Yehova Ta Nos “Libertadó”

“SEÑOR ta yuda nan i ta libra nan.”​—SAL. 37:40.

1, 2. Ki bèrdat fundamental tokante Yehova ta un fuente di konsuelo i fortalesa pa nos?

SOMBRA ku solo ta krea no ta para ketu. Segun ku planeta Tera ta bira, e sombranan ta keda move i kambia nònstòp. Sinembargo, e Kreador di Tera i solo sí no ta kambia. (Mal. 3:6) Beibel ta bisa ku serka dje “no tin variashon ni sombra di kambio.” (Sant. 1:17) E bèrdat fundamental akí tokante Yehova ta realmente un fuente di konsuelo i fortalesa pa nos, spesialmente ora nos haña nos ku prueba- i situashonnan difísil. Dikon?

² Manera nos a menshoná den e artíkulo anterior, Yehova a duna prueba ku e ta e “Libertadó,” Esun ku den tempu di Beibel a yuda su adoradónan skapa. (Sal. 70:5) E no ta kambia i semper e ta kumpli ku su palabra; pues, e hendenan ku awe ta ador’é por tin pleno konfiansa ku lo e ‘yuda nan i libra nan.’ (Sal. 37:40) Kon Yehova a perkurá liberashon pa su sirbidónan den tempu moderno? Kon e por hasi esei pa nos personalmente?

Librá di Opositor

 3. Dikon nos por tin sigur ku opositornan lo no stòp e pueblo di Yehova di prediká e bon notisia?

³ Ni maske kuantu oposishon satániko Testigunan di Yehova ta konfrontá, esei lo no stòp nan nunka di duna Yehova e adorashon eksklusivo ku e ta meresé. E Palabra di Dios ta sigurá nos: “Ningun arma ku wòrdu formá kontra bo lo no prosperá; i tur lenga ku lanta kontra bo den husgamentu lo bo kondená.” (Isa. 54:17) Opositornan a purba stòp e pueblo di Dios di kumpli ku nan asignashon di prediká, pero nan a frakasá. Konsiderá dos ehèmpel.

4, 5. Ki oposishon e pueblo di Yehova a konfrontá na 1918, i ku ki resultado?

⁴ Na aña 1918, e pueblo di Yehova a konfrontá un ola di persekushon instigá pa klero ku kier a para e obra di prediká. Dia 7 di mei, gobièrnu federal a saka órden di aresto kontra J. F. Rutherford, kende tabata supervisá e predikashon mundial na e tempu ei, i kontra algun ruman mas na e sede mundial. Den ménos ku dos luna, Ruman Rutherford i su sosionan a keda inhustamente sentensiá pa konspirashon i nan a haña kastigu largu di prizòn. Akaso opositor a logra para e obra di prediká permanentemente ku yudansa di instansianan hudisial? Klaru ku nò!

⁵ Kòrda riba loke Yehova a primintí: “Ningun arma ku wòrdu formá kontra bo lo no prosperá.” Dia 26 di mart 1919, den un kambio dramátiko i repentino—nuebe luna despues ku Ruman Rutherford i su sosionan a keda sentensiá—e rumannan a sali liber bou di fiansa. E siguiente aña, dia 5 di mei 1920, korte a anulá tur e akusashonnan kontra nan. E rumannan a usa nan libertat pa sigui padilanti ku e obra di prediká e Reino. Ku ki resultado? Wèl, tabatin un oumento fenomenal desde e tempu ei padilanti! Tur krédito pa e resultado ei ta bai na e “Libertadó.”​—1 Kor. 3:7.

6, 7. (a) Ki kampaña kontra e Testigunan di Yehova a tuma lugá na Alemania nazi, i ku ki resultado? (b) E historia moderno di e pueblo di Yehova ta duna testimonio di ki echo?

⁶ Laga nos konsiderá awor un di dos ehèmpel. Na aña 1934, Hitler a hura ku lo e kaba ku e Testigunan di Yehova na Alemania. Esaki no tabata menasa sin base. Nan a arestá hopi Testigu i enkarselá nan. Míles di nan a sufri di maltrato i sentenáres a pèrdè nan bida den kampo di konsentrashon. Akaso Hitler tabatin éksito ku su kampaña di eliminá e Testigunan? El a logra para predikashon di e bon notisia na Alemania? Apsolutamente ku nò! Durante e persekushon, nos rumannan a sigui prediká klandestinamente. Despues di kaida di e régimen nazi, nan a usa nan libertat pa sigui prediká, i awe tin mas ku 165.000 predikadó di Reino na Alemania. Un biaha mas, nos “Libertadó” a kumpli ku su palabra: “Ningun arma ku wòrdu formá kontra bo lo no prosperá.”

