Ora un Miembro di Famia Ta Enfermo

1, 2. Con Satanas a usa tragedia i enfermedad pa trata na kibra Job su integridad?

E HOMBER Job siguramente mester ser contá entre esnan cu a disfrutá di un bida di famia felis. Bijbel ta yam’é “esun mas grandi di tur e orientalnan.” E tabatin shete yu homber i tres yu muher, dies yu na tur. E tabatin tambe e medio pa percurá bon pa su famia. Mas importante, el a hiba e delantera den actividadnan spiritual i tabata preocupá tocante e posicion di su yunan dilanti di Jehova. Tur esaki a resultá den lasonan familiar estrecho i felis.—Job 1:1-5.

² Job su situacion a ser observá dor di Satanas, e enemigu principal di Jehova Dios. Satanas, kende constantemente ta buscando maneranan pa kibra e integridad di Dios su sirbidornan, a atacá Job dor di destruí su famia felis. Despues, el “a dal Job cu un blufein maligno for di su planta di pia te na corona di su cabes.” Pues Satanas a spera cu usando tragedia i enfermedad e ta kibra e integridad di Job.—Job 2:6, 7.

 3. Kico tabata e síntomanan di Job su malesa?

³ Bijbel no ta duna e nomber médico di Job su afliccion. Sin embargo, e ta bisa nos di e síntomanan. Su carni tabata cubrí cu bichi, i su cueru a forma casca i a putri. Job su aliento tabata repugnante, i su curpa tabata hole stinki. El a ser tormentá cu dolor. (Job 7:5; 19:17; 30:17, 30) Den agonia Job a sinta meimei di shinishi i a rasca su mes cu un pida kibrá di un vas di klei. (Job 2:8) En berdad un bista lastimoso!

 4. Kico tur famia ta experenciá de bes en cuando?

⁴ Con abo lo reaccioná si bo ser afligí cu un malesa serio asina? Awe, Satanas no ta dal Dios su sirbidornan cu malesa mescos cu el a haci cu Job. Tog, debí na imperfeccion humano, e presionnan di bida diario, i e medio ambiente deteriorá cu nos ta biba aden, di mes por spera cu de bes en cuando, miembronan di famia lo bira malu. Apesar dje medidanan preventivo cu nos por tuma, nos tur ta sensibel pa malesa, aunke poco lo sufri n’e grado cu Job a sufri. Ora malesa invadí nos famia, berdaderamente esei por ta un desafio. P’esei, laga nos mira con e Bijbel ta yuda nos enfrentá cu éxito e enemigu semper presente aki di humanidad.—Eclesiástes 9:11; 2 Timoteo 3:16.

 5. Con miembronan di famia ta reaccioná generalmente den casonan di enfermedad temporal?

⁵ Interupcion di e rutina normal di bida, sin importá kico ta e causa, semper ta difícil, i esaki ta specialmente e caso si e interupcion ta ser causá dor di enfermedad prolongá. Asta un malesa di corto duracion ta exigí ahuste, concesion i sacrificionan. Miembronan di famia salú kisas mester keda ketu pa permití esun enfermo haña sosiegu. Kisas nan tin cu abstené for di cierto actividad. Tog, den mayoria famia asta mucha chikitu ta sinti compasion pa un ruman of mayor enfermo, aunke de bes en cuando nan mester ser recordá pa tene consideracion. (Colosensenan 3:12) Den caso di un malesa temporal, e famia generalmente ta cla pa haci loke ta necesario. Ademas, cada miembro di famia lo spera di haña consideracion similar si e lo mester bira malu.—Mateo 7:12.

