Jehova, e Hacidor di Cosnan Maraviyoso

“Bo ta grandi i ta haci cosnan maraviyoso; bo ta Dios, bo so.” —SALMO 86:10.

1, 2. (a) Con invento di hende a afecta mundo? (b) Unda nos por haya speranza di mihor cosnan?

HENDE djawe por broma cu nan invencion ta maraviyoso, esta, aparato eléctrico, telecomunicacion, video, auto, biahamento cu djet, i tecnología di computer. Eseinan a haci mundo bira un solo barrio. Pero, ki un barrio! En bez di paz, prosperidad, i un abundancia pa tur hende, humanidad tin plaga di gera cruel, crimen, terrorismo, contaminacion, maleza, i pobreza. I arma nuclear situá rond di mundo, aunque nan ta menos, por extermina e raza humano ainda. Traficante den morto, fabricante di arma, ta sigi mantene e negoshi di mas grandi di mundo. Hende ricu ta bira mas ricu, hende pober ta bira mas pober. Ta posibel pa haya un solucion?

² Sí! Tin un Persona cu ta garantiza liberacion, Jehova Dios, “esun cu ta mas halto cu e halto.” (Eclesiastés 5:8) El a inspira e skirbimento di salmo, cu ta duna hopi consuelo i conseho sabí den tempo di angustia. Den eseinan tin Salmo 86, cu tin e título senciyo: “Un oracion di David.” Esei ta un oracion cu bo por pone na práctico.

Afligí pero Leal

 3. Den e tempo aki, David a laga cua ehempel animador pa nos?

³ David a skirbi e salmo ora e tabata bao di afliccion. Nos djawe, cu ta biba durante e “último dianan” dje sistema di Satanás, e “tempo crítico duro pa trata cuné,” ta enfrenta prueba similar. (2 Timoteo 3:1; mira també Mateo 24:9-13.) Mescos cu nos, David a sufri di angustia i desconsuelo debí na problema cu e tabatin cu wanta. Pero, e nunca a permiti tal prueba debilita su confianza leal den su Creador. El a sclama: “Inclina bo orea, O Jehova. Contestámi, pasobra mi ta afligí i pober. O, warda mi alma, pasobra mi ta leal. Salba bo sirbidor—bo ta mi Dios—cu ta confia den bo.”—Salmo 86:1, 2.

 4. Con nos mester demonstra nos confianza?

⁴ Mescos cu David, nos por tene e confianza di cu Jehova, “e Dios di tur consuelo,” lo dirigi su oído ne tera i scucha nos oracion humilde. (2 Corintio 1:3, 4) Confiando henteramente den nos Dios, nos por sigi e conseho di David: “Tira bo carga riba Jehova mes, i e mes lo sostenébo. Lo e nunca laga hende husto tambaleá.”—Salmo 55:22.

Intimo cu Jehova

 5. (a) Con algun traduccion cuidadoso a corrigi error di scriba hudío? (b) Di ki manera Salmo 85 i 86 ta engrandece Jehova? (Mira nota.)

⁵ Den Salmo 86, David a usa e expresion “O Jehova” 11 bez. Ki fervoroso tabata e oracion di David i ki íntimo e tabata cu Jehova! Mas tardi, tal uso íntimo dje nomber di Dios a bira repugnante pa scriba hudío, specialmente soferim. Nan a cria un miedu supersticioso di usa su nomber pa malu. Ignorando e echo cu Dios a cria hende den su imagen, nan a nenga di atribui na Dios atributo cu hende també ta desplega. P’sei, den 7 dje 11 uso dje nomber divino den e texto hebreo dje solo salmo aki, nan a sustitui e título ­’Adho-naiʹ (Señor) pe nomber YHWH (Jehova). Nos por keda agradicido cu tanto e Traducción del Nuevo Mundo de las Santas Escrituras, como varios otro traduccion cuidadoso, a restorá e nomber divino na su lugar apropiado den e Palabra di Dios. Como resultado, nos relacion cu Jehova ta ser enfatizá como debe ser.a

 6. Di ki manera nos por mustra cu e nomber di Jehova ta precioso pa nos?

⁶ E oracion di David ta sigi: “Mustrámi fabor, O Jehova, pasobra mi ta sigi sclama na bo tur e dia largu. Haci e alma di bo sirbidor alegra, pasobra mi ta hiza mi alma mes na bo, O Jehova.” (Salmo 86:3, 4) Ripara cu David a sigi inboca Jehova “tur e dia largu.” En berdad, hopi bez David a reza henter anochi, manera ora e tabata un fugitivo den desierto. (Salmo 63:6, 7) Mescos awe, algun Testigo di Jehova den peliger di violacion of otro asalto criminal a sclama cu boz halto na Jehova. Tabatin bez cu nan a haya sorpresa ne resultado feliz.b E nomber di Jehova ta precioso pa nos, mescos cu e tabata pa “Jesucristo, yiu di David,” ora e tabata riba tera. Jesús a siña disípel di dje pidi e santificacion dje nomber di Jehova i a duna di conoce na nan loke e nomber ta representa.—Mateo 1:1; 6:9; Juan 17:6, 25, 26.

