E Goso Di Jehova Ta Nos Fortalesa

“E dia aki ta santu pa nos Señor, i no sinti boso heridá, pasobra e goso di Jehova ta boso fortalesa.”​—⁠NEHEMIAS 8:⁠10.

1, 2. (a) Kico ta un fortalesa? (b) Con David a mustra cu el a tuma refugio den Jehova?

JEHOVA ta un fortalesa incomparabel. I kico ta un fortalesa? Esei ta un lugá fortificá, unu di siguridad of sobrebibencia. David di Israel di pasado a haña cu Dios ta su fortalesa. Por ehempel, considerá e cantica cu David a dirigí n’e Haltísimo “riba e dia cu Jehova a libr’é for dje plant’i man di tur su enemigunan i for dje man di Saul,” e rey di Israel.​—⁠Salmo 18, introduccion.

² David a cuminsá e cantica conmovedor ei cu e palabranan: “Lo mi tin cariño pa bo, O Jehova mi forsa. Jehova ta mi baranca i mi fortalesa i e Proveedor di escape pa mi. Mi Dios ta mi baranca. Lo mi tuma refugio den dje, mi escudo i mi cachu di salbacion, mi haltura sigur.” (Salmo 18:​1, 2) Declará inhustamente como fugitivo di ley i persiguí dor di Rey Saul, hustu David a tuma refugio den Jehova, mescos cu un persona por core drenta den un lugá fortificá pa sobrebibí un of otro calamidad.

3. Pakico e hudiunan den tempu di Esdras a experenciá “gran alegria”?

³ E goso cu Jehova ta duna ta un fortalesa infalibel pa esnan cu ta cana den su caminda como wardadornan di integridad. (Proverbio 2:​6-8; 10:29) Pa tin e goso cu Dios ta duna, naturalmente, hende mester haci e boluntad divino. Relacioná cu esaki, considerá loke a sosodé den Jerusalem na 468 P.E.C. E copista Esdras i otronan a duna comprendimentu mediante un lesamentu yen di nificacion dje Ley. Anto nan a urgi e pueblo: “Bai, come e cosnan vet i bebe e cosnan dushi, i manda porcionnan pa esun pa ken nada a ser prepará; pasobra e dia aki ta santu pa nos Señor, i no sinti boso heridá, pasobra e goso di Jehova ta boso fortalesa.” Tabatin “gran alegria” segun cu e hudiunan a aplicá e conocimentu cu nan a gana i a tene un gososo Festival di Tent. (Nehemías 8:​1-12) Esnan cu tabatin ‘e goso di Jehova como nan fortalesa’ a reuní forsa pa su adoracion i sirbishi. Siendo cu e goso di Jehova tabata nan fortalesa, nos mester spera p’e pueblo di Dios ta gososo awe tambe. Cua, anto, ta algun di nan motibunan pa goso awe?

“Nada Otro sino Gososo”

4. Kico ta un fuente sobresaliente di goso pa Jehova su pueblo?

⁴ Un motibu sobresaliente pa goso ta e provision cu Jehova ta haci pa reunimentu huntu. Asambleanan i congresonan di Testigonan di Jehova ta trece goso pa nan awe, mescos cu e festivalnan anual cu e israelitanan a tene a trece goso na nan curason. E pueblo di Israel a ser bisá: “Siete dia lo bo celebrá e festival [di tent] na Jehova bo Dios den e lugá cu Jehova lo scoge, pasobra Jehova bo Dios lo bendicioná bo den tur bo producto i den tur obra di bo man, i bo mester bira nada otro sino gososo.” (Deuteronomio 16:​13-15) Sí, Dios tabata kier pa nan “bira nada otro sino gososo.” Mescos ta cierto pa cristiannan, pasobra apostel Pablo a urgi su compañeronan creyente: “Semper alegrá den Señor. Un biaha mas lo mi bisa, Alegrá!”​—⁠Filipense 4:⁠4.

