Dios Ta Real pa Bo?

ORA bo ta enfrentá problemanan penoso, bo ta acercá Jehova mesora den oracion? Si ta asina, bo ta sinti cu bo ta papia cu un persona real?

Haciendo referencia na su Tata celestial, Jesucristo a bisa: “Esun cu a mandá mi ta real.” (Juan 7:28) Sí, Jehova ta un persona real, i acudí na dje den oracion ta mescos cu acercá un amigu humano mashá yegá pa yudansa of conseho. Naturalmente, pa Jehova tende nos oracionnan, nan mester cumpli cu rekisitonan bíblico pa oracion aceptabel. Por ehempel, nos tin cu acercá e “Tendedor di oracion” cu humildad mediante su Yu, Jesucristo.—Salmo 65:2; 138:6; Juan 14:6.

Dor cu Dios ta invisibel, algun hende por haña cu e ta impersonal. Kisas pa nan, Dios por parce abstracto. Asta algun cristian cu a siña tocante Dios su maraviyoso atributonan, por haña de bes en cuando cu ta difícil pa dicerní con real e ta. Bo a yega di sinti asina? Si esei ta e caso, kico por yuda pa Jehova Dios bira real pa bo?

Studia Bijbel

Bo ta studia e Scritura Santu regularmente? Mas frecuente i intensivo bo sesionnan di studio di Bijbel ta, mas real Jehova lo bira pa bo. E ora ei, bo fe lo bira asina fuerte cu, de facto, e ta permití bo “mira Esun cu ta invisibel.” (Hebreonan 11:6, 27) Di otro banda, si bo ta studia Bijbel de bes en cuando, probablemente lo e no tin ningun impacto significante riba bo fe.

Pa ilustrá: Imaginá cu, pa cura un iritacion di cueru persistente, bo dokter a mandá bo hunta un crema dos bes pa dia. Bo iritacion lo kita si bo hunta e crema un of dos bes so pa luna? Casi sigur cu no. Di mes manera, e salmista ta duna nos un “recept” pa logra salú spiritual. Lesa Dios su Palabra “na bos abou di dia i anochi.” (Salmo 1:1, 2) Pa nos por obtené mas i mas beneficio, nos mester sigui e “recept”—un consideracion diario dje Palabra di Dios huntu cu yudansa di publicacionnan cristian.—Hosué 1:8.

Lo bo kier pa bo sesionnan di studio bira mas fortalecedor di fe? Ata aki un sugerencia: Despues cu bo a caba di lesa un capítulo for dje Traducción del Nuevo Mundo of un otro Bijbel cu referencia, selectá un versículo cu bo ta haña interesante i busca e textonan di referencia mencioná. Esaki lo enrikesé bo studio, i sin duda lo bo keda impresioná cu e armonia interno cu ta existí den Bijbel. Na su turno, esaki lo haci su Autor, Jehova Dios, mas real pa bo.

Dor di haci uso di referencianan, bo por bira mas familiar tambe cu profecianan di Bijbel i nan cumplimentu. Kisas bo conocé e profecianan principal di Bijbel manera por ehempel, esnan relacioná cu e destruccion di Jerusalem dor dje babilonionan. Pero, Bijbel ta contené un cantidad di profecia relacioná cu otro, i nan cumplimentu. Algun di nan no ta mashá conocí.

Por ehempel, lesa e profecia relacioná cu e castigu pa esun cu reedificá Jérico, i despues considerá su cumplimentu. Hosué 6:26 ta bisa: “Hosué a pone cu n’e tempu en particular ei un huramentu a ser hací, bisando: ‘Maldicioná dilanti Jehova sea e hende cu lanta i edificá e stad aki, asta Jérico. Cu pérdida di su primogénito lagu’é pone su fundeshi, i cu pérdida di esun mas chikitu di dje lagu’é pone su portanan.’” El a haña su cumplimentu un 500 aña despues, pasobra nos ta lesa na 1 Reynan 16:34: “Den e dianan [di Rey Acab] Hiel e betelita a edificá Jérico. Cu pérdida di Abiram, su primogénito, el a pone su fundeshi, i cu pérdida di Segub, su yu mas chikitu, el a pone su portanan, di acuerdo cu Jehova su palabra cu el a papia mediante Hosué e yu di Nun.”a Ta un Dios real so por inspirá profecia asina i percurá pa nan cumpli.

Miéntras bo ta lesa Bijbel, kisas un of otro punto ta hací bo curioso. Por ehempel, por ta bo ta puntra bo mes, cuantu aña a transcurí entre e profecia i e cumplimentu. En bes di djis puntra un hende, pakico no haci esfuerso pa bo mes haña sa? Haci uso di tabel i yudansanan pa studia Bijbel, averiguá e contestanan cu e mésun diligencia cu lo bo a manifestá pa decifrá un mapa cu ta indicá sitio di un tesoro. (Proverbionan 2:4, 5) Ora bo haña e contestanan lo e tin un efecto profundo riba bo fe i lo e haci Jehova mas real pa bo.

Haci Oracion Regularmente i Fervientemente

No pasa por halto dje importancia di oracion i fe. Jesus su disipelnan a haci e peticion directo aki: “Duna nos mas fe.” (Lucas 17:5) Si Jehova no ta parce real pa bo, pakico no haci oracion na dje tocante bo necesidad pa mas fe? Cu confiansa pidi bo Tata celestial su yudansa pa e bira real pa bo.

