‘Deleitá Bo Mes den Yehova’

“Deleitá bo mes den SEÑOR, i e lo duna bo e deseonan di bo kurason.”—SALMO 37:4.

1, 2. Ken ta e Fuente di berdadero felisidat, i kon Rei David a hala atenshon na e echo aki?

“FELIS ta esnan ku ta konsiente di nan nesesidat spiritual, . . . felis ta esnan miserikòrdioso, . . . felis ta e hasidónan di pas.” Huntu ku seis deskripshon mas di esnan ku ta felis, e deklarashonnan aki ta forma e introdukshon remarkabel di Hesus su famoso Sermon Riba Seru, segun e Evangelio ku Mateo a skirbi. (Mateo 5:3-11, NW) Hesus su palabranan ta duna nos e siguransa ku felisidat ta na nos alkanse.

² Un kantika sagrado komponé dor di Rei David di antiguo Israel ta hala atenshon na e Fuente di berdadero felisidat, Yehova. David a bisa: “Deleitá bo mes den SEÑOR, i e lo duna bo e deseonan di bo kurason.” (Salmo 37:4) Pero kon e echo ku nos konosé Yehova i e tantísimo fasetanan di su personalidat, por “deleitá” nos? Anto kon un konsiderashon di loke el a hasi kaba i lo hasi ainda pa kumpli ku su propósito ta duna bo e speransa di haña “e deseonan di bo kurason”? Un análisis kuidadoso di Salmo 37, versíkulo 1 pa 11, ta kontestá e preguntanan ei.

‘No Sea Envidioso’

3, 4. Manera ta pará skirbí na Salmo 37:1, ki konseho David ta duna, i dikon ta bon pa nos hasi kaso di dje awe?

³ Nos ta bibando den “tempunan trabahoso,” i maldat ta abundá. Nos a mira kumplimentu di e palabranan di apòstel Pablo: “Hendenan malbado i gañadónan lo bai di malu pa peor, gañando i siendo gañá.” (2 Timoteo 3:1, 13) E aparente éksito i prosperidat di hendenan malbado por afektá nos fásilmente. Tur esei por distraí nos, i pone nos pèrdè nos vishon spiritual. Tuma nota kon e palabranan di introdukshon di Salmo 37 ta spièrta nos pa e posibel peliger aki: “No kunsumí pa motibu di malbadonan, ni sea envidioso di e hasidónan di inikidat.”

⁴ Medionan di komunikashon di mundu ta bombardiá nos diariamente ku un lista di aktonan inhustu. Komersiantenan desonesto ta kometé froude sin wòrdu kastigá. Kriminalnan ta probechá egoistamente di hende vulnerabel. Asesinonan no ta ser gará òf ta keda sin haña kastigu. Tur e tipo di ehèmpelnan ei di inhustisia por provoká rabia i perturbá nos pas mental. E aparente éksito di hasidónan di maldat por asta lanta sintimentunan di envidia. Pero e echo ku nos ta rabia pa e kosnan ei, ta drecha e situashon? Si nos sinti envidia pa e aparente bentahanan ku e malbadonan ta gosa di dje, ta kambia e resultado pa nan? Definitivamente ku nò! I bon mirá, nos no tin motibu pa “kunsumí.” Dikon nò?

 5. Dikon hasidónan di maldat ta ser kompará ku yerba?

⁵ E salmista ta kontestá: “Pasobra pronto nan lo wòrdu kòrtá manera yerba, i nan lo marchitá manera yerba bèrdè.” (Salmo 37:2) Yerba bèrdè por parse bunita, pero djis despues su blachinan ta marchitá i muri. Meskos ta pasa ku hasidónan di maldat. Nan aparente prosperidat no ta permanente. Ora nan muri, nan ganashinan atkerí ilegalmente no por yuda nan mas. Na final di kuenta, tur hende ta haña loke hustisia ta dikta. Pablo a skirbi: “E pago di piká ta morto.” (Romanonan 6:23) Hasidónan di maldat i tur hende inhustu finalmente lo risibí nan “pago” i nada mas. Ki un bida bano i sin sentido!—Salmo 37:35, 36; 49:16, 17.

