Dios Realmente Ta Conocébo?

“O Jehova, . . . bo a familiarizábo asta cu tur mi caminanan.” —SALMO 139:1, 3.

TIN hende cu realmente ta comprende tur ansiedad, presion, i problema cu ta enfrentábo? Mundialmente tin miyones di hende, hoven i bieu, cu no tin ni famía ni pariente cu ta interesá den loke ta pásanan. Asta den famía, hopi esposa—sí, i esposo també—ta kere cu nan casá berdaderamente no ta comprende e presion cu ta un carga pisá pa nan. Tin bez cu, den frustracion, nan ta keha: “Pero bo no ta comprende!” I basta hopi hoven ta yega ne conclusion cu ningun hende no ta comprendénan tampoco. Sin embargo, dentro di esnan cu ta anhela pa otro hende comprendénan mihor, tin algun hende kende nan bida a alcanza un nificacion ricu. Con esei ta posibel?

² Ta asina pasobra, sea cu otro hende ta comprende completamente nan sintimento of no, nan tin e confianza di cu Dios sí ta comprende loke nan ta experimenta i cu como sirbidor di dje nan no tin cu enfrenta nan problemanan nan so. (Salmo 46:1) Además, e Palabra di Dios hunto cu e yudanza di anciano cristian huicioso ta haci posibel pa nan mira mas ayá cu nan problemanan personal. E Scritura ta yúdanan comprende cu nan fiel sirbishi ta precioso den e bista di Dios i cu tin un futuro sigur pa hende cu ta pone nan speranza den dje i percuracion cu el a haci mediante Jesucristo.—Proverbio 27:11; 2 Corintio 4:17, 18.

³ Tal bez bo ta conoce Salmo 100:2, cu ta bisa: “Sirbi Jehova cu alegría. Drenta dilanti dje cu un sclamacion gozoso.” Cuanto hende realmente ta rindi adoracion na Jehova dje manera ei? Motibo sano pa haci esei ta duná den versículo 3, cu ta hácinos corda: “Sa cu Jehova ta Dios. E ta esun cu a tráhanos, i no nos nos mes. Nos ta su pueblo i carné di su sabana.” Den e texto hebreo, Dios ta ser yamá ’Elo·himʹ, indicando asina e grandeza di su mahestad, dignidad, i excelencia. E ta e único Dios berdadero. (Deuteronomio 4:39; 7:9; Juan 17:3) Sirbidor di dje ta yega di conoce su Divinidad, no simplemente como un echo cu tabata siñá na nan sino como algo cu nan ta experimenta i di locual nan ta duna evidencia cu nan obedencia, confianza, i debocion.—1 Crónica 28:9; Romano 1:20.

⁴ Ya cu Jehova ta e Dios bibo, cu por mira asta nos curazón, nada ta scondí for di su bista. E wel sa loke ta sosode den nos bida. E ta comprende loke ta causa problema cu ta enfrentános i també e disturbio mental i emocional cu por resulta di eseinan. Como Creador, e ta conocénos mihor cu nos ta conoce nos mes. També, e sa con pa yúdanos enfrenta nos situacion i con pa duna alivio permanente. Amorosamente, lo e yúdanos—mescos cu wardador ta braza lamchi—mientras cu nos ta confia den dje cu tur nos curazón. (Proverbio 3:5, 6; Isaías 40:10, 11) Un estudio di Salmo 139 por haci hopi pa fortalece tal confianza.

Esun cu ta mira tur camina di nos

⁵ Salmista David a skirbi cu aprecio profundo: “O Jehova, bo a scudriñami completamente, i bo ta conocémi.” (Salmo 139:1) David tabatin e confianza di cu e conocimento di Jehova di dje no tabata superficial. Dios no a mira David manera hende por a miré, tumando nota solamente di su estatura fisical, su capacidad di papia, of su aptitud den tocamento di arpa. (1 Samuel 16:7, 18) Jehova a “scudriña completamente” te ne parti mas íntimo di David i a haci esei cu interés amoroso den su bienestar spiritual. Si bo ta un sirbidor deboto di Jehova Dios, e ta conocébo mes tanto cu el a conoce David. Esei no ta conmove den bo un sintimento di gratitud i també di asombro?