⁷ E historia moderno di Testigunan di Yehova ta duna prueba ku Yehova nunka lo permití pa su pueblo kompletu ser eliminá. (Sal. 116:15) Pero kiko di nos individualmente? Kon Yehova ta libra nos personalmente?

Kiko di Protekshon Físiko?

8, 9. (a) Kon nos por sa ku no ta tur biaha Yehova ta protehá kada un di nos físikamente? (b) Kiko nos tin ku rekonosé realístikamente?

⁸ Nos sa ku Yehova no a garantisá ku semper lo e protehá kada un di nos físikamente. Apesar di esei, nos ta tuma e mesun posishon ku e tres hebreonan fiel ku a nenga di bùig pa e imágen di oro di Rei Nabukodonosor. E hóbennan ei temeroso di Dios no a asumí sin mas ku Yehova lo a hasi un milager i protehá nan físikamente. (Lesa Daniel 3:​17 i 18.) Pero den e kaso akí, Yehova á libra nan for di e vlamnan di e fòrnu di kandela. (Dan. 3:​21-27) Sinembargo, asta den tempu bíbliko liberashon milagroso tabata algu eksepshonal i no un kos komun i koriente. Hopi sirbidó fiel di Yehova a muri na man di opositor.​—Heb. 11:​35-37.

⁹ Kiko di awe? Komo e “Libertadó,” Yehova siguramente por libra personanan individual for di situashonnan peligroso. Pero nos por bisa ku tur siguridat ku Yehova a intervení òf nò den kasonan spesífiko? Nò. Podisé un persona ku a skapa di un situashon peligroso sí ta sinti ku Yehova tabatin un man den e asuntu. Otro rumannan no tin derechi di kuestion’é i bisa ku nan no ta di akuerdo kuné. Pero nos mester ta realístiko tambe i rekonosé ku hopi kristian fiel a muri komo resultado di persekushon, manera tabata e kaso durante e régimen nazi. Otro rumannan a muri bou di sirkunstansianan trágiko. (Ekl. 9:11, NW) Podisé nos ta puntra: ‘Esei ke men ku Yehova no tabata “Libertadó” di e rumannan fiel ku a muri prematuramente?’ Klaru ku no ta asina.

10, 11. Dikon hende no por hasi nada pa evitá morto, pero kiko Yehova sí por hasi al respekto?

¹⁰ Pensa riba esaki: Un hende no por hasi nada pa evitá ku e ta muri, pasobra ningun hende no por “libra su alma for di e poder di Seol,” òf Hades, e graf komun di humanidat. (Sal. 89:48) Pero kiko di Yehova? Un ruman muhé ku a sobrebibí e periodo di teror nazi ta kòrda loke su mama Testigu a yega di bis’é pa konsol’é relashoná ku nan sernan kerí ku a muri den kampo di konsentrashon: “Si morto ta sigui tene humanidat pa semper den su gara, esei ke men ku e ta mas fuerte ku Dios, no ta asina?” Pero un kos ta sigur, morto no tin mas poder ku e Fuente todopoderoso di bida! (Sal. 36:9) Tur e hendenan den Seol, òf Hades, ta den e memoria di Yehova, i lo e libra delaster un di nan.​—Luk. 20:​37, 38; Rev. 20:11-14.

¹¹ Miéntras tantu, Yehova ta realmente interesá den bida di su adoradónan fiel djawe. Laga nos konsiderá tres manera den kua definitivamente e ta nos “Libertadó,” Esun ku ta yuda nos skapa.

Protekshon Spiritual

12, 13. Dikon protekshon kontra daño spiritual ta sumamente importante, i kon Yehova ta perkurá esei pa nos?

¹² Yehova ta ofresé nos protekshon spiritual, ku ta e protekshon di mas importante. Komo kristiannan berdadero, nos ta komprondé ku tin algu ku ta mas balioso ku nos bida aktual. E kos di mas balioso ku nos tin ta nos relashon personal ku Yehova. (Sal. 25:14; 63:3) Sin e relashon ei, nos bida lo no tabatin propósito ni nos lo no tabatin un speransa pa futuro.