 6. Ki lès nos por saka for di Salmo 37:1 i 2?

⁶ Pues anto, nos mester permití e prosperidat pasahero di hasidónan di maldat perturbá nos? E lès ku nos ta saka for di e promé dos versíkulonan di Salmo 37 ta esaki: No laga nan éksito desviá bo for di e kaminda ku bo a skohe pa sirbi Yehova. Al kontrario, sigui enfoká riba bendishon- i metanan spiritual.—Proverbionan 23:17.

“Konfia den SEÑOR i Hasi Loke Ta Bon”

 7. Dikon nos mester konfia den Yehova?

⁷ E salmista ta animá nos pa “konfia den SEÑOR i hasi loke ta bon.” (Salmo 37:3a) Ora nos ta yen di preokupashon òf asta duda, nos mester pone nos konfiansa firmemente den Yehova. E ta Esun ku ta ofresé pleno siguridat spiritual. Moisés a skirbi: “Esun ku ta biba bou di e protekshon di e Haltísimo lo permanesé den e sombra di e Todopoderoso.” (Salmo 91:1) Ora ku oumento di maldat den e mundu aki ta kita nos trankilidat, nos tin ku lèn mas tantu ainda riba Yehova. Si nos suek nos ènkel, nos ta keda kontentu ora nos por lèn riba brasa di un amigu. Asina tambe, ora nos ta hasi esfuerso pa kana den fieldat, nos tin mester di Yehova su sosten.—Isaias 50:10.

 8. Kon dor di partisipá den sirbishi kristian nos ta evitá ku e prosperidat di e malbadonan ta molestiá nos demasiado?

⁸ Ora e prosperidat di e malbadonan ta molestiá nos, tin un kos ku nos por hasi pa kombatié: okupá nos mes den e trabou di buska i yuda hende semehante na karné pa yega na un konosementu eksakto di Yehova su propósito. En bista di e oumento di maldat, nos mester ta plenamente okupá yudando otro hende. Apòstel Pablo a bisa: “No laga di hasi bon i di kompartí ku otro; pasobra sorto di sakrifisionan asina ta agradá Dios.” E “bon” di mas grandi ku nos por hasi ta di kompartí e glorioso bon nobo di e Reino di Dios ku otro hende. Nos predikashon públiko ta realmente “un sakrifisio di alabansa.”—Hebreonan 13:15, 16; Galationan 6:10.

 9. Splika David su apelashon pa “biba den e tera.”

⁹ David a bisa: “Biba den e tera i alimentá bo mes ku Su fieldat.” (Salmo 37:3b) Den tempu di David “e tera” tabata e teritorio ku Yehova a duna Israel: e Tera Primintí. Durante e reinado di Salomon, e tera su límitenan a kore for di Dan den nort te na Beerseba den zùit. Esaki tabata e lugá di biba di Israel. (1 Reinan 4:25) Awe, na unda ku nos ta biba riba tera, nos ta spera ku anhelo e tempu ora ku henter e planeta lo bira un paradeis den e mundu nobo di hustisia. Pero tanten, nos ta biba den siguridat spiritual.—Isaias 65:13, 14.

10. Kiko ta e resultado ora nos ta “trata ku fieldat”?

¹⁰ Kiko lo ta e resultado ora nos ta ‘alimentá nos mes ku fieldat,’ es desir, “trata ku fieldat” [NW]? E proverbio inspirá ta rekordá nos: “Un hende fiel lo ta yen di bendishon.” (Proverbionan 28:20) Ora ku fielmente nos ta perseverá den prediká e bon nobo na unda ku nos ta biba i na ken ku nos por papia kuné, esei siguramente ta trese bendishon di Yehova. Por ehèmpel, 40 aña pasá Frank ku su kasá Rose, a aseptá un asignashon di pionero den un stat den parti nort di Eskosia. Anteriormente tabatin un par di hende interesá den e stat, pero nan interes a fria. Sin laga esaki stroba nan, e pareha pionero a kuminsá ku e trabou di prediká i hasi disipel. Awor tin un kongregashon próspero den e stat ei. E fieldat di e pareha aki realmente tabatin Yehova su bendishon. Frank ta splika humildemente: “E bendishon di mas grandi simplemente ta ku nos ta den e bèrdat ainda i ta útil pa Yehova.” Sí, ora nos ta “trata ku fieldat,” nos ta risibí hopi bendishon i ta apresiá nan.

