Laga “e Lei di Bondat Amoroso” Guia Bo Lenga

“El a habri su boka ku sabiduria, i e lei di bondat amoroso ta riba su lenga.”​—PRO. 31:26, NW.

1, 2. (a) Ki kualidat Beibel ta animá sirbidónan di Yehova pa kultivá? (b) Kiko nos lo analisá den e artíkulo akí?

E MENSAHE di peso ku Rei Lemuel di antigwedat a haña serka su mama a menshoná karakterístikanan importante di un bon esposa. Su mama a bis’é, entre otro: “El a habri su boka ku sabiduria, i e lei di bondat amoroso ta riba su lenga.” (Pro. 31:​1, 10, 26, NW) Klaru ku no ta hende muhé sabí so mester papia ku bondat amoroso, sino tambe tur hende ku ke agradá Yehova Dios. (Lesa Proverbionan 19:22.)a Pues, e manera di papia di tur kristian berdadero mester reflehá bondat amoroso.

² Pero kiko ta bondat amoroso? Na ken nos tin ku mustr’é? Kon nos por laga “e lei di bondat amoroso” guia nos lenga? Ki influensia esei lo tin riba e manera ku nos ta papia ku nos famia i rumannan kristian?

Kiko Ta Bondat Amoroso?

3, 4. (a) Kiko ta bondat amoroso? (b) Ki diferensia tin entre bondat amoroso i e tipo di bondat ku hende en general ta demostrá?

³ Manera e ekspreshon mes ta indiká, bondat amoroso tin e karakterístikanan di tantu amor komo bondat. E ta enserá bondat, pasobra e ta pone nos mustra konsiderashon i interes personal den otro hende ku echo i palabra. I siendo ku e otro faktor ta amor, bondat amoroso ta impulsá nos pa mustra interes den e bienestar di otro hende pasobra nos ta stima nan. Ma e ekspreshon den e idioma original di Beibel pa ‘bondat amoroso’ ta bai mas leu ku bondat motivá pa amor. E ta e tipo di bondat ku ta pone nos pega lealmente i di buena gana na un persona te ora nos logra loke nos ta deseá pa e persona ei.

⁴ Tin un diferensia mas entre bondat i bondat amoroso. E tipo di bondat ku hende en general ta demostrá por ser mustrá asta na hende deskonosí. Por ehèmpel, e habitantenan di e isla di Malta a mustra e tipo di bondat òf “kariño” akí na apòstel Pablo i na 275 hende mas ku a noufragá huntu kuné, hende ku nunka nan no a yega di topa. (Echo. 27:​37–28:2) Di otro banda, bondat amoroso tin di haber ku e apego leal ku ta eksistí entre hende ku ya a forma un relashon ku otro.b Esei ta e kualidat ku e keneonan a mustra na “tur e yunan di Israel tempu ku nan a bini for di Egipto.”​—1 Sam. 15:6.

E Importansia di Meditá i Hasi Orashon

 5. Kiko lo yuda nos dominá nos lenga?

⁵ No ta fásil pa demostrá bondat amoroso den nos manera di papia. Papiando di lenga, disipel Santiago a skirbi: “Ningun hende no por mans[é]. E ta un maldat sin sosiegu i yen di venenu mortal.” (Sant. 3:8) Kiko por yuda nos dominá e órgano akí di nos kurpa ku ta asina difísil pa kontrolá? Nos ta haña e klave pa esei den loke Hesus a bisa e lidernan religioso di su tempu. E di: “For di abundansia di kurason boka ta papia.” (Mat. 12:34) P’esei, si nos ke laga bondat amoroso guia nos lenga, nos mester tin e kualidat akí den nos kurason—den nos paden. Laga nos mira kon orashon i meditashon por yuda nos kultivá esaki.

 6. Pakiko nos tin ku meditá ku gratitut riba Yehova su obranan di bondat amoroso?

⁶ Beibel ta bisa ku Yehova Dios ta “abundá den bondat amoroso.” (Eks. 34:6, NW) Un di e salmonan ta bisa: “Bo bondat amoroso, o Yehova, a yena tera.” (Sal. 119:64, NW) E Skritura ta kontené hopi relato ku ta ilustrá kon Yehova a mustra bondat amoroso na su sirbidónan. Segun ku nos tuma tempu pa meditá ku gratitut riba e ‘obranan di Yehova,’ esei por stimulá den nos e deseo pa kultivá e kualidat akí.​—Lesa Salmo 77:12.