 7. Cua ehempel nos tin di cu Jehova a hiza alma mes di sirbidor di dje, i con nos mester reac­ciona?

⁷ David a hiza su alma, su ser completo, na Jehova. E ta animános pa haci mescos, bisando den Salmo 37:5: “Lora bo camina riba Jehova, i confia den dje, i e mes lo reacciona.” Pues, nos peticion na Jehova pe haci nos alma alegrá lo no pasa sin contesta. Hopi sirbidor di Jehova, wardador di integridad, ta sigi haya gran gozo den su sirbishi—apesar di dificultad, persecucion, i enfermedad. Nos rumanan den tera cu gera ta destrui den Africa, tal como Angola, Liberia, Mozambique, i Zaïre, a sigi pone e sirbishi di Jehova promé den nan bida.c E berdaderamente a hácinan alegrá den e cosecha spiritual abundante. Nos tin cu wanta mescos cu nan. (Romano 5:3-5) I mientras cu nos ta wanta, nos tin e siguranza: “E vision ta pa e tempo siñalá ainda, i ta sigi anshá te na fin . . . Lo e no tarda.” (Habacuc 2:3) Cu confianza completo den Jehova, láganos també sigi “anshá te na fin.”

E Bondad di Jehova

 8. Cua relacion íntimo nos por tene cu Jehova Dios, i con el a manifesta su bondad?

⁸ David a sigi haci peticion apasioná: “Abo, O Jehova, ta bon i cla pa pordoná; i bondad amoroso ta abundante pa tur esnan cu ta inbocábo. Presta oído, O Jehova, na mi oracion; i en berdad presta atencion ne boz di mi súplica. Lo mi inbocábo den e dia di mi afliccion, pasobra lo bo contestámi.” (Salmo 86:5-7) “O Jehova”—bez tras bez tal expresion íntimo ta conmovénos! Esei ta un relacion íntimo cu nos por cultiva constantemente den oracion. David a haci oracion na otro ocasion: “Ai, no corda e picá di mi hubentud ni mi rebeldía. Bo mes cordámi, O Jehova, segun bo bondad amoroso, pa causa di bo bondad.” (Salmo 25:7) Jehova ta bondad mes—percurando e rescate di Jesús, mustrando misericordia na pecador arrepentí, i bashando bondad amoroso riba su testigonan leal i apreciativo.—Salmo 100:3-5; Malaquías 3:10.

 9. Pecador arrepentí mester tuma na pecho cua siguranza?

⁹ Nos mester noha riba error di pasado? Si nos ta haci camina stret pa nos pia awor, nos ta ser animá ora nos ta corda e siguranza cu apóstol Pedro a duna na hende arrepentí di cu “temporada di refrescamento” lo bini di Jehova. (Echo 3:19) Láganos keda pegá cu Jehova den oracion mediante nos Rescatador, Jesús, cu a bisa amorosamente: “Bini cerca mi, boso tur cu ta afaná i cargá, i lo mi refresca boso. Tuma mi yugo riba boso i siña foi mi, pasobra mi ta di genio suave i humilde di curazón, i boso lo haya refrescamento pa boso alma.” Ora testigo leal ta haci oracion na Jehova awe den e nomber precioso di Jesús, nan en berdad ta haya refrescamento.—Mateo 11:28, 29; Juan 15:16.

10. E buki di Salmo ta duna cua prominencia ne bondad amoroso di Jehova?

¹⁰ E buki di Salmo ta menciona e “bondad amoroso” di Jehova mas cu cien bez. Tal bondad amoroso siguramente ta abundante! Den su promé cuater versículo, Salmo 118 ta apela na sirbidor di Dios pa agradici Jehova, repitiendo cuater bez “pasobra su bondad amoroso ta te na tempo indefinitivo.” Salmo 136 ta enfatiza e calidad precioso di “su bondad amoroso” 26 bez. Maske con nos ta haci error—i segun Santiago 3:2 “nos tur ta trompica hopi bez”—láganos keda puesto pa busca e pordón di Jehova, cu e confianza di recibi su misericordia i bondad amoroso. Su bondad amoroso ta un expresion di su amor leal pa nos. Si nos ta sigi haci e boluntad di Dios lealmente, lo e demonstra su amor leal, dunando e fortaleza pa nos por enfrenta tur prueba.—1 Corintio 10:13.