 6. Ki reaccionnan ta ser mirá algun biaha ora un miembro di famia haña un enfermedad serio i duradero?

⁶ Sin embargo, kico si e malesa ta hopi serio i e interupcion ta drástico i prolongá? Por ehempel, kico si un persona den e famia ta keda paralisá dor di un atake celebral, incapacitá dor dje malesa di Alzheimer (verkalking), of debilitá dor di un of otro malesa? Of kico si un miembro dje famia ta ser afligí cu un enfermedad mental, manera eskisofrenia? Generalmente e promé reaccion ta duele—tristesa cu un persona stimá ta sufriendo asina tantu. Sin embargo, despues dje duele por bini otro reaccionnan. Segun cu miembronan di famia ta haña nan mes hopi afectá i nan libertad limitá dor dje enfermedad di un persona, nan por bin sinti rencor. Nan por puntra nan mes: “Pakico e cos aki mester sosodé cu ami?”

 7. Con Job su esposa a reaccioná na su enfermedad, i kico evidentemente el a lubidá?

⁷ Parce cu algu similar a pasa dor dje mente dje esposa di Job. Corda, ya caba e esposa a experenciá e pérdida di su yunan. Segun cu e sucesonan trágico ei tabata desaroyá, sin duda el a sinti su mes progresivamente mas afligí. Finalmente, ora cu el a mira su esposo, cu un tempu tabata activo i cu vigor, afligí cu un malesa repugnante i doloroso, ta parce cu e casá di Job a lubidá cua tabata e factor vital cu tabata mas importante cu tur e tragedianan—e relacion cu e i su esposo tabatin cu Dios. Bijbel ta bisa: “Finalmente [Job] su esposa a bis’é: ‘Ainda bo ta manteniendo firmemente bo integridad? Maldicioná Dios i muri!’”—Job 2:9.

 8. Ora un miembro di famia ta hopi malu, cua texto bíblico lo yuda otro miembronan di famia mantené un punto di bista corecto?

⁸ Hopi hende ta sinti nan frustrá, asta rabiá, ora nan bida cambia radicalmente dor dje enfermedad di un otro hende. Tog, un cristian cu ta razoná riba e situacion finalmente mester realisá cu esaki ta dun’é un oportunidad pa demostrá e sinceridad di su amor. Berdadero amor “tin gran pacenshi i ta bondadoso . . . [i] no ta busca su mes interes . . . E ta soportá tur cos, ta kere tur cos, ta spera tur cos, ta wanta tur cos.” (1 Corintionan 13:4-7) P’esei en bes di permití sintimentunan negativo dominá nos, ta esencial pa nos haci nos esfuerso pa pone nan bou di control.—Proverbionan 3:21.

 9. Ki siguransa por yuda un famia spiritualmente i emocionalmente ora un miembro ta gravemente malu?

⁹ Kico por haci pa salbaguardiá e bienestar spiritual i emocional di un famia ora un di su miembronan ta gravemente malu? Naturalmente, cada malesa ta rekerí su mes cuido i tratamentu particular, i lo no ta apropiado den e publicacion aki pa recomendá ningun procedura médico of di cuido na cas. Sin embargo, den un sentido spiritual, Jehova “ta lantando tur cu ta doblá.” (Salmo 145:14) Rey David a skirbi: “Felis ta cualkier persona cu ta actua cu consideracion pa cu esun di condicion humilde; den e dia di calamidad Jehova lo percurá escape p’e. Jehova mes lo proteh’é i conserb’é bibu. . . . Jehova mes lo sosten’é riba un sofá di enfermedad.” (Salmo 41:1-3) Jehova ta conserbá su sirbidornan bibu spiritualmente, asta ora nan ser poné na prueba emocionalmente fuera di nan mes límitenan. (2 Corintionan 4:7) Hopi miembro di famia cu ta enfrentá enfermedad serio den nan cas a resoná e palabranan dje salmista: “Mi a ser afligí na gran grado. O Jehova, conserbá mi bibu di acuerdo cu bo palabra.”—Salmo 119:107.

10, 11. (a) Kico ta vital pa un famia por lucha exitosamente cu malesa? (b) Con un muher a trata cu e malesa di su esposo?

¹⁰ “E spiritu di un homber por soportá su enfermedad,” un proverbio bíblico ta bisa, “pero en cuanto un spiritu abatí, ken por want’é?” (Proverbionan 18:14) Trauma por afligí e spiritu di un famia i tambe “e spiritu di un homber.” Sin embargo, “un curason calmu ta e bida dje organismo di carni.” (Proverbionan 14:30) Si un famia lo lucha exitosamente cu un malesa serio of no, ta dependé hopi di e actitud, of spiritu, di su miembronan.—Compará cu Proverbionan 17:22.