“Deleitá Bo Mes” den Yehova

11, 12. (a) Kon nos por “deleitá” den Yehova? (b) Ki meta bo por pone relashoná ku studio personal, i kiko lo por ta e resultado?

¹¹ Pa fortalesé nos relashon ku Yehova i mantené nos konfiansa den dje, nos tin ku ‘deleitá nos mes den Yehova.’ (Salmo 37:4a) Kon nos ta hasi esei? En bes di ta preokupá ku nos propio situashon, pa difísil ku e situashon por ta, nos ta konsentrá riba Yehova. Un manera pa hasi esaki ta dor di tuma tempu pa lesa su Palabra. (Salmo 1:1, 2) Bo lesamentu di Beibel ta deleitá bo, duna bo goso? Esei lo ta e kaso si bo ta lesa ku e meta di siña mas tokante Yehova. Pakiko bo no ta pousa despues di lesa un porshon i puntra bo mes: ‘Kiko e pasashi aki ta siña mi tokante Yehova?’ Podisé ta bon pa bo tin un buki di nota òf un pida papel na man ora bo ta lesa Beibel. Kada biaha ku bo stòp pa reflekshoná riba e nifikashon di loke bo a lesa, skirbi un frase ku ta rekordá bo di un di Dios su kualidatnan atraktivo. Den un otro salmo, David a kanta: “Mare palabranan for di mi boka i pensamentunan di mi kurason por ta agradabel na bo, SEÑOR, mi Baranka i Salbadó.” (Salmo 19:14, Beibel na papiamentu koriente) Ora nos ta konsentrá asina riba e Palabra di Dios, esei ta “agradabel” pa Yehova i ta duna nos goso.

¹² Kon nos por haña felisidat for di nos studio i meditashon? Nos por pone e meta pa siña mas tantu posibel tokante Yehova i su kamindanan. Publikashonnan manera E homber mas importante cu hamás a biba i Hala Serka Yehovaa ta duna nos hopi kos pa reflekshoná ku apresio riba dje. David ta sigurá hende hustu ku Yehova na su turno, “lo duna bo e deseonan di bo kurason.” (Salmo 37:4b) Ta e konfiansa aki lo mester a motivá apòstel Juan pa skirbi e palabranan: “Esaki ta e konfiansa ku nos tin su dilanti, ku si nos pidi kualkier kos konforme su boluntat, e ta tende nos. I si nos sa ku e ta tende nos den tur loke nos pidi, nos sa ku nos tin e petishonnan ku nos a pidi di dje.”—1 Juan 5:14, 15.

13. Den añanan resien, ki ekspanshon den e trabou di prediká e Reino a ser opservá den hopi pais?

¹³ Komo personanan ku ta warda integridat, nos deleite di mas grandi ta pa mira Yehova su derecho di goberná komo Soberano ser vindiká. (Proverbionan 27:11) Nos kurason no ta abundá ku goso ora nos tende di e tremendo trabou di prediká ku nos rumannan ta efektuá den paisnan ku anteriormente tabata totalitario òf diktatorial? Ansiosamente nos ta spera pa mira kuantu libertat mas nan lo haña promé ku fin di e sistema aki yega. Hopi sirbidó di Yehova ku ta biba den paisnan kaminda aktividatnan kristian por tuma lugá libremente ta prediká ku entusiasmo na studiantenan, refugiadonan i otro hendenan ku temporalmente ta biba den e paisnan aki, i na unda nan ta disfrutá di libertat di adorashon. Nos ta deseá sinseramente ku ora e personanan aki regresá nan pais, nan ta sigui laga e lus di e bèrdat bria asta kaminda e trabou ta prohibí i kaminda tin un skuridat aparentemente impenetrabel.—Mateo 5:14-16.

