Para i Mira e Salbashon di Yehova!

“Stashoná boso mes, para i mira e salbashon di SEÑOR na boso fabor.”​—2 KRÓNIKANAN 20:17.

1, 2. Pakiko e atake inminente di parti di “Gòg di tera di Magòg” lo tin un mayor impakto ku e menasa di terorismo internashonal?

ALGUN hende a yega di deskribí terorismo komo un atake kontra komunidat mundial i asta kontra sivilisashon mes. Ta di komprondé ku mester tuma un menasa asina masha na serio. Di otro banda, tin un otro atake ku lo tin konsekuensia asta mas grandi ainda, unu ku komunidat mundial ta duna masha poko atenshon na dje. Otronan no ta wòri mes kuné. Kiko esei ta?

² Esei ta e atake di “Gòg di tera di Magòg,” ku Beibel ta papia di dje den Ezekiel kapítulo 38. Ta un eksagerashon pa bisa ku e atake aki lo tin un mayor impakto ku e menasa di terorismo internashonal? Nò, pasobra e atake di Gòg ta mas ku un atake kontra gobièrnunan humano. E ta un atake kontra e gobièrnu selestial di Dios! Sin embargo, distinto di hende ku kisas no por hasi muchu kos ora nan ser ataká, e Kreadó sí ta kompletamente kapas pa kontrarestá e atake mas feros di Gòg.

Un Atake Kontra e Gobièrnu di Dios

3. Kiko gobernantenan mundial a ser invitá pa hasi desde 1914, i kon nan a respondé?

³ E konflikto entre Dios su Rei ku aworakí ta na mando i Satanas su mundu malbado a kuminsá for di dia ku e Reino di Dios a ser establesí den shelu na 1914. E tempu ei a notifiká gobernantenan humano pa someté nan mes n’e Gobernante eskohí di Dios. Pero, manera a ser profetisá, nan a nenga di hasi esei: “E reinan di mundu ta tuma nan posishon i e gobernantenan ta konsultá huntu kontra SEÑOR i kontra su ungí, bisando: ‘Laga nos kibra nan kadenanan i tira nan kabuyanan for di nos!’” (Salmo 2:​1-3) Tur kos ta mustra ku e resistensia kontra e gobernashon di Reino lo alkansá su kulminashon durante e atake di parti di Gòg di Magòg.

4, 5. Kon hende por bringa kontra e gobièrnu selestial invisibel di Dios?

⁴ Talbes bo ta puntra bo mes kon hende por bringa kontra un gobernashon selestial invisibel. E gobernashon aki, manera Beibel ta revelá, ta konsistí di “144.000 [persona] ku a wòrdu kumprá for di tera,” huntu ku “e Lamchi,” Kristu Hesus. (Revelashon 14:​1, 3; Juan 1:29) Dor ku nan ta den shelu, Beibel ta yama e gobièrnu nobo e “shelunan nobo,” miéntras ku su súpditonan riba tera ta ser yamá lógikamente “un tera nobo.” (Isaias 65:17; 2 Pedro 3:13) Mayoria di e 144.000 ko-gobernantenan ku Kristu ya kaba a finalisá nan bida riba tera fielmente. Dje manera ei nan a demostrá ku nan ta digno pa tuma nan asignashon di sirbishi nobo den shelu.

⁵ Sin embargo, ainda a sobra un restu chikitu di e 144.000 riba tera. Di e mas ku 15.000.000 personanan ku a asistí n’e selebrashon di e Sena di Señor na 2002, solamente 8.760 a ekspresá e speransa ku nan a ser eskohí pa e asignashon selestial aki. Ken ku ta tribi di ataká e sobrá prospektivo miembronan di e Reino en realidat ta atentando kontra e Reino di Dios.​—Revelashon 12:17.

