Camnando cu un Curazón Unificá

“Instruími, O Jehova . . . Unifica mi curazón pe teme bo nomber.”—SALMO 86:11.

 1. Con Jehova ta recompensa su hendenan leal?

‘O JEHOVA, bo ta Dios, bo so.’ (Salmo 86:8, 10) David a alaba Dios cu un curazón yen di aprecio. Asta promé cu David a bira rey riba tur Israel, Jehova a libré for di Saul i for di filisteo. P’sei e por a canta: “Jehova ta mi barranca i mi fortaleza i esun cu ta percura escape pa mi. Bo ta actua den lealtad cu hende leal.” (2 Samuel 22:2, 26) Jehova a scapa su sirbidor leal for di hopi prueba. David por a pone su confianza den su Dios leal, pero e tabatin mester di guía continuo. Awor David a peticioná Dios: “Instruími, O Jehova, tocante bo camina.”—Salmo 86:11.

 2. Con Jehova a haci percuracion pa nos recibi su siñanza?

² David no a deseá nada relacioná cu idea of filosofía di mundo. El a deseá pa Jehova siñé, manera e profeta di Dios a bisa despues. (Isaías 54:13) Probablemente David por a medita riba nuebe buki so dje Bijbel disponibel den su tempo. Pero, tal instruccion di Jehova tabata precioso pe! Pa nos instruccion, nos djawe por probecha di tur 66 buki di Bijbel, i també un abundancia di literatura di Reino cu e “sclabo fiel i prudente” ta percura. (Mateo 24:45) Mescos cu David, láganos inboca Jehova, pa su spiritu yúdanos rista “e cosnan cu Dios a prepara pa hende cu ta stimé, . . . asta e cosnan profundo di Dios.”—1 Corintio 2:9, 10.

 3. Di ki manera instruccion bíblico por benefi­ciános?

³ E Bijbel tin e contesta pa tur pregunta i problema cu por presenta den nos bida. “Pasobra tur loke tabata skirbí den tempo pasá tabata skirbí pa nos instruccion, pa mediante nos awante i mediante consuelo di Scritura nos por tene speranza.” (Romano 15:4) Nos aceptacion di instruccion di Jehova por fortalecénos pa wanta dificultad, consolános den tempo di desconsuelo, i mantene e speranza di Reino cendí briyantemente den nos curazón. Nos por haya gozo den e lezamento dje Palabra di Dios i den meditacion riba dje “dia i anochi,” pasobra sabiduría fundá ariba e Bijbel ta bira “un palu di bida pa hende cu ta haya gara di dje, i hende cu ta mantene un gara firme riba dje ta ser yamá feliz.”—Salmo 1:1-3; Proverbio 3:13-18; mira també Juan 17:3.

 4. Cua ehempel Jesús a pone pa nos en cuanto nos accion?

⁴ Jesús, e Yiu di Dios, yamá també e “Yiu di David,” semper a acudi na Jehova pa instruccion. (Mateo 9:27)a El a bisa: “E Yiu no por haci ni un solo cos di su mes iniciativa, sino solamente loke e ta mira e Tata haci. Pasobra cualkier cos cu E haci, e Yiu ta haci mescos també di igual manera.” “Mi no ta haci nada di mi mes iniciativa; ma net manera e Tata a siñami, esei ta loke mi ta papia.” (Juan 5:19; 8:28) Jesús a laga un modelo pa nos “sigi su pasonan cu sumo cuidao i atencion.” (1 Pedro 2:21) Imaginábo! Si nos ta studia mescos cu Jesús probablemente a haci, den cualkier situacion nos por reacciona manera Jehova Dios kier. E camina di Jehova semper ta e camina recto.

