“Proteha Bo Curason”

JEHOVA a bisa profeta Samuel: “No ta manera hende ta mira ta e manera cu Dios ta mira, pasobra e simpel hende ta mira loke ta parce na bista; pero en cuanto Jehova, e ta mira loke e curason ta.” (1 Samuel 16:7) David a enfocá riba e curason figurativo tambe ora el a canta: “[Jehova] bo a examiná mi curason, bo a haci inspeccion anochi, bo a refiná mi; lo bo descubrí cu mi no a trama nada.”—Salmo 17:3.

Sí, Jehova ta wak den nos curason p’e determiná ken nos ta realmente. (Proverbionan 17:3) Ta cu bon motibu anto, rey Sálomon di antiguo Israel ta consehá: “Mas cu tur cos cu tin cu ser vigilá, protehá bo curason, pasobra for di dje ta e fuentenan di bida.” (Proverbionan 4:23) Con nos por protehá nos curason figurativo? Proverbionan capítulo 4 ta contestá e pregunta ei pa nos.

Scucha n’e Disiplina di un Tata

Capítulo 4 dje buki di Proverbionan ta cuminsá cu e palabranan: “Scucha, o yunan, n’e disiplina di un tata i presta atencion, afin di conocé comprendimentu. Pasobra bon instruccion ta loke lo mi duna boso sigur. No bandoná mi ley.”—Proverbionan 4:1, 2.

E conseho na hóbennan ta pa scucha instruccion sano di nan mayornan deboto na Dios, foral esun di nan tata. E tin e responsabilidad bíblico pa percurá pa tantu e necesidad físico como esun spiritual di su famia. (Deuteronomio 6:6, 7; 1 Timoteo 5:8) Sin tal guia, cuantu mas difícil e ta pa hóbennan alcansá madures! P’esei, un yu no mester aceptá disiplina di su tata cu respet?

Pero, kico si un hóben no tin un tata pa instruyé? Por ehempel, Jason di diesun aña a perde su tata tempu cu e tabatin cuater aña.a Ora un anciano cristian a puntr’é kico ta e cos den su bida cu mas ta molesti’é, Jason a respondé mesora: “Mi ta sinti falta di un tata. Tin biaha e cos ei ta haci mi ègt tristu.” Pero, tin conseho animante pa hóbennan cu no tin guia di mayor. Jason i otronan mescos cuné por busca i haña conseho paternal cerca anciano i otro rumannan maduro den e congregacion cristian.—Santiago 1:27.

Papiando di su mes educacion, Sálomon ta sigui: “Mi a resultá di ta un berdadero yu homber pa mi tata, tierno i e único dilanti mi mama.” (Proverbionan 4:3) Ta evidente cu e rey a recordá su infancia cu cariño. Siendo “un berdadero yu” cu a tuma conseho paternal na pechu, e hóben Sálomon mester tabatin un relacion caluroso i íntimo cu su tata David. Ademas, Sálomon tabata “e único” of esun mashá stimá. Ta ki importante pa un mucha lanta den un hogar unda tin un ambiente caluroso i bon comunicacion cu mayornan!

Gana Sabiduria i Comprendimentu

Recordando su tata su conseho amoroso, Sálomon ta relatá: “E tabata instruí mi i bisa mi: ‘Laga bo curason tene duru na mi palabranan. Warda mi mandamentunan i sigui biba. Gana conocimentu, gana comprendimentu. No lubidá, i no desviá for dje dichonan di mi boca. No bandon’é [esta, sabiduria], i lo e warda bo. Stim’é, i lo e protehá bo. Sabiduria ta e cos principal. Gana sabiduria; i cu tur loke bo ta gana, gana comprendimentu.’”—Proverbionan 4:4-7.

Di con sabiduria ta “e cos principal”? Sabiduria ta nificá pone conocimentu i comprendimentu na práctica den un manera cu e ta duna bon resultado. Conocimentu ta fundamental pa sabiduria. Conocimentu ta ora bo sa of ta familiarisá cu echonan cu bo a adkerí dor di observacion i experencia of dor di lesa i studia. Pero si nos no tin e abilidad pa pone conocimentu bon na práctica, lo e ta di poco balor. Nos no mester ta solamente regular den lesa Bijbel i publicacionnan basá riba Bijbel cu “e esclabo fiel i discreto” ta percurá, sino tambe haci esfuerso pa aplicá loke nos ta siña for di nan.—Mateo 24:45.

Gana comprendimentu tambe ta esencial. Sin dje, nos lo por mira realmente con echonan ta relacioná cu otro i haña un bista completo dje asuntu cu ta bou di consideracion? Si nos no tabatin comprendimentu, con nos lo por a percibí e pakico i motibunan di cosnan i gana comprendimentu penetrante i dicernimentu? Sí, pa nos por conta dos cu dos huntu i yega n’e conclusion corecto, nos mester di comprendimentu.—Daniel 9:22, 23.

