Referensia pa Material i Tarea pa Reunion Nos Bida i Sirbishi Kristian

Referensia pa Material i Tarea pa Reunion Nos Bida i Sirbishi Kristian

16-22 DI YANÜARI

TESORO DI E PALABRA DI DIOS | 1 KRÓNIKANAN 1-3

“E Hendenan den Beibel Tabata Personanan Real!”

w09-S 1/9 14 §1

Adam ku Eva Tabata Personanan Real?

Konsiderá, por ehèmpel, e genealogianan hudiu den e buki di Beibel di Promé Krónikanan 1 pa 9 i den e evangelio di Lukas kapítulo 3. E genealogianan akí ta masha detayá. Esun na Promé Krónikanan 1-9 ta kubri 48 generashon, i esun na Lukas kapítulo 3 ta kubri 75 generashon. Lukas a konsentrá riba e genealogia di Hesukristu, miéntras ku e buki di Krónikanan ta registrá e genealogia di rei i saserdote di e nashon di Israel. Tur dos di e genealogianan akí a inkluí personahenan konosí manera Sálomon, David, Yakòb, Isak, Abraham, Noe i Adam. Komo ku tur e personanan den e genealogianan aki tabata personanan real, ta lógiko pa konkluí ku Adam tambe tabata un persona real.

w09-S 1/9 14-15

Adam ku Eva Tabata Personanan Real?

Tuma por ehèmpel e reskate, un siñansa di Beibel ku ta hopi importante pa kualke kreyente. Di akuerdo ku e siñansa akí, Hesukristu a duna su bida humano perfekto komo reskate pa salba hende for di piká. (Mateo 20:28; Huan 3:16) Manera nos sa, un reskate ta e preis ku bo ta paga pa kumpra algu bèk òf pa libra un persona. P’esei, Beibel ta deskribí Hesus komo “un reskate korespondiente.” (1 Timoteo 2:6) Kisas nos ta puntra, korespondiente na kiko? Beibel ta bisa: “Meskos ku den Adam tur ta muri, asina tambe den Kristu tur lo haña bida.” (1 Korintionan 15:22) E bida perfekto ku Hesus a sakrifiká pa libra humanidat obediente ta ekivalente (òf, korespondiente) na e bida perfekto ku Adam a pèrdè ora e tabata den hòfi di Edén. (Romanonan 5:12) Ta bisto ku si Adam no a eksistí, e sakrifisio di Hesus lo no tabatin ningun sentido.

Hoya Spiritual

it-1-S 1005 §1-2

Genealogia

Nòmber di Hende Muhé. Den algun kaso a inkluí nòmber di hende muhé den e genealogianan ora tabatin motibu históriko pa hasi esei. Ta parse ku Sarai (Sara) ta ser menshoná na Génesis 11:29 i 30, pasobra e simia primintí mester a bini pa medio di dje i no pa medio di un otro esposa di Abraham. Kisas Milka a ser menshoná den e mesun relato ei, pasobra e tabata wela di Rebeka, esposa di Isak; esei a mustra ku Rebeka su liña di desendensia tabata bini for di Abraham su famia, komo ku Isak no tabatin mag di tuma un esposa for di otro nashon. (Gén 22:20-23; 24:2-4) Na Génesis 25:1, Ketura, nòmber di un otro esposa di Abraham, ta ser menshoná. Esei ta mustra ku Abraham a kasa atrobe despues ku Sara a muri i ku ainda e tabatin poder pa reprodusí mas ku 40 aña despues ku milagrosamente Yehova a hasi esei posibel. (Rom 4:19; Gén 24:67; 25:20) Ademas, di e manera ei nos ta mira e relashon ku Madian i otro tribu arabir tabatin ku Israel.

Tantu Lea, Raquel i e konkubinanan di Yakòb, huntu ku nan yu hòmbernan ta ser menshoná. (Gén 35:21-26) Esei ta yuda nos komprondé mihó e manera ku Yehova a trata ku e yu hòmbernan ei despues. Pa motibunan similar, nos ta haña nòmber di otro hende muhé den e genealogianan. Ora un herensia a ser pasá mediante un hende muhé, nan nòmber por a ser inkluí. (Num 26:33) Pero, Tamar, Rahab i Rut ta kasonan spesial. Den kada un di e kasonan ei tabatin algu remarkabel ku a pone ku e hende muhénan akí a bira parti di e liña di desendensia di e Mesías, Hesukristu. (Gén 38; Rut 1:3-5; 4:13-15; Mat 1:1-5) Otro ehèmpel di genealogia unda nòmber di hende muhé ta ser menshoná ta na 1 Krónikanan 2:35, 48, 49; 3:1-3, 5.

30 DI YANÜARI–5 DI FEBRÜARI

TESORO DI E PALABRA DI DIOS | 1 KRÓNIKANAN 7-9

“Ku Yehova su Yudansa Bo Por Kumpli ku Asignashon Difísil”

w11-S 15/9 32 §7

Abo Por Ta Manera Fínehas ora Bo Ta Enfrentá Difikultat?

Fínehas tabatin hopi responsabilidat den Israel di antigwedat. Pero, el a dependé riba Dios, i ku kurashi i perspikasia el a logra enfrentá difikultat ku éksito. Yehova a aprobá di e manera ku Fínehas tabata kuida Su kongregashon. Mas o ménos 1.000 aña despues, Èsdras a skirbi bou di inspirashon: “Den pasado, Fínehas, yu hòmber di Eleazar, tabata nan kabesante. I Yehova tabata kuné.” (1 Kró. 9:20) Nos ta spera ku e palabranan ei por apliká na tur superintendente den Dios su pueblo awe, i tambe na tur kristian ku ta sirbi Yehova fielmente.

6-12 DI FEBRÜARI

TESORO DI E PALABRA DI DIOS | 1 KRÓNIKANAN 10-12

Hoya Spiritual

it-1-S 551 §5-6

Kurason

Sirbi Dios “di Henter Bo Kurason.” E kurason literal mester ta kompleto pa e por funshoná, pero e kurason figurativo por ta dividí. David a bisa den orashon: “Uni mi kurason pa teme Bo nòmber.” Esei ta mustra ku un persona su kurason por ta dividí ora ta trata di e kosnan ku e ta gusta i teme. (Sl 86:11) Si un persona su kurason ta “dividí”, esei por pone ku e ta adorá Yehova sin entusiasmo. (Sl 119:113, NW, Nota; Rev 3:16) Ademas, un persona por tin un “kurason dòbel,” esei ke men ku e ta purba di sirbi dos doño òf e ta bisa algu miéntras ku e ta pensa algu otro. (1Kr 12:33, Nota; Sl 12:2) Hesus a kondená e hipókritanan ku tabata sirbi Yehova ku un kurason dividí.—Mat 15:7, 8.

Un hende ku ke agradá Dios no por sirbié ku un kurason dividí ni ku un kurason dòbel, e mester sirbié di henter kurason. (1Kr 28:9) Esei ta tuma hopi esfuerso pasobra e kurason ta korupto i ta inkliná na maldat. (Yer 17:9, 10; Gén 8:21) Kiko por yuda nos sirbi Dios di henter kurason? Hasi orashon di henter kurason (Sl 119:145; Lam 3:41), studia e Palabra di Dios regularmente (Èsd 7:10; Pro 15:28), prediká e bon notisia ku zelo (kompará ku Yer 20:9) i asosiá ku otro hende ku ta sirbi Yehova di henter kurason.—Kompará ku 2Re 10:15, 16.