⁶ Tur actividad di David a sali na cla pa Jehova mira, i David tabata sa esei. E salmista a skirbi: “Bo mes a yega di conoce mi sintamento i mi lantamento. Bo a considera mi pensamento di leu. Bo a midi mi biahamento i mi drumimento gerek, i bo a familiarizábo asta cu tur mi caminanan.” (Salmo 139:2, 3) Aunque Jehova ta den cielo i leu for di tera, esei no a strobé di sa loke David tabata haci of pensa. Dios “a midi,” of a scudriña cuidadosamente tur actividad di David, tanto den dia como den anochi, pe conoce nan naturaleza.

⁷ Ora amor pa Dios i confianza den su poder pa libera hende a conmove David como un hoven pa ofrece boluntariamente pa bringa e gigante filisteo Goliat, Jehova tabata sa esei. (1 Samuel 17:32-37, 45-47) Despues, ora enemistad di hende a causa dolor severo den e curazón di David, ora e presion tabata asina grandi cu el a entrega na yoramento den anochi, e conocimento di cu Jehova a tende su súplica a duné consuelo. (Salmo 6:6, 9; 55:2-5, 22) També, ora su curazón yená cu gratitud a haci David medita riba Jehova durante anochi ora e no por a drumi, Jehova tabata wel sa esei. (Salmo 63:6; compara cu Filipense 4:8, 9.) Un atardi ora David, en bez di medita riba cosnan spiritual, a wak esposa di su beciña baña su curpa, Jehova tabata sa esei també, i el a mira loke a pasa ora David, asta pa un momento breve, a permiti deseo pecaminoso saca Dios for di su pensamento. (2 Samuel 11:2-4) Despues, ora profeta Natán tabata mandá pa confronta David cu e gravedad di su picá, Jehova no solamente a tende e palabra cu a sali for di boca di David sino també a mira e curazón arrepentí for di locual esei a sali. (2 Samuel 12:1-14; Salmo 51:1, 17) Esei mester hácinos pensa seriamente riba unda nos ta bai, loke nos ta haci, i loke ta den nos curazón, no ta berdad?

⁸ Siendo cu Dios sa tur loke nos ta haci, no mester sorprendénos di cu e sa con nos ta usa un miembro di nos curpa tanto chikito como e lenga. Rey David tabata sa esei, i el a skirbi: “Pues no tin un solo palabra di mi lenga, pero, mira! O Jehova, ya bo sa tur cos.” (Salmo 139:4) David tabata wel sa cu hende cu lo ser recibí como bishitante den e tent di Jehova lo ser hende cu no ta calumniá otro i cu ta nenga di usa nan lenga pa plama palabra sabroso di redashi cu por causa reproche pa un amigo íntimo. Hende cu Jehova a favorece ta hende cu a papia e berdad asta den nan curazón. (Salmo 15:1-3; Proverbio 6:16-19) Ningun di nos por domina nos lenga perfectamente, pero David no a conclui den debilidad cu e no por haci nada pa mehora su situacion. El a dedica hopi tempo ne composicion i cantamento di salmo di alabanza pa Jehova. També el a admiti libremente su necesidad di yudanza i a pidié di Dios. (Salmo 19:12-14) Nos uso di nos lenga també tin mester di atencion den oracion?