Sálomon ta sigui relatá e palabranan di su tata, bisando: “Consider’é [esta, sabiduria] di hopi balor, i lo e halsa bo. Lo e glorificá bo pasobra bo ta bras’é. Lo e duna bo cabes un krans di encanto; un corona di bunitesa lo e otorgá bo.” (Proverbionan 4:8, 9) Sabiduria divino ta protehá e persona cu acept’é. Ademas, e ta dun’é onor i ta hacié bunita. Di tur manera anto, laga nos gana sabiduria.

“Gara Disiplina”

Ripitiendo e conseho di su tata, e rey di Israel ta bisa lo siguiente: “Tende, mi yu, i aceptá mi dichonan. E ora ei e añanan di bida lo bira hopi pa bo. Lo mi instruí bo asta den e caminda di sabiduria; lo mi haci bo stap den e camindanan di rectitud. Ora bo cana, bo pasonan lo no ta pertá; i si bo core, lo bo no trompecá. Gara disiplina; no lagu’e bai. Proteh’é, pasobra e mes ta bo bida.”—Proverbionan 4:10-13.

Manera un berdadero yu pa su tata, Sálomon mester a apreciá e balor di disiplina amoroso cu ta instruí i corigí. Sin disiplina balansá, con nos por verwagt cu nos ta progresá te na madures spiritual of spera cu nos lo mehorá nos calidad di bida? Si nos no siña for di nos fayonan of si nos keda sin corigí ideanan robes, nos progreso spiritual lo ta berdaderamente insignificante. Disiplina razonabel ta hiba na conducta deboto na Dios i asina ta yuda nos “stap den e camindanan di rectitud.”

Tin un otro tipo di disiplina cu tambe ta yuda ‘e añanan di nos bida bira hopi.’ Con asina? Wel, Jesucristo a bisa: “E persona fiel den loke ta mínimo ta fiel tambe den loke ta hopi, i e persona inhustu den lo mínimo ta inhustu tambe den loke ta hopi.” (Lucas 16:10) Si nos ta disipliná nos mes den cosnan chikitu, lo no bira mas fácil pa nos haci mescos ora ta trata di cosnan mas grandi, di cua kisas nos bida mes ta dependé? Por ehempel, si nos entrená nos wowo pa no “sigui wak un muher afin di tene pasion p’e,” lo ta improbabel cu nos lo sucumbí na inmoralidad. (Mateo 5:28) Ta claro cu e principio aki ta aplicá na tantu hende homber como hende muher. Si nos disipliná nos mente pa “trece tur pensamentu bou di control,” tin tiki chens cu nos lo cometé fayonan grave den palabra of accion.—2 Corintionan 10:5.

Ta cierto cu generalmente ta difícil pa aceptá disiplina i kisas por parce cu e ta kita bo libertad. (Hebreonan 12:11) Sin embargo, e rey sabí ta sigurá nos cu si nos gara disiplina, nos caminda lo hiba nos na progreso. Mescos cu entrenamentu apropiado ta permití un coredó bai dilanti na un velocidad optimal sin cai of heridá su mes, asina tene disiplina gará ta permití nos sigui riba e caminda di bida riba un paso stabil sin trompecá. Claro cu nos tin cu tene cuidou cua caminda nos ta scoge.

Evitá “e Caminda dje Malbadonan”

Cu un sentido di urgencia Sálomon ta spierta: “No subi e caminda dje malbadonan, i no cana bai derechitu riba caminda di esnan cu ta malu. Evit’é, no pasa riba dje; desviá for di dje i sigui cana. Pasobra nan no ta drumi a ménos cu nan haci maldad, i nan soño ta ser kitá for di nan a ménos cu nan pone un hende trompecá. Pasobra nan a alimentá nan mes cu pan di maldad, e biña di actonan di violencia ta loke nan ta bebe.”—Proverbionan 4:14-17.

E malbadonan, kende nan caminda Sálomon kier pa nos evitá, ta biba di nan actonan malbado. Haci loke ta malu ta mescos cu come i bebe pa nan. Nan no por drumi a ménos cu nan participá den actonan di violencia. Henter nan personalidad ta corupto! Nos por ègt protehá nos curason miéntras nos ta den nan compania? Ta ki un bobedad pa “cana bai derechitu riba caminda di esnan cu ta malu” dor di exponé nos mes na violencia cu ta sobresalí den hopi diberticion dje mundu djawe! Haci esfuerso pa ta tiernamente compasivo simplemente no ta bai cu wakmentu di yen di esena di maldad na television of cine.

Keda den e Lus

Usando ketu bai e similaridad di un caminda, Sálomon ta declará: “Pero e caminda dje hustunan ta mescos cu e lus briyante cu ta bira mas i mas cla te ora e dia ta firmemente establecí.” (Proverbionan 4:18) Cuminsá un studio di Bijbel i purba aplicá den bo bida loke e ta bisa por ser compará cu cuminsá un biahe den e scuridad di mainta trempan. Segun cu e scuridad di shelu djanochi ta bira blou scur, casi nos no por mira nada. Pero segun cu di dia ta habri tiki-tiki, nos ta cuminsá distinguí poco-poco mas di nos ambiente. Finalmente, solo ta briya skerpi, i nos por mira tur cos en detaye. Sí, e berdad ta bira gradualmente mas cla pa nos, segun cu nos ta persistí den studia e Scritura cu pacenshi i diligentemente. Si nos kier protehá nos curason di razonamentu falsu, ta esencial pa suministrá nos curason cu alimento spiritual.

