Haña Consuelo den Jehova Su Forsa

“Ora mi pensamentunan inkietante a bira hopi den mi, bo mes consolacion a cuminsá cariciá mi alma.”—SALMO 94:19.

BIJBEL tin palabra di animacion pa tur esnan cu ta anhelá consuelo. P’esei, no ta nada straño cu The World Book Encyclopedia ta bisa cu “un cantidad incontabel di hende a acudí na Bijbel pa consuelo, speransa i guia den tempu di problema i insiguridad.” Di con?

Dor cu Bijbel ta inspirá dor di nos Creador amoroso, “e Dios di tur consuelo,” Esun “cu ta consolá nos den tur nos tribulacion.” (2 Corintionan 1:3, 4) E ta ‘e Dios cu ta suministrá consuelo.’ (Romanonan 15:5) Jehova a pone un ehempel dor di percurá un medio di alivio pa nos tur. El a manda su Yu unigénito, Cristo Jesus, na tera pa duna nos speransa i consuelo. Jesus a siña: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” (Juan 3:16) Bijbel ta describí Jehova como esun “kende diariamente ta hiba e carga pa nos, e Dios berdadero di nos salbacion.” (Salmo 68:19) Hende cu ta teme Dios por bisa cu confiansa: “Mi a pone Jehova mi dilanti constantemente. Dor cu e ta na mi man drechi, nan lo no haci mi tambaleá.”—Salmo 16:8.

Pasashinan den Bijbel manera esun aki ta mustra e amor profundo cu Jehova Dios tin pa nos como hende. Ta keda bisto cu e tin e deseo sincero, i tambe e abilidad, di percurá consuelo abundante i calma nos dolor den tempu di angustia. “E ta dunando poder na esun cansá; i esun sin energia dinámico e ta haci abundá den pleno potencia.” (Isaías 40:29) Anto, con nos por haña consuelo den Jehova su forsa?

E Efecto Calmante di Jehova Su Cuido

E salmista a skirbi: “Tira bo carga riba Jehova mes, i e mes lo sostené bo. Nunca lo e permití e hustu tambaleá.” (Salmo 55:22) Sí, Jehova Dios tin interes den e famia humano. Apostel Pedro a trankilisá e cristiannan di promé siglo, bisando: “E [Dios] ta interesá den boso.” (1 Pedro 5:7) Jesucristo a enfatisá cuantu Dios ta balorá hende, dor di bisa: “Ta bende cincu mofi pa dos moneda di poco balor, no ta berdad? Tog Dios no ta lubidá ningun di nan. Pero asta e cabeinan di boso cabes ta contá. No tene miedu; boso ta bal mas cu hopi mofi.” (Lucas 12:6, 7) Nos ta asina balioso den Dios su bista cu e ta tuma nota di asta nos detayenan di mas chikitu. E sa cos di nos cu nos mes no sa, pasobra e tin interes profundo den cada un di nos.

Pa Svetlana, e hóben prostituta mencioná den e artículo anterior, tabata un gran consuelo di por a sinti Jehova su interes personal. E tabata cla pa cometé suicidio ora el a drenta den contacto cu Testigonan di Jehova. E ora ei el a aceptá un studio di Bijbel cu a yud’é conocé Jehova como un persona real cu ta interesá den su bienestar. Esei a toca su curason i a motiv’é pa cambia su forma di bida i dedicá su mes na Dios. Ademas, el a duna Svetlana e midí necesario di balor propio cu e tabatin mester pa por sigui padilanti apesar di su problemanan, i haña un punto di bista positivo di bida. Awor e ta bisa: “Mi ta convencí cu Jehova lo no laga mi nunca. Mi a descubrí cu loke ta pará skirbí na 1 Pedro 5:7 ta berdad. E ta bisa: ‘Tira tur boso ansiedad riba [Jehova], pasobra e ta interesá den boso.’”

Speransa Basá Riba Bijbel Ta Consolá

Un manera special cu Dios ta percurá consuelo ta pa medio di su Palabra skirbí cu ta contené un speransa maraviyoso pa futuro. Apostel Pablo a skirbi: “Tur loke a ser skirbí den tempu pasá a ser skirbí pa nos instruccion, pa mediante nos awante i mediante e consuelo for dje Scritura nos por tin speransa.” (Romanonan 15:4) Pablo a aclará e relacion entre speransa berdadero i consuelo dor di skirbi: “Laga . . . Dios nos Tata, kende a stima nos i a duna consuelo eterno i bon speransa pa medio di bondad inmerecí, consolá boso curason i haci boso firme den tur bon obra i palabra.” (2 Tesalonicensenan 2:16, 17) E “bon speransa” aki ta incluí e speransa di bida perfecto, felis i eterno riba un tera paradísico.—2 Pedro 3:13.

E speransa bunita i sigur ei a animá Laimonis, e alcohólico lam mencioná den e artículo anterior. Lesando literatura bíblico di Testigonan di Jehova, el a alegrá ora el a haña sa tocante e mundu nobo bou dje Reino di Dios, caminda su salú por ser restorá completamente. El a lesa den Bijbel e siguiente promesa bunita tocante curacion milagroso: “N’e tempu ei wowo di esnan ciegu lo ser habrí, i orea mes di esnan surdu lo ser habrí. N’e tempu ei esun coho lo subi mescos cu un biná, i lenga di esun muda lo sclama di alegria.” (Isaías 35:5, 6) Laimonis a haci cambionan grandi den su bida pa e por cualificá pa biba den e Paradijs ei. El a laga bebida, i su bisiña i conocínan no a keda sin nota su transformacion. Awor e ta conducí vários studio di Bijbel, i ta compartí cu otronan e consuelo cu speransa basá riba Bijbel ta duna.