¹¹ Un muher cristian mester a soportá di mira su esposo bira incapacitá dor di un atake celebral solamente seis aña despues cu nan tabata casá. “Mi esposo su abla a ser afectá malamente, i a bira casi imposibel pa combersá cuné,” el a recordá. “E esfuerso mental pa purba comprendé loke e tabata luchando pa bisa tabata hopi grandi.” Imaginá, tambe, e agonia i frustracion cu e esposo mester a experenciá. Kico e pareha a haci? Aunke nan a biba un distancia basta leu for dje congregacion cristian, e ruman muher a haci su best pa keda spiritualmente fuerte dor di keda al dia cu tur e último informacion organisacional i tambe cu e suministro continuo di alimento spiritual den e revistanan Toren di Vigilancia i Spierta! Esaki a dun’é e fortalesa spiritual pa cuida su kerido esposo te na su morto cuater aña despues.

12. Manera e caso di Job ta indicá, ki contribucion esun enfermo ta haci tin biaha?

¹² Den e caso di Job tabata e, esun afligí, cu a keda fuerte. El a puntra su esposa, “Nos lo aceptá simplemente loke ta bon for di e Dios berdadero i no aceptá tambe loke ta malu?” (Job 2:10) No ta straño cu mas despues e disipel Santiago a cita Job como un ehempel sobresaliente di pacenshi i awante! Na Santiago 5:11 nos ta lesa: “Boso a tende dje awante di Job i a mira e resultado cu Jehova a duna, cu Jehova ta masha tierno den cariño i misericordioso.” Mescos awe, den hopi caso e actitud balente dje miembro di famia enfermo a yuda otronan den e famia pa mantené un actitud mental positivo.

13. Ki comparacion un famia cu ta experenciá malesa serio no mester haci?

¹³ Mayoria hende cu tabatin cu trata cu enfermedad den famia ta bai di acuerdo cu na principio no ta straño pa miembronan di famia hañ’é difícil pa confrontá e realidad. Tambe nan ta señalá cu e manera con un persona ta wak e situacion ta extremadamente importante. Cambio i ahustenan den e rutina di cas kisas ta difícil na principio. Pero si un persona realmente ta haci esfuerso, e por adaptá na un situacion nobo. Haciendo esei, ta importante pa nos no compará nos circunstancia cu esun di otronan cu no tin malesa den famia, pensando cu nan bida ta mas fácil i cu ‘simplemente no ta hustu!’ En realidad, ningun hende sa realmente ki carga otronan tin cu hiba. Tur cristian ta haña consuelo den e palabranan di Jesus: “Bini cerca mi, boso tur cu ta afaná i cargá, i lo mi refrescá boso.”—Mateo 11:28.

14. Con por pone prioridadnan corecto?

¹⁴ Enfrentando malesa serio, lo ta beneficioso pa un famia corda e palabranan inspirá: “Den e multitud di consehero tin logro.” (Proverbionan 15:22) Miembronan di famia por bini huntu i considerá e situacion causá dor dje malesa? Siguramente lo ta apropiado pa haci asina huntu cu oracion i pa acudí n’e Palabra di Dios pa guia. (Salmo 25:4) Kico mester ser tratá den un consideracion asina? Wel, tin decisionnan médico, financiero, i di famia pa ser tumá. Ken lo ta esun principal pa percurá e cuido directo? Con e famia por cooperá pa apoyá e cuido ei? Con e areglonan hací lo afectá cada miembro dje famia? Con lo atendé e necesidad spiritual i otro necesidadnan di esun cu ta percurá e cuido directo?

