Studiamentu—Recompensador i Agradabel

“Si bo sigui busk’é . . . lo bo haña e conocimentu mes di Dios.”—PROVERBIONAN 2:4, 5.

 1. Con lesamentu den tempu liber por ta hopi placentero?

HOPI hende ta lesa djis pa smak. Si ta material saludabel, lesamentu por ta un fuente di relahamentu sano. Banda di nan programa di lesamentu di Bijbel regular, algun cristian ta disfrutá mashá di lesa pidanan cu nan mes a scoge for di Salmonan, Proverbionan, e relatonan di Evangelio of otro partinan di Bijbel. E lenguahe i e pensamentunan asina bunita ta duna nan placer profundo. Otronan ta scoge e Anuario di Testigonan di Jehova, e revista Spierta!, relatonan biográfico publicá den e revista aki, of material tocante historia, geografia i naturalesa pa nan lesa den nan tempu liber.

 2, 3. (a) Den ki sentido por compará informacion spiritual profundo cu cuminda sólido? (b) Kico studiamentu ta encerá?

² Lesa pa placer por ta un forma di relahá, pero studia ta rekerí berdadero esfuerso mental. E filósofo ingles Francis Bacon a skirbi: “Algun buki ta pa bo purba, otro ta pa bo guli, i un par ta pa bo kou i digerí.” Sin duda, Bijbel ta cai den e último categoria. Apostel Pablo a skirbi: “Nos tin hopi pa bisa tocante dje [Cristo, prefigurá dor di e Rey-Sacerdote Melkísedec] i e ta difícil pa splica, ya cu boso a bira stompi den boso oido. . . . Cuminda sólido ta pertenecé na hende maduro, na esnan kende mediante uso tin nan facultadnan perceptivo entrená pa distinguí tantu loke ta bon como loke ta malu.” (Hebreonan 5:11, 14) Mester kou cuminda sólido promé cu gulié i digerié. Informacion spiritual profundo tambe ta rekerí pa bo refleccioná riba dje promé cu bo por absorb’é i keda cord’é.

³ Un diccionario ta definí “studiamentu” como “e acto of proceso di usa mente pa adkerí conocimentu of comprendimentu, dor di por ehempel lesa, investigá, etc.” Pues, studia ta encerá mas cu djis lesa den purá i kisas hala strepi bou di palabra segun cu nos ta lesa. Studia ta encerá trabou, esfuerso mental i uso di nos facultadnan perceptivo. Pero e echo cu studiamentu ta rekerí esfuerso no kier men cu e no por ta agradabel.

Haci Studiamentu un Placer

 4. Segun e salmista, con studiamentu di e Palabra di Dios por ta refrescante i recompensador?

⁴ Lesa i studia e Palabra di Dios por ta refrescante i stimulante. E salmista a declará: “E ley di Jehova ta perfecto, e ta restorá alma. E recordatorio di Jehova ta digno di confiansa, e ta haci hende sin experencia sabí. E ordunan di Jehova ta recto, nan ta haci curason alegrá; e mandamentu di Jehova ta limpi, e ta haci wowo briya.” (Salmo 19:7, 8) Jehova su leynan i su recordatorionan ta rebibá nos alma, nan ta mehorá nos salú spiritual, nan ta duna goso di paden i ta haci nos wowo briya cu un bista cla di Jehova su propósitonan maraviyoso. Esta dushi!

 5. Den ki maneranan studiamentu por ta masha agradabel?

⁵ Si nos por mira e bon resultadonan di nos trabou, nos lo tin e tendencia di disfrutá dje trabou. P’esei, pa haci studiamentu mas placentero, nos mester usa unbes e conocimentu nobo cu nos a haña. Santiago a skirbi: “Esun cu ta mira cuidadosamente den e ley perfecto cu ta pertenecé na libertad i cu ta persistí den dje, e hende aki, dor cu el a bira, no un tendedó lubidadó, sino un hacidó dje obra, lo ta felis haciendo esei.” (Santiago 1:25) Aplicacion personal inmediato dje cosnan cu nos a siña ta trece masha satisfaccion. Haci investigacion cu e propósito specífico di contestá un pregunta cu nan a haci nos den nos trabou di predicá i siña hende tambe lo haci nos masha felis.

