Teme Yehova i Sea Felis!

“Felis ta e hòmber ku ta teme Yehova.”​—SALMO 112:1, NW.

1, 2. Kiko e temor di Yehova por produsí?

FELISIDAT no ta un kos ku nos ta logra fásilmente. Berdadero felisidat ta dependé di si nos ta tuma e desishonnan korekto, ta hasi loke ta korekto i ta keda leu for di loke ta robes. Nos Kreadó, Yehova, a duna nos su Palabra, Beibel, pa siña nos kon nos por hiba e mihó bida ku tin. Dor di buska Yehova su guia i siguié, desplegando asina temor di Dios, nos por ta realmente satisfecho i felis.—Salmo 23:1; Proverbionan 14:26.

² Den e artíkulo aki nos lo konsiderá algun ehèmpel bíbliko i tambe di nos tempu ku ta mustra kon berdadero temor di Dios ta duna un hende e fortalesa pa resistí preshon pa hasi loke ta robes i e kurashi pa hasi loke ta korekto. Nos lo bai mira ku temor di Dios por hasi nos felis dor di motivá nos pa korigí un proseder robes, manera Rei David tabatin ku hasi. Tambe nos lo bai mira ku e temor di Yehova ta un herensia realmente balioso ku mayornan por pasa pa nan yunan. De echo, e Palabra di Dios ta sigurá nos: “Felis ta e hòmber ku ta teme Yehova.”—Salmo 112:1, NW.

Kon pa Rekuperá Felisidat Pèrdí

 3. Kiko a yuda David rekuperá di su pikánan?

³ Manera nos a konsiderá den e artíkulo anterior, na tres okashon notabel David a faya di demostrá e debido temor di Dios i el a peka. Sin embargo, e manera ku el a reakshoná riba Yehova su disiplina a demostrá ku apesar di su pikánan e tabata un persona temeroso di Dios. Su rèspèt i atmirashon profundo pa Dios a motiv’é na atmití su kulpa, korigí su kaminda i restablesé un relashon ku Yehova. Ounke David su erornan a kousa sufrimentu p’e i pa otro hende, su repentimentu sinsero a pone ku el a sigui haña Yehova su sosten i bendishon. David su ehèmpel siguramente por duna kurashi na kristiannan djawe ku kisas ta kometé un pika serio.

 4. Kon e temor di Dios por yuda un persona rekuperá felisidat?

⁴ Tuma e kaso di Sonja.a Ounke Sonja tabata sirbi komo un predikadó di tempu kompletu, el a kuminsá anda ku mal asosiashon i el a hañ’é enbolbí den komportashon no-kristian, i mester a ekspuls’é for di e kongregashon kristian. Pero Sonja a rekuperá su sano huisio, i el a hasi tur loke ta nesesario pa drecha su relashon ku Yehova. Ku tempu, el a ser restablesé den e kongregashon. Durante tur e kosnan ei, Sonja nunka a bandoná su deseo di sirbi Yehova. A lo largu, el a bolbe drenta den sirbishi di pionero di tempu kompletu. Despues, el a kasa ku un ekselente ansiano kristian, i awor Sonja felismente ta sirbi huntu kuné den e kongregashon. Ounke Sonja ta lamentá ku temporalmente el a dual for di e kaminda kristian, e ta felis ku su temor di Dios a yud’é bin bèk serka Yehova.

Mihó Sufri Ku Peka

5, 6. Splika kon i pakiko David a spar Saul su bida dos biaha.

⁵ Naturalmente ta mas mihó ora ku temor di Dios ta yuda un hende evitá di kometé piká. Esaki tabata e kaso ku David. Na un okashon ku Saul tabata persiguí David ku un ehérsito di 3.000 hende, Saul a drenta den un kueba. Tabata nèt e kueba kaminda David ku su hòmbernan tabata skonde. E hòmbernan di David a urgié p’e mata Saul, rasonando ku ta Yehova tabata entregando David su enemigu mortal den su man. Ketu-ketu, David a slùip yega serka Saul i a kòrta zòm di su mantel kita afó. Pero komo ku David tabata teme Dios, asta e akto relativamente inofensivo ei a tormentá su konsenshi. David a plama su hòmbernan agitá for di otro ku e palabranan: ‘Ku esaki sea leu di mi di hasi un kos asin’aki ku mi señor, Yehova su ungí, di lanta mi man kontra dje, siendo ku e ta Yehova su ungí.’b—1 Samuel 24:1-7.

