Instruí cu Perspicacia i Poder di Persuadí

“E curason di esun sabí ta pone su boca manifestá perspicacia, i ta agregá e poder di persuadí na su lipnan.”—PROVERBIONAN 16:23.

 1. Di con siña hende e Palabra di Dios ta encerá mas cu djis transmití informacion?

COMO maestronan di e Palabra di Dios, nos meta no ta pa iluminá nos studiantenan su mente so, sino nan curason tambe. (Efesionan 1:18) P’esei, siña ta enbolbé mas cu djis transmití informacion. Proverbionan 16:23 ta bisa: “E curason di esun sabí ta pone su boca manifestá perspicacia, i ta agregá e poder di persuadí na su lipnan.”

 2. (a) Kico kier men persuadí? (b) Con tur cristian por ta maestro persuasivo?

² Apostel Pablo ta unu cu sigur a aplicá e principio aki den su trabou di siña. Na Corinto “e tabata duna discurso den e snoa tur sabat i tabata persuadí hudiu i griego.” (Echonan 18:4) Segun un autoridad riba e tema, e palabra griego traducí como “persuadí” aki, ta nificá “causa un cambio di opinion cu influencia di razonamentu of factornan moral.” Cu argumento convincente, Pablo a logra motivá hende pa cambia asta nan moda di pensa. Su abilidad pa persuadí tabata asina considerabel, cu su enemigunan tabata tene cuidou cuné. (Echonan 19:24-27) Tog, no ta abilidad humano ta loke a haci Pablo su siñamentu eficas. El a bisa e corintionan: “Mi papiamentu i loke mi a predicá no tabata cu palabranan persuasivo di sabiduria, sino cu demostracion di spiritu i poder, pa boso fe por ta, no den sabiduria di hende, sino den e poder di Dios.” (1 Corintionan 2:4, 5) Ya cu tur cristian ta ricibí yudansa di Jehova Dios su spiritu, nan tur lo por bira maestro persuasivo. Pero con? Laga nos examiná algun técnica di siña cu ta eficas.

Sea un Bon Scuchadó

 3. Di con perspicacia ta necesario pa siña hende, i con nos por alcansá curason di un studiante di Bijbel?

³ E promé técnica di siña no tin di haber cu papia, sino cu scucha. Manera Proverbionan 16:23 ta mencioná, pa bo por persuadí bo tin mester di perspicacia. Jesus definitivamente tabatin perspicacia tocante e hendenan cu e tabata siña. Juan 2:25 ta bisa: “E mes tabata sa loke tabatin den hende.” Pero con nos por sa kico tin den curason di esnan cu nos ta siña? Un manera ta dor di ser un bon scuchadó. Santiago 1:19 ta bisa: “Tur hende mester ta lihé pa tende, slow pa papia.” Ta berdad cu no ta tur hende ta cla pa expresá nan pensamentunan. Segun cu nos studiantenan di Bijbel bira mas convencí di nos interes genuino den nan, nan lo por cuminsá expresá nan berdadero sintimentunan mas lihé. Hopi bes, preguntanan bondadoso pero dicernidor por yuda nos alcansá nan curason i ‘saca’ tal expresionnan.—Proverbionan 20:5.

 4. Pakico ancianonan cristian mester ta bon scuchadó?

⁴ Ta particularmente importante pa ancianonan cristian sea bon scuchadó. Ta asina so nan por sa di berdad “con [nan] mester duna un contesta na cada un.” (Colosensenan 4:6) Proverbionan 18:13 ta spierta: “Ora un hende contestá riba un asuntu promé cu e tend’é, esei ta bobedad di su parti i un bergwensa.” Dos ruman homber cu bon intencion a yega di duna un ruman muher conseho riba actitud mundano dor cu el a falta un par di reunion. A duel e ruman muher mashá cu nan no a puntr’é di con e no tabata presente. Ta di un operacion recien e tabata recuperando. Pues, ta masha importante pa nos scucha promé cu nos consehá!

 5. Con ancianonan por trata cu pleitu cu por lanta entre ruman?

⁵ Pa ancianonan, hopi bes siñamentu ta enbolbé duna otro hende conseho. Den esaki tambe ta importante pa nan ta bon scuchadó. Scucha ta specialmente importante ora pleitu lanta entre compañeronan cristian. Ta ora nan caba di scucha so e ancianonan por imitá “e Tata cu ta husga sin distincion.” (1 Pedro 1:17) Den situacionnan asina, hopi bes tin emocionnan fuerte den wega, i ta bon p’e ancianonan tene e conseho di Proverbionan 18:17 na mente: “Esun cu t’ei promé den su caso legal ta hustu; su próhimo ta drenta i ta scudriñ’é completamente.” Un maestro eficas lo scucha tur dos banda. Dor di ofrecé un oracion, lo e yuda establecé un ambiente calmu. (Santiago 3:18) Si emocionnan lanta, lo e por sugerí pa cada ruman dirigí su preocupacionnan directamente na dje, en bes cu nan dos pleita cu otro. Cu preguntanan apropiado e anciano lo por logra clarificá e asuntunan cu ta den consideracion. Den hopi caso ta mal comunicacion, i no mal intencion, ta resultá di ta e causa dje pleitu. Pero si tabatin violacion di principio bíblico, awor cu el a tende tur dos banda, un maestro amoroso por instruí cu perspicacia.