Desaroyá Cariño pa e Palabra di Dios

 6. Con e escritor di Salmo 119 a expresá su cariño pa e palabra di Jehova?

⁶ Esun cu a componé Salmo 119—kisas Ezekías tempu e tabata un prins hóben ainda—a expresá su cariño pa e palabra di Jehova. Den lenguahe poético el a bisa: “Pa bo statutonan lo mi mustra cariño. Lo mi no lubidá bo palabra. Tambe, pa bo recordatorionan ta loke mi tin cariño . . . Lo mi mustra cariño pa bo mandamentunan cu mi a stima. Laga bo misericordianan bini na mi, pa mi por sigui biba; pasobra pa bo ley mi tin cariño. Mi a anhelá bo salbacion, o Jehova, i pa bo ley mi tin cariño.”—Salmo 119:16, 24, 47, 77, 174.

 7, 8. (a) Segun un obra di referencia, kico kier men “mustra cariño” pa e Palabra di Dios? (b) Con nos por demostrá nos amor pa e Palabra di Dios? (c) Con Esdras a prepará su mes promé cu el a lesa Jehova su Ley?

⁷ Splicando e palabra traducí como “mustra cariño” na Salmo 119, un diccionario di Scritura Hebreo ta declará: “Su uso na v. 16 ta paralelo cu e [verbonan] pa alegramentu . . . i pa meditacion . . . E secuencia ta bai di alegrá, pa meditá, pa deleitá aden . . . Kisas e combinacion aki ta sugerí cu ta dor di refleccioná cu un propósito bo ta bin haña deleite den e palabra di Yahweh. . . . E nificacion dje palabra ta incluí un elemento di emocion.”a

⁸ Sí, nos amor pa e Palabra di Jehova tin cu bini di nos curason, e cuna di emocion. Nos mester tin placer den keda pensa riba cierto pasashinan cu nos a caba di lesa. Nos lo mester meditá riba pensamentunan spiritual profundo, keda profundamente ocupá pensando riba nan. Pa nos logra esaki nos mester refleccioná den silencio i haci oracion. Mescos cu Esdras, nos mester prepará nos curason pa lesa i studia e Palabra di Dios. A ser skirbí tocante dje: “Esdras mes a prepará su curason pa consultá e ley di Jehova i pa cumpli cuné i pa siña regulacion i husticia den Israel.” (Esdras 7:10) Wak e tres propósitonan pakico Esdras a prepará su curason: pa studia, pa haci aplicacion personal i pa siña. Nos mester sigui su ehempel.

Studio Como un Acto di Adoracion

 9, 10. (a) Den ki maneranan e salmista a mustra interes intenso den e Palabra di Jehova? (b) Kico e verbo hebreo traducí como “interesá [bo mes] intensamente” kier men? (c) Pakico ta importante pa nos considerá studiamentu di Bijbel como “un acto di adoracion”?

⁹ E salmista ta declará cu el a mustra interes pa e ley, mandamentu i recordatorionan di Jehova. E ta canta: “Cu bo ordunan lo mi interesá mi mes intensamente, i lo mi paga tinu na bo bereanan. . . . Lo mi hisa mi plant’i mannan na bo mandamentunan cu mi a stima, i lo mi interesá mi mes intensamente den bo regulacionnan. Cuantu mi stima bo ley! Henter dia e ta mi interes intenso. Mas perspicacia cu tur mi maestronan mi a yega di tin, pasobra bo recordatorionan ta di interes intenso pa mi.” (Salmo 119:15, 48, 97, 99) Kico “interes intenso” pa Jehova su Palabra ta encerá?

¹⁰ E verbo hebreo traducí “interesá [bo mes] intensamente” kier men tambe, “meditá, pensa profundamente,” “examiná un asuntu den bo mente.” “Sa us’é den e sentido di refleccioná den silencio riba Dios su obranan . . . i riba e Palabra di Dios.” (Theological Wordbook of the Old Testament) E forma sustantivo “interes intenso” ta referí na “e meditacion dje salmista,” “su studiamentu” di e ley di Dios “motivá pa amor,” como “un acto di adoracion.” Si nos considerá studiamentu di e Palabra di Dios como un acto di adoracion, esei ta aumentá su grado di seriedad. Ya cu ta asina, nos mester studia cu sumo atencion, cu yudansa di oracion. Studiamentu ta parti di nos adoracion, i ta pa mehorá nos adoracion nos ta hacié.