Nificacion di profecianan bíblico tambe ta ser revelá progresivamente. Segun cu Jehova su spiritu santu ta tira lus riba profecianan i nan ta cumpli den sucesonan di mundu of den bida dje pueblo di Dios, nan ta bira mas cla pa nos. En bes di ser impaciente i recurí na speculacion tocante nan cumplimentu, nos tin cu spera pa ‘e lus bira mas i mas cla.’

Kico di esnan cu rechasá Dios su guia dor di nenga di cana den e lus? Sálomon ta bisa: “E caminda dje malbadonan ta manera scuridad. Nan no a sa riba kico nan ta sigui trompecá.” (Proverbionan 4:19) E malbadonan ta manera un homber cu ta trompecá den scuridad sin sa ta kico a pon’é trompecá. Asta si e malbadonan ta parce di prosperá debí na nan inhusticia, nan aparente éxito ta solamente temporal. Relacioná cu hende asina, e salmista a canta: “Siguramente riba suela cu ta slip ta caminda bo ta pone nan. [Jehova] bo a laga nan cai den ruina.”—Salmo 73:18.

Mantené Vigilancia

E rey di Israel ta sigui bisa: “Mi yu, presta atencion sí na mi palabra. Incliná bo orea na mi dichonan. No laga nan scapa for di bo wowo. Warda nan meimei di bo curason. Pasobra nan ta bida pa hende cu ta haña nan i salú pa tur nan carni. Mas cu tur cos cu tin cu ser vigilá, protehá bo curason, pasobra for di dje ta e fuentenan di bida.”—Proverbionan 4:20-23.

Sálomon su propio ehempel ta duna testimonio di e balor dje conseho pa protehá e curason. Ta cierto cu den su hubentud el “a resultá di ta un berdadero yu” pa su tata i el keda fiel na Jehova pa basta aña como adulto. Tog, Bijbel ta bisa: “I a sosodé cu ora Sálomon a bira bieu, su esposanan [stranhero] mes a pone su curason incliná pa sigui otro diosnan; i su curason no a resultá completo pa cu Jehova su Dios manera e curason di su tata David.” (1 Reynan 11:4) Si no tin vigilancia constant, asta e mihó curason por ser tentá pa haci loke ta malu. (Jeremías 17:9) Nos tin cu tene e recordatorionan dje Palabra di Dios pegá na nos curason, esta, ‘meimei di nos curason.’ Esaki ta incluí e guia percurá den capítulo 4 di Proverbionan.

Examiná e Condicion di Bo Curason

Nos tin éxito den protehá nos curason figurativo? Con nos por sa den ki condicion e persona interno ta? Jesucristo a bisa: “For dje abundancia di curason e boca ta papia.” (Mateo 12:34) Tambe el a declará: “For dje curason ta sali razonamentu malbado, matamentu, adulterio, fornicacion, ladronicia, testimonio falsu, blasfemia.” (Mateo 15:19, 20) Sí, nos palabra i accionnan ta duna di conocé bon cla kico nos ta di curason.

Apropiadamente, Sálomon ta consehá nos: “Kita for di bo mes tur abla trocí; i pone leu di bo e falsedad di lip. En cuanto bo wowonan, stret dilanti nan mester mira, sí, bo propio wowonan radiante mester fiha stret bo dilanti. Parehá e curso di bo pia, i tur bo mes camindanan sea firmemente establecí. No incliná na man drechi ni na man robes. Kita bo pia for di loke ta malu.”—Proverbionan 4:24-27.

En bista di Sálomon su conseho spiertador, nos tin cu examiná nos abla i nos accionnan. Si nos kier protehá nos curason i agradá Dios, nos tin cu evitá abla trocí i falsedad. (Proverbionan 3:32) P’esei, nos tin cu refleccioná cu oracion riba loke nos palabra i echonan ta revelá tocante nos. Anto, laga nos busca Jehova su yudansa pa corigí cualkier debilidad cu nos ripará.—Salmo 139:23, 24.

Riba tur cos, laga ‘nos wowonan wak stret padilanti.’ Laga nos mantené nan fihá riba e meta di rindi sirbishi di henter alma na nos Tata celestial. (Colosensenan 3:23) Segun cu abo personalmente ta sigui tras di un curso recto asina, Jehova duna bo éxito den “tur bo mes camindanan,” i bendicioná bo ricamente pasobra bo ta haci caso dje conseho inspirá pa “protehá bo curason.”

[Nota]

[Komentario na página 22]

Bo ta evitá diberticion den cua violencia ta sobresalí?

[Plachi na página 21]

Beneficiá for di conseho di hende cu experencia

[Plachi na página 23]

Disiplina no ta stroba bo di progresá

[Plachi na página 24]

Persistí den bo studio di Bijbel