7, 8. (a) Kon Yehova a mustra bondat amoroso na Lòt i su famia? (b) Kon David a sintié pa e bondat amoroso ku Yehova a mustra na dje?

⁷ Pensa, por ehèmpel, riba kon Yehova a libra Lòt, subrino di Abraham, i su famia. Ora e momento a yega pa e destruí Sodoma, e stat kaminda nan tabata biba, e angelnan ku a bini serka Lòt a pur’é pa e sali lihé for di e stat huntu ku su famia. Beibel ta bisa ku ora “Lòt a tarda . . . e [angelnan] a gara su man i man di su esposa i man di su dos yu muhénan, pasobra e kompashon di SEÑOR tabata riba dje; i nan a hib’é pafó i a pon’é pafó di e stat.” Ora nos meditá riba e manera ku Yehova a salba nan, esei no ta konmové nos? Esaki no ta pone nos rekonosé ku esei tabata un ekspreshon di su bondat amoroso?​—Gén. 19:​16, 19.

⁸ Pensa tambe riba e ehèmpel di Rei David di Israel di antigwedat, kende a kanta: “[Yehova] ta pordoná tur bo inikidatnan; [e] ta kura tur bo malesanan.” E tabata hopi gradisidu ku Yehova a pordoná su piká ku Bètsabé! P’esei, el a alabá Yehova, bisando: “Mes haltu ku e shelunan ta for di tera, mes grandi su miserikòrdia [òf, “bondat amoroso,” NW] ta pa esnan ku ta tem’é.” (Sal. 103:​3, 11) Ora nos meditá riba e tipo di pasashinan akí den Beibel, nos kurason ta yena ku gratitut pa Yehova su bondat amoroso, i nos ta sinti nos motivá pa alab’é i gradisié. Mas gradisidu nos ta, mas inkliná nos lo ta pa imitá e Dios berdadero.​—Efe. 5:1.

 9. Ki gran motivashon sirbidónan di Yehova tin pa mustra bondat amoroso den nan bida di tur dia?

⁹ E ehèmpelnan di Beibel ta mustra ku Yehova ta ekstendé su bondat amoroso—òf amor leal—na hende ku ya tin un bon relashon kuné. Awor kiko di esnan ku no ta amigu di e Dios bibu? Akaso Yehova ta trata nan malu òf brutu? Ningun ora so! Segun Lukas 6:35 (NW): “E ta bondadoso asta ku hende malagradesí i malbado.” Ademas, “e ta hasi su solo sali riba mal hende i riba bon hende, i ta laga awa yobe riba hende hustu i riba hende inhustu.” (Mat. 5:45) Promé ku nos a siña e bèrdat i asept’é, nos a benefisiá di e bondat di Dios, e tipo di bondat ku e ta mustra na tur ser humano. Pero ora nos a kuminsá sirbié, nos a kuminsá disfrutá di su amor leal, esta, su bondat amoroso infalibel. (Lesa Isaias 54:10.) Nos por ta hopi gradisidu pa esei! I ki un gran motivashon esei ta pa demostrá bondat amoroso den nos kòmbersashonnan i tambe den otro aspektonan di nos bida!

10. Si nos ke pa bondat amoroso bira parti di nos personalidat, pakiko ta importante pa hasi orashon?

¹⁰ Un yudansa balioso den nos esfuersonan pa kultivá bondat amoroso ta e privilegio di hasi orashon. Esei ta pasobra amor i bondat—e dos komponentenan di bondat amoroso—ta parti di e fruta di spiritu santu. (Gal. 5:22) P’esei, si nos someté nos mes na e influensia di e spiritu di Yehova, bondat amoroso lo saka rais den nos kurason. E manera mas direkto pa risibí e spiritu santu di Yehova ta di pidié den orashon. (Luk. 11:13) Ta bon pa tur ora bai nos pidi Dios duna nos su spiritu, i laga nos aseptá su guia. Pues, si nos ke laga e lei di bondat amoroso guia nos lenga, nos mester meditá i hasi orashon.

