Kana den e Kaminda di Integridat

“Ma pa loke t’ami, lo mi kana den mi integridat.”—SALMO 26:11.

1, 2. (a) Dikon hende su integridat ta un parti importante di e kuestion di Dios su soberania? (b) Kon kriaturanan inteligente por demostrá ku nan ta apoyá Yehova su soberania?

ORA Satanas a rebeldiá den e hòfi di Edén, el a lanta e kuestion universal di Dios su soberania, esta, si Dios tin derecho di goberná riba tur Su kriaturanan. Poko tempu despues, Satanas a pretendé ku hende lo a sirbi Dios tanten ku esei a kumbiní nan. (Jòb 1:9-11; 2:4) Pues, hende su integridat a bira un parti importante di e kuestion di Yehova su soberania universal.

² Maske ta asina ku Dios su soberania no ta dependé di e integridat di su kriaturanan, hende i yunan spiritual di Dios por demostrá na ki banda di e kuestion aki nan ta pará. Kon? Dor di skohe pa sigui un bida di integridat òf nò. Pues anto, un base sólido pa por husga un persona ta su integridat.

 3. (a) Kiko Jòb i David tabata ke pa Yehova eksaminá i husga? (b) Ki preguntanan tokante integridat ta lanta?

³ Jòb a bisa ku konfiansa: “Laga [Yehova] pisa mi ku balansa eksakto, i laga Dios konosé mi integridat.” (Jòb 31:6) Rei David di antiguo Israel a pidi Yehova eksaminá su integridat ora el a resa: “Vindiká mi [òf, husga mi,” NW], o SEÑOR, pasobra mi a kana den mi integridat; i mi a konfia den SEÑOR sin totobiá.” (Salmo 26:1) Ta masha importante anto pa nos tambe kana den e kaminda di integridat! Pero kiko ta integridat, i kiko ke men kana den su kaminda? Kiko lo yuda nos keda riba e kaminda di integridat?

“Mi A Kana den Mi Integridat”

 4. Kiko ta integridat?

⁴ Integridat ta nifiká ser íntegro òf rekto, sin kulpa, hustu i intachabel. Sin embargo, integridat ta enserá mas ku djis hasi loke ta korekto. E ta puresa moral òf sintimentu di pleno deboshon na Dios den bo kurason. Satanas a kuestioná Jòb su motivashon ora el a bisa Dios: “Saka bo man awor i mishi ku [Jòb] su wesu i ku su karni; e lo maldishoná bo den bo kara.” (Jòb 2:5) Pues, fuera di e akshon korekto, integridat ta rekerí e motivashon korekto di kurason.

 5. Kiko ta mustra ku pa warda integridat nos no mester ta perfekto?

⁵ Sin embargo, pa warda integridat un hende no mester ta perfekto. Rei David tabata imperfekto i el a kometé vários eror grave durante su bida. Tòg Beibel ta papia di dje komo un hòmber ku a kana “den integridat di kurason.” (1 Reinan 9:4) Dikon? Pasobra David a stima Yehova. Su kurason tabata deboto na Dios. Di buena gana el a rekonosé su erornan, aseptá reprendementu i korigí su kaminda. En bèrdat nos por mira David su integridat den su amor i deboshon di henter kurason pa su Dios, Yehova.—Deuteronomio 6:5, 6.

6, 7. Kiko kana den integridat ta enserá?

⁶ Integridat no ta limitá na un sierto aspekto di komportashon humano, manera por ehèmpel deboshon religioso. E ta abarká henter nos manera di biba. David “a kana” den su integridat. Segun The New Interpreter’s Bible, “e verbo ‘kana’ ta transmití e idea di un hende su ‘manera di biba’ òf ‘estilo di bida.’” Papiando di personanan ku “nan kaminda ta sin mancha,” e salmista a kanta: “Bendishoná ta esnan ku ta warda [Dios] su testimonionan, ku ta busk’é ku henter nan kurason; tampoko nan no ta hasi inhustisia; nan ta kana den su kamindanan.” (Salmo 119:1-3) Pa nos ta íntegro, konstantemente nos mester buska pa hasi Dios su boluntat i kana den su kaminda.

⁷ Kana den integridat ta rekerí fiel deboshon na Dios, asta den sirkunstansianan desfaborabel. Nos integridat ta bira bisto ora nos ta soportá prueba, ta keda firme apesar di kontratempu òf ta resistí tentashon for di e mundu malbado. Nos ta ‘hasi Yehova su kurason kontentu’ pasobra e por kontestá esun ku ta reproch’é. (Proverbionan 27:11) Ku bon motibu anto nos por tin e mesun determinashon ku Jòb: “Te na mi morto lo mi no bandoná mi integridat”! (Jòb 27:5) Salmo 26 ta mustra kiko lo yuda nos kana den integridat.