Coba Mas Profundo den e Palabra di Dios

11. Con Jehova ta revelá pensamentunan spiritual profundo na su pueblo?

¹¹ Cu admiracion respetuoso e salmista a sclama: “Ki grandi bo obranan ta, o Jehova! Masha profundo bo pensamentunan ta.” (Salmo 92:5) I apostel Pablo a haci mencion di “e cosnan profundo di Dios,” pensamentunan profundo cu Jehova ta revelá na su pueblo “mediante su spiritu” cu ta obrando riba e clase dje esclabo fiel i discreto. (1 Corintionan 2:10; Mateo 24:45) E clase di esclabo ta percurá alimento spiritual diligentemente pa tur: “lechi” pa esnan nobo pero “cuminda sólido” pa “hende maduro.”—Hebreonan 5:11-14.

12. Duna un ehempel dje “cosnan profundo di Dios” cu e clase di esclabo a yega di splica.

¹² Pa capta tal “cosnan profundo di Dios,” ta necesario pa nos studia huntu cu oracion i refleccioná riba su Palabra. Por ehempel, tin informacion excelente publicá cu ta mustra con ta posibel cu Jehova por ta hustu i misericordioso na mes momento. E echo cu e ta mustra misericordia no ta nificá cu e ta swak su husticia; mas bien, misericordia divino ta un expresion di tantu Dios su husticia como di su amor. Ora Jehova husga un pecadó, promé e ta determiná si ta posibel pa mustra misericordia riba base dje sacrificio di rescate di su Yu. Si e pecadó no ta repentí, of ta rebelde, Dios ta permití husticia sigui su rumbo sin misericordia innecesario. Di tur dos manera e ta fiel na su principionan elevá.b (Romanonan 3:21-26) ‘O e profundidad dje sabiduria di Dios!’—Romanonan 11:33.

13. Con nos mester mustra nos aprecio pa “e gran suma” di berdadnan spiritual revelá te awor?

¹³ Mescos cu e salmista, nos ta keda emocioná di sa cu Jehova ta compartí hopi di su pensamentunan cu nos. David a skirbi: “Ki precioso bo pensamentunan ta pa mi! O Dios, ki hopi e gran suma di nan ta! Si mi purba conta nan, nan ta mas hopi cu asta pipita di santu.” (Salmo 139:17, 18) Apesar cu awe nos conocimentu ta djis un parti masha chikitu di tur e pensamentunan innumerabel cu Jehova lo revelá atrabes di eternidad, nos tin masha aprecio pa e “gran suma” di berdadnan spiritual precioso revelá te awor, i nos ta sigui coba mas i mas profundo den e suma, esta e substancia, dje Palabra di Dios.—Salmo 119:160, nota na pia di página.

Esfuerso i Herment Eficas Ta Necesario

14. Con Proverbionan 2:1-6 ta enfatisá e necesidad pa haci esfuerso ora di studia e Palabra di Dios?

¹⁴ Studio profundo di Bijbel ta rekerí esfuerso. Esaki ta bira masha cla si nos lesa Proverbionan 2:1-6 cuidadosamente. Nota e verbonan activo cu Sálomon e rey sabí a usa pa enfatisá e esfuerso cu ta necesario pa adkerí conocimentu, sabiduria i dicernimentu divino. El a skirbi: “Mi yu, si bo ricibí mi dichonan i atesorá cu bo mi mes mandamentunan, pa asina bo presta atencion cu bo oido na sabiduria, pa bo incliná bo curason na dicernimentu; si, ademas, bo sclama pa comprendimentu mes i duna bo bos pa dicernimentu mes, si bo sigui busk’é manera ta plata, i manera pa tesoro scondí bo sigui en busca di dje, den tal caso lo bo comprendé e temor di Jehova, i lo bo haña e conocimentu mes di Dios. Pasobra Jehova mes ta duna sabiduria; for di su boca tin conocimentu i dicernimentu.” Sí, studio recompensador ta rekerí investigacion, cobamentu, como si fuera buscando un tesoro scondí.

15. Ki ilustracion bíblico ta resaltá e necesidad di tin un bon sistema di studia?

¹⁵ Pa bo studio enrikesé bo spiritualmente, bo mester tin tambe un bon sistema di studia. Sálomon a skirbi: “Si un herment di heru a bira stompi i un hende no a mula su rand, e ora ei lo e usa cu esfuerso su propio energia vital.” (Eclesiástes 10:10) Si un obrero usa un herment di corta cu no ta skerpi, of si e no us’é ábilmente, lo e gasta su energia i su trabou lo ta con-cu-ta. Di igual manera, e beneficionan cu nos ta saca dje tempu cu nos ta usa pa studia lo por varia mashá, dependiendo di e sistema di studia cu nos usa. Nos por haña sugerencianan excelente i práctico pa mehorá nos manera di studia den Studio 7 di e Guia pa Scol di Ministerio Teocrático.c