Kon Parehanan Kasá Por Laga Bondat Amoroso Guia Nan Lenga?

11. (a) Kon nos por sa ku Yehova ta ferwagt di esposonan pa nan trata nan kasá ku bondat amoroso? (b) Kon e lei di bondat amoroso por yuda un esposo dominá su lenga?

¹¹ Apòstel Pablo a animá hòmbernan kasá: “Esposonan, stima boso esposa, meskos ku Kristu tambe a stima e iglesia i a entregá su mes p’e.” (Efe. 5:25) Tambe Pablo a kòrda nan riba loke Yehova a bisa Adam ku Eva. El a skirbi: “Un hòmber lo bandoná su tata i su mama, i lo uni ku su esposa; i nan lo bira ún karni.” (Efe. 5:31) Ta bon kla anto ku Yehova ta ferwagt di esposonan pa nan ta fiel na nan kasá, i pa nan semper trata nan kasá ku bondat amoroso. Un esposo ku ta laga amor leal guia su lenga no ta revelá e faltanan di su kasá ni rebah’é den bista di otro hende. Mas bien, e ta elogi’é i gab’é ku smak. (Pro. 31:28) I te na ora mes surgi un desakuerdo den nan, bondat amoroso ta yuda e esposo dominá su lenga pa e no humiá su kasá.

12. Kon un esposa por mustra ku e ta laga e lei di bondat amoroso guia su lenga?

¹² E lei di bondat amoroso mester guia lenga di e esposa tambe. E no mester laga e spiritu di mundu influensiá su manera di papia. Ya ku e ta “respetá su esposo,” e ta papia bon di dje dilanti di otro hende, lokual ta pone nan respetá e hòmber asta mas ainda. (Efe. 5:33) Komo ku e no ke pa e yunan pèrdè rèspèt pa nan tata, e no ta bai kontra dje òf kuestioná su punto di bista nan dilanti. Mas bien, e ta resolvé e asuntunan ei ora nan dos ta so. Bien bèrdè Beibel ta bisa ku “e muhé sabí ta traha su kas.” (Pro. 14:1) Su kas ta un lugá agradabel i konfortabel pa henter famia.

13. Na unda foral e lei di bondat amoroso mester reina, i kon esei por ta e kaso?

¹³ Parehanan kasá mester sigui papia ku otro ku rèspèt asta den e privasidat di nan kas. Manera Pablo a skirbi, nan tin ku legumai “rabia, furia, malisia, kalumnia i palabra sushi.” Tambe el a bisa ku nan mester “bisti un kurason di kompashon, kariño [òf, “bondat,” NW], humildat, mansedumbre i pasenshi.” I riba tur kos, nan mester “bisti amor, lokual ta e laso perfekto di unidat.” (Kol. 3:​8, 12-14) Ora yu kustumbrá tende nan mayornan papia ku otro ku bondat i amor, no solamente nan lo ta mas felis, sino ku nan lo ta mas inkliná tambe pa imitá e ehèmpel di nan mayornan.

14. Den ki manera kabesnan di kas por usa nan lenga pa sostené òf animá nan famia?

¹⁴ E salmista a skirbi: “Bo mes bondat amoroso, o Yehova, a sigui sostené mi.” (Sal. 94:18, NW) Un manera sobresaliente den kua Yehova ta sostené su pueblo ta pa medio di e guia i animashon ku e ta duna nan. (Sal. 119:105) Kon kabesnan di kas por benefisiá di e ehèmpel di nos Tata selestial i usa nan lenga pa sostené òf animá nan famia? Nan por hasi esei dor di duna e instrukshon i animashon nesesario. E anochi di Adorashon Komo Famia ta un oportunidat ekselente pa huntu nan deskubrí tesoronan spiritual!​—Pro. 24:4.