E Rei Ta Kompletá Su Viktoria

6. Kon Yehova i Kristu ta mira e oposishon dirigí kontra e pueblo di Dios?

⁶ Beibel ta profetisá kon Yehova ta reakshoná riba e oposishon kontra su Reino establesí: “Esun ku ta sinta den e shelunan ta hari; Señor ta hasi bofon di nan. Anto e lo papia ku nan den su rabia i terorisá nan den su furia: ‘Ma pa loke ta ami, mi a establesé mi rei riba Sion, mi seru santu.’” (Salmo 2:​4-6) Awor a yega e tempu pa Kristu, bou di direkshon di Yehova, “kompletá su viktoria.” (Revelashon 6:2, NW) Kon Yehova ta mira e oposishon dirigí kontra su pueblo durante e tempu di konkista final aki? Yehova ta mira esei komo si fuera dirigí kontra dje i kontra su Rei na mando. “Esun ku mishi ku boso ta mishi ku [“mi,” NW] pret’i wowo,” Yehova ta bisa. (Zakarías 2:8) I Hesus a deklará enfátikamente ku e ta konta loke hende hasi òf laga di hasi ku su rumannan ungí komo si fuera nan a hasi òf laga di hasi kuné.​—Mateo 25:​40, 45.

7. Pa ki motibunan e miembronan di e “multitut grandi,” deskribí na Revelashon 7:9, ta eksperensiá e furia di Gòg?

⁷ Klaru ku esnan ku ta apoyá e restu ungí aktivamente tambe lo sinti e furia di Gòg. E futuro miembronan aki di Dios su “tera nobo,” ta “un multitut grandi” yamá for “di tur nashon i tur tribu i pueblo i lenga.” (Revelashon 7:9) Beibel ta bisa ku nan ta “pará dilanti di e trono i dilanti di e Lamchi, bistí na paña blanku.” Pues nan tin un posishon aprobá dilanti Dios i dilanti Kristu Hesus. Ku “rama di palma den nan man,” nan ta aklamá Yehova komo Soberano legítimo di universo, kende su gobernashon a ser ekspresá mediante e reinado di su Rei entronisá, Hesukristu, “e Lamchi di Dios.”​—Juan 1:​29, 36.

8. Kiko e atake di Gòg lo pone Kristu hasi, i ku ki resultado?

⁸ E atake di Gòg lo pone e Rei entronisá di Dios drenta akshon i bringa e guera di Armagedón. (Revelashon 16:​14, 16) Esnan ku a nenga di rekonosé e soberania di Yehova lo ser destruí. Di otro banda, esnan ku a wanta aflikshon òf tribulashon pa motibu di nan lealtat n’e Reino di Dios lo haña alivio permanente. Relashoná ku esaki, apòstel Pablo a skirbi: “Esaki ta un indikashon bon kla di e huisio hustu di Dios, pa boso wòrdu konsiderá digno di e reino di Dios, pa kual di bèrdat boso ta sufri. Pasobra ta hustu dilanti di Dios pa paga ku aflikshon esnan ku ta afligí boso, i pa duna alivio na boso ku ta wòrdu afligí i na nos tambe ora Señor Hesus wòrdu manifestá for di shelu ku su angelnan poderoso den kandela tur na vlam, pa duna pago meresí na esnan ku no konosé Dios i na esnan ku no ta obedesé e evangelio di nos Señor Hesus.”​—2 Tesalonisensenan 1:​5-8.

9, 10. (a) Kon Yehova a duna Huda e viktoria riba un enemigu formidabel? (b) Kiko kristiannan djawe mester sigui hasi?

⁹ Durante e binidero tribulashon ku ta kulminá na Armagedón, Kristu lo batayá kontra tur maldat. Pero su siguidónan lo no tin nodi bringa, meskos ku mas ku 2.900 aña pasá Huda su habitantenan di e reino di dos tribu no tabatin nodi bringa. E bataya a pertenesé na Yehova, i é a duna e viktoria. E relato ta bisa: “SEÑOR a prepará atakenan di sorpresa kontra e yu hòmbernan di Amon, Moab i Seru Seir, kendenan a bin kontra Huda; asina nan a wòrdu derotá. Pasobra e yu hòmbernan di Amon i Moab a lanta kontra e habitantenan di Seru Seir i a destruí nan kompletamente, i ora nan a kaba ku e habitantenan di Seir, nan a yuda destruí otro. Ora Huda a yega na e toren di vigilansia den desierto, nan a wak den direkshon di e multitut; i mira, nan tur tabata kadaver bentá na suela; i ningun hende no a skapa.”​—2 Krónikanan 20:​22-24.