11. Con accion di anciano por yuda elimina sintimento di culpa?

¹¹ Por tin ocasion ora otro hende ta hácinos trompica. Abuso emocional of fisical durante niñez ta laga algun hende cu un sintimento di culpa of di inutilidad total. Tal víctima por inboca Jehova Dios cu e confianza cu lo e responde. (Salmo 55:16, 17) Un anciano bondadoso por tin e interés pa yuda hende asina acepta e echo cu esei no tabata e falta dje víctima. Despues, e anciano por yama e persona na telefón de bez en cuando locual por yuda e persona te cu por fin e por ‘wanta e carga.’—Galatio 6:2, 5.

12. Di ki manera afliccion a aumenta, pero con nos por logra enfrentánan?

¹² Tin hopi otro circunstancia cu ta causa angustia cu e pueblo di Jehova mester enfrenta awe. Cuminzando cu Gera Mundial I na 1914, calamidad grandi a cuminza afligi mundo. Segun e profecía di Jesús, esei tabata “un comienzo di dolor di afliccion.” Afliccion a aumenta ora nos a bai mas leu den e “conclusion dje sistema di cosnan.” (Mateo 24:3, 8) ‘E tempo cortico’ di e Diabel ta terminando den su fin culminante. (Revelacion 12:12) “Manera un león ruidoso” buscando víctima, e gran Enemigo ta usa tur gañamento posibel pa separános for dje tao di Dios i destruínos. (1 Pedro 5:8) Pero, e no por logra! Pasobra, mescos cu David, nos ta hancra nos plena confianza den nos solo Dios, Jehova.

13. Con mayornan i nan yiu por probecha dje bondad di Jehova?

¹³ Indudablemente, David a inculca den e curazón di Salomón, su yiu, e necesidad di depende dje bondad di Jehova Dios. P’sei, Salomón por a instrui su mes yiu: “Confia den Jehova cu tur bo curazón i no depende di bo mes comprendimento. Den tur camina di bo tuma nota di dje, i e mes lo haci bo camina stret. No bira sabí den bo mes bista. Teme Jehova i aparta for di maldad.” (Proverbio 3:5-7) Mayornan djawe també mester siña nan yiunan con pa reza na Jehova Dios cu confianza i con pa enfrenta asalto di un mundo cruel—tal como presion na scol di otro muchanan i tentacion pa comete inmoralidad. Bibando di acuerdo cu e berdad cu bo yiunan tur dia por impresioná riba nan curazón hoven un berdadero amor pa Jehova Dios i ­dependencia riba dje den oracion.—Deuteronomio 6:4-9; 11:18, 19.

Obra Incomparabel di Jehova

14, 15. Menciona algun obra sin igual di Jehova Dios.

¹⁴ David a bisa cu conviccion profundo: “No tin ningun manera abo den e diosnan, O Jehova, ni no tin obra manera esnan di bo.” (Salmo 86:8) Obra di Jehova ta mas grandi, mas magnífico, mas mahestuoso, cu cualkier hende por sikiera imagina. Ciencia moderna ta haya un bistazo so dje universo cu Dios a crea—su grandeza, su armonía, su magnificencia—ta resulta hopi mas asombroso cu cualkier cos cu David a mira. Sin embargo, asta David a keda conmoví pa bisa: “Cielo ta declara e gloria di Dios; i e expansion ta declara obra di su man.”—Salmo 19:1.

¹⁵ Obra di Jehova ta maraviyosamente desplegá també den e manera cu el a situá i a prepara e tera, percurando pa dia i anochi, temporada, tempo pa sembra i cosechá, i un cantidad di cosnan gozoso pa hende disfruta despues. I ki maraviyosamente nos mes ta ser trahá i equipá, di manera cu nos por disfruta di obra di Jehova Dios tur rond di nos!—Génesis 2:7-9; 8:22; Salmo 139:14.

16. Cua ta e expresion mayor dje bondad di Jehova, resultando den cua otro obra sin igual?

¹⁶ Despues cu nos promé mayornan a desobedece Dios, principiando e afliccion cu ta plaga mundo te ne dia djawe, Jehova Dios den su amor a haci e obra maraviyoso di manda su Yiu na mundo pa proclama e Reino di Dios i muri como rescate pa humanidad. Anto e maraviya mayor! Sí, Jehova Dios a resusitá Cristo pe bira su Rey socio, esun cu el a scoge. (Mateo 20:28; Echo 2:32, 34) També Dios a scoge for di hende leal “un creacion nobo” cu lo reina cu Cristo como un bondadoso “cielo nobo” riba un sociedad di un “tera nobo” cu lo inclui miles di miyones di hende resusitá. (2 Corintio 5:17; Revelacion 21:1, 5-7; 1 Corintio 15:22-26) Asina, obra di Jehova Dios lo progresá te na un culminacion glorioso! Berdaderamente, nos por sclama: “O Jehova, . . . ki abundante ta bo bondad, cu bo a warda pa esnan cu ta temébo!”—Salmo 31:17-19.

