“Di Ken Lo Mi Tin Miedu?”
“Maske guera lanta kontra mi, tòg lo mi tin konfiansa.”—SAL. 27:3.
1. Ki preguntanan Salmo 27 lo yuda nos kontestá?
DIKON nos ta sigui hasi mas den e trabou di prediká apesar ku situashon di mundu ta birando pió? Dikon nos ta usa nos tempu i energia ku smak den e trabou di prediká siendo ku tin hopi problema ekonómiko serio awe? Kon bini nos ta mira futuro ku konfiansa siendo ku hopi hende tin miedu di futuro? E kantika na Salmo 27 ku Rei David a komponé lo yuda nos kontestá e preguntanan akí.
2. Ki efekto miedu por tin riba un persona, pero ki konfiansa nos tin?
2 David a kuminsá su salmo ku e siguiente palabranan: “SEÑOR ta mi lus i mi salbashon; di ken lo mi tin temor? SEÑOR ta e fortalesa di mi bida; di ken lo mi tin miedu?” (Sal. 27:1) Miedu por laga un persona sintié asina débil ku e no por hasi nada. Sinembargo, un persona ku ta teme Yehova no ta laga miedu strob’é. (1 Ped. 3:14) Sí, ora nos ta hasi Yehova nos fortalesa, nos “lo biba trankil, sin miedu di maldat.” (Pro. 1:33; 3:25) Kon bini?
‘YEHOVA TA MI LUS I MI SALBASHON’
3. Den ki sentido Yehova ta nos lus, pero kiko nos mes mester hasi?
3 E metáfora ‘Yehova ta mi lus’ ta hala atenshon na e echo ku Yehova ta siña nos e bèrdat i ta saka nos for di skuridat spiritual. (Sal. 27:1) Lus literal por yuda nos mira kualke peliger òf opstákulo den nos kaminda, pero e no ta kit’é. Ta nos mes tin ku aktua na un manera sabí ku e asuntu. Di mes manera, Yehova ta yuda nos komprondé nifikashon di susesonan di mundu. Ademas, e ta spièrta nos di e peligernan di e mundu malbado akí. I el a perkurá pa nos tin su Palabra, Beibel, ku ta kontené prinsipionan ku semper ta duna bon resultado. Pero, ta nos mester apliká loke nos ta siña. Anto ora nos ta hasi esei, nos lo bira sabí meskos ku e salmista kende a bisa ku Dios su mandamentu a hasié ‘mas sabí ku su enemigunan i tur su maestronan.’—Sal. 119:98, 99, 130.
4. (a) Dikon David a bisa ku konvikshon: ‘Yehova ta mi salbashon’? (b) Na ki tempu spesialmente Yehova lo salba su sirbidónan djawe?
4 David su palabranan na Salmo 27:1 ta mustra ku e no a lubidá kon Yehova a yega di salb’é, òf libr’é, na diferente okashon. Por ehèmpel, Yehova a yega di libr’é “for di gara di leon i for di gara di ber.” Ademas, Yehova a yud’é derotá e gigante Goliat. Despues, Yehova a skap’é tur e biahanan ku Rei Saul a purba traspas’é ku lansa. (1 Sam. 17:37, 49, 50; 18:11, 12; 19:10) P’esei no ta nada straño ku David a bisa ku konvikshon: ‘Yehova ta mi salbashon’! I meskos ku Yehova a yega di salba David, lo e salba su sirbidónan djawe tambe. Na ki tempu lo e hasi esei? Durante “e tribulashon grandi.”—Rev. 7:14; 2 Ped. 2:9.
KÒRDA KON YEHOVA A YUDA BO
5, 6. (a) Dikon nos rekuerdonan ta duna nos kurashi? (b) Dikon ta bon pa meditá riba e echo ku Yehova a yuda su pueblo den pasado?