⁶ Na un otro okashon mas despues, Saul tabata anochi den un kampamentu, i e ku su hòmbernan a pega ‘un soño profundo ku a bin for di Yehova.’ David ku Abisai, un subrino di dje yen di kurashi, a slùip drenta meimei di e kampamentu i para wak Saul drumí na soño. Abisai kier a kaba ku Saul di unabes pa semper. Pero David a frena Abisai, bisando: “Ken por saka su man kontra SEÑOR su ungí i keda sin kulpa?”—1 Samuel 26:9, 12.

 7. Kiko a frena David di kometé piká?

⁷ Dikon David no a mata Saul ora ku dos biaha el a haña chèns pa hasi esei? Pasobra e tabata teme Yehova mas ku e tabata teme Saul. Komo ku David tabatin e debido temor di Dios, el a preferá di sufri—si ta nesesario—i no peka. (Hebreonan 11:25) E tabatin pleno konfiansa ku Yehova lo a kuida Su pueblo i kuid’é personalmente. David tabata sa ku obedesé Dios i konfia den dje lo a produsí felisidat i trese hopi bendishon, miéntras ku ignorá Dios lo a trese Dios su desaprobashon. (Salmo 65:4) Tambe e tabata sa ku Dios lo a kumpli ku Su promesa di hasi David rei i lo a kita Saul na Su debido tempu i manera.—1 Samuel 26:10.

Teme Dios Ta Produsí Felisidat

 8. Kon David su kondukta bou di preshon ta sirbi komo un ehèmpel?

⁸ Komo kristian, nos ta ferwagt bofon, persekushon i otro pruebanan. (Mateo 24:9; 2  Pedro 3:3) Tin biaha nos por asta haña nos ku difikultat ku tin keber ku rumannan den fe. Sin embargo, nos sa ku Yehova ta mira tur kos, ta tende nos orashonnan i, na e debido tempu, lo rektifiká asuntunan segun su boluntat. (Romanonan 12:17-21; Hebreonan 4:16) P’esei, en bes di tene miedu di nos opositornan, nos ta teme Dios i ta akudí na dje pa libra nos. Meskos ku David, nos no ta venga nos mes, ni nos no ta komprometé prinsipionan hustu pa evitá sufrimentu. Na final di kuenta, esaki ta produsí felisidat. Pero kon?

 9. Duna un ehèmpel di e manera ku temor di Dios por resultá den felisidat apesar di persekushon.

⁹ Un kristian ku tin hopi tempu komo misionero na Afrika a konta: “Mi ta kòrda e ehèmpel di un mama ku su yu muhé tiner ku debí na nan neutralidat kristian a nenga di kumpra karchi di partido polítiko. Un multitut di hòmber a ataká nan brutalmente i despues a manda nan bai kas. Segun ku nan tabata kana bai, e mama a purba konsolá su yu muhé ku tabata yora i ku tabata bringa pa komprondé dikon e kos aki a pasa ku nan. Nan no tabata kontentu na e momento ei, pero sí nan tabatin un konsenshi limpi. Despues, nan tabata masha felis ku nan a obedesé Dios. Si nan lo a kumpra e karchinan di e partido, e multitut lo a keda superkontentu. E hòmbernan lo a duna nan bòter di limonada i lo a baila rònt di nan durante henter nan kaminda pa kas. Pero e mucha muhé i su mama, sabiendo ku nan a komprometé nan fe, lo tabata e hendenan di mas infelis na mundu.” Nan temor di Dios a spar nan tur esei.

10, 11. Ki bon resultado e temor di Dios di un señora a produsí?

¹⁰ Temor di Dios ta resultá den felisidat tambe ora nos ta konfrontá pruebanan relashoná ku rèspèt pa e santidat di bida. Tempu ku Mary tabata na estado di su di tres yu, su dòkter a urgié pa kometé aborto. E dòkter a bisa: “Bo kondishon ta peligroso. Lo bo por haña komplikashon un momento pa otro i muri den 24 ora. E ora ei e beibi tambe lo muri. En todo kaso, no tin ningun garantia ku e beibi lo ta normal.” Mary tabata studia Beibel ku Testigunan di Yehova pero ainda e no a batisá. Mary a bisa: “Pero ya mi a disidí di sirbi Yehova, i mi tabata determiná pa keda obedesidu na dje, pase loke pase.”—Eksodo 21:22, 23, NW.