¹³ Afortunadamente, Yehova ta duna nos tur e yudansa ku nos tin mester pa mantené un relashon íntimo kuné. Nos tin su Palabra, su spiritu santu i su kongregashon mundial pa yuda nos. Kon nos por saka pleno probecho di e kosnan akí? Si nos studia su Palabra diligentemente i riba un base regular, nos fe lo bira mas firme i nos speransa mas briante. (Rom. 15:4) Si nos pidié sinseramente pa e duna nos su spiritu santu, nos lo risibí yudansa pa resistí e tentashon pa hasi kosnan kuestionabel. (Luk. 11:13) Si nos ta keda al dia ku e instrukshonnan ku e esklabo fiel ta perkurá mediante publikashonnan basá riba Beibel i tambe na reunion-, asamblea- i kongresonan, nos lo haña e ‘kuminda spiritual na su debido tempu.’ (Mat. 24:45) E kosnan akí ta protehá nos kontra daño spiritual i ta yuda nos keda serka di Dios.​—Sant. 4:8.

14. Relatá un eksperensia ku ta enfatisá kon Yehova ta protehá nos spiritualmente.

¹⁴ Pa ilustrá kon Yehova ta protehá nos spiritualmente, es desir, protehá nos relashon kuné, laga nos bai bèk na e mayornan menshoná na prinsipio di e artíkulo anterior. Un par di dia despues ku nan yu muhé, Theresa, a pèrdè, nan a haña e notisia teribel ku el a ser asesiná.a E tata a konta: ‘Mi a pidi Yehova proteh’é. Mi tin ku atmití ku ora nan a hañ’é asesiná, mi a puntra mi mes na prinsipio dikon mi orashon no a ser kontestá. Klaru ku mi sa ku Yehova no ta garantisá protekshon milagroso pa su pueblo individualmente. Mi a sigui pidié yuda mi komprondé. Loke a konsolá mi ta e echo ku Yehova ta protehá su pueblo spiritualmente, es desir, e ta perkurá loke nos tin mester pa nos por protehá nos relashon kuné. E tipo di protekshon ei ta sumamente importante, pasobra e por tin efekto riba nos futuro eterno. Den e sentido ei, Yehova á protehá Theresa, pasobra e tabata un sirbidó fiel di dje ora el a muri. E echo ku mi sa ku Theresa su speransa di bida pa futuro ta den Yehova su man amoroso a duna mi pas.’

Sostené Durante Malesa

15. Den ki maneranan Yehova por yuda nos ora nos ta sufri di malesa?

¹⁵ Yehova por sostené nos ‘riba kama di malesa,’ meskos ku el a hasi ku David. (Sal. 41:3) Ounke den nos tempu Yehova no ta perkurá liberashon den e sentido di hasi kurashon milagroso, e ta yuda nos sí. Kon asina? E prinsipionan ku nos ta haña den su Palabra por yuda nos tuma desishonnan sabí relashoná ku tratamentu médiko i otro asuntunan. (Pro. 2:6) Ademas, nos por haña informashon útil i sugerensianan práktiko for di artíkulonan publiká den E Toren di Vigilansia i Spièrta! ku kisas ta trata nèt e problema di salú ku nos tin. Yehova por duna nos mediante su spiritu “e poder mas ayá di loke ta normal” pa nos por dil ku e situashon i mantené nos integridat, maske kiko pasa. (2 Kor. 4:7, NW) Ku e yudansa ei, nos por evitá di ta asina preokupá ku nos malesa te ku nos ta pèrdè nos enfoke spiritual.

16. Kon un ruman hòmber a logra biba ku su malesa?

¹⁶ Tuma e ruman hòmber menshoná na prinsipio di e artíkulo anterior komo ehèmpel. Na aña 1998, dòkternan a saka afó ku e tin e malesa ku nan ta yama ALS (sklerósis lateral amiotrófiko), ku al final a lag’é kompletamente paralisá.b Kon el a logra biba ku su malesa? El a splika: “Tabatin momentonan di hopi doló i di frustrashon ku mi tabata sinti ku morto lo tabata mi úniko alivio. Pero ki ora ku mi a sinti mi desesperá, mi a pidi Yehova duna mi tres kos: un kurason trankil, pasenshi i perseveransia. Mi ta sinti ku Yehova a kontestá e orashonnan ei. Un kurason trankil ta laga mi pensa riba kosnan ku ta konsolá mi, manera por ehèmpel kon bida lo ta den e mundu nobo ora ku lo mi por bolbe kana, saboriá un dushi kuminda i papia ku mi famianan. Pasenshi ta yuda mi soportá e inkomodidat i difikultatnan di parálisis. Perseveransia ta yuda mi keda fiel sin pèrdè mi balansa spiritual. Di bèrdat mi ta pensa meskos ku e salmista David, pasobra mi ta sinti ku Yehova a sostené mi riba mi kama di malesa.”​—Isa. 35:6, 7.

