“Haltu Manera un Palu di Seda na Líbanon”

DEN e bunita cerunan di Líbanon ta crece palunan cu ta conocí como Arz Ar-rab, cu ta nificá “Palu di Seda di Señor.” Bijbel ta mencioná e palunan impresionante, semper berde aki, cu na un tempu a cubri e cerunan, un 70 biaha asina, mas cu cualkier otro palu.

E Scritura ta usa e palabranan “selecto” i “mahestuoso” pa describí e imponente palunan di seda, of sedro, di Líbanon. (Cantica di Sálomon 5:15; Ezekiel 17:23) Pa hopi tempu caba, e tamaño dje palu di seda i e duradero cu e palu cu ta saca for di dje ta, a hacié un material hopi gustá pa traha cas, boto i tambe muebel. E palu su fragancia i color cu vlam corá ta masha atractivo, i debí na su contenido haltu di hars e no ta putri i insectonan no ta invadié. E palunan ta extraordinariamente haltu i masivo, i nan por yega un altura di 37 meter i un omtrek di te cu 12 meter, i nan tin raisnan profundo i fuerte. Nada straño cu cultivadónan di selva djawendia a describí nan como “e corona di bunitesa di fauna”!

Den un profecia, e escritor bíblico, Ezekiel, a compará e Mesías cu un stèk di palu di seda, cu Dios mes ta hinca den tera. (Ezekiel 17:22) Eigenlijk, e palabra hebreo pa “palu di seda” ta bini dje palabra original cu ta nificá “ser firme.” Awe siguidónan di Jesucristo, e Mesías, tambe mester ta “firme den e fe, . . . poderoso,” manera un palu di seda cu ta haltu i resistente. (1 Corintionan 16:13) Con nan por logra esaki? Dor di mustra un resistencia fuerte contra influencianan no-cristian i un perseverancia firme den un curso di integridad i debocion na Dios. Bijbel ta yama esnan cu ta haci esei “e hustu . . . [cu] lo crece bira haltu manera un palu di seda na Líbanon.”—Salmo 92:12, The New English Bible.