¹¹ Durante su embaraso, Mary a sigui studia Beibel i okupá su mes ku kuido di su famia. Finalmente e beibi a nase. Mary a konta: “E parto tabata un poko mas difísil ku e promé dosnan, pero no tabatin komplikashon grandi.” Temor di Dios a yuda Mary mantené un bon konsenshi, i poko despues el a batisá. Segun ku e beibi a krese, e tambe a siña teme Yehova, i aktualmente e mucha hòmber aki ta sirbiendo na un di e sukursalnan di Testigunan di Yehova.

‘Fortalesé Bo Mes den Yehova’

12. Kon temor di Dios a fortalesé David?

¹² David su temor di Yehova a hasi mas ku solamente fren’é di hasi kos robes. E temor ei a fortales’é pa aktua na un manera desisivo i sabí bou di sirkunstansianan difísil. Pa un aña i kuater luna, David ku su hòmbernan a buska refugio for di Saul na Ziklag den e tera di e filisteonan. (1 Samuel 27:5-7) Un biaha ku e hòmbernan no tabata t’ei, un grupo di bandidu amalekita a kima e stat i a bai ku tur e hòmbernan su kasá-, yu- i tounan. Ora ku David i e hòmbernan a regresá i mira loke a sosodé, nan a yora. Pero tristesa a kambia rápidamente den amargura, i e hòmbernan a kuminsá bisa ku nan kier a piedra David mata. Ounke hopi angustiá, David no a desesperá. (Proverbionan 24:10) Su temor di Dios a motiv’é pa akudí na Yehova, i el ‘a fortalesé su mes den Yehova su Dios.’ Ku Dios su yudansa, David i su hòmbernan a logra alkansá e amalekitanan i a rekuperá tur kos.—1 Samuel 30:1-20.

13, 14. Kon temor di Dios a yuda un kristian tuma bon desishon?

¹³ Dios su sirbidónan djawe tambe ta konfrontá situashonnan ku ta rekerí konfiansa den Yehova i e kurashi pa aktua na un manera desisivo. Tuma komo un ehèmpel e kaso di Kristina. Na mucha, Kristina a studia Beibel ku Testigunan di Yehova. Pero e kier a bira un pianista di konsierto, i el a hasi hopi progreso den e direkshon ei. Ademas, e tabatin bèrgwensa di prediká i p’esei tabatin miedu di aseptá e responsabilidatnan ku lo e tin si e batisá. Segun ku Kristina a sigui studia e Palabra di Dios, el a kuminsá sinti su poder. El a siña konosé e temor di Yehova, i a realisá ku Yehova ta ferwagt di su sirbidónan ku nan ta stim’é ku henter nan kurason, mente, alma i forsa. (Marko 12:30) Esaki a motiv’é pa dediká su mes na Yehova i batisá.

¹⁴ Kristina a pidi Yehova yud’é hasi progreso spiritual. El a splika: “Mi tabata sa ku e bida di un pianista di konsierto ta enbolbé masha hopi biahamentu i ku lo tin kontraktnan pa toka te ku 400 konsierto pa aña. Pues mi a disidí pa na lugá di esei mi bai duna lès pa asina mantené mi mes finansieramente i sirbi komo un predikadó di tempu kompletu.” Na e tempu ei, Kristina tabata di skèdjel kaba pa hasi su debut den e sala di konsierto mas konosí di su pais. El a konta: “Mi promé konsierto a resultá di ta a la bes mi último.” Entre tantu Kristina a kasa ku un ansiano kristian. Awor nan dos huntu ta sirbi na un sukursal di Testigunan di Yehova. E ta felis ku Yehova a dun’é e fortalesa pa tuma desishonnan korekto i ku awor e por usa su tempu i energia den Su sirbishi.

Un Herensia Balioso

15. Kiko David kier a pasa pa su yunan, i kon el a hasié?

¹⁵ David a skirbi: “Bin, yunan, skucha mi; lo mi siña boso e temor di SEÑOR.” (Salmo 34:11) Komo tata, David tabata desididu pa pasa pa su yunan un herensia balioso: un temor sinsero, balansá i saludabel di Yehova. Ku echo i palabra, David a pinta Yehova, no komo un Dios eksigente ku ta spantá bo, i ku ta kla pa kastigá kualke violashon di Su lei, sino komo un Tata amoroso, atento i kla pa pordoná su yunan terenal. David a puntra: “Ta ken por tene konteo di eror?” Anto, indikando asina su konfiansa ku Yehova no ta konstantemente bezig ta saminá nos erornan, el a agregá: “Tene mi leu for di kosnan ku mi no a ripará!” David tabatin sigur ku si e hasi su mihó esfuerso, su palabra- i pensamentunan lo por ta aseptabel pa Yehova.—Salmo 19:12, 14, Byington.

