisia di Dios

10, 11. Kon algun hende a demostrá ku Yehova ta nan porshon den asuntu di empleo? Duna un ehèmpel.

¹⁰ Ademas, Hesus a urgi su disipelnan pa ‘buska promé Dios su hustisia.’ (Mat. 6:33) Esei ta nifiká ku nos mester sigui Yehova su normanan enkuanto loke ta bon i malu i no esnan di hende. (Lesa Isaias 55:8 i 9.) Podisé bo ta kòrda algun hende ku den pasado tabata kultivá òf bende tabako, train hende pa bai guera òf produsí i bende arma pa guera. Pero ora nan a haña e bèrdat, nan a kambia di trabou i por a batisá.—Isa. 2:4; 2 Kor. 7:1; Gal. 5:14.

¹¹ Andrew a hasi esei. Ora Andrew ku su esposa a siña tokante Yehova, nan a disidí di sirbié. Andrew tabata gusta su trabou mashá, pero tòg el a disidí di kita for di trabou. Pakiko? Pasobra e organisashon ku e tabata traha p’e tabata enbolbí den guera i e tabata determiná pa buska promé e hustisia di Dios. Ora Andrew a kita for di trabou, e tabatin dos yu pa kria, e no tabatin entrada i e plaka ku e tabatin lo a yega pa un par di luna so. For di e punto di bista di hende por a parse ku na moda di papia e no tabatin herensia. Pero el a konfia den Yehova i a bai buska un otro trabou. Debí na loke Andrew i su famia a pasa aden, nan por bisa ku siguransa ku Yehova su man no ta kòrtiku. (Isa. 59:1) Nan a tene nan bida simpel i pa e motibu ei Andrew ku su esposa por a traha pionero. Andrew a bisa: “Tin biaha nos tabata preokupá tokante nos situashon finansiero, bibienda, nos salú i e echo ku nos ta birando bieu. Pero semper Yehova a yuda nos. . . . Sin duda nos por bisa ku sirbi Yehova ta duna satisfakshon i ku esaki ta e onor di mas grandi ku un ser humano por tin.”a—Ekl. 12:13.

12. Ki kualidat bo mester tin pa pone Dios su hustisia na promé lugá? Konta un eksperensia lokal.

¹² Abo lo sigui buska Dios su hustisia promé aunke esei lo por kousa problema pa bo? Hesus a bisa su disipelnan: “Si boso tin fe manera un simia di mòster, boso lo bisa e seru akí: ‘Hala for di aki bai p’aya,’ i e lo hala; i nada lo no ta imposibel pa boso.” (Mat. 17:20) Si abo ta pensa ku bo no por sigui Dios su normanan pasobra esei lo trese sierto problema pa bo, papia ku e rumannan den bo kongregashon. Nan eksperensianan enkuanto kon Yehova a yuda nan sin duda lo fortalesé bo fe.

Mustra Apresio pa Loke Yehova Ta Proveé

13. Ora nos ta hasi nos máksimo esfuerso den Yehova su sirbishi, ki siguransa nos por tin?

¹³ Si bo ta balorá bo privilegio di sirbi Yehova, bo por tin sigur ku lo e perkurá tantu pa bo nesesidatnan spiritual komo esnan físiko meskos ku el a perkurá pa e levitanan. Pensa un ratu riba David. Maske e tabata den un kueba, e tabatin sigur ku Dios lo a yud’é. Nos tambe por konfia den Yehova asta ora nos ta sinti nos lomba kontra muraya. Kòrda ku ta ora Asaf a drenta “den e santuario di Dios,” el a bin komprondé mihó kiko tabata molesti’é. (Sal. 73:17) Nos tambe mester akudí na Yehova Dios pa nos por haña loke nos tin mester pa nos por keda su Amigu. Sí, di e manera ei nos ta demostrá ku nos ta balorá nos sirbishi na Yehova sin importá den ki situashon nos ta. Asina nos ta hasi Yehova nos porshon.

14, 15. Kon nos mester reakshoná ora bin un kambio den e manera ku nos ta komprondé sierto teksto bíbliko, i dikon?

¹⁴ Kon nos ta reakshoná ora Yehova, e Fuente di lus spiritual, ta yuda nos komprondé ‘e kosnan profundo di Dios’ ku tin den Beibel? (1 Kor. 2:10-13) Apòstel Pedro ta un ekselente ehèmpel pa nos den e asuntu akí. Hesus a bisa Su oyentenan: “Si boso no kome e karni di e Yu di hende i bebe su sanger, boso no tin bida den boso.” Hopi disipel a pensa ku e tabata papia di karni i sanger literal i a bisa: “E palabranan aki ta hopi duru! Ken por para skucha nan?” (BPK) I nan “a retirá.” Pero Pedro a bisa: “Señor, serka ken nos lo bai? Abo tin e palabranan di bida eterno.”—Juan 6:53, 60, 66, 68.