15. Ki sosten Jehova ta percurá pa famianan cu ta experenciá malesa serio?

¹⁵ Haciendo oracion sinceramente pa Jehova su guia, meditando riba su Palabra, i cu curashi sigui e caminda indicá dor dje Bijbel hopi bes ta resultá den bendicionnan fuera di nos expectativanan. E malesa di un miembro di famia enfermo kisas no semper ta duna periodonan di alivio. Pero dependiendo riba Jehova semper ta hiba n’e mihó resultado den cualkier situacion. (Salmo 55:22) E salmista a skirbi: “Bo propio bondad amoroso, O Jehova, a sigui sostené mi. Ora mi pensamentunan inkietante a yega di ta hopi den mi, bo propio consolacionnan a cuminsá cariciá mi alma.”—Salmo 94:18, 19; mira tambe Salmo 63:6-8.

16, 17. Ki puntonan por trece padilanti ora di considerá cu yunan chikitu e malesa di nan ruman?

¹⁶ Malesa serio por causa problema pa yunan den e famia. Ta importante pa mayornan yuda e yunan comprendé e necesidadnan cu a presentá i kico nan por haci pa yuda. Si esun cu a bira malu ta un mucha, mester yuda su rumannan comprendé cu e atencion extra i cuido cu esun enfermo ta ricibiendo no ta nificá cu e mayornan ta stima e otro yunan ménos. En bes di permití rencor of rivalidad desaroyá, mayornan por yuda e otro yunan forma un laso mas estrecho cu otro i tene berdadero cariño segun cu nan ta cooperá den atendé e situacion causá dor dje malesa.

¹⁷ Muchanan chikitu generalmente lo respondé mas fácil si mayornan apelá na nan sintimentunan mas bien cu na splicacionnan largu of complicá tocante condicionnan médico. Asina por duna nan algun idea di loke e miembro di famia enfermo ta pasando aden. Si e yunan salú ta mira con e enfermedad ta prevení esun enfermo di haci hopi dje cosnan cu nan mes ta haña gewoon, nan probablemente lo tin mas “cariño fraternal” i ser “tiernamente compasivo.”—1 Pedro 3:8.

18. Con por yuda yunan mas grandi comprendé e problemanan causá dor di malesa, i con esaki por ta di beneficio pa nan?

¹⁸ Mester yuda yunan mas grandi realisá cu ta existí un situacion difícil i cu esei ta rekerí sacrificio di parti di tur hende den e famia. Cu gastu di dokter i recibunan médico pa paga, tal bes no ta posibel pa mayornan percurá p’e otro yunan manera nan ta deseá. E yunan lo sinti rencor pa esaki i ta sinti cu nan ta ser privá di algu? Of nan lo comprendé e situacion i lo ta dispuesto pa haci e sacrificionan necesario? Hopi ta dependé riba e manera cu e asuntu ser tratá i e spiritu cu ta ser cultivá den e famia. En berdad, den hopi famia e malesa di un miembro di famia a yuda entrená yunan pa sigui e conseho di Pablo: “[No] haci nada debí na pleitamentu of debí na egotismo, sino considerando cu humildad di mente cu e otronan ta superior na boso, vigilando no cu interes personal boso mes asuntunan so, sino tambe cu interes personal den asuntu dje otronan.”—Filipensenan 2:3, 4.

19, 20. (a) Ki responsabilidadnan cabesnan di famia ta carga ora un miembro di famia ta enfermo? (b) Aunke Bijbel no ta un buki di instruccion médico, den ki manera e ta percurá guia den atendé cu malesa?

¹⁹ Cristiannan balansá no ta oponé tratamentu médico tanten cu e no ta bai contra e ley di Dios. Ora un miembro di nan famia bira malu, nan ta purá pa busca yudansa pa aliviá e sufrimentu dje esun afligí. Tog, por tin opinionnan médico contradictorio cu mester ser evaluá. Ademas, den añanan recien malesanan nobo a bin ta lanta cabes inesperadamente, i pa hopi di esakinan, no tin un método di tratamentu generalmente aceptá. Asta diagnósticonan exacto tin biaha ta difícil pa haña. Kico, anto, un cristian mester haci?