“Refiná Mi Nirnan i Mi Kurason”

 8. Kiko bo ta siña for di David su súplika pa Yehova saminá su nirnan i su kurason?

⁸ David a pidi den orashon: “Skudriñá mi, o SEÑOR, i pone mi na prueba; saminá mi mente [“refiná mi nirnan,” NW ] i mi kurason.” (Salmo 26:2) Nirnan ta te paden ayá di e kurpa. Den sentido figurativo, nirnan ta representá un persona su pensamentu- i emoshonnan di mas profundo. I kurason ta representá henter e persona interno, su motivashon, sintimentunan i intelekto. Ora David a pidi Yehova samin’é, e tabata ke pa Yehova analisá i skudriñá su pensamentu- i sintimentunan di mas íntimo.

 9. Den ki manera Yehova ta refiná nos nirnan i kurason?

⁹ David a supliká Dios pa refiná su nirnan i su kurason. Kon Yehova ta refiná e persona ku nos ta di paden? David a kanta: “Lo mi bendishoná SEÑOR, kende a duna mi konseho; tambe mi kurason [“nirnan,” NW] ta instruí mi den oranan di anochi.” (Salmo 16:7) Kiko esaki ta nifiká? E ta nifiká ku Dios su konseho a yega te den e partinan mas profundo di David i a keda einan, korigiendo su pensamentu- i emoshonnan di mas íntimo. Esei tambe por sosodé den nos kaso si nos reflekshoná ku gratitut riba e konseho ku nos ta risibí mediante Dios su Palabra, su representantenan i su organisashon, i permití e konseho ei keda profundo den nos. Pidiendo Yehova ku regularidat den orashon pa refiná nos den e manera aki lo yuda nos kana den integridat.

‘Bo Miserikòrdia Ta Mi Dilanti’

10. Kiko a yuda David kana den Dios su bèrdat?

¹⁰ David a kontinuá: “Bo miserikòrdia ta dilanti di mi wowo, i mi a kana den bo bèrdat.” (Salmo 26:3) David tabata bon na haltura di Dios su obranan di miserikòrdia, i ku apresio el a meditá riba nan. El a kanta: “Bendishoná SEÑOR, o mi alma, i no lubidá ni un di su benefisionan [òf, “echonan,” NW].” Kòrdando riba un di Dios su “echonan,” David a sigui bisa: “SEÑOR ta hasi hustisia i huisio pa tur esnan ku ta wòrdu oprimí. El a hasi su kamindanan konosí na Moisés, su echonan na e yunan di Israel.” (Salmo 103:2, 6, 7) Kisas David tabata pensa riba e manera ku e egipsionan a oprimí e israelitanan den tempu di Moisés. Si ta asina, David su kurason probablemente a keda konmoví ora ku el a reflekshoná riba e manera ku Yehova a duna di konosé na Moisés kon e ta bai libra nan, i esaki a fortalesé David su determinashon pa kana den Dios su bèrdat.

11. Kiko por yuda nos kana den e kaminda di integridat?

¹¹ Studia e Palabra di Dios ku regularidat i meditá riba loke nos ta siña for di dje lo yuda nos tambe kana den e kaminda di integridat. Por ehèmpel, ora nos ta kòrda ku Hosé a hui for di e proposishonnan inmoral di e kasá di Potifar, esei siguramente lo animá nos pa hui for di proposishonnan similar ku nos ta haña na trabou, skol òf otro kaminda. (Génesis 39:7-12) Kiko si nos ta ser tentá dor di oportunidatnan pa haña prosperidat material òf prominensia i poder den mundu? Wèl, nos por meditá riba e ehèmpel di Moisés, kende a rechasá e glorianan di Egipto. (Hebreonan 11:24-26) Si nos tene na mente e perseveransia di Jòb, esei indudablemente lo yuda nos bira mas determiná pa keda fiel na Yehova apesar di malesa òf kalamidat. (Santiago 5:11) Kiko si nos haña nos ku persekushon? Wèl, kòrdando riba Daniel su eksperensia den e kueba di leon lo yena nos ku kurashi!—Daniel 6:16-22.

“Mi No Ta Sinta Huntu ku Hòmbernan Gañadó”

12, 13. Ki klase di asosiashon nos tin ku evitá?

¹² Refiriendo na un otro faktor mas ku a fortifiká su integridat, David a bisa: “Mi no ta sinta huntu ku hòmbernan gañadó, tampoko lo mi no anda ku hipókritanan. Mi ta odia e asamblea di hasidónan di maldat, i lo mi no sinta huntu ku e malbadonan.” (Salmo 26:4, 5) David a nenga redondamente di sinta ku e malbadonan. E tabata odia mal asosiashon.