5 Lesa Salmo 27:2 i 3. E tekstonan akí ta hala nos atenshon na algu masha importante ku por yuda nos haña kurashi. Nan ta mustra ku David a kòrda momentonan ku Yehova a skapa su bida. (1 Sam. 17:34-37) Anto e rekuerdonan ei sigur lo a dun’é kurashi pa enfrentá asta su pió enemigunan. Abo tambe ta haña kurashi ora bo kòrda kon Yehova a yuda bo? Por ehèmpel, bo no a yega di hasi orashon intenso tokante un problema ku tabata molestiá bo? I Yehova no a duna bo sabiduria i forsa pa trata ku e problema ei? Kisas bo ta kòrda kon Yehova a kita sierto opstákulonan ku tabata stroba bo di sirbié ku goso òf kon el a duna bo sierto privilegionan den su sirbishi. (1 Kor. 16:9) Ki efekto e rekuerdonan akí tin riba bo? Nan no ta duna bo mas konfiansa ku Yehova por yuda bo trata ku situashonnan asta mas difísil òf yuda bo perseverá bou di prueba severo?—Rom. 5:3-5.
6 Awor, kiko si un gobernante poderoso trama pa kaba ku e organisashon di Testigunan di Yehova? Den nos tempu, hopi hende a purba di hasi esei, pero nan no a logra. Ademas, ta bon pa nos kòrda ku Yehova a yuda su pueblo den pasado, pasobra esei lo duna nos kurashi pa enfrentá loke sea bini den futuro.—Dan. 3:28.
AMOR PA ADORASHON BERDADERO
7, 8. (a) Kiko David a pidi Yehova segun Salmo 27:4? (b) Kiko ta Yehova su gran tèmpel spiritual, i kon hende ta ador’é einan?
7 Un otro kos ku ta yuda nos kultivá kurashi ta amor pa adorashon berdadero. (Lesa Salmo 27:4.) Den tempu di David, “e kas di SEÑOR” tabata e tabernakel. I David a hasi preparashon pa su yu hòmber Sálomon traha un bunita tèmpel pa Yehova. Pero, siglonan despues, Hesus a bisa ku lo a bini e tempu ku hende no mester bai e tèmpel mas pa adorá Yehova. (Huan 4:21-23) Yehova lo a perkurá un otro areglo pa nos rindi adorashon ku e ta aseptá. Pa nos adorashon ta aseptabel p’e, nos mester tin fe den e sakrifisio di reskate di Hesus. Na Hebreonan kapítulo 8 te ku 10, apòstel Pablo a indiká ku e areglo akí ta e gran tèmpel spiritual. Ademas, el a splika ku e tèmpel ei a kuminsá funshoná na Hesus su boutismo ku a tuma lugá na aña 29 di nos era ora el a presentá pa hasi Yehova su boluntat. (Heb. 10:10) Awor, kon nos ta adorá Dios na e tèmpel akí? Nos ta hasi esei ora nos ta hasi orashon “ku kurason sinsero i pleno fe,” ta proklamá nos speransa sin vasilá, ta asistí na nos reunionnan di kongregashon i tene nos Adorashon Komo Famia. (Heb. 10:22-25) I amor pa adorashon berdadero lo fortalesé nos pa sigui hasi e kosnan ei den e último dianan krítiko akí.
8 Rònt mundu, Yehova su fiel sirbidónan ta oumentá nan partisipashon den sirbishi, siña otro idioma i ta muda bai otro lugá kaminda tin mas nesesidat di predikadó di Reino. Di e manera ei, nan ta demostrá ku nan tin e mesun deseo ku e salmista kende a pidi Yehova un solo kos, esta, ‘p’e kontemplá e bunitesa di SEÑOR i meditá den su tèmpel.’ Sí, Yehova su fiel sirbidónan ke pa Yehova bendishoná nan, i nan ke sigui rindi sirbishi sagrado na dje maske kiko ku pasa.—Lesa Salmo 27:6.
KONFIA DEN DIOS SU YUDANSA
9, 10. Kiko Yehova ta primintí nos na Salmo 27:10?
9 David su palabranan ta mustra kuantu el a konfia den Yehova su yudansa; el a bisa: “Maske mi tata i mi mama bandoná mi, SEÑOR lo rekohé mi.” (Sal. 27:10) Ora nos lesa 1 Samuel kapítulo 22, nos por konkluí ku David su mayornan no a bandon’é. Sinembargo, awe tin hopi hende ku ta ser rechasá pa nan mes famia. I hopi di e hendenan akí a haña yudansa amoroso i protekshon den e kongregashon kristian.