¹⁰ Tabata eksaktamente manera Yehova a profetisá: “Boso no tin mester di bringa.” (2 Krónikanan 20:17) Esaki ta establesé e patronchi pa kristiannan sigui ora Hesukristu drenta akshon “pa kompletá su viktoria.” Miéntras tantu, nan ta sigui lucha kontra maldat, no ku arma karnal, sino spiritual. Dje forma ei nan ta sigui “vense malu ku bon.”​—Romanonan 6:13; 12:​17-21; 13:12; 2 Korintionan 10:​3-5.

Ken Lo Dirigí e Atake di Gòg?

11. (a) Ki elementonan Gòg lo usa pa realisá su atake? (b) Kiko ta enserá keda spiritualmente alerta?

¹¹ Gòg di Magòg ta ser identifiká komo Satanas e Diabel den su posishon degradá desde 1914. Komo un kriatura spiritual, e mes no por ataká direktamente, pero lo e usa elementonan humano pa realisá su atakenan. Ken e elementonan humano aki lo ta? Beibel no ta duna nos detaye, pero sí e ta duna nos sierto indikashon ku por yuda nos identifiká ken esakinan lo ta. Segun ku susesonan di mundu ta kumpli ku profesia di Beibel, nos lo haña gradualmente un kuadro mas kla. E pueblo di Yehova ta evitá spekulashon pero ta keda spiritualmente alerta, plenamente konsiente di desaroyonan polítiko i religioso ku ta kuadra ku e profesianan di Beibel ku mester kumpli.

12, 13. Kon profeta Daniel a predisí un atake final riba e pueblo di Dios?

¹² Profeta Daniel ta revelá mas informashon tokante un atake final kontra e pueblo di Dios, skirbiendo: “Ku gran furia e [rei di nort] lo sali pa destruí i kaba ku hopi hende. I e lo lanta su tèntnan real entre e lamannan i e bunita seru santu.”​—Daniel 11:​44, 45.

¹³ Den konteksto di Beibel, “e lamannan” tabata Laman Grandi, òf Laman Mediteráneo, i “e seru santu” tabata Sion, di kua Yehova a bisa: “Mi a establesé mi rei riba Sion, mi seru santu.” (Salmo 2:6; Josué 1:4) Pues den un sentido spiritual, e tera “entre e lamannan i e bunita seru santu” ta representá e tereno di aktividat spiritual próspero di e kristiannan ungí. Ya nan no ta ser identifiká mas ku e laman di humanidat alehá for di Dios, i nan ta anhelá pa goberná ku Kristu Hesus den e Reino selestial. Klaramente, e sirbidónan ungí di Dios, huntu ku nan kompañeronan leal di e multitut grandi, lo ta e blanko di e rei di nort ora e lansa su atake feros na kumplimentu di e profesia di Daniel.​—Isaias 57:20; Hebreonan 12:22; Revelashon 14:1.

Kon e Sirbidónan di Dios Lo Reakshoná?

14. Kiko ta e tres kosnan ku e pueblo di Dios lo hasi ora nan ser ataká?

¹⁴ Kiko sirbidónan di Dios lo tin ku hasi ora nan ser ataká? Un biaha mas e reakshon di e nashon típiko di Dios den e tempu di Josafat ta establesé e patronchi. Tuma nota ku su siudadanonan mester a hasi tres kos: (1) stashoná nan mes, (2) keda para i (3) mira e salbashon di Yehova. Kon e pueblo di Dios lo aktua awe na armonia ku e palabranan aki?​—2 Krónikanan 20:17.

15. Kiko kier men ku e pueblo di Yehova ta stashoná nan mes?

¹⁵ Stashoná nan mes: Sin vasilá, e pueblo di Dios lo sigui stashoná òf posishoná nan mes aktivamente na banda di e Reino di Dios. Nan lo sigui mantené nan posishon neutral komo kristian. Nan lo ta “firme, konstante” den nan sirbishi leal na Yehova i lo sigui alabá Yehova públikamente pa su miserikòrdia i bondat amoroso. (1 Korintionan 15:58; Salmo 118:​28, 29) Ningun preshon aktual ni den futuro por sagudí nan for di e posishon aki aprobá pa Dios.

