LÈS 37
Loke Beibel Ta Bisa Tokante Trabou i Plaka
Bo a yega di preokupá tokante trabou òf plaka? Tin biaha, por ta difísil pa pèrkurá pa nos nesesidatnan i na mes momento sirbi Yehova ku henter nos kurason. Beibel ta duna bon konseho ku por yuda nos.
1. Kiko Beibel ta bisa tokante trabou?
Dios ke pa nos disfrutá di nos trabou. Beibel ta bisa: “Ta bon pa un hende . . . haña goso den e trabounan duru ku e ta hasi.” (Eklesiástes 2:24) Yehova ta traha duru. Ora nos ta imitá Yehova i ta traha duru, nos lo hasié kontentu i nos lo sinti nos bon.
Ta bèrdat ku trabou ta importante, pero nunka nos no mester laga trabou bira mas importante ku nos adorashon na Yehova. (Huan 6:27) Yehova ta primintí ku ora nos pon’é na promé lugá den nos bida, lo e pèrkurá pa nos nesesidatnan físiko.
2. Ki punto di bista balansá nos mester tin di plaka?
Maske Beibel ta bisa ku “plaka ta protekshon,” e ta spièrta nos tambe ku plaka so no por hasi nos felis. (Eklesiástes 7:12) P’esei, Beibel ta animá nos pa no stima plaka pero pa “keda kontentu ku loke [nos] tin.” (Lesa Hebreonan 13:5.) Ora nos ta keda kontentu ku loke nos tin, nos lo no sinti nos frustrá pasobra nos ta pensa ku nos no tin sufisiente. Anto nos lo evitá di kai den debe innesesario. (Proverbionan 22:7) Ademas, nos ta evitá wega di plaka i otro manera fásil di gana plaka ku por ta masha peligroso.
3. Kon nos por ta generoso ku nos plaka?
Yehova ta un Dios generoso i nos ta imit’é ora nos ta “generoso, kla pa kompartí ku otro.” (1 Timoteo 6:18) Nos por ta generoso ku nos plaka ora nos ta sostené e kongregashon finansieramente i yuda otro hende den nesesidat, spesialmente nos rumannan. Yehova ta interesá, no den kuantu nos ta duna, sino e motibu dikon nos ta duna. Ora nos ta generoso i ta duna di nos kurason, nos lo ta felis i nos lo agradá Yehova.—Lesa Echonan 20:35.
KIKO MAS NOS POR SIÑA?
Laga nos wak e benefisionan di tin un punto di bista korekto tokante trabou i di ta kontentu ku loke nos tin.
4. Laga e manera ku bo ta traha onra Yehova
Nos amistat ku Yehova mester influensiá e manera ku nos ta mira trabou. Pasa e VIDIO. Despues, analisá e siguiente preguntanan:
Den e vidio, kiko a impreshoná bo di Jason su aktitut i kondukta na trabou?
Kiko el a hasi pa tene trabou na su debido lugá?
Lesa Kolosensenan 3:23, 24. Despues, analisá e siguiente pregunta:
Dikon e manera ku nos ta mira trabou ta importante?
Trabou ta importante. Pero nunka nos no mester lag’é bira mas importante ku nos adorashon na Yehova
5. Nos lo benefisiá ora nos keda kontentu ku loke nos tin
Hopi hende ta purba di haña mas tantu plaka posibel. Pero Beibel ta konsehá algu otro. Lesa 1 Timoteo 6:6-8. Despues, analisá e siguiente pregunta:
Kiko Beibel ta animá nos pa hasi?
Asta ora nos no tin mashá, nos por ta felis. Pasa e VIDIO. Despues, analisá e siguiente pregunta:
Aunke ku e famianan akí no tin hopi plaka, kiko ta hasi nan kontentu?
Pero kiko si nos tin hopi plaka i tòg nos ke mas? Hesus a usa un ilustrashon pa mustra kon peligroso esei ta. Lesa Lukas 12:15-21. Despues, analisá e siguiente pregunta:
Kiko abo a siña for di Hesus su ilustrashon?—Wak versíkulo 15.
Lesa Proverbionan 10:22 i 1 Timoteo 6:10 i kompará nan ku otro. Despues, analisá e siguiente preguntanan:
Kiko abo ta pensa ta mas importante: tin un amistat ku Yehova òf tin hopi plaka? Dikon bo ta bisa esei?
Ki problema lo bo haña bo kuné si bo ta kore tras di plaka?
6. Yehova lo sòru pa nos tin loke nos mester
Ora trabou i plaka ta preokupá nos, nos por sinti ku ta difísil pa konfia den Yehova. Pasa e VIDIO pa mira kiko nos por hasi ora nos tin e tipo di preokupashonnan ei. Despues, analisá e siguiente preguntanan:
Ki reto e ruman hòmber den e vidio a hañ’é kuné?
Kiko el a hasi pa trata ku su situashon?
Lesa Mateo 6:25-34. Despues, analisá e siguiente pregunta:
Kiko Yehova ta primintí di hasi pa tur hende ku pon’é na promé lugá den nan bida?
LOKE HENDE SA BISA: “Mi mester traha duru pa pèrkurá pa mi famia. P’esei, mi no por bai reunion tur siman.”
Ki teksto ta konvensé abo ku Yehova lo pèrkurá pa nos ora nos pone adorashon na dje na promé lugá den nos bida?
RESÚMEN
Trabou i plaka ta nesesario, pero nan no mester stroba nos di sirbi Yehova.
Repaso
Kiko por yuda bo tin un punto di bista balansá di trabou?
Dikon ta bon pa keda kontentu ku loke bo tin?
Kon bo por mustra ku bo tin konfiansa ku Yehova lo pèrkurá pa su pueblo?
MAS INFORMASHON INTERESANTE
Beibel ta bisa ku ta malu pa un hende tin plaka?
“Plaka Ta Rais di Tur Sorto di Maldat?” (artíkulo riba jw.org)
Haña sa kon nos por usa nos plaka pa hasi Dios kontentu.
“Kiko Beibel Ta Bisa Tokante Dunamentu?” (artíkulo riba jw.org)
Ta malu pa hunga wega di plaka?
“E Punto di Bista Bíbliko—Wega di Plaka” (Spièrta! di mart 2015)
Wak kiko a motivá un hòmber ku tabata hunga wega di plaka i ku tabata hòrta kambia su bida.
“Mi Tabata Stima Kareda di Kabai” (E Toren di Vigilansia di 1 di novèmber 2011, na spañó)