Dios A Perkurá Alimento

17. Kiko Yehova a primintí ku lo e hasi pa nos, i kiko e promesa akí ta nifiká?

¹⁷ Yehova a primintí di perkurá pa nos materialmente. (Lesa Mateo 6:​33 i 34, i Hebreonan 13:​5 i 6.) Esei no ke men ku nos por stèns ku lo e hasi milager pa perkurá pa nos nesesidatnan material òf ku nos tin ku nenga di traha. (2 Tes. 3:10) Loke e promesa ei ta nifiká ta esaki: Si nos ta buska e Reino di Dios promé den nos bida i ta dispuesto pa traha pa nos pan di kada dia, nos por konta ku Yehova lo yuda nos haña e nesesidatnan di bida. (1 Tes. 4:​11, 12; 1 Tim. 5:8) E por perkurá loke nos tin mester na un manera ku kisas nos no ta ferwagt, podisé via di un ruman den fe ku ta yuda nos òf ku ta ofresé nos trabou.

18. Konta un eksperensia ku ta mustra kon Yehova por perkurá pa nos den tempu di nesesidat.

¹⁸ Bo ta kòrda e mama soltero menshoná den e introdukshon di e artíkulo anterior? Ora e ku su yu muhé chikí a bai biba na un área nobo, e tabatin problema pa haña trabou. El a splika: “Mi tabata bai sirbishi di vèlt parti mainta, i pasa henter atardi buskando trabou. Mi ta kòrda un dia ku mi a bai tienda pa kumpra lechi. Mi a para wak e bèrduranan, pero mi no tabatin sufisiente sèn pa kumpra niun. Nunka mi a sinti mi asina deprimí den mi bida. Ora mi a yega kas e dia ei for di tienda, mi a haña yen di saku den mi veranda patras ku tur sorto di bèrdura aden. Tabatin sufisiente kuminda pa nos kome vários luna. Úniko kos ku mi por a hasi tabata yora, i mi a gradisí Yehova.” Despues e ruman muhé a haña sa ku ta un ruman hòmber di su kongregashon ku ta planta bèrdura den su hòfi a laga e sakunan p’e. E ruman muhé a skirbié despues: “Ounke e dia ei mi a gradisí bo mashá, mi a gradisí Yehova tambe pasobra el a usa bo bondat pa kòrda mi di su amor.”​—Pro. 19:17.

19. Na e gran tribulashon, ki konfiansa e sirbidónan di Yehova lo tin, i kiko nos mester ta desididu pa hasi awor?

¹⁹ Ta bisto anto ku loke Yehova a hasi den tempu di Beibel i tambe den nos tempu ta duna nos motibu pa konfia den dje komo nos Ayudante. Pronto, ora ku e gran tribulashon yega riba e mundu di Satanas, nos lo tin mester di e yudansa di Yehova mas ku nunka. Sinembargo, sirbidónan di Yehova lo por akudí na dje ku pleno konfiansa. Nan lo por lanta nan kabes i alegrá, sabiendo ku nan liberashon ta serka. (Luk. 21:28) Miéntras tantu, sin importá ki prueba nos haña nos kuné, laga nos ta desididu pa pone nos konfiansa den Yehova, ku e pleno siguransa ku nos Dios ku no ta kambia, di bèrdat ta Esun ku por skapa nos; e ta nos “Libertadó.”

[Nota]

Bo Ta Kòrda?

• Kon Yehova por perkurá liberashon pa hende ku a muri prematuramente?

• Dikon protekshon spiritual ta sumamente importante?

• Kiko Yehova su promesa di perkurá pa nos materialmente ta enserá?

[Plachi na página 16]

Na aña 1918, nan a arestá Ruman Rutherford i su sosionan, pero despues a laga nan bai i a anulá tur akusashon kontra nan

[Plachi na página 18]

Yehova por sostené nos riba “kama di malesa”