Mustra Amor Leal na Nos Rumannan Kristian

15. Kon ansiano i otro kristian maduro por usa nan lenga pa protehá e rumannan den kongregashon?

¹⁵ Rei David a pidi den orashon: “Laga bo bondat amoroso i bo apego na bèrdat protehá mi konstantemente.” (Sal. 40:11, NW) Kon ansiano i otro kristian maduro por imitá Yehova den e aspekto akí? Esei ta ora nan ta dirigí atenshon di e rumannan den kongregashon na e siñansanan di Beibel; esaki sigur ta un manera bondadoso di usa nos lenga.​—Pro. 17:17.

16, 17. Den ki otro forma nos por laga bondat amoroso guia loke nos ta papia?

¹⁶ Kiko nos mester hasi si nos mira un kristian kue un rumbo ku ta kontrali na prinsipionan bíbliko? Bondat amoroso lo no motivá nos pa papia kuné pa purba tres’é bèk riba e bon kaminda? (Sal. 141:5) Si nos haña sa ku un ruman a kometé un piká serio, amor leal mester motivá nos pa anim’é pa e “yama e ansianonan di iglesia” pa nan por “hasi orashon p’e, huntando e ku zeta den e nòmber di Señor.” (Sant. 5:14) Si e ruman no aserká e ansianonan, i nos no informá nan di e asuntu, nos lo no ta mustrando amor ni bondat. Por sosodé tambe ku algun di nos rumannan ta sinti nan malu debí na desanimashon, soledat òf falta di balor propio. Òf kisas nan ta haña nan ku vários desepshon den bida. Un bon manera pa demostrá ku e lei di bondat amoroso ta guia nos lenga ta ora nos ta “enkurashá esnan ku ta falta ánimo.”​—1 Tes. 5:14.

¹⁷ Kon nos mester reakshoná ora enemigunan di Dios ta plama rumor tokante e rumannan? En bes di kuminsá duda den e fieldat di nos rumannan, nos mester terminá un kòmbersashon asina, òf, si e persona ku ta lansa e akusashon ta rasonabel, puntr’é si e tin sigur ku su remarkenan tin base. Si enemigunan di e pueblo di Dios ta buska pa sa paradero di nos rumannan kristian pa hasi nan daño, e amor leal ku nos tin pa nos rumannan mester motivá nos pa no duna nan tal informashon.​—Pro. 18:24.

E Hende di “Bondat Amoroso Lo Haña Bida”

18, 19. Pakiko e lei di bondat amoroso no mester apartá for di nos lenga ora nos ta trata ku nos rumannan?

¹⁸ Amor leal mester ta bisto den tur trato ku nos tin ku otro sirbidó di Yehova. Ni den sirkunstansia difísil, e lei di bondat amoroso no mester apartá for di nos lenga. Ora e bondat amoroso di e yunan di Israel a bira “manera serena ku ta disparsé trempan,” Yehova a keda indigná. (Ose. 6:​4, 6) En kambio, Yehova ta keda masha kontentu ora su sirbidónan ta demostrá e kualidat akí tur ora, i e ta bendishoná nan pa esei. Kon asina?

¹⁹ Proverbionan 21:21 (NW) ta bisa: “Esun ku ta sigui tras di hustisia i bondat amoroso lo haña bida, hustisia i gloria.” Un di e bendishonnan ku un persona asina lo risibí ta e posibilidat di biba, no pa un par di aña so, sino pa semper. Yehova lo yud’é haña un ‘gara riba e berdadero bida.’ (1 Tim. 6:​12, 19) P’esei, laga nos hasi tur nos esfuerso pa ‘trata otro ku bondat amoroso.’​—Zak. 7:9, NW.

[Nota]

Bo Por Splika?

• Kiko ta bondat amoroso?

• Kiko lo yuda nos laga e lei di bondat amoroso guia nos lenga?

• Kon parehanan kasá por demostrá amor leal den nan manera di papia ku otro?

• Kiko ta mustra ku e lei di bondat amoroso ta guia nos lenga ora nos ta trata ku nos rumannan?

[Plachi na página 25]

David a alabá e bondat amoroso di Yehova

[Plachi na página 26]

Abo ta tene e anochi di Adorashon Komo Famia riba un base regular?