“Enkomendá Bo Kaminda na SEÑOR”

14. Ki prueba tin ku nos por konfia den Yehova?

¹⁴ Ta un gran alivio pa sa ku nos preokupashonnan i loke por parse di ta pesonan opresivo, por kita for di nos lomba! Kon? David a bisa: “Enkomendá bo kaminda na SEÑOR, konfia tambe den dje, i e lo hasié.” (Salmo 37:5) Den nos kongregashonnan, nos tin hopi evidensia ku Yehova ta un sosten konfiabel. (Salmo 55:22) E rumannan den sirbishi di tempu kompletu, sea ta pionero, superintendente biahero, misionero òf boluntario ku ta sirbi na Bètel, tur por testifiká ku Yehova su kuido ta konfiabel. Pakiko bo no ta papia ku esnan ku bo konosé i puntra nan kon Yehova a yuda nan? Sin duda lo bo tende hopi eksperensia ku ta mustra ku asta ora tempu ta difísil, Yehova su man nunka no ta kòrtiku. Semper e ta perkurá pa e nesesidatnan di bida.—Salmo 37:25; Mateo 6:25-34.

15. Den ki manera e hustisia di e pueblo di Dios ta bria?

¹⁵ Ora nos ta hasi Yehova nos konfiansa i ta dependé riba dje kompletamente, nos por eksperensiá e siguiente palabranan di e salmista: “E lo laga bo hustisia bria manera lus, i bo derecho manera mèrdia.” (Salmo 37:6) Komo Testigunan di Yehova, hende hopi bes ta pinta nos malu. Pero Yehova ta habri wowo di esnan di kurason onrado pa yuda nan realisá ku nos sirbishi públiko ta ser motivá dor di amor pa Yehova i pa próhimo. Na mesun tempu, maske hende ta pinta nos malu, nos kondukta rekto no por keda skondí. Yehova ta sostené nos den tur tipo di oposishon i persekushon. Komo resultado, e hustisia di e pueblo di Dios ta bria manera solo di mèrdia.—1 Pedro 2:12.

“Warda ku Pasenshi”

16, 17. Na armonia ku Salmo 37:7, awor ta tempu pa kiko, i dikon?

¹⁶ E siguiente palabranan di e salmista ta: “Sosegá den SEÑOR, i warda ku pasenshi riba dje; no kunsumí pa motibu di esun ku ta prosperá den su kaminda, pa motibu di e hende ku ta ehekutá plan di maldat.” (Salmo 37:7) Aki David ta enfatisá ku ta nesesario pa nos warda ku pasenshi riba Yehova p’e aktua. Ounke fin di e sistema aki no a yega ainda, esaki no mester ta un motibu pa nos keha. Akaso nos no a mira ku Yehova su miserikòrdia i pasenshi ta mas grandi ku loke nos a pensa na prinsipio? Nos lo por mustra awor di nos parti ku nos tambe ta warda ku pasenshi segun ku nos ta keda okupá predikando e bon nobo promé ku e fin yega? (Marko 13:10) Awor ta tempu pa evitá aktonan deskabeyá ku por hòrta nos di nos goso i siguridat spiritual. Awor ta tempu pa resistí mas ku nunka e mal influensia di e mundu di Satanas. I awor ta tempu pa mantené puresa moral i nunka peligrá e posishon hustu ku nos tin dilanti Yehova. Laga nos sigui deshasí di pensamentunan inmoral i evitá aktonan indesente pa ku personanan di e sekso opuesto òf asta pa ku personanan di e mesun sekso.—Kolosensenan 3:5.

¹⁷ David ta konsehá nos: “Stòp di rabia i laga furia para; no kunsumí—esei ta kondusí na maldat so. Pasobra hasidónan di maldat lo wòrdu kòrtá kitá afó; ma esnan ku spera riba SEÑOR lo heredá e tera.” (Salmo 37:8, 9) Sí, ku konfiansa nos por antisipá e tempu—ku awor ta asina serka—ora ku Yehova lo eliminá tur korupshon for di riba tera i tambe esnan ku ta responsabel p’e.