5. (a) Kico ta goso, i con cristiannan ta adkiri’é? (b) Con nos por tin goso apesar di prueba?

⁵ Siendo cu Jehova kier pa nos ta gososo, e ta duna nos goso como un dje frutanan di su spiritu santu. (Galatio 5:​22, 23) I kico ta goso? Esei ta e emocion deleitabel causá p’e expectativa of adkisicion di algu bon. Goso ta un estado di berdadero felicidad, asta hubilacion. E fruta aki di Dios su spiritu santu ta sostené nos bou di prueba. “P’e goso cu a ser poní su dilanti [Jesus] a wanta un staca di tormento, despreciando bergwensa, i a sinta na man drechi dje trono di Dios.” (Hebreo 12:⁠2) Disipel Santiago a skirbi: “Considerá tur esei un goso, mi rumannan, ora boso ta topa cu vários prueba, siendo cu boso sa cu e cualidad probá aki di boso fe ta obra awante.” Pero ke tal si nos no sa kico pa haci tocante un cierto prueba? E ora ei nos por haci oracion cu confiansa pidiendo sabiduria pa trata cuné. Obrando na armonia cu sabiduria celestial ta permití nos resolvé problemanan of enfrentá cu éxito pruebanan persistente sin perde e goso di Jehova.​—⁠Santiago 1:​2-8.

6. Ki relacion tin entre goso i adoracion berdadero?

⁶ E goso cu Jehova ta duna ta fortalecé nos pa promové adoracion berdadero. Esei ta loke a sosodé den e dianan di Nehemías i Esdras. Hudiunan dje tempu ei cu tabatin e goso di Jehova como nan fortalesa a ser fortalecí pa fomentá e interesnan di adoracion berdadero. I segun cu nan a promové e adoracion di Jehova, nan goso a aumentá. Mescos ta cierto awe. Como adoradornan di Jehova, nos tin un base pa gran alegria. Laga nos considerá awor un par mas di nos hopi motibunan pa goso.

Relacion cu Dios Mediante Cristo

7. Relacioná cu Jehova, ki motibu cristiannan tin pa goso?

⁷ Nos relacion íntimo cu Jehova ta haci nos e pueblo di mas felis riba tera. Promé cu nos a bira cristian, nos tabata parti dje sociedad humano inhustu cu ta ‘mentalmente den scuridad i alehá for dje bida cu ta pertenecé na Dios.’ (Efesio 4:18) Ki contentu nos ta cu nos no ta alehá for di Jehova mas! Naturalmente, esfuerso ta necesario pa permanecé den su fabor. Nos mester “continuá den e fe, establecí riba e fundeshi i constante i sin ser moví for dje speransa dje bon nobo ei.” (Colosense 1:​21-23) Nos por alegrá cu Jehova a atraé nos na su Yu na armonia cu Jesus su propio palabranan: “Ningun hende por bini cerca mi aménos cu e Tata cu a mandá mi ta atra’é.” (Juan 6:44) Si nos berdaderamente ta apreciá nos relacion precioso cu Dios mediante Cristo, nos lo vigilá contra cualkier cos cu por ruin’é.

8. Con Jesus a contribuí na nos estado gososo?

⁸ Pordon di picá mediante fe den e sacrificio di rescate di Jesus ta un gran causa di goso pasobra esaki ta loke ta haci nos relacion cu Dios posibel. Dor di su curso boluntario di picá, nos antepasado Adam a trece morto riba tur humanidad. Sin embargo, apostel Pablo a splica: “Dios ta recomendá su propio amor na nos den e echo cu, miéntras cu nos tabata pecador ainda, Cristo a muri pa nos.” Pablo a skirbi tambe: “Mescos cu mediante un solo ofensa e resultado pa tur clase di hende tabata condenacion, asina tambe mediante un solo acto di hustificacion e resultado pa tur clase di hende ta di declará nan hustu pa bida. Pasobra mescos cu mediante e desobedencia di un solo homber hopi a ser constituí pecador, asina tambe mediante e obedencia di un solo persona hopi lo ser constituí hustu.” (Romano 5:​8, 18, 19) Ki gososo nos por ta cu Jehova Dios ta contentu pa rescatá e desendientenan ei di Adam kendenan ta haci uso di un provision asina amoroso!