16. Den ki sentido Yehova su sirbidónan lo keda para?

¹⁶ Keda para: Yehova su sirbidónan lo no purba salba nan mes sino lo pone nan konfiansa apsoluto den dje. Ta Yehova so por reskatá su sirbidónan for di káos mundial, i el a primintí di hasi esei. (Isaias 43:​10, 11; 54:15; Lamentashonnan 3:26) Konfia den Yehova ta nifiká entre otro konfia den e kanal visibel ku e ta usando pa mas ku 100 aña kaba den e era aki pa sirbi su propósito. Manera nunka promé, kristiannan berdadero lo tin ku pone nan konfiansa den e rumannan ku Yehova a outorisá i den su Rei na mando pa hiba delantera. E hòmbernan fiel aki lo dirigí e pueblo di Dios. Lo por ta fatal pa esun ku ta rechasá nan guia.​—Mateo 24:​45-47; Hebreonan 13:​7, 17.

17. Pakiko e fiel sirbidónan di Dios lo mira e salbashon di Yehova?

¹⁷ Mira e salbashon di Yehova: Salbashon lo ta e rekompensa pa tur esnan ku ta mantené nan integridat komo kristian i ku ta konfia den Yehova pa libra nan. Te n’e ora final—i te kaminda nan por—nan lo anunsiá e yegada di e dia di Yehova su huisio. Henter kreashon mester sa ku Yehova ta e Dios berdadero i ku e tin sirbidónan fiel riba tera. Nunka mas no tin nodi lanta un kontroversia largu riba e legitimidat di Yehova su soberania.​—Ezekiel 33:33; 36:23.

18, 19. (a) Kon e kantika di viktoria den Eksodo kapítulo 15 ta reflehá e sintimentunan di esnan ku lo sobrebibí e atake di Gòg? (b) Ta na su lugá pa e pueblo di Dios hasi kiko awor?

¹⁸ Ku energia renobá, e pueblo di Dios lo drenta den e mundu nobo, ansioso pa kanta un kantika di viktoria, meskos ku e israelitanan di antigwedat a kanta despues ku nan a ser librá pasando dor di Laman Kòrá. Semper gradesidu na Yehova pa e protekshon ku el a brinda nan personalmente i komo pueblo, nan lo resoná e palabranan di hopi tempu pasá: “Lo mi kanta na SEÑOR, pasobra e ta grandemente halsá. . . . SEÑOR ta un guerero; [Yehova] ta su nòmber. . . . Bo man drechi, o SEÑOR, ta kibra e enemigu na pida-pida. I den e grandesa di bo ekselensia bo ta derotá esnan ku lanta kontra bo; bo ta manda bo rabia ardiente, i esei ta kaba ku nan manera bagas. . . . Den bo miserikòrdia bo a guia e pueblo ku bo a redimí; den bo fortalesa bo a guia nan na bo habitashon santu. . . . Abo lo hiba nan i planta nan den e seru di bo herensia, e lugá, o SEÑOR, ku abo a traha komo bo lugá di biba, e santuario, o SEÑOR, ku bo mannan a establesé. SEÑOR lo reina pa semper i semper.”​—Eksodo 15:​1-19.

¹⁹ Awor ku e posibilidat di haña bida eterno ta mas bisto ku nunka promé, ta un tempu oportuno p’e sirbidónan di Dios demostrá nan deboshon na Yehova i renobá nan determinashon pa sirbié komo nan Rei eterno!​—1 Krónikanan 29:​11-13.

Bo Por Splika?

• Pakiko e atake di Gòg lo ta dirigí kontra e ungínan i e otro karnénan?

• Kon e pueblo di Dios lo stashoná nan mes?

• Kiko kier men ku nan lo keda para?

• Kon e pueblo di Dios lo mira e salbashon di Yehova?

[Plachi na página 18]

Yehova a duna Josafat i su pueblo e viktoria, sin ku nan tabatin nodi bringa

[Plachi na página 20]

E ungínan i e otro karnénan ta yuda sostené e soberania di Yehova

[Plachi na página 22]

Meskos ku e israelitanan di antigwedat, e pueblo di Dios pronto lo kanta un kantika di viktoria