⁹ Jehova no ta mira nos ni nos situacion solamente desde un perspectiva limitá. E ta mira e cuadro completo, desde tur banda. Usando un stad cercá pa un ehército como un ehempel, David a skirbi: “Di patrás i di dilanti, bo a cercámi.” Den e caso di David, Dios no tabata un enemigo cu a cerqué; mas bien, e tabata un wardador vigilante. David a sigi: “Bo ta pone bo man riba mi,” indicando asina e control i proteccion di Dios cu el a eherce pe beneficio eterno di hende cu ta stimé. David a admiti: “Tal conocimento ta demasiado maraviyoso pa mi. E ta asina halto cu mi no por alcanzé.” (Salmo 139:5, 6) E conocimento di Dios di su sirbidornan ta asina completo, asina cabal, cu nos no por comprendé completamente. Pero, nos sa suficiente pa tene confianza cu Jehova berdaderamente ta comprendénos i cu e yudanza cu e ta percura ta lo mihor.—Isaías 48:17, 18.

Unda cu nos ta, Dios por yúdanos

¹⁰ Considerando e cuido amoroso di Jehova desde un otro punto di bista, e salmista a sigi: “Unda mi por bai for di bo spiritu, i unda mi por hui for di bo cara?” David no a desea di hui for di Jehova; mas bien, e tabata sa cu unda e por tá, Jehova por sa i, mediante spiritu santo, por yudé. David a sigi: “Si mi por subi na cielo, lo bo tei; i si mi ta habri mi cama den Sheol, mira! lo bo tei. Si mi ta tuma hala di habrimento di dia, pa mi biba den lamá di mas remoto, ei, també, bo mes man lo guiámi i bo man drechi lo garámi. I si mi bisa: ‘Siguramente scuridad mes lo cogémi un bez!’ anto anochi lo ser luz rond di mi. Asta scuridad mes lo no ser demasiado scur pa bo, pero anochi mes lo briya mescos cu dia ta haci; e scuridad por wel ta luz.” (Salmo 139:7-12) No tin lugar cu nos por bai, ningun circunstancia cu por enfrentános, cu por pónenos mas ayá cu e bista di Jehova of mas ayá cu e alcance di su spiritu pa yúdanos.

¹¹ Na un tempo profeta Jonás a lubida esei. Jehova a asigné pa predica ne pueblo di Nínive. Pa un motibo el a kere cu e no por a cumpli cu tal asignacion. Kizás pa motibo dje nomber feroz di Asiria, e idea di predica den Nínive a spanta Jonás. P’sei, el a purba di sconde. Den haf di Jope, el a haya transporte riba un barcu cu rumbo Tarsis (generalmente considerá como Spaña), mas cu 3.500 km west di Nínive. No obstante, Jehova a miré barca i bai drumi den bodega dje barcu. També, Dios tabata sa unda Jonás tabata ora nan a tiré den lamá, i Jehova a tende Jonás ora el a priminti den e barica dje piscá grandi di cu lo e cumpli cu su voto. Entregá di nobo riba tera secu, Jonás tabata duná e oportunidad atrobé di cumpli cu su asignacion.—Jonás 1:3, 17; 2:1–3:4.

¹² Cuanto mas mihor por tabata pa Jonás desde e principio depende dje spiritu di Jehova pa yudé cumpli cu su asignacion! Pero, despues Jonás sí a skirbi humildemente su experencia, i su registro a yuda hopi hende desde e tempo ei manifesta e confianza den Jehova cu a parce tanto dificultoso pa Jonás alcanza.—Romano 15:4.

¹³ Experencia di Elías tabata un poco diferente. El a entrega fielmente e decreto di Jehova di cu Israel lo sufri di un secura como castigo pa nan picánan. (1 Rey 16:30-33; 17:1) Cu curashi el a defende e adoracion berdadero den un competencia entre Jehova i Baal na Monte Carmelo. I na continuacion, el a ehecuta 450 profeta di Baal den e rooi di Cisón. Pero ora reina Jezabel den rabia a hura pa mata Elías, el a hui for dje país. (1 Rey 18:18-40; 19:1-4) Jehova tabatei pa yudé den tal tempo di dificultad? Sí, en berdad. Si Elías a subi un montaña halto, como si pa yega cielo; si el a sconde den un cueba hundo den e tera, como si den Sheol; si el a hui na un isla remoto cu un velocidad como si fuera e claridad di habrimento di dia riba tur e tera—e man di Jehova por a ser presente pa fortalecé i guié. (Compara cu Romano 8:38, 39.) I Jehova sí a fortalece Elías no solamente cu cuminda pa su biahe sino també cu demonstracion maraviyoso di Su forza activo. Fortalecí asina, Elías a acepta su sigiente asignacion profético.—1 Rey 19:5-18.