 5. Kico ta e “berdad”?

⁵ David a declara sigientemente: “Lo mi camna den bo berdad.” (Salmo 86:11) Mil aña despues, Pilato a haci Jesús, e Yiu di David, e pregunta: “Kico ta berdad?” Pero Jesús a caba di contestá e pregunta, bisando Pilato: “Mi reino no ta parti di mundo,” agregando: “Bo mes ta bisa cu mi ta rey. P’sei mi a nace, i p’sei mi a bini na mundo, pa mi duna testimonio dje berdad.” (Juan 18:33-38) Asina Jesús a duna di conoce cu e berdad ta enfocá ariba e Reino Mesiánico. Realmente, e tema henter dje Bijbel ta e santificacion dje nomber di Jehova Dios mediante e Reino.—Ezekiel 38:23; Mateo 6:9, 10; Revelacion 11:15.

 6. Ora nos ta camna den e berdad, nos mester keda cauteloso tocante kico?

⁶ Kico kier men anda den e berdad? Esei kier men haci e speranza dje Reino e interés principal di nos bida. Nos tin cu biba di acuerdo cu e berdad dje Reino. Nos mester ta deboto poniendo interés di Reino promé, celoso pa probecha di tur oportunidad di duna testimonio dje berdad dje Reino, sigiendo ehempel di Jesús. (Mateo 6:33; Juan 18:37) Nos no por anda un parti dje tempo den e berdad, rindiendo simplemente un muestra di sirbishi pero despues complaciendo nos mes cu dwalmento pa participa den demasiado recreo of drenta den un ofishi cu ta ocupa nos tempo of “bira esclabo . . . di Riqueza.” (Mateo 6:24) Nos por bai perdí riba un camina asina i nunca haya e camina pa bolbe ne ‘camina pretá cu ta hiba na bida.’ Láganos no dwal for dje camina ei! (Mateo 7:13, 14) Jehova Dios, nos Gran Instructor, mediante su Palabra i organizacion, ta ilumina e camina, bisando: “ ‘Esaki ta e camina. Boso camna den dje,’ si acaso boso ta bai rechts of si acaso boso ta bai links.”—Isaías 30:21.

Un Temor Apropiado

 7. Con nos por “unifica” nos curazón?

⁷ E oracion di David a sigi den versículo 11: “Unifica mi curazón pe teme bo nomber.” Mescos cu David, nos mester deseá pa nos curazón ser deboto, completo, den e hacimento dje boluntad di Dios. Esei ta di acuerdo cu e conseho di Moisés: “I awor, O Israel, kico Jehova bo Dios ta pidi di bo sino di teme Jehova bo Dios, pa bo camna den su camina i stimé i sirbi Jehova bo Dios cu tur bo curazón i cu tur bo alma; pa warda e mandamento di Jehova i su estatuto cu mi ta mandábo awe, pa bo beneficio?” (Deuteronomio 10:12, 13) Realmente ta pa nos beneficio cu nos ta dedica nos curazón i alma ne sirbishi di Jehova Dios. Asina nos ta demonstra e temor apropiado pa su nomber ilustre. E nomber di Jehova ta nifica literalmente “E Ta Causa Ser,” specialmente en relacion cu cumplimento di su gran propósito. E ta representa també su autoridad supremo riba tur e universo. Si nos ta sirbi Dios den temor di su mahestad, miedu di hende mortal no por desviános. Nos curazón lo no ser partí. Mas bien, nos ta keda den temor di no haci nada pa desagradá Jehova Dios, e Huez Supremo i Señor Soberano, cu ta tene nos bida mes den su man.—Isaías 12:2; 33:22.

 8, 9. (a) Kico kier men ‘no sea parti di mundo’? (b) Nos tin cu dal cua paso ya cu nos ta un “exhibicion teatral”?