17. Con Salmo 86:9 ta ser cumplí awor en relacion cu obra di Jehova?

¹⁷ Obra di Jehova djawe ta inclui loke David a detayá den Salmo 86:9: “Tur nacion cu bo a traha, nan mes lo bini, i nan lo buig dilanti bo, O Jehova, i lo duna gloria na bo nomber.” Despues di a yama for di humanidad e resto di su creacion nobo, e “trupa chikito” di heredero di Reino, Jehova a sigi pa saca for di “tur nacion” “un multitud grandi” di “otro carné,” miyones di hende cu també ta eherce fe den e sanger dramá di Jesús. El a traha di nan un organizacion dinámico, e único sociedad mundial di amante di paz riba tera awe. Mirando esei, ehército di cielo ta cai boca abao dilanti Jehova, declarando: “Bendicion i gloria i sabiduría i agradicimento i onor i poder i forza sea pa nos Dios pa semper hamás.” E multitud grandi també ta glorifica e nomber di Jehova i ta sirbié “dia i anochi,” cu e speranza di sobrebiba e fin di mundo i biba pa semper den Paradijs riba tera.—Lucas 12:32; Revelacion 7:9-17; Juan 10:16.

E Grandeza di Jehova

18. Con Jehova Dios a demonstra cu e so ta Dios?

¹⁸ Sigientemente David a hala atencion ne Divinidad di Jehova, bisando: “Bo ta grandi i ta haci cosnan maraviyoso; bo ta Dios, bo so.” (Salmo 86:10) Desde tempo di antigua, Jehova a demonstra cu e so en berdad ta Dios. Faraó, e tirano di Egipto, tabata esun cu a reta Moisés, puntrando: “Ken ta Jehova, pa mi obedece su boz i despacha Israel? Ami absolutamente no ta conoce Jehova.” Pero, el a yega di sa pronto ki grandi Jehova tá! Dios Todopoderoso a humiliá dios i sacerdote practicante di magia di Egipto, mandando plaga catastrófico, matando yiu mayor di Egipto, i destruyendo faraó i su mihor ehército den Lamá Corrá. En berdad, no tin ningun manera Jehova den e diosnan!—Éxodo 5:2; 15:11, 12.

19, 20. (a) Na ki tempo e cantica di Revelacion 15:3, 4 lo haya su expresion mayor? (b) Asta awor, con nos por tene parti den e trabao di Jehova Dios?

¹⁹ Como e solo Dios, Jehova a sigi haci cosnan maraviyoso den preparacion pe liberacion di adorador obediente di dje for di Egipto moderno—e mundo di Satanás. El a dirigi e proclamacion di huicio divino di dje den tur e mundo como testimonio den e campaña di mas extenso di predicacion den tur historia, cumpliendo asina cu e profecía di Jesús den Mateo 24:14. Pronto, e “fin” tin cu yega, ora Jehova Dios lo demonstra su grandeza na escala sin igual, exterminando tur maldad for dje tera. (Salmo 145:20) Anto e cantica di Moisés i e cantica dje Lamchi lo alcanza un máximo: “Grandi i maraviyoso ta bo obranan, Jehova Dios, Todopoderoso. Bo camina ta husto i berdadero, Rey di eternidad. Ken lo no realmente temébo, Jehova, i glorifica bo nomber, pasobra bo so ta leal?”—Revelacion 15:3, 4.

²⁰ Laga nos, di nos parti, ser celoso den nos papiamento cu otro hende tocante e propósito magnífico di Dios. (Compara cu Echo 2:11.) Jehova Dios lo sigi haci cosnan grandi i maraviyoso den nos tempo i també te na futuro, manera e sigiente artículo lo splica.

[Nota]

Bo ta Corda?

◻ Pakico nos mester pone na práctico e oracion di Salmo 86?

◻ Con nos por establece un relacion íntimo cu Jehova Dios?

◻ Con Jehova ta expresa su bondad pa cu nos?

◻ Menciona algun obra sin igual di Jehova Dios.

◻ Di ki manera Jehova so ta Dios en cuanto grandeza?

[Plachi na página 10]

Den e binidero “tera nobo,” obra maraviyoso di Jehova lo sigi duna testimonio di su gloria i bondad