Libertad Religioso i Iluminacion

9. Pakico nos ta gososo desde un punto di bista religioso?

⁹ Libertad for di Babilonia e Grandi, e imperio mundial di religion falsu, ta un otro motibu pa ta gososo. Ta berdad divino a haci nos liber. (Juan 8:32) I libertad for dje muher religioso di mala bida aki ta nificá cu nos no ta participá den su picánan, no ta experenciá su plaganan, ni no ta caba den destruccion huntu cuné. (Revelacion 18:​1-8) No ta duel nos en absoluto pa scapa for di tur esei!

10. Ki iluminacion nos ta disfrutá di dje como Jehova su pueblo?

¹⁰ Comprendiendo i aplicando e Palabra di Dios den bida ta motibunan di gran alegria. Siendo liber di influencia di religion falsu, nos ta disfrutá di perspicacia spiritual cu ta bira progresivamente mas cla, cua nos Tata celestial a proveé mediante “e esclabo fiel i discreto.” (Mateo 24:​45-47) Di tur hende cu ta biba riba tera, solamente esnan exclusivamente dedicá na Jehova tin su spiritu santu i e comprendimentu bendicioná di su Palabra i su boluntad. Ta manera Pablo a bisa: “Ta na nos Dios a revelá nan [e cosnan cu el a prepará pa esnan cu ta stim’é] mediante su spiritu, pasobra e spiritu ta scrudiñá tur cos, asta e cosnan profundo di Dios.” (1 Corintio 2:​9, 10) Nos por ta gradicidu i tambe gososo cu nos ta disfrutando dje comprendimentu progresivo indicá den e palabranan di Proverbio 4:18: “E caminda dje hustunan ta manera e lus briyante cu ta birando mas i mas cla te ora e dia ta firmemente establecí.”

Speransa di Reino i Bida Eterno

11. Con e speransa gososo di Reino a ser compartí cu otronan?

¹¹ Nos speransa di Reino tambe ta haci nos gososo. (Mateo 6:​9, 10) Como Testigonan di Jehova, pa hopi tempu nos a proclamá cu e Reino di Dios ta e único speransa pa tur humanidad. Por ehempel, considerá e aña 1931, tempu nos a adoptá e nomber Testigonan di Jehova mediante un resolucion aclamá gososamente na 51 congreso rond mundu. (Isaías 43:​10-12) E resolucion ei i un discurso di congreso significativo cu J. F. Rutherford (e tempu ei presidente di Watch Tower Society) a duna, a ser publicá den e foyeto The Kingdom, the Hope of the World. El a incluí un otro resolucion adoptá n’e congreso ei, unu cu a denunciá Cristiandad pa su apostasia i pa su manera cu el a trata e conseho di Jehova cu desprecio. Tambe el a proclamá: “E speransa dje mundu ta e Reino di Dios, i no tin otro speransa.” Den un par di luna, Testigonan di Jehova a plama mas cu cincu miyon copia dje foyeto aki na tur parti dje tera. Desde e tempu ei hopi biaha nos a afirmá cu e Reino ta e único speransa di humanidad.