10 Awor, siendo ku Yehova ta kla pa sostené su sirbidónan ora otronan bandoná nan, lo e no yuda nan trata tambe ku kualke otro difikultat? Por ehèmpel, si nos ta preokupá tokante kon pa perkurá materialmente pa nos famia, nos no mester tin konfiansa ku Yehova lo yuda nos? (Heb. 13:5, 6) Yehova ta komprondé nos situashon i ta konsiente di nos nesesidatnan.
11. Ki efekto nos konfiansa den Yehova tin riba otro hende? Ilustrá.
11 Tuma por ehèmpel e kaso di Victoria, un studiante di Beibel na Liberia. Segun ku e tabata progresá ku e meta pa batisá, e hòmber ku e tabata biba kuné a bandoná é i su tres yunan. Maske Victoria a keda sin lugá di biba i sin entrada, el a sigui hasi progreso spiritual te el a batisá. Algun tempu despues, su yu muhé di 13 aña a haña un pòtmòni yen di sèn. Pa no kai den tentashon, nan a disidí ku nan no ta ni konta e plaka. Mesora nan a buska kontakto ku e doño di e pòtmòni, kende tabata un sòldá. El a bisa nan ku si tur hende tabata onesto manera Testigunan di Yehova, mundu lo tabata mihó i lo tabatin mas pas. Usando Beibel, Victoria a mustra e sòldá Yehova su promesa di un mundu nobo. E sòldá a keda asina impreshoná ku Victoria su fieldat ku el a dun’é un kantidat konsiderabel di e plaka ku tabatin den e pòtmòni. Sí, Testigunan di Yehova ta personanan onesto pasobra nan tin pleno konfiansa ku Yehova lo perkurá pa nan. I rònt mundu nan ta konosí komo hende onesto.
12. Kiko nos ta demostrá ora nos sigui sirbi Yehova aunke nos sufri pèrdida material? Ilustrá.
12 Awor, laga nos wak e ehèmpel di Thomas, un publikadó no batisá na Sierra Leone. El a traha kasi un aña komo maestro na un skol sekundario sin por a kobra su salario pasobra nan mester a kaba di atendé su solisitut. Bo por imaginá bo kon e tabata sintié? Finalmente, pa e por a haña su sèn, e mester a papia ku e direktor di e skol. I e direktor, kende tabata un pastor, a bis’é ku debí ku e kreensianan di Testigunan di Yehova ta bai kontra di esnan di e instituto, e no por sigui traha na e skol i a la bes ser un Testigu. Pues, e mester a skohe. Thomas a disidí di kita for di trabou i pèrdè su salario di un aña largu. Despues di esei, el a haña un trabou di drecha radio i telefòn selular. Tin hopi ehèmpel mas ku ta mustra ku ora nos ta konfia den Yehova, nos no mester tin miedu ku nos lo keda desampará. Komo ku Yehova a krea tur kos i semper ta protehá su pueblo, nos sa ku lo e kuida nos.
13. Kon e trabou di prediká ta progresando den paisnan di ménos rekurso?
13 Publikadónan di Reino ku ta biba den paisnan pober hopi biaha ta masha aktivo den e trabou di prediká. Kon bini? Un sukursal a skirbi: “Hopi di e personanan ku ta aseptá un estudio di Beibel ta sin trabou i p’esei nan tin mas tempu pa studia durante dia. E rumannan tambe tin mas tempu pa prediká. Ademas, hende ku ta biba den un situashon deplorabel no mester ser konvensí ku nos ta bibando den e último dianan; nan mes ta eksperensiá esei.” Un misionero ku ta sirbi pa mas ku 12 aña den un pais kaminda kada publikadó tin un averahe di mas ku tres estudio di Beibel a skirbi: ‘Mayoria di publikadó ta hiba un bida simpel ku poko distraishon. P’esei, nan tin mas tempu pa bai sirbishi i pa studia Beibel ku hende.’