¹³ Ke tal di nos? Nos ta nenga di sinta ku hòmbernan gañadó via programa di televishon, vidio, pelíkula, Internet òf otro medionan? Nos ta keda leu for di hende hipókrita, hende ku ta skonde ken nan ta? Tin hende na skol òf na nos trabou ku kisas ta fingi di ta nos amigu pa propósitonan tramposo. Di bèrdat nos ke tin amistat será ku hende ku no ta kana den Dios su bèrdat? Apóstatanan tambe por pretendé di ta sinsero, miéntras ku nan ta skonde nan berdadero intenshon di kita nos di sirbi Yehova. Kiko si tin personanan den e kongregashon kristian ku ta hiba un bida dòbel? Nan tambe ta purba skonde ken nan ta realmente. Jayson, kende awor ta sirbi komo sirbidó ministerial, tabatin amigunan asina den su hubentut. El a bisa di nan: “Un dia un di nan a bisa mi: ‘No ta importá kiko nos ta hasi awor pasobra ora e sistema nobo yega, gewon nos lo ta morto. Nos lo no sa mes ku nos a pèrdè algu.’ E kos ei ku el a bisa a manera lanta mi for di soño. Mi no ke ta morto ora e sistema nobo yega.” Jayson a hasi kos di sabí i a stòp di asosiá ku personanan asina. Apòstel Pablo a spièrta: “No laga hende gaña boso: ‘Mal kompania ta daña bon kustumber.’” (1 Korintionan 15:33) Pues, ta masha importante pa nos evitá mal asosiashon!

‘Lo Mi Deklará Tur Bo Maravianan’

14, 15. Kon nos por ‘atendé Yehova su altar’?

¹⁴ David a sigui bisa: “Lo mi laba mi man den inosensia, i lo mi atendé bo altar, o SEÑOR.” Dikon? “Pa mi proklamá ku bos di gradisimentu i deklará tur bo maravianan.” (Salmo 26:6, 7) David kier a keda moralmente limpi pa asina e por a adorá Yehova i proklamá su deboshon na Dios.

¹⁵ Tur kos relashoná ku adorashon berdadero na e tabernakel i despues na e tèmpel tabata “un kopia i sombra di e kosnan selestial.” (Hebreonan 8:5; 9:23) E altar a representá Yehova su boluntat pa aseptá e sakrifisio di Hesukristu pa salbashon di humanidat. (Hebreonan 10:5-10) Nos ta laba nos mannan den inosensia i ‘atendé Yehova su altar’ dor di ehersé fe den e sakrifisio ei.—Juan 3:16-18.

16. Kon nos ta benefisiá ora nos ta deklará Dios su obranan maravioso na otro hende?

¹⁶ Ora nos pensa riba tur loke e reskate ta hasi posibel, nos kurason no ta yena ku gratitut pa Yehova i pa su Yu unigénito? Pues anto, ku gradisimentu den nos kurason laga nos informá otro hende di Dios su obranan maravioso, kuminsando for di e kreashon di hende den e hòfi di Edén te na e restorashon kompletu di tur kos den Dios su mundu nobo. (Génesis 2:7; Echonan 3:21) I definitivamente e trabou di prediká e Reino i hasi disipel ta un gran protekshon spiritual pa nos. (Mateo 24:14; 28:19, 20) Dor di ta okupá den e trabou ei, nos speransa pa futuro ta keda briante, nos fe den e promesanan di Dios ta keda fuerte i nos amor pa Yehova i pa hende ta keda bibu.

“Mi Ta Stima e Kas Kaminda Bo Ta Biba”

17, 18. Ki aktitut nos mester tin pa ku reunionnan kristian?

¹⁷ E tabernakel, ku su altar pa ofresé sakrifisio, tabata e sentro di Yehova su adorashon na Israel. David a ekspresá den orashon su plaser den e lugá ei ku e palabranan: “O SEÑOR, mi ta stima e kas kaminda bo ta biba i e lugá kaminda bo gloria ta keda.”—Salmo 26:8.

¹⁸ Nos tambe stima reuní na lugánan kaminda nos ta siña tokante Yehova? Tur Salòn di Reino ku nan programa kontinuo di instrukshon spiritual ta fungi komo sentro di adorashon berdadero den komunidat. Ademas, tur aña nos tin nos kongresonan, asambleanan di sirkuito i dianan spesial di asamblea. Na e reunionnan ei, nos ta konsiderá Yehova su “testimonionan” òf rekordatorionan. Si nos siña “stima nan masha hopi mes,” nos lo ta ansioso pa asistí na reunion i nos lo paga bon tinu ora nos ta presente. (Salmo 119:167) Ta masha refreskante ora nos ta den kompania di rumannan den fe ku ta interesá den nos bienestar personal i ku ta yuda nos sigui kana den e kaminda di integridat.—Hebreonan 10:24, 25.