²⁰ Aunke un escritor di Bijbel tabata un dokter i apostel Pablo a ofrecé consehonan médico útil na su amigu Timoteo, e Scritura ta un guia moral i spiritual, no un buki di instruccion médico. (Colosensenan 4:14; 1 Timoteo 5:23) P’esei, den asuntunan di tratamentu médico, cabesnan di famia cristian tin cu tuma nan propio decisionnan balansá. Kisas nan por sinti cu nan mester obtené mas cu un opinion médico. (Compará cu Proverbionan 18:17.) Nan siguramente lo kier e mihó yudansa disponibel pa nan miembro di famia enfermo, i mayoria ta busca esaki entre dokternan comun. Algun ta sinti mas confortabel cu e terapianan di medicina alternativo. Esaki tambe ta un decision personal. Tog, ora di atendé problemanan di salú, cristiannan no ta stop di laga ‘e palabra di Dios ser un lampi pa nan pia i un lus pa nan berea.’ (Salmo 119:105) Nan ta sigui e guianan presentá den e Bijbel. (Isaías 55:8, 9) Pues, nan ta evitá técnicanan di diagnosticá cu tin rasgo di spiritismo, i nan ta evitá tratamentunan cu ta violá principionan bíblico.—Salmo 36:9; Echonan 15:28, 29; Revelacion 21:8.

21, 22. Con un muher asiático a razoná riba un principio bíblico, i con e decision cu el a tuma a resultá di ta bon den su situacion?

²¹ Considerá e caso di un muher hóben asiático. Un poco tempu despues cu el a cuminsá siña tocante Bijbel como resultado di studia cu un Testigo di Jehova, el a duna lus prematuramente na un yu muher cu a pisa solamente 1.470 gram. E muher su curason a kibra ora un dokter a bis’é cu e baby lo ta severamente retardá i nunca lo por cana. El a conseh’é pa entregá e baby na un instituto. Su esposo tabata insigur tocante e asuntu. Na ken e señora por a acudí?

²² E ta bisa: “Mi ta corda cu mi a siña for dje Bijbel cu ‘yunan ta un herencia for di Jehova; e fruta dje barica ta un recompensa.’” (Salmo 127:3) El a dicidí di bai cas cu e “herencia” aki i cuid’é. Cosnan tabata difícil na principio, pero cu e yudansa di amigunan cristian den e congregacion local di Testigonan di Jehova, e muher tabata capas pa manehá e situacion i percurá p’e yu cu e apoyo special necesario. Diesdos aña despues, e yu tabata bai e reunionnan n’e Salon di Reino i tabata disfrutá di e compañerismo dje otro muchanan ei. E mama ta comentá: “Mi ta asina gradicidu cu principionan bíblico a conmové mi pa haci loke ta corecto. Bijbel a yudá mi mantené un concenshi limpi dilanti Jehova Dios i pa no tin e remordimentunan cu lo a afligí mi p’e resto di mi bida.”

23. Ki consuelo Bijbel ta duna pa esnan enfermo i pa esnan cu ta cuida nan?

²³ Malesa lo no ta cu nos pa semper. Profeta Isaías a señalá padilanti n’e tempu ora “ningun habitante lo bisa: ‘Mi ta malu.’” (Isaías 33:24) E promesa ei lo ser cumplí den e mundu nobo acercando rápidamente. Sin embargo, te cu e tempu ei, nos tin cu lucha cu malesa i morto. Felismente, e Palabra di Dios ta duna nos guia i yudansa. E reglanan básico di conducta cu e Bijbel ta percurá ta duradero, i nan ta surpasá e opinionnan semper cambiando di hendenan imperfecto. P’esei, un persona sabí ta bai di acuerdo cu e salmista kende a skirbi: “E ley di Jehova ta perfecto, treciendo e alma bek. E recordatorio di Jehova ta confiabel, haciendo esun sin experencia sabí. . . . E decisionnan hudicial di Jehova ta berdadero; nan a resultá tur hustu. . . . Den wardamentu di nan tin un recompensa grandi.”—Salmo 19:7, 9, 11.