¹⁵ Pedro no a komprondé bon kiko Hesus tabata ke men. Pero e tabatin konfiansa ku Yehova lo yuda hende komprondé e bèrdat mediante Hesus. Ora tin un ahuste den un siñansa bíbliko, bo ta purba komprondé ta pa ki motibu e ahuste a ser hasí? (Pro. 4:18) E bereanonan di promé siglo a risibí e palabra “ku bon boluntat i tabata skudriñá e Skrituranan tur dia.” (Echo. 17:11) Si bo imitá nan, bo apresio pa bo privilegio di sirbi Yehova lo bira mas profundo. Lo bo ta realmente gradisidu ku bo tin Yehova komo bo porshon.

Kasa Solamente den Señor

16. Segun 1 Korintionan 7:39, kon un kristian soltero por demostrá ku Yehova ta su porshon?

¹⁶ Kua ta un otro área den kua kristiannan mester hasi Yehova nan porshon? Wèl, nan mester sigui e konseho ‘pa kasa solamente den Señor.’ (1 Kor. 7:39) Hopi ruman ta preferá di keda soltero i no ignorá e konseho divino akí. Dios ta perkurá bon pa nan. Kiko David a hasi ora el a sintié su so i lomba kontra muraya? El a bisa: ‘Mi ta deshogá mi kurason Dios su dilanti; mi ta hasi mi angustia konosí su dilanti ora mi spiritu tabata desmayá den mi.’ (Sal. 142:1-3) Kisas profeta Jeremias tambe a yega di sintié su so. El a sirbi Dios fielmente pa hopi aña komo soltero. Si bo ke haña sa mas tokante su ehèmpel, wak kapítulo 8 di e buki E Mensahe di Dios Mediante Jeremias.

17. Kiko un ruman muhé soltera ta hasi ora e sintié su so?

¹⁷ Un ruman muhé na Merka a bisa: “Nunka mi a deseá di keda soltera. Mi ke kasa ora mi topa e persona adekuá. Pero mi mama, kende no ta un Testigu, a purba konvensé mi pa kasa ku ken ku presentá. Mi a puntr’é si e lo ke karga e kulpa si mi matrimonio bai malu. Ku tempu mi mama a ripará ku mi tabatin un bon trabou, ta perkurá pa mi mes i ta felis, anto el a stòp di preshoná mi.” Tin bes e ruman muhé akí sa sintié su so. El a bisa: “E ora ei, mi ta pone mi konfiansa den Yehova. Nunka e no ta laga mi na kaya.” Kiko a yud’é konfia den Yehova? El a bisa: “Orashon ta laga mi sinti ku Yehova ta real i ku nunka mi ta mi so. E Haltísimo di universo ta skucha mi, pues kon lo mi por keda sin sinti mi onrá i gososo?” E ta konfia den loke Beibel ta bisa: “Ta mas bendishoná pa duna ku pa risibí.” E ruman a sigui bisa: “Mi ta hasi tur mi esfuerso pa yuda otro hende, sin spera nada a kambio. Ora mi puntra mi mes, ‘Kiko mi por hasi pa yuda e persona akí,’ mi ta sinti un goso.” (Echo. 20:35) Sí, Yehova ta su porshon, i e ta felis den Su sirbishi.

18. Kon abo por bira Yehova su porshon?

¹⁸ Sin importá kiko ta bo situashon, bo por laga Dios ta bo porshon. Si bo hasi esei, lo bo ta entre Dios su pueblo felis. (2 Kor. 6:16, 17) E ora ei, abo tambe lo por bira Yehova su porshon, manera tabata e kaso di otro sirbidónan di Yehova den pasado. (Lesa Deuteronomio 32:9 i 10.) Meskos ku Dios a skohe Israel entre e nashonnan pa bira Su porshon, e por skohe abo tambe pa ta su porshon i kuida bo ku yen di amor.—Sal. 17:8.

[Nota]

a Wak e ¡Despertad! di novèmber 2009, página 12-14.

Kon Lo Bo Kontestá?

Kon lo bo por demostrá ku Yehova ta bo porshon den e kuater áreanan akí?

• Buska promé e Reino i e hustisia di Dios.

• Mustra apresio pa loke Yehova ta proveé.

• Sigui e konseho pa kasa solamente den Señor.

[Komentario na página 16]

Yehova ta bira nos porshon ora nos ta pone su sirbishi na promé lugá den nos bida

[Plachi na página 18]

Jeremias su ehèmpel ta animante