⁸ Asta den e presencia di reproche i persecucion, nos lo sigi ehempel intrépido di Jesús di no ser parti dje mundo malbado rond di nos. (Juan 15:17-21) Esei no kier men cu disípel di Jesús tin cu sconde den cueba of conbento. Jesús a bisa den oracion na su Tata: “Mi ta pidíbo, no sácanan for di mundo, sino vigilánan pa causa dje malbado. Nan no ta parti di mundo, mescos cu mi no ta parti di mundo. Santificánan pa medio dje berdad; bo palabra ta berdad. Mescos cu bo a mandámi na mundo, ami també ta mándanan na mundo.” (Juan 17:15-18) Mescos cu Jesús, nos ta ser mandá pa proclama e berdad dje Reino. Hende por a acercá Jesús. Su moda di siña a refresca hende. (Compara cu Mateo 7:28, 29; 11:28, 29; Juan 7:46.) Nos tin cu ser mescos.

⁹ Nos cariño sincero, e bon gusto di nos aparencia i cabei, nos conbersacion bondadoso i decente, mester haci nos i nos mensahe aceptabel pa hende di curazón recto. Nos mester evita slordigheid, bistí inmodesto, asociacion cu por resulta den enbolbimento mundano, i un moda di biba inmoral i sin principio cu nos ta mira den mundo rond di nos. Ya cu nos a “bira un exhibicion teatral pa mundo, i pa angel, i pa hende,” nos ta keda responsabel 24 ora di tur dia pa sirbi i biba como hende cristian ehemplar. (1 Corintio 4:9; Efesio 5:1-4; Filipense 4:8, 9; Colosense 4:5, 6) Nos curazón tin cu keda unificá pa ser asina.

10. Con Jehova ta corda hende cu ta unfica nan curazón den su sirbishi sagrado?

¹⁰ Jehova Dios lo córdanos, nos cu ta unifica nos curazón den temor dje nomber di Jehova, meditando riba su gran propósito i yenando nos bida cu su sirbishi sagrado. “En cuanto Jehova, su wowo ta pasa riba tur e tera pe demonstra su forza na fabor di esnan cu tin un curazón completo pa cuné.” (2 Crónica 16:9) Haciendo referencia profético na nos dia, Malaquías 3:16 ta bisa: “Ne tempo ei esnan den temor di Jehova a papia un cu otro, cada un cu su compañé, i Jehova a sigi presta atencion i scucha. I un buki di recordamento a cuminza ser skirbí dilanti dje pa esnan den temor di Jehova i pa esnan cu a corda su nomber.” Laga nos curazón keda unificá den e temor saludable di Jehova!

E Bondad Amoroso di Jehova

11. Con Jehova lo expresa su bondad amoroso pa cu hende leal?

¹¹ Ki fervoroso tabata e oracion di David! El a sigi: “Mi ta alabábo, O Jehova mi Dios, lo mi glorifica bo nomber cu tur mi curazón te na tempo indefinitivo, pasobra bo bondad amoroso ta grandi pa cu mi, i bo a libra mi alma for di Sheol, di su lugar mas abao.” (Salmo 86:12, 13) Pe segunda bez den e salmo, David a alaba Jehova pa su bondad amoroso—su amor leal. Su amor ta asina grandi cu e por salba hende den situacion cu ta parce imposibel. Ora Saul tabata persigi David den ­desierto, David por a deseá di sconde den un skina i muri. Esei tabata mescos cu topa cara cara cu e lugar mas abao den Sheol—den e profundidad dje graf. Pero, Jehova a libré! Di igual manera, Jehova hopi bez a duna alivio na sirbidor di dje djawe na moda maraviyoso, i també a sostene wardador di integridad cu a persevera fielmente te na morto. Tur hende leal lo recibi un recompensa, asta den un resureccion for di morto si ta necesario.—Compara cu Job 1:6-12; 2:1-6, 9, 10; 27:5; 42:10; Proverbio 27:11; Mateo 24:9, 13; Revelacion 2:10.b