12. Ki prospectonan gososo di bida ta poní dilanti esnan cu ta sirbiendo Jehova?

¹² Tambe nos ta alegrá den e prospecto di bida eterno bou di gobernacion di Reino. E “trupa chikitu” di cristian ungí tin un speransa celestial gososo. “Bendicioná sea e Dios i Tata di nos Señor Jesucristo,” apostel Pedro a skirbi, “pasobra segun su gran misericordia el a duna nos un nacementu nobo na un speransa bibu mediante e resureccion di Jesucristo for di morto, pa un herencia incoruptibel i incontaminá i inmarchitabel. E ta reservá den cielu pa boso.” (Lucas 12:32; 1 Pedro 1:​3, 4) Awe, e gran mayoria di Testigonan di Jehova ta anticipá ansiosamente bida eterno den Paradijs den e dominio dje Reino. (Lucas 23:43; Juan 17:⁠3) Ningun otro pueblo riba tera tin cualkier cos comparabel cu nos prospectonan gososo. Cuantu nos mester apreciá nan!

Un Hermandad Bendicioná

13. Con nos mester mira nos hermandad internacional?

¹³ Siendo parti dje único hermandad internacional aprobá dor di Dios tambe ta un fuente di gran goso. Felismente, nos tin e socionan di mas deseabel riba tera. Jehova Dios mes a señalá na nos tempu i a bisa: “Lo mi sagudí tur e nacionnan, i e cosnan deseabel di tur e nacionnan mester drenta paden; i lo mi yena e cas aki cu gloria.” (Ageo 2:⁠7) Ta cierto cu tur cristian ta imperfecto. Sin embargo, Jehova a atraé tal individuonan na su mes mediante Jesucristo. (Juan 14:⁠6) Siendo cu Jehova a atraé na su mes hende cu e ta considerá deseabel, nos goso lo abundá si nos mustra nan amor fraternal, apreciá nan mashá, cooperá cu nan den actividadnan piadoso, sostené nan den nan pruebanan i resa na fabor di nan.

14. Ki animacion nos por saca for di 1 Pedro 5:​5-11?

¹⁴ Tur esaki lo contribuí na nos goso. En berdad, ta e goso di Jehova cu ta e fortalesa di nos hermandad spiritual rond e tera. Sí, nos tur ta sufri di persecucion i otro dificultadnan. Pero esaki mester hala nos na otro i duna nos un sentido di unidad como parti dje único organisacion berdadero di Dios riba tera. Manera Pedro a bisa, nos mester humiyá nos mes bou dje man poderoso di Dios, tirando tur nos ansiedad riba dje sabiendo cu e ta interesá den nos. Nos mester ta vigilante pasobra e Diabel ta busca manera pa devorá nos, pero den esaki nos no ta so, pasobra Pedro ta agregá: “Para firme contra dje, sólido den fe, sabiendo cu e mésun cosnan en cuanto sufrimentu ta tumando lugá den henter e asociacion di boso rumannan den e mundu.” I e hermandad internacional gososo aki nunca lo cai den otro, pasobra nos tin e siguransa cu ‘despues di a sufri pa un poco tempu, Dios lo terminá nos entrenamentu i lo haci nos firme i fuerte.’ (1 Pedro 5:​5-11) Pensa riba esei. Nos hermandad gososo lo permanecé pa semper!

Un Bida di Propósito

15. Pakico nos por bisa cu Testigonan di Jehova tin un bida yen di propósito?

¹⁵ Nos tin goso den e mundu problemático aki pasobra nos tin un bida yen di propósito. Nos a ser confiá cu un ministerio cu ta haci nos i otronan felis. (Romano 10:10) Siguramente ta un privilegio gososo pa ta Dios su colaboradornan. Relacioná cu esaki, Pablo a bisa: “Kico . . . Apólos ta? Sí, kico Pablo ta? Ministernan mediante ken boso a bira creyente, net manera e Señor a concedé na cada un. Ami a planta, Apólos a muha, pero Dios a sigui haci’é crece; di manera cu ni esun cu ta planta ta algu, ni esun cu ta muha, sino Dios cu ta haci’é crece. Awor esun cu ta planta i esun cu ta muha ta un, pero cada persona lo ricibí su propio recompensa segun su propio labor. Pasobra nos ta colaboradornan di Dios. Boso ta e cunucu di Dios bou di cultivacion, edificio di Dios.”​—⁠1 Corintio 3:​5-9.