‘No Tuma Mi Bida’

19. David no ke tabata kulpabel di kua piká?

¹⁹ Komo ku David tabata bon konsiente di e konsekuensianan di desviá for di Dios su bèrdat, el a roga: “No tuma mi alma huntu ku pekadónan, ni mi bida huntu ku hòmbernan ku ta drama sanger, den kende nan man tin plan di maldat [òf, “kondukta desenfrená,” NW], i nan man drechi ta yen di plaka pasá bou di mesa.” (Salmo 26:9, 10) David no tabata ke ser kontá huntu ku hende malbado kulpabel di kondukta desenfrená òf soborno.

20, 21. Kiko por hiba nos den e kaminda di e malbadonan?

²⁰ Den e mundu djawe tin un avalancha di práktikanan inmoral. Televishon, revistanan i pelíkulanan ta promové kondukta desenfrená, “bida parotin.” (Galationan 5:19, BPK) Tin hende a bira adikto na pornografia, lokual hopi bes ta hiba na kondukta inmoral. Foral hóbennan tin mas chèns di ser afektá dor di tal influensia. Den algun pais, ta un kustumber pa dos hende di sekso opuesto traha sita pa sali ku otro, i tinernan ta ser preshoná pa pensa ku nan tambe mester hasi esei. Hopi hóben ta buska relashonnan romántiko, maske nan ta muchu yòn pa kasa. I pa satisfasé e deseonan seksual ku ta akumulá den nan, no ta tarda muchu ku nan ta haña nan den kondukta inmoral ku ta hiba na fornikashon.

²¹ Adultonan di ningun manera no ta imün pa mal influensia. Práktikanan desonesto den negoshi i e tendensia di tuma desishon a base di motibunan egoista ta indiká falta di integridat. Kana den e kamindanan di mundu lo solamente distansiá nos for di Yehova. Laga nos “odia maldat [i] stima bondat” i sigui kana den e kaminda di integridat.—Amos 5:15.

“Redimí Mi i Tene Miserikòrdia di Mi”

22-24. (a) Ki animashon bo ta haña den e palabranan final di Salmo 26? (b) Ki trampa nos lo analisá den e siguiente artíkulo?

²² David a konkluí su palabranan na Dios, bisando: “Ma pa loke t’ami, lo mi kana den mi integridat; redimí mi i tene miserikòrdia di mi. Mi pia ta para riba un lugá lizu; den e kongregashonnan lo mi bendishoná SEÑOR.” (Salmo 26:11, 12) David su determinashon pa warda su integridat ta estrechamente ligá ku su súplika pa ser redimí òf librá. Esta un gran animashon! Apesar di nos kondishon pekaminoso, Yehova lo yuda nos si nos ta determiná pa kana den e kaminda di integridat.

²³ Laga nos manera di biba mustra ku nos ta respetá i apresiá Dios su soberania den tur faseta di nos bida. Nos kada un por pidi Yehova den nos orashonnan pa saminá i refiná nos pensamentu- i sintimentunan di mas íntimo. Nos por tene su bèrdat konstantemente nos dilanti dor di studia su Palabra diligentemente. Anto di tur manera, laga nos evitá mal asosiashon i mas bien bendishoná Yehova den kongregashon. Partisipá tambe ku entusiasmo den e trabou di prediká e Reino i hasi disipel, i nunka no laga mundu pone nos relashon presioso ku Yehova na peliger. Segun ku nos ta hasi nos bèst pa kana den e kaminda di integridat, nos por tin konfiansa ku Yehova lo mustra nos miserikòrdia i fabor.

²⁴ Ya ku integridat ta enserá tur aspekto di bida, nos mester ta konsiente di un trampa mortal: mal uso di alkohòl. Den e siguiente artíkulo nos lo trata esaki.

Bo Ta Kòrda?

• Dikon korektamente por husga kriaturanan inteligente a base di nan integridat?

• Kiko ta integridat, i kiko kana den e kaminda di integridat ta enserá?

• Kiko lo yuda nos kana den e kaminda di integridat?

• Pa warda integridat, kua peligernan nos mester ta konsiente di dje i evitá?

[Plachi na página 14]

Bo ta tene Yehova su echonan di miserikòrdia dilanti di bo wowo?

[Plachi na página 14]

Bo ta pidi Yehova regularmente pa saminá bo pensamentunan di mas íntimo?

[Plachinan na página 15]

Ora nos warda integridat bou di prueba, nos ta hasi Yehova su kurason kontentu

[Plachinan na página 17]

Bo ta hasi bon uso di Yehova su perkurashonnan pa yuda bo kana den e kaminda di integridat?