12. Di ki manera e clero ta tribí i tirano, i cua recompensa nan lo recibi?

¹² David a sclama tocante persigidor: “O Dios, hende halzá a lanta contra mi; i e asamblea mes di hende tirano a busca mi alma, i nan no a ponébo dilanti nan mes.” (Salmo 86:14) Awe, persigidor ta inclui clero di cristiandad. Eseinan ta pretende di adora Dios pero ta usa e título “Señor” como sustituto pa su nomber santo i ta presentele como un trinidad misterioso cu realmente no ta ser mencioná den ningun parti dje Bijbel. Ki un tribilidad! Además, nan ta purba di convence poder político pa prohibi i encarcelá Testigo di Jehova, manera nan ta haci ainda den un gran cantidad sorprendibel di país rond di mundo. Bistí den bata, tal blasfemador dje nomber di Dios lo cosecha nan recompensa, hunto cu sector di Babilonia e Grandi semehante di muher di mala bida.—Revelacion 17:1, 2, 15-18; 19:1-3.

13. Jehova ta manifesta cua calidad ora e ta duna di conoce su bondad?

¹³ Na contraste feliz e oracion di David ta sigi: “Pero abo, O Jehova, ta un Dios misericordioso i bondadoso, tardá pa rabia i abundante den bondad amoroso i pegá ne berdad.” (Salmo 86:15) Superlativo, en berdad, ta tal calidad di nos Dios. E palabra ei ta hácinos corda e Ceru di Sinaí ora Moisés a pidi pa mira e gloria di Jehova. Jehova a contesta: “Ami lo haci tur mi bondad pasa dilanti bo cara, i lo mi declara e nomber di Jehova dilanti bo.” Pero el a adverti Moisés: “Bo no por mira mi cara, pasobra ningun hende por mira mi cara i toch biba.” Despues, Jehova a baha den un nubia, proclamando: “Jehova, Jehova, un Dios misericordioso i bondadoso, tardá pa rabia i abundante den bondad amoroso i berdad.” (Éxodo 33:18-20; 34:5, 6) David a cita su palabra den su oracion. Calidad asina di Jehova Dios ta nifica hopi mas pa nos cu cualkier aparencia fisical! Siñá for di nos mes experencia, nos no ta aprecia e bondad di Jehova manifestá den tal atributo excelente?

“Un Siñal cu ta Nifica Bondad”

14, 15. Con Jehova ta efectua “un siñal cu ta nifica bondad” pa su sirbidornan?

¹⁴ David a pidi e bendicion di Jehova di nobo, bisando: “Dirigíbo na mi i mustrámi fabor. Sí, duna bo forza na bo sirbidor, i en berdad salba e yiu di bo esclaba. Efectuá cu mi un siñal cu ta nifica bondad, pa hende cu ta odiámi por miré i keda bergonzá. Pasobra bo mes, O Jehova, a yudámi i a ­consolámi.” (Salmo 86:16, 17) David a reconoce cu como ‘e yiu dje esclaba di Jehova,’ e també tabatin cu pertenece na Jehova. Ta asina cu nos tur djawe cu a dedica nos bida na Jehova Dios i ta sirbié como esclabo. Nos tin mester dje forza salbador di Jehova mediante su spiritu santo. P’sei, nos ta pidi nos Dios efectua cu nos “un siñal cu ta nifica bondad.” E bondad di Jehova ta encerra tur calidad excelente cu nos a caba di mencioná. Riba e base ei, cua siñal, of evidencia, nos por spera pa Jehova dúnanos?

¹⁵ Jehova ta e Dunador di “tur bon regalo i tur don perfecto” i segun e siguranza cu Jesús a dúnanos, e ta generoso den dunamento di “spiritu santo na esnan cu ta pidi.” (Santiago 1:17; Lucas 11:13) E spiritu santo—ki un don preciosísimo di Jehova Dios! Mediante e spiritu santo, Jehova ta duna gozo di curazón, asta den tempo di persecucion. Asina, apóstol di Jesús, ora nan tabata huzgá pa nan bida, por a declara cu gozo cu Dios ta duna spiritu santo na hende cu ta obedecé como gobernante. (Echo 5:27-32) Gozo di spiritu santo a sigi efectua cu nan “un siñal cu ta nifica bondad.”—Romano 14:17, 18.