16, 17. Ki ehempelnan por ser citá pa proba cu Jehova su pueblo tin un bida gososo di propósito?

¹⁶ Nos lo por cita hopi ehempel pa mustra cu sirbiendo Jehova fielmente ta resultá den un bida yen di propósito cu ta yena nos cu goso. E declaracion aki ta típico: “Mi a mira rond den e Salon di Reino yen di hende [riba e dia di su programa di dedicacion] i mi por a mira ocho miembro di mi famia presente, incluyendo ami i mi casá i tres di nos yunan cu nan casánan. . . . Ami i mi casá realmente tabatin un bida felis, yen di propósito den e sirbishi di Dios.”

¹⁷ Ta un animacion tambe pa realisá cu na cualkier edad un persona por cuminsá un bida gososo di berdadero propósito den Jehova su sirbishi. Por ehempel, un señora kende a siña e berdad di Bijbel den un cas di cuido a ser bautisá como Testigo di Jehova na edad di 102 aña. Asina el a terminá su bida cu un propósito gososo, ‘temiendo e Dios berdadero i wardando su mandamentunan.’​—⁠Eclesiastes 12:⁠13.

Un Fortalesa Infalibel

18. Kico nos por haci pa vence desanimacion i pa aumentá nos goso?

¹⁸ E goso di Jehova ta un fortalesa infalibel pa esnan fiel. Tog, teniendo e goso aki no ta nificá cu nos nunca lo ta tristu manera ora Jesus a hañ’é ta bisa den Getsémani: “Mi alma ta profundamente afligí, asta te na morto.” (Marco 14:​32-34) Suponé cu nos corementu tras di empeñonan egoista a resultá den desanimacion. E ora ei laga nos cambia nos estilo di bida. Si nos goso a mengua debí cu nos ta hiba inegoistamente un carga pisá di responsabilidadnan bíblico, talbes nos por haci ahustenan cu lo aliviá tension i restorá nos spiritu gososo. Ademas, Jehova lo bendicioná nos cu goso si nos busca pa agrad’é dor di resistí vigorosamente e carni pecaminoso, e mundu malbado, i e Diabel.​—⁠Galatio 5:24; 6:14; Santiago 4:⁠7.

19. Con nos mester mira cualkier privilegio cu nos tin den e organisacion di Dios?

¹⁹ P’e motibunan cu nos a considerá, i pa hopi otro motibu, nos tin gran goso. Sea nos ta publicadornan di congregacion of ta participando den un of otro forma di sirbishi di tempu completo, nos tur por tin hopi di haci den e trabou di Señor, i esaki siguramente lo contribuí na nos goso. (1 Corintio 15:58) Cua privilegio cu nos por tin den e organisacion di Jehova, laga nos ser gradicidu pa nan i sigui rindi sirbishi sagrado gososamente na nos Dios amoroso i felis.​—⁠1 Timoteo 1:⁠11.

20. Cua ta nos mayor privilegio, i di kico nos por ta sigur?

²⁰ Specialmente nos tin motibu pa alegrá den nos privilegio di carga Jehova su gran nomber como su Testigonan. Sí, nos ta imperfecto i ta enfrentá hopi prueba, pero laga nos tene na mente nos bendicionnan maraviyoso como Testigonan di Jehova. I corda, nos Tata celestial stimá nunca lo laga nos na caya. Nos por ta sigur cu nos semper lo ser bendicioná si e goso di Jehova ta nos fortalesa.

Con Lo Bo Contestá?

◻ Kico ta “e goso di Jehova”?

◻ Con cristiannan ta adkerí berdadero goso?

◻ Cua ta algun motibu pakico Testigonan di Jehova ta gososo?

◻ Pakico e goso di Jehova ta un fortalesa infalibel?