“Aki Poko Tempu”

18, 19. Ki animashon bo ta saka for di Salmo 37:10?

¹⁸ “Pasobra aki poko tempu e malbado lo no t’ei mas; maske kuantu bo buska su lugá, e lo no t’ei.” (Salmo 37:10) E palabranan aki ta un gran animashon pa nos segun ku nos ta aserká fin di e sistema aki i kulminashon di hende su independensia desastroso for di Yehova! Tur klase di gobièrnu òf outoridat ku hende a bini kuné a frakasá miserablemente. I awor nos ta aserkando e tempu pa hende bolbe bèk na Dios su gobernashon—berdadero teokrasia—ku ta e Reino di Yehova den man di Hesukristu. E gobièrnu ei lo tuma kontròl kompletu riba asuntunan di mundu i eliminá tur opositor di e Reino di Dios.—Daniel 2:44.

¹⁹ Maske kuantu bo buska den e mundu nobo bou di e Reino di Dios, lo bo no por haña un “malbado.” Sí, ken ku rebeldiá e tempu ei kontra Yehova lo ser eliminá rápidamente. Einan lo no tin niun persona ku ta ataká Yehova su derecho di goberná komo Soberano ni ku ta nenga di someté nan mes na Dios su outoridat. Tur bo bisiñanan lo tin e mesun deseo di agradá Yehova. Esei lo trese un gran siguridat: lo no tin lòk ni hèkwèrk, nada ku lo daña konfiansa i felisidat!—Isaias 65:20; Mikeas 4:4; 2 Pedro 3:13.

20, 21. (a) Ken ta “e humildenan” ku Salmo 37:11 ta referí na dje, i na unda nan ta haña “pas abundante”? (b) Ki bendishonnan nos lo haña si nos imitá e David Mayor?

²⁰ E ora ei “e humildenan lo heredá e tera.” (Salmo 37:11a) Sí, “e humildenan” ta esnan ku humildemente ta warda riba Yehova pa e korigí tur e inhustisianan ku a ser kometé kontra nan. Nan “lo deleitá nan mes den pas abundante.” (Salmo 37:11b) For di aworakí mes nos ta haña pas abundante den e paradeis spiritual ku ta ligá ku e berdadero kongregashon kristian.

²¹ Ounke ainda nos no a haña alivio di sufrimentu, nos ta sostené otro i ta konsolá esnan ku ta deprimí. Komo resultado, esei ta promové un berdadero sintimentu di satisfakshon den e pueblo di Yehova. Amorosamente rumannan nombrá komo wardadó ta atendé nos nesesidatnan spiritual—i tin biaha asta nesesidatnan físiko—i asina nan ta yuda nos soportá sufrimentu pa kousa di hustisia. (1 Tesalonisensenan 2:7, 11; 1 Pedro 5:2, 3) E pas aki ta un poseshon sumamente balioso! Tambe nos tin e speransa di bida eterno den e binidero Paradeis kaminda pas lo reina. P’esei laga nos imitá e David Mayor, Kristu Hesus, kende su selo pa Yehova a motiv’é pa sirbi fielmente te na fin. (1 Pedro 2:21) Hasiendo esei, nos lo sigui ta felis, alabando nos Dios, Yehova, esun den ken nos ta deleitá nos mes.

[Nota]

Bo Por Kontestá?

• Ki lèsnan bo a siña for di Salmo 37:1 i 2?

• Kon bo por “deleitá bo mes” den Yehova?

• Ki prueba tin ku nos por konfia den Yehova?

[Plachi na página 9]

Kristiannan ‘no ta envidioso di esnan ku ta hasi maldat’

[Plachi na página 10]

‘Konfia den Yehova i hasi loke ta bon’

[Plachi na página 11]

Deleitá bo mes den Yehova dor di siña mas tantu posibel tokante dje

[Plachi na página 12]

“E humildenan lo heredá e tera”