E Balor di Simplesa

 6. Con Pablo i Jesus a pone ehempel den siña na moda simpel?

⁶ Tene cos simpel ta un otro técnica balioso di siña. Ta berdad cu nos kier pa e studiantenan di Bijbel “ser henteramente capas pa capta mentalmente cu tur e santunan loke ta e hanchura i largura i haltura i profundidad” dje berdad. (Efesionan 3:18) Tin aspecto di doctrina bíblico cu ta fasinante i cu mayoria bes ta exigí esfuerso pa por comprendé. (Romanonan 11:33) Pero ora Pablo a predicá na e griegonan, el a enfocá riba e simpel mensahe di ‘Cristo clabá n’e staca.’ (1 Corintionan 2:1, 2) Na moda similar, Jesus tambe a predicá na un manera cla i agradabel. El a usa un vocabulario simpel den su Sermon riba Ceru. Tog e ta contené algun dje berdadnan mas profundo cu a yega di ser expresá.—Mateo, capítulo 5-7.

 7. Con nos por tene cos simpel ora di dirigí studio di Bijbel?

⁷ Nos tambe por tene cos simpel ora di conducí studionan di Bijbel. Con? Dor di enfocá riba e “cosnan mas importante.” (Filipensenan 1:10) Ora nos trata temanan profundo, nos mester purba expresá nos mes den idioma di tur dia. Nos mester enfocá riba e textonan clave na lugá di purba lesa i trata delaster un text di Bijbel mencioná den un publicacion. Pa por haci esaki, nos mester ta bon prepará. Nos mester evitá di forsa e studiante cu muchu detaye, i no permití nos mes desviá for dje tema cu asuntunan ménos importante. Si un studiante tin un pregunta cu no ta directamente relacioná cu e les, nos lo por sugerí na bon manera pa nos trat’é despues dje les.

Uso Eficas di Pregunta

 8. Con Jesus a usa pregunta na moda eficas?

⁸ Otro técnica útil ta di usa pregunta eficas. Jesucristo a usa pregunta extensivamente den su siñamentu. Por ehempel, Jesus a puntra Pedro: “‘Kico bo ta pensa, Simon? Di ken e reynan dje tera ta ricibí contribucion of belasting personal? Di nan yunan of di hende straño?’ Ora el a bisa: ‘Di hende straño,’ Jesus a bis’é: ‘Realmente, anto, e yunan ta liber di belasting.’” (Mateo 17:24-26) Como Yu unigénito di Esun cu a ser adorá n’e tempel, eigenlijk Jesus no tabatin obligacion di paga belasting di tempel. Pero Jesus a transmití e berdad aki dor di usa pregunta eficasmente. Asina, Jesus a yuda Pedro yega na e conclusion corecto a base di informacion cu e tabatin caba.

 9. Con nos lo por usa pregunta durante studio di Bijbel?

⁹ Nos por haci bon uso di pregunta durante studio di Bijbel. Ora un studiante duna un contesta robes, lo bo por tin e tendencia di bis’é esun corecto, pero lo e keda corda e informacion? Hopi bes ta mihó si nos purba guia e studiante na e conclusion corecto pa medio di pregunta. Por ehempel, si e tin dificultad pa capta di con ta bon pa e usa e nomber divino, nos lo por puntra: ‘Bo nomber ta importante pa bo? . . . Di con? . . . Con lo bo sinti si un hende nenga di usa bo nomber? . . . No ta razonabel pa Dios rekerí di nos pa usa su nomber?’

10. Con ancianonan lo por usa pregunta ora nan ta yuda hende cu ta emocionalmente heridá?

¹⁰ Ancianonan tambe por usa pregunta bon ora di pastoreá e tou. Satanas su mundu a maltratá hopi miembro dje congregacion den sentido emocional, i nan lo por sinti cu nan ta sushi i no merecé di ser stimá. Un anciano lo por razoná cu un hende asina dor di bis’é: ‘Maske bo ta bisa cu bo ta sinti bo sushi, con Jehova ta sinti tocante bo? Si nos Tata celestial amoroso a laga su Yu muri i proveé un rescate pa bo, esei no ta mustra cu Dios ta stima bo?’—Juan 3:16.

11. Pakico pregunta retórico ta sirbi, i con por usa nan ora di papia den público?

¹¹ Pregunta retórico ta otro técnica útil di siña. E intencion no ta pa e oyente respondé nan na bos haltu, sino pa nan yud’é razoná riba asuntunan. Hopi bes e profetanan di pasado a haci tipo di preguntanan asina pa pone nan oyentenan pensa profundamente. (Jeremías 18:14, 15) Jesus a usa pregunta retórico na moda eficas. (Mateo 11:7-11) Preguntanan asina ta particularmente eficas ora di papia den público