E Rol di Oracion

Ora cu nos tin dolor di curason pa un motibu of otro, nos por haña consuelo dor di haci oracion na Jehova. Esei por kita un carga for di riba nos. Den nos súplicanan, nos lo por ser consolá dor di corda cosnan cu Dios su Palabra ta bisa. E salmo mas largu den Bijbel ta manera un oracion bunita. Su compositor a canta: “Mi a corda bo decisionnan hudicial desde tempu indefiní, o Jehova, i mi ta haña consuelo pa mi mes.” (Salmo 119:52) Den situacionnan sumamente difícil, foral ora ta trata di un crísis relacioná cu salú, hopi bes no tin un solo solucion cu por drecha tur cos. Cu nos propio forsa, kisas nos lo no sa precis kico pa haci. Hopi hende a descubrí cu, despues cu nan a haci tur loke ta humanamente posibel, nan a haña hopi consuelo dor di acudí na Dios den oracion, i na algun ocasion, nan a haña solucionnan inesperá.—1 Corintionan 10:13.

Pat, cu nan a core hiba sala di emergencia di hospital, a experenciá e efecto consolador di oracion. Despues cu el a recuperá el a bisa: “Mi a resa na Jehova, i mi a ègt siña cu mi tabatin cu laga mi bida den su man, i confia den dje p’e haci loke sea ta su boluntad. Atrabes di tur esei mi a sinti mi calmu; mi tabata experenciá e pas di Dios mencioná na Filipensenan 4:6 i 7.” E versículonan ei por ta masha consolador pa nos tur! Ei Pablo ta animá nos: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.”

E Spiritu Santu Como Consolador

E anochi promé cu su morto, Jesus a laga su apostelnan comprendé cu pronto lo e bai laga nan. Esei a molestiá nan i haci nan tristu. (Juan 13:33, 36; 14:27-31) Dor cu el a reconocé cu nan mester a sigui haña consuelo, Jesus a primintí nan: “Lo mi pidi e Tata i lo e duna boso un otro yudante [of, consolador] pa keda cu boso pa semper.” (Juan 14:16; nota na pia di página) Aki Jesus tabata referí na e spiritu santu di Dios. Entre otro, e spiritu di Dios a consolá e apostelnan durante nan pruebanan i el a fortalecé nan pa sigui cumpli cu Dios su boluntad.—Echonan 4:31.

Angie, kende su casá a hera di muri despues di un accidente serio, por a enfrentá tur e angustia i dolor di su situacion cu éxito. Kico a yud’é? E ta bisa: “Sin sosten dje spiritu santu di Jehova, nos lo no por a pasa den tur e cosnan ei i keda fuerte. En berdad Jehova su forsa ta bira bisto den nos debilidad, i el a resultá di ta un lugá fortificá den nos tempu di angustia.”

Un Hermandad Consolador

Con cu un hende su situacion den bida por ta, sin importá ki circunstancia doloroso desaroyá, e mester por haña consuelo den e hermandad cu ta existí den Jehova su congregacion. E hermandad aki ta percurá apoyo spiritual i yudansa pa esnan cu ta asociá cuné. Ei bo por haña un grupo di amigu amoroso, animador i interesá, cu ta cla i dispuesto pa yuda i consolá otronan den tempu di angustia.—2 Corintionan 7:5-7.

Miembronan dje congregacion cristian ta ser siñá pa “obra loke ta bon pa cu tur, pero specialmente pa cu esnan relacioná cu [nan] den e fe.” (Galationan 6:10) E educacion bíblico cu nan ta ricibí ta motivá nan pa manifestá amor fraternal i tierno cariño pa otro. (Romanonan 12:10; 1 Pedro 3:8) Rumannan spiritual den congregacion ta ser motivá pa nan ta bondadoso, consolador i tiernamente compasivo.—Efesionan 4:32.

Joe cu Rebecca, cu a perde nan yu trágicamente den un accidente, a experenciá e tipo di apoyo consolador ei cerca miembronan dje congregacion cristian. Nan ta bisa: “Jehova i su congregacion amoroso a yuda nos pasa den nos tempu difícil. Nos a ricibí cientos di karchi, carta i yamada di telefon. Esei ta yuda nos apreciá con precioso nos hermandad ta. Ora nos tabata tur zonzá dor dje tragedia, hopi congregacion local a bin yuda nos cu cuminda i limpiamentu di cas.”

Haña Consuelo!

Ora e bientu duru di adversidad cuminsá supla, i yobida i hagel di angustia cuminsá basha sin misericordia, Dios ta cla pa percurá proteccion consolador. Asina aki un dje salmonan ta describié percurando proteccion consolador: “Cu su punta di alanan lo e blokea acceso na bo, i bou di su alanan lo bo tuma refugio.” (Salmo 91:4) Kisas loke e ta describí aki ta un águila. E ta describí un para cu ta sinti peliger anto ta span su alanan riba su yunan pa protehá nan. Den un sentido asta mayor, Jehova ta bira un berdadero Protector pa tur esnan cu haña refugio den dje.—Salmo 7:1.

Si bo kier siña mas tocante Dios, su personalidad, su propósito i su abilidad pa percurá consuelo, nos ta invitá bo pa studia su Palabra. Testigonan di Jehova lo keda contentu di yuda bo den bo esfuerso. Sí, abo tambe por haña consuelo den Jehova su forsa!

[Plachinan na página 7]

E speransa bíblico pa futuro por duna consuelo