¹⁴ E palabra profético di Salmo 139:7-12 no kier men cu Dios ta omnipresente, cu e ta presente personalmente na tur parti na tur tempo. E Scritura ta mustra claramente lo contrario. (Deuteronomio 26:15; Hebreo 9:24) Pero, sirbidor di dje nunca ta fuera di su alcance. Esei ta cierto di esnan cu tin asignacion teocrático cu ta híbanan na lugar leu. Esei tabata cierto di Testigo di Jehova leal den concentrasicamp nazista durante Gera Mundial II, i tabata cierto di misionero encarcelá nan so den China desde 1958 te 1965. Tabata cierto di nos estimada rumanan homber i muher den un país di Africa Central cu tabatin cu hui bez tras bez for di nan pueblo, i asta for di nan país. Si ta necesario, Jehova por hinca su man den Sheol mes, e graf común, i restora hende fiel mediante un resureccion.—Job 14:13-15; Lucas 20:37, 38.

Esun cu berdaderamente ta comprendénos

¹⁵ Bao di inspiracion, e salmista a hala atencion ne echo cu e conocimento di Dios di nos ta sosode asta promé cu e tempo di nos nacimento, bisando: “Pasobra abo mes a produci mi riñon; bo a wardámi protehá den barica di mi mama. Lo mi alabábo pasobra di manera cu ta inspirá temor mi ta maraviyosamente trahá. Bo obranan ta maraviyoso, manera mi alma sa mashá bon.” (Salmo 139:13, 14) E combinacion di genes di nos tata i mama ne tempo di nos concepcion ta produci e dibuho cu ta influenciá profundamente nos potencial fisical i mental. Dios ta comprende tal potencial. Den e salmo mencion special ta ser hací di riñon, cu e Scritura ta usa hopi bez pa representa aspecto di mas íntimo di nos personalidad.a (Salmo 7:9; Jeremías 17:10) Jehova ta conoce tal detaye di nos desde e tempo promé cu nos a nace. E també ta esun cu a dibuhá e curpa humano cu interés amoroso di manera cu e cel fertilizá den matriz di mama ta produci un enboltura protectivo pa ‘protehá’ e embrión i protehé segun cu e ta desaroyá.

¹⁶ Anto, enfatizando e poder penetrante dje vision di Dios, e salmista a sigi: “Mi wesu no tabata scondí foi bo ora mi tabata trahá den secreto, ora mi tabata hilá den e parti mas abao dje tera [aparentemente un referencia poëtico na matriz di su mama pero cu un referencia ne creacion di Adam for di stof di tera]. Bo wowo asta a mira e embrión di mi, i den bo buki tur parti tabata skirbí, en cuanto e dianan ora [tal miembro di curpa] tabata formá i ainda no tabatin ningun [miembro distinto] entre nan.” (Salmo 139:15, 16) No cabe duda tocante dje—sea cu otro hende ta comprendénos of no, Jehova sí ta comprende. Con esei mester afectános?

¹⁷ E skirbidor di Salmo 139 a reconoce cu obra di Dios, tocante locual e tabata skirbí, ta maraviyoso. Bo ta di acuerdo cuné? Algo cu ta maraviyoso ta haci hende pensa profundamente of ta presta plena atencion. Probablemente bo ta reacciona asina en cuanto obra dje creacion fisical di Jehova. (Compara cu Salmo 8:3, 4, 9.) Bo ta pensa dje manera ei també tocante loke Dios a haci estableciendo e Reino Mesiánico, tocante loke e ta haci percurando pe bon nobo ser predicá den tur e tera, i tocante e manera cu su Palabra ta transforma personalidad humano?—Compara cu 1 Pedro 1:10-12.

¹⁸ Bo a experimenta, també, cu meditacion riba obra di Dios ta inspira temor, cu e ta produci un temor saludable, un temor cu ta fuertemente motivador, un temor cu tin un efecto profundo riba bo personalidad i riba e manera cu bo ta usa bo bida? (Compara cu Salmo 66:5.) Si ta asina, bo curazón lo conmovébo pa alaba Jehova, pa elogié, pa busca oportunidad pa bisa otro hende tocante su propósito i e cosnan maraviyoso cu e tin wardá pa hende cu ta stimé.—Salmo 145:1-3.

[Footnotes]

Cua Comentario Bo Tin?

◻ Con nos conocimento di cu “Jehova ta Dios” ta yúdanos sirbié cu alegría?

◻ Con nos conocimento di cu Dios sa tur loke nos ta haci mester influenciá nos bida?

◻ Pakico e echo di cu Dios nunca ta perde bista di nos ta animador?

◻ Pakico Dios por comprendénos di manera cu ningun hende por?

◻ Pakico un estudio manera esaki ta hácinos deseá di alaba Jehova?

[Study Questions]

 1. Cuanto hende ta kere cu ‘otronan no ta comprende’ ansiedad, problema, i presion cu ta enfrentános?

 2. Kico ta haci posibel pa adorador di Jehova Dios hiba un bida cu ta duna satisfaccion ricu?

3, 4. (a) Con comprendimento dje echo di cu “Jehova ta Dios” i cu el a “tráhanos” por yúdanos haya gozo den su sirbishi? (b) Pakico e ta dúnanos siguranza ora e Bijbel ta yámanos “carné di su sabana”?

 5. Kico kier men pa Jehova ‘scudrinános completamente’, i pakico esei ta deseabel?

 6. Con Salmo 139:2, 3 ta mustra cu Jehova sa tur loke nos ta haci, asta tur nos pensamento?

 7. (a) Usando incidente dje bida di David como un base, comenta riba algun cos den nos bida cu Dios sa di dje. (b) Con reconocimento di esei mester afectános?

 8. (a) Di ki manera ‘palabra di nos lenga’ ta influenciá nos relacion cu Dios? (b) Con nos por vence debilidad den e uso di nos lenga? (Mateo 15:18; Lucas 6:45)

 9. (a) Detaye di Salmo 139:5 ta indica kico en cuanto ki cabalmente Dios ta conoce nos situacion? (b) Esei ta dúnanos confianza di kico?

10. Detaye bibo di Salmo 139:7-12 ta expresa cua berdad animador?

11, 12. (a) Aunque Jonás a perde bista di dje pa un tempo, con e capacidad di Jehova di mira i yuda tabata demonstrá den e caso di Jonás? (b) Di ki manera experencia di Jonás mester beneficiános?

13. (a) Elías a cumpli fielmente cu cua asignacion promé cu el a hui for di reina Jezabel? (b) Con Jehova a yuda Elías asta ora el a purba di bai sconde pafó dje territorio di Israel?

14. (a) Pakico ta incorrecto pa conclui cu Dios ta omnipresente? (b) Den ki circunstancia Jehova a sostene sirbidor di dje amorosamente den tempo moderno? (c) Di ki manera cu aunque nos ta den Sheol mes, Dios lo tei?

15. (a) Desde ki tempo primordial Jehova por observa nos desaroyo? (b) Con e mencion dje salmista di riñon ta indica extento dje conocimento di Dios di nos?

16. (a) Di ki manera Salmo 139:15, 16 ta enfatiza e poder penetrante dje vision di Dios? (b) Pakico esei mester ta un animacion pa nos?

17. Ora nos ta considera cu obra di Dios ta maraviyoso, esei ta conmovénos pa haci kico?

18. Si nos ta haya cu obra di Dios ta inspira temor, con esei lo afectános?