16, 17. (a) Cua siñal di su bondad Jehova a duna Pablo i Barnabás? (b) Cua siñal el a duna tesalonicense persigí?

¹⁶ Durante e transcurso di nan biahe como misionero den Asia Menor, Pablo i Barnabás a contra cu dificultad, asta persecucion severo. Ora nan a predica den Antioquía di Pisidia, hudío a rechaza nan mensahe. P’sei, nan a acudi ne pueblo dje nacionan. Kico tabata e resultado? “Ora hende dje nacionan a tende esei, nan a cuminza alegra i glorifica e palabra di Jehova, i tur esnan cu tabata correctamente dispuesto pa bida eterna a bira creyente.” Pero hudío a lanta un bochincha, di manera cu e dos misionero tabata sacá for dje país. Nan i hende recién ­creyente a desanimá tocante esei? Di ningun manera! Mas bien, “e disípelnan a sigi ser yená cu gozo i spiritu santo.” (Echo 13:48, 52) Jehova a dúnanan tal siñal di su bondad.

¹⁷ Despues, e congregacion nobo den Tesalónica a wordu persigí. P’sei, apóstol Pablo a skirbi un carta di consuelo, i a encomenda nan awante bao di tribulacion. Nan a “acepta e palabra bao di hopi tribulacion cu gozo di spiritu santo.” (1 Tesalonicense 1:6) E “gozo di spiritu santo” a sigi fortalecénan como un siñal claro di Dios cu ta misericordioso i bondadoso, tardá pa rabia, i abundante den bondad amoroso i pegamento ne ­berdad.

18. Con nos rumanan den Oosteuropa a mustra aprecio pe bondad di Jehova?

¹⁸ Den tempo reciente, Jehova Dios a expresa su bondad pa cu nos fiel rumanan den Oosteuropa, bergonzando esnan cu a odiánan—hende cu a persigínan na antes. Aunque e alivio for di hopi aña di opresion a yega recientemente, nos rumanan stimá tin cu wanta ainda, pasobra dificultad económico severo ta enfrentánan ainda. No obstante, nan “gozo di spiritu santo” ta consolánan. Cua gozo mayor nan por haya cu e uso di nan libertad nobo den e expansion dje testimonio duná? Hopi hende ta scúchanan, segun cu informe di asamblea i bautismo ta mustra.—Compara cu Echo 9:31.

19. Con nos por cumpli cu e palabra di Salmo 86:11?

¹⁹ Tur loke a ser considerá den e artículo aki i esun promé ta un refleccion dje oracion fervoroso di David na Jehova: “Instruími, O Jehova . . . Unifica mi curazón pe teme bo nomber.” (Salmo 86:11) Láganos cumpli cu e palabra ei di nos texto di aña di 1993 mientras cu nos ta traha cu tur nos curazón ta apoya interés di Reino i ta aprecia e bondad sin fin di nos solo Dios, Señor Soberano Jehova.

[Nota]

Con Bo ta Contestá?

◻ Kico nos ta indica ora nos ta pidi, “Instruími, O Jehova”?

◻ Kico kier men e unificacion di nos curazón pa teme e nomber di Jehova?

◻ Con Jehova Dios lo demonstra su bondad amoroso pa cu tur hende leal?

◻ Con Jehova Dios ta efectua pa nos “un siñal cu ta nifica bondad”?

[Kuadro na página 16]

E texto di aña di 1993: “Instruími, O Jehova . . . Unifica mi curazón pe teme bo nomber.” ​—Salmo 86:11.

[Plachi na página 15]

Jehova Dios ta un barranca i fortaleza pa hende cu ta camna recto den e berdad

[Plachi na página 18]

Ne Asamblea Internacional “Portador di Luz” di Testigo di Jehova den St. Petersburg, Rusia, den Juni di 1992, 46.214 a asisti i 3.256 a bautiza. Ki maraviyosamente nan a probecha dje bondad di Jehova Dios, cu e “gozo di spiritu santo”!