Si bo tin un problema ta preocupá bo, tuma e tempu necesario i expresá bo mes di curason na bo Amigu celestial. Ora Jesus su morto tabata cerca, el a haci oracion intensamente. Aunke el a condená e custumber religioso di haci oracion largu djis pa bista di hende, el a pasa henter un anochi haciendo oracion na privá promé cu el a scoge su 12 apostelnan. (Marco 12:38-40; Lucas 6:12-16) Kisas nos por a siña un les tambe for dje experencia di Hana, kende a bira mama di profeta Samuel. Anhelando un yu homber, “el a haci oracion extenso na Jehova.”—1 Samuel 1:12.

Kico ta e les básico di tur esaki? Si bo kier pa Jehova contestá bo oracionnan, bo tin cu haci oracion sinceramente i fervientemente, sin stop—i naturalmente, na armonia cu Dios su boluntad. (Lucas 22:44; Romanonan 12:12; 1 Tesalonicensenan 5:17; 1 Juan 5:13-15) Esaki lo yuda pa Dios bira real pa bo.

Observá e Creacion

Pinturanan di un artista por reflehá su personalidad. Di mes manera, e “cualidadnan invisibel” di Jehova, e Diseñador i Creador di Universo, por ser mirá bon cla den creacion. (Romanonan 1:20) Ora nos observá Jehova su obra cuidadosamente, nos ta haña un mihó comprendimentu di su personalidad, i asina e ta bira mas real pa nos.

Si bo haci mas cu observá aríbariba e cosnan cu Dios a crea, lo bo por keda profundamente impresioná dor di ripará con real su cualidadnan ta. Por ehempel, informacion tocante para su abilidad pa nabegá, sigur lo por aumentá bo aprecio pa Jehova su sabiduria. Si bo lesa tocante universo, kisas bo ta haña sa cu e Via Lactea, cu ta midi 100.000 aña di lus di punta pa punta, ta djis un di e cientos di miyones galaxianan den espacio. Esaki no ta convencé bo cu e Creador su sabiduria ta real?

Ta claro cu Jehova su sabiduria ta real! Pero kico e ta nificá pa bo? Wel, siguramente no tin ningun problema cu cualkier un di nos por trece dilanti dje den oracion cu por confundié. Sí, asta e mínimo conocimentu di creacion por haci Jehova mas real pa bo.

Cana cu Jehova

Abo personalmente por experenciá con real Jehova ta? Sí, basta bo ta manera e fiel patriarca Noe. Semper el a obedecé Jehova, te cu por a ser bisá di dje: “Noe a cana cu e Dios berdadero.” (Génesis 6:9) Noe a biba como si fuera Jehova tabata ei mes banda di dje. Asina real Dios por ta pa bo.

Si bo ta cana cu Dios, bo ta pone confiansa den promesanan bíblico i bo ta actua na armonia cu nan. Por ehempel, bo ta kere e palabranan di Jesus: “Sigui busca . . . promé e reino i [Dios su] husticia, i tur e otro cosnan [necesidadnan material] aki lo ser agregá na boso.” (Mateo 6:25-33) Ta berdad cu kisas no ta semper Jehova ta percurá loke bo mester den e forma cu bo ta verwagt. Pero ora bo haci oracion i despues bo experenciá Dios su yudansa, lo e ta mes real pa bo cu un persona cu ta banda di bo.

Bo ta cultivá un relacion estrecho asina cu Jehova ora bo ta perseverá den cana cu Dios. Considerá e ehempel di Manuela, un Testigo di abla spañó kende a wanta un cantidad di prueba. E ta bisa: “Ki ora cu mi tin un preocupacion of ta den necesidad, mi ta aplicá e principio di Proverbionan 18:10. Mi ta core pidi Jehova pa yudansa. Semper e tabata ‘un toren fuerte’ pa mi.” Manuela por bisa esaki despues cu el a dependé riba Jehova pa 36 aña i a sinti cu Jehova a sosten’é.

Ta net bo a cuminsá haci Jehova bo confiansa? No desanimá si ainda bo relacion cuné no ta manera bo kier. Biba tur dia manera un persona cu ta cana cu Dios. Miéntras cu bo ta edificá un patronchi di bida den fieldad, lo bo disfrutá di un relacion mas íntimo cu Jehova.—Salmo 25:14; Proverbionan 3:26, 32.

Un otro manera pa cana cu Jehova ta dor di enbolbé bo mes completamente den su sirbishi. Ora bo ta participá den e trabou di predicá e Reino, bo ta un co-trahadó di Jehova. (1 Corintionan 3:9) Si bo ta conciente di esaki, lo e yuda haci Jehova masha real pa bo.

E Salmista ta urgi: “Lora bo caminda riba Jehova, i dependé riba dje, i e mes lo actua.” (Salmo 37:5) Sea cual sea bo problema of preocupacion, nunca keda sin tira nan riba Jehova. Semper mira na dje pa yudansa i guia. Si bo dependé riba Jehova Dios den oracion i semper bo tin pleno confiansa den dje, lo bo sintí bo sigur pasobra bo sa cu lo e no keda sin actua na bo fabor. Bo tin confiansa den Jehova ora bo ta acerk’é cu bo problemanan personal? Esaki lo ta e caso—si Dios ta real pa bo.

[Nota]

[Plachi na página 21]

Haci bo sesionnan di studio fortalecedor di fe

[Plachi na página 22]

Tuma tempu regularmente pa haci oracion ferviente

[Plachinan na página 23]

Tuma nota con creacion ta manifestá Dios su cualidadnan

[Rekonosementu]

Blenchi: U.S. Fish and Wildlife Service, Washington, D.C./Dean Biggins; strea: Photo: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands