Cultivá un Relacion Intimo cu Jehova

DISIPEL Santiago a skirbi: “Hala cerca Dios, i lo e hala cerca boso.” (Santiago 4:8) I e salmista David a canta: “E intimidad cu Jehova ta pertenecé na esnan cu ta tem’é.” (Salmo 25:14) Ta bisto anto cu Jehova Dios kier pa nos tin un relacion íntimo cuné. Tog, no ta tur hende cu ta adorá Dios i ta obedecé su leynan necesariamente ta sinti cu nan tin un relacion íntimo cuné.

Kico di abo? Bo tin un relacion personal estrecho cu Dios? Sin duda bo kier hala mas cerca dje. Con nos por cultivá un relacion íntimo cu Dios? Kico esaki ta nificá pa nos? Capítulo tres dje buki bíblico di Proverbionan ta duna contesta.

Manifestá Bondad Amoroso i Apego n’e Berdad

Rey Sálomon di Israel di antigwedad ta cuminsá capítulo tres di Proverbionan cu e palabranan: “Mi yu, no lubidá mi ley, i laga bo curason warda mi mandamentunan, pasobra largura di dianan i añanan di bida i pas lo ser agregá na bo.” (Proverbionan 3:1, 2) Ya cu Sálomon a skirbi bou di inspiracion divino, e conseho aki manera di un tata ta bini realmente di Jehova Dios i e ta dirigí na nos. Nos ta ser consehá aki pa cumpli cu Dios su recordatorionan—su ley of siñansanan, i su mandamentunan—registrá den Bijbel. Si nos hacié, “largura di dianan i añanan di bida i pas lo ser agregá” na nos. Sí, asta for di awor nos por disfrutá di un bida pacífico, i nos por evitá di sigui tras di metanan cu por exponé nos na e peliger di morto prematuro cu hopi bes ta bini riba hacidónan di maldad. Ademas, nos por carga e speransa di bida eterno den un mundu nobo pacífico.—Proverbionan 1:24-31; 2:21, 22.

Sálomon a continuá bisando: “Laga bondad amoroso i apego n’e berdad mes no bandoná bo. Mara nan rond di bo garganta. Skirbi nan riba tabla di bo curason, i asina haña fabor i bon perspicacia den bista di Dios i di hende.” —Proverbionan 3:3, 4.

E palabra pa “bondad amoroso” den e idioma original ta ser traducí tambe como “amor leal” i ta encerá fidelidad, solidaridad i lealtad. Nos ta decididu pa keda pegá na Jehova, sin importá kico pasa? Nos ta desplegá bondad amoroso den nos relacion cu otro compañeronan creyente? Nos ta traha pa keda den un relacion íntimo cu nan? Den nos trato diario cu nan, nos ta mantené ‘e ley di bondad amoroso riba nos lenga,’ asta den situacion dificultoso?—Proverbionan 31:26.

Siendo cu Jehova ta abundante den bondad amoroso, e ta “cla pa pordoná.” (Salmo 86:5) Si nos a repentí di nos picánan di pasado i awor ta haci nos pasonan stret, nos por ta sigur cu “temporadanan di refrescamentu” lo bini for di Jehova. (Echonan 3:19) Nos no mester imitá nos Dios dor di pordoná otronan pa nan fayonan?—Mateo 6:14, 15.

Jehova ta “e Dios dje berdad,” i e kier “apego n’e berdad” for di esnan cu ta busca un relacion íntimo cuné. (Salmo 31:5) Realmente nos por spera cu Jehova lo ta nos Amigu si nos ta hiba un bida dòbel—ora nos ta huntu cu rumannan cristian nos ta actua un manera i ora nos ta for di nan bista, nos conducta ta diferente—mescos cu “hende di falsedad” cu ta sconde ki clase di persona nan ta? (Salmo 26:4) Ki un bobedad esei lo ta, ya cu “tur cos ta sunú i abiertamente exponé dilanti wowo” di Jehova!—Hebreonan 4:13.

Nos mester balorá bondad amoroso i apego n’e berdad mescos cu un cadena di balor incalculabel ‘mará rond di nos garganta,’ pasobra nan ta yuda nos ‘haña fabor den bista di Dios i di hende terenal.’ Nos mester desplegá e cualidadnan ei no di pafó so, sino tambe nos mester graba nan ‘riba tabla di nos curason,’ esta, haci nan un parti fundamental di nos personalidad.

Cultivá Confiansa Absoluto den Jehova

E rey sabí ta continuá: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.”—Proverbionan 3:5, 6.

Sigur-sigur Jehova ta merecé nos pleno confiansa. Como e Creador, e ta “vigoroso den poder” i e Fuente di “energia dinámico.” (Isaías 40:26, 29) E por cumpli cu tur loke ta su propósito. Sí, su nomber mes ta nificá literalmente “E Ta Causa pa Yega di Ser.” Esaki ta edificá nos confiansa den su abilidad di cumpli cu tur loke el a primintí! E echo cu ta “imposibel pa Dios gaña,” ta hacié e personificacion mes di berdad. (Hebreonan 6:18) Su cualidad dominante ta amor. (1 Juan 4:8) E ta “hustu den tur su camindanan i leal den tur su obranan.” (Salmo 145:17) Si nos no por confia Dios, ken nos por confia? Claro cu pa cultivá confiansa den dje, nos mester “purba i mira cu Jehova ta bon” dor di aplicá loke nos ta siña for di Bijbel den nos bida i refleccioná riba e bon cu esaki ta producí.—Salmo 34:8.

Con nos por ‘tuma nota di Jehova den tur nos camindanan’? E salmista inspirá ta bisa: “Siguramente lo mi meditá riba tur bo actividad, i den bo tratonan lo mi interesá mi mes intensamente.” (Salmo 77:12) Siendo cu Dios ta invisibel, pa cultivá un relacion íntimo cuné ta vital pa meditá riba su obranan magnífico i riba su trato cu su pueblo.

Oracion tambe ta un manera importante pa tuma nota di Jehova. Rey David a sigui yama na Jehova “henter dia.” (Salmo 86:3) Hopi bes, David a haci oracion henter anochi, manera tempu e tabata fugitivo den desierto. (Salmo 63:6, 7) Apostel Pablo a exhortá: “Sigui haci oracion na tur ocasion den spiritu.” (Efesionan 6:18) Cuantu biaha nos ta haci oracion? Nos ta disfrutá di tin comunicacion personal i sincero cu Dios? Ora nos haña nos den situacionnan difícil, nos ta pidié yudansa? Nos ta busca su guia den oracion promé cu nos tuma decisionnan importante? Nos oracionnan sincero na Jehova ta pon’é stima nos. I nos tin e siguransa cu lo e scucha nos oracion i ‘haci nos camindanan stret.’

Ki un bobedad pa ‘lèn riba nos mes comprendimentu’ of riba esun di hendenan prominente den mundu, ora cu nos por pone tur nos confiansa den Jehova! Sálomon ta bisa: “No bira sabí den bo propio bista.” Al contrario e ta amonestá: “Teme Jehova i apartá bo di loke ta malu. Lagu’e bira un curacion pa bo lombrishi i un refrescamentu pa bo wesunan.” (Proverbionan 3:7, 8) E temor sano di desagradá Dios mester goberná tur nos accion, pensamentu i emocionnan. Tal temor reverencial ta evitá cu nos ta haci loke ta malu, i e ta spiritualmente curativo i refrescante.

Duna Jehova lo Mihó di Bo

Den cua otro manera nos por hala cerca Dios? “Onra Jehova cu bo cosnan balioso i cu e promé frutanan di tur bo productonan,” e rey ta instruí. (Proverbionan 3:9) Onra Jehova ta nificá mustra gran aprecio p’e i hals’é públicamente dor di apoyá i participá den e proclamacion público di su nomber. E cosnan balioso cu cua nos ta onra Jehova ta: nos tempu, nos talentonan, nos forsa i nos posesionnan material. Esakinan mester ta e promé frutanan—lo mihó di nos. E manera cu nos ta usa nos recursonan personal no mester reflehá nos determinacion pa ‘sigui busca promé e reino i Dios su husticia’?—Mateo 6:33.

Onra Jehova cu nos cosnan balioso no ta keda sin ser recompensá. Sálomon ta sigurá nos: “E ora ei bo mangasinanan di suministro lo ta yená cu abundancia; i bo propio bakinan di pers biña lo basha over cu biña nobo.” (Proverbionan 3:10) Aunke prosperidad spiritual riba su mes no ta hiba na prosperidad material, si nos usa nos recursonan generosamente pa onra Jehova, e ta trece hopi bendicion. Pa Jesus, haci e boluntad di Jehova tabata igual cu “cuminda” sostenedor. (Juan 4:34) Mescos tambe, si nos ta participá den e trabou di predicá i haci disipel cu ta glorificá Jehova, esaki ta nutri nos. Si nos perseverá den e trabou ei, nos mangasina spiritual lo ta yená cu abundancia. Nos goso, cu e biña ta simbolisá, lo basha over.

Nos no ta acudí tambe na Jehova i pidié den oracion pa suficiente cuminda material tur dia? (Mateo 6:11) De facto, tur cos cu nos tin, nos a haña for di nos amoroso Tata celestial. Mas nos usa nos cosnan balioso pa alab’é, mas bendicion Jehova lo basha.—1 Corintionan 4:7.

Aceptá Jehova Su Disiplina cu Aprecio

Riparando e importancia di disiplina den logra un relacion íntimo cu Jehova, e rey di Israel ta consehá nos: “E disiplina di Jehova, o mi yu, no rechas’é; i no aborecé su reprendementu, pasobra Jehova ta reprendé esun cu e ta stima, mescos cu un tata ta haci cu un yu den ken e tin placer.”—Proverbionan 3:11, 12.

Pero, kisas no ta fácil pa nos aceptá disiplina. “Ningun disiplina ta parce gososo ora di hañ’é, sino penoso,” apostel Pablo a skirbi, “sin embargo, despues pa esnan cu a ser entrená p’e, e ta duna fruta di pas, esta, husticia.” (Hebreonan 12:11) Reprendementu i disiplina ta partinan necesario dje entrenamentu cu ta hala nos mas cerca di Dios. Coreccion for di Jehova—sea cu nos ta ricibié for di nos mayornan, mediante e congregacion cristian of dor di meditá riba e Scritura durante nos studio personal—ta un expresion di su amor pa nos. Ta sabí pa nos acept’é cu aprecio.

Tene Duru na Sabiduria i Dicernimentu

Siguientemente, Sálomon ta enfatisá e importancia di sabiduria i dicernimentu pa cultivá un relacion estrecho cu Dios. E ta declará: “Felis ta e hende cu a haña sabiduria, i e hende cu ta obtené dicernimentu, pasobra teniend’é como ganashi ta mihó cu teniendo plata como ganashi i teniend’é como producto mas cu oro mes. . . . E ta un palu di bida pa esnan cu gar’é, i esnan cu ta teniend’é firmemente gará mester ser yamá felis.”—Proverbionan 3:13-18.

Pa recordá nos dje despliegue di sabiduria i dicernimentu den Jehova su maraviyoso obranan di creacion, e rey ta declará: “Jehova mes cu sabiduria a funda e tera. El a establecé shelu firmemente cu dicernimentu. . . . Mi yu, no laga nan scapa for di bo bista. Protehá sabiduria práctico i abilidad di pensa, i nan lo resultá di ta bida pa bo alma i encanto pa bo garganta.”—Proverbionan 3:19-22.

Sabiduria i dicernimentu ta cualidadnan divino. Nos no tin cu solamente cultivá nan, sino tambe tene duru na nan dor di nunca neglishá nos studio diligente dje Scritura ni di aplicá loke nos ta siña. “Den e caso ei lo bo cana den siguridad riba bo caminda,” Sálomon ta continuá, “i ni sikiera bo pia lo no dal contra nada.” E ta agregá: “Ki ora cu bo cai drumi lo bo no sinti miedu; i sigur-sigur lo bo cai drumi, i bo soño mester ta placentero.”—Proverbionan 3:23, 24.

Sí, nos por cana den siguridad i drumi cu pas mental miéntras nos ta spera riba e yegada manera di un ladron dje dia di “destruccion repentino” riba e mundu malbado di Satanas. (1 Tesalonicensenan 5:2, 3; 1 Juan 5:19) Asta durante e tribulacion grandi cu lo dal aden pronto, nos por tin e siguransa aki: “Lo bo no tin nodi tin miedu di nada spantoso repentino, ni dje tormenta riba e malbadonan, pasobra e ta bini. Pasobra Jehova mes lo resultá di ta, de echo, bo confiansa, i sigur lo e soru pa bo pia no ser gará.”—Proverbionan 3:25, 26; Mateo 24:21.

Haci Loke Ta Bon

“No retené loke ta bon for di esnan na ken bo ta deb’é,” Sálomon ta amonestá, “ora ta sosodé cu ta den poder di bo man pa hacié.” (Proverbionan 3:27) Haci bon pa otronan ta encerá usa nos recursonan generosamente na nan fabor, i esaki tin vários faceta. Pero yuda otro hende logra un relacion estrecho cu e Dios berdadero no ta e mihó cos cu nos por haci pa nan durante e “tempu di fin” aki? (Daniel 12:4) Esakinan ta anto, e dianan pa mustra celo den e trabou di predicá e Reino i di haci disipel.—Mateo 28:19, 20.

E rey sabí ta mencioná tambe algun práctica pa evitá, bisando: “No bisa bo próhimo: ‘Bai, i bini bek i mañan lo mi duna bo,’ ora bo tin algu huntu cu bo. No trama nada malu contra bo próhimo, ora e ta biba cerca bo cu un sintimentu di siguridad. No busca pleitu cu un hende sin motibu, si e no a haci bo nada malu. No bira envidioso dje homber di violencia, ni scoge ningun di su camindanan.”—Proverbionan 3:28-31.

Resumiendo e motibu di su conseho, Sálomon ta bisa: “Pasobra e persona tramposo ta un cos detestabel pa Jehova, pero Su intimidad ta cu esnan recto. E maldicion di Jehova ta riba cas dje malbado, pero e lugá di habitacion dje hustunan e ta bendicioná. Si ta trata di mofadó, e mes lo haci bofon; pero n’e mansunan lo e mustra fabor. Onor ta loke esnan sabí lo poseé, pero esnan estúpido ta halsa desonor.”—Proverbionan 3:32-35.

Si nos kier disfrutá di un relacion íntimo cu Jehova, nos no mester trama plannan tramposo i perhudicial. (Proverbionan 6:16-19) Ta solamente si nos haci loke ta corecto den bista di Dios, nos lo tin su fabor i bendicion. Kisas nos ta haña tambe un onor cu nos no a pidi p’e, ora otronan mira cu nos ta actua conforme cu sabiduria divino. P’esei, laga nos rechasá e camindanan tramposo dje mundu malbado i violento aki. Sí, laga nos sigui tras di un curso recto i cultivá un relacion íntimo cu Jehova!

[Plachi na página 25]

“Onra Jehova cu bo cosnan balioso”