16. Ki sugerencianan práctico tin pa yuda nos studia profundamente?

¹⁶ Ora un hende di fishi ta prepará pa cuminsá traha, e ta pone tur e hermentnan cu e ta bai tin mester cla. Di igual manera, ora nos cuminsá cu nos periodo di studio, nos mester seleccioná for di nos biblioteca personal e hermentnan cu nos lo bai tin mester pa studia. Cordando cu studio ta trabou i cu e ta rekerí esfuerso mental, ta bon pa nos hacié den un posicion apropiado tambe. Si nos kier keda mentalmente alerto, anto kisas sinta na un mesa of un lesenar lo duna mihó resultado cu si nos drumi riba cama of sinta riba un stul demasiado cómodo. Despues di un ratu di concentracion, kisas lo bo haña cu ta beneficioso pa rek un tiki of sali pafó pa tuma un poco aire frescu.

17, 18. Duna ehempel di con pa usa e hermentnan di studio excelente cu ta disponibel pa bo.

¹⁷ Tambe nos tin hopi herment di studio incomparabel na nos disposicion. Esun principal entre esakinan ta e version di Bijbel Traduccion di Mundu Nobo, disponibel awor completo of en parte na 37 idioma. E edicion standard dje Traduccion di Mundu Nobo ta ekipá cu textonan di referencia i un “Tabèl dje Bukinan di Bijbel” cu e nomber dje escritor, e lugá caminda a skirbié i e periodo di tempu cu e ta cubri. Tambe e tin un index di palabranan bíblico, un apéndix i mapa. Den algun idioma, e Bijbel aki ta ser imprimí den un edicion mas grandi, conocí como Bijbel Cu Referencia. E ta contené tur e rasgonan mencioná aki riba i hopi mas, incluso un cantidad di nota na pia di página cu tambe ta registrá den un index. Bo ta saca pleno probecho di loke ta disponibel den bo idioma pa yuda bo coba mas profundo den e Palabra di Dios?

¹⁸ Otro herment di studio balioso ta e enciclopedia di Bijbel den dos volúmen, Perspicacia pa Comprendé e Scritura. Si bo tin e obra aki den un idioma cu bo por comprendé, bo mester tiné huntu cu bo tur ora cu bo ta studia. Lo e duna bo datonan histórico adicional tocante mayoria tópico bíblico. Un otro herment cu tambe ta útil asina ta e buki “Tur Scritura Ta Inspirá di Dios i Probechoso.” Ora bo cuminsá lesa un buki nobo di Bijbel, ta bon pa examiná e studio corespondiente den e buki “Tur Scritura” pa bo tin e cuadro histórico i geográfico, i un resúmen di e contenido dje buki di Bijbel i su balor pa nos. Algu cu a bini acerca recientemente ademas di tur e hermentnan di studio imprimí ta e Watchtower Library riba computer, disponibel awor den nuebe idioma.

19. (a) Pakico Jehova a duna nos hermentnan excelente pa studia Bijbel? (b) Kico ta necesario pa nos lesa i studia Bijbel apropiadamente?

¹⁹ Jehova a percurá tur e hermentnan aki pa medio di “e esclabo fiel i discreto” pa yuda su sirbidónan riba tera ‘busca i haña e conocimentu mes di Dios.’ (Proverbionan 2:4, 5) Bon custumber di studio lo permití nos conocé Jehova mihó, i disfrutá di un relacion mas estrecho cuné. (Salmo 63:1-8) Sí, studio ta encerá trabou, pero trabou agradabel i recompensador. Sin embargo, e ta tuma tempu, i casi sigur bo ta pensa: ‘Unda mi por saca tempu pa duna e debido atencion na mi lesamentu di Bijbel i mi studio personal?’ Nos lo considerá e aspecto aki den e último artículo dje seri aki.

[Nota]

Preguntanan di Repaso

• Con nos por haci nos studio personal refrescante i recompensador?

• Mescos cu e salmista, con nos por mustra “cariño” i “interes intenso” den e Palabra di Jehova?

• Con Proverbionan 2:1-6 ta mustra cu ta necesario pa haci esfuerso pa studia e Palabra di Dios?

• Ki hermentnan excelente di studio Jehova a percurá?

[Plachi na página 14]

Refleccion den silencio i oracion ta yuda nos desaroyá amor p’e Palabra di Dios

[Plachinan na página 17]

Bo ta saca pleno probecho dje hermentnan di studio disponibel pa coba mas profundo den e Palabra di Dios?