14. Den ki manera Dios por protehá e multitut grandi?
14 Yehova a primintí ku lo e yuda, protehá i libra su pueblo, komo grupo, tantu físikamente komo spiritualmente, i nos tin konfiansa ku lo e kumpli ku su promesa. (Sal. 37:28; 91:1-3) Beibel ta bisa ku lo tin un multitut grandi ku lo sobrebibí “e tribulashon grandi.” (Rev. 7:9, 14) Pues, ningun hende lo no por eksterminá Dios su pueblo durante e último dianan akí pasobra Dios lo protehá e multitut ei. Un otro manera ku Yehova ta protehá e multitut grandi ta den sentido spiritual. E ta duna nan tur loke nan tin mester pa por soportá prueba i keda ku un bon relashon kuné. I durante Armagedon tambe Yehova lo protehá su pueblo.
“SIÑA MI BO KAMINDA, O SEÑOR”
15, 16. Ki bendishon nos ta risibí ora nos ta hasi loke Dios ta bisa? Ilustrá.
15 Pa nos por keda ku kurashi, nos mester sigui laga Yehova instruí nos. David a roga Yehova: “Siña mi bo kaminda, o SEÑOR, i guia mi den un berea di rektitut, pa motibu di mi enemigunan.” (Sal. 27:11) Si nos tambe ke pa Yehova siña nos, nos mester presta bon atenshon na loke Beibel ta bisa i na e guia di Yehova su organisashon. I nos mester ta kla pa apliká loke nos ta siña. Por ehèmpel, hopi ruman a hasi kaso di e konseho sabí pa simplifiká nan bida i a eliminá debe innesesario. P’esei, e krísis ekonómiko resien no a afektá nan mashá. Nan no tin e preokupashon di tin ku paga kos material ku nan no por afòrt; nan ta liber pa hasi mas den sirbishi. P’esei ta bon pa kada un di nos puntra nos mes: ‘Mi ta kla pa apliká loke mi ta lesa den Beibel i den e publikashonnan di e esklabo fiel i prudente, asta si esei ta nifiká ku mi tin ku hasi sakrifisio?’—Mat. 24:45.
16 Ora nos ta laga Yehova instruí nos i guia nos den e kaminda korekto, nos no tin ningun motibu pa sinti miedu. Un biaha, un pionero regular na Merka a solisitá pa un puesto na su trabou ku lo a permití é i su famia sigui den e trabou di tempu kompleto. Su supervisor a bis’é ku nunka lo e haña e puesto ei sin un estudio universitario. Si esaki a sosodé ku abo, lo bo a lamentá ku bo a keda sin sigui un estudio avansá pa drenta sirbishi di tempu kompleto? Dos siman despues, e supervisor a pèrdè su trabou i un otro manager a puntra e ruman kiko ta su metanan. Mesora el a bisa su manager ku e i su kasá ta Testigu di Yehova i ku nan ta traha den sirbishi di tempu kompleto i ku nan ke sigui hasi esei. Promé ku e ruman por a kaba di papia, e manager a bis’é: “Mi a ripará ku bo ta diferente! Tempu ku mi tata tabata muriendo, dos di boso rumannan tabata bin lesa Beibel kuné tur dia. I mi a primintí mi mes ku si un dia mi haña oportunidat di yuda un Testigu di Yehova, lo mi hasié.” E siguiente mainta, e ruman a haña e mesun trabou ku e eks-supervisor a nenga di dun’é. Sí, ora nos pone interesnan di Reino na promé lugá den nos bida, Yehova ta kumpli ku su promesa di duna nos tur loke nos tin mester.—Mat. 6:33.
NOS MESTER TIN FE I SPERANSA
17. Kiko lo yuda nos enfrentá futuro ku konfiansa?
17 Despues, David a enfatisá e importansia di tin fe i speransa. El a bisa ku lo el a desesperá ‘si e no a kere ku lo e mira e bondat di SEÑOR.’ (Sal. 27:13) En bèrdat, kiko lo a para di nos si Dios no a duna nos speransa i si nos no tabata sa e kosnan ku Salmo 27 ta papia di dje? P’esei, laga nos sigui pidi Yehova forsa i p’e protehá nos i salba nos na Armagedon.—Lesa Salmo 27:14.
[Plachi na página 23]
David a haña kurashi ora el a kòrda kon Yehova a salb’é
[Plachi na página 25]
Nos ta mira problema ekonómiko komo un oportunidat pa hasi mas den sirbishi?