16, 17. Kon mayornan por siña nan yunan teme Yehova?

¹⁶ David ta para komo un ehèmpel pa mayornan awe. Ralph, kende huntu ku su ruman hòmber ta sirbi na un sukursal di Testigunan di Yehova, a bisa: “Nos mayornan a lanta nos na un manera ku tabata agradabel pa ta den e bèrdat. Tempu ku nos tabata chikí, nan a inkluí nos den nan kòmbersashonnan tokante aktividatnan di e kongregashon, i nos a bira mesun entusiasmá tokante e bèrdat ku nan. Nan a lanta nos ku e kreensia ku nos por hasi bon kos den e sirbishi di Yehova. De echo, durante vários aña nos famia a biba den un pais ku tin gran nesesidat di publikadónan di Reino, i a yuda establesé kongregashonnan nobo.

¹⁷ Loke a tene nos riba e kaminda korekto no tabata un kantidat di reglanan estrikto sino e echo ku pa nos mayornan, Yehova tabata real i masha-masha bon i bondadoso mes. Nan a purba di siña konosé Yehova mihó i di agrad’é, i nos a siña for di nan berdadero temor di Dios i amor p’e. Asta ora nos a hasi algu robes, nos mayornan no a laga nos sinti ku Yehova no tabata stima nos mas; tampoko nan no a rabia i pone restrikshonnan innesesario riba nos. Mayoria biaha, nan tabata pone nos kai sinta i djis papia ku nos, Mama tin biaha ku awa den su wowo, purbando pa yega na nos kurason. I esei a duna resultado. Nos a siña mediante nos mayornan su echo i palabra ku temor di Yehova ta un kos bunita i ku ta un goso i plaser—no un karga—di por ta un di su Testigunan.”—1 Juan 5:3.

18. Kiko nos lo gana dor di teme e Dios berdadero?

¹⁸ Entre “e último palabranan di David” nos ta lesa: “Esun ku ta goberná hende ku hustisia, ku ta goberná den e temor di Dios, ta manera e lus di mainta ora solo ta sali.” (2 Samuel 23:1, 3, 4) Salomon, David su yu i susesor, aparentemente a siña e sabiduria di e palabranan aki, pasobra el a pidi Yehova dun’é “un kurason obedesidu” i e kapasidat “pa diserní entre bon i malu.” (1 Reinan 3:9, NW) Salomon a rekonosé ku temor di Yehova ta hiba na sabiduria i felisidat. Mas despues, el a resumí e buki di Eklesiastés ku e palabranan: “E konklushon di tur loke ku a wòrdu tendí, ta: teme Dios i warda su mandamentunan, pasobra esaki ta aplikabel na kada persona. Pasobra Dios lo trese tur echo na huisio, tur kos ku ta skondí, sea bon òf malu.” (Eklesiastés 12:13, 14) Si nos obedesé e konseho ei, nos en bèrdat lo nota ku ‘e rekompensa di humildat i e temor di Yehova’ no ta solamente sabiduria i felisidat, sino tambe “rikesa, onor i bida.”—Proverbionan 22:4.

19. Kiko lo kapasitá nos pa komprondé ‘e temor di Yehova’?

¹⁹ For di ehèmpelnan bíbliko i eksperensianan di nos tempu, nos ta mira ku e debido temor di Dios ta hunga un papel positivo den e bida di Yehova su sirbidónan berdadero. E temor ei no solamente por prevení nos di hasi loke ta desagradá nos Tata selestial sino tambe ku e por duna nos e kurashi pa enfrentá nos atversarionan i e fortalesa pa wanta prueba- i difikultatnan ku ta bin den nos direkshon. P’esei laga nos tur, hóben i bieu, hasi nos bèst diligentemente pa studia e Palabra di Dios, meditá riba loke nos ta siña i hala serka di Yehova den orashon sinsero i riba un base regular. Hasiendo esei, no solamente nos lo haña “e konosementu di Dios,” sino tambe nos lo komprondé ‘e temor di Yehova.’—Proverbionan 2:1-5.

[Nota]

Bo Por Splika?

Kon e temor di Dios por

• yuda un hende rekuperá for di piká serio?

• produsí felisidat apesar di prueba i persekushon?

• fortalesé nos pa hasi e boluntat di Dios?

• ta un herensia balioso pa nos yunan?

[Plachi na página 26]

Temor di Yehova a frena David di mata Rei Saul

[Plachinan na página 29]

Temor di Dios ta un herensia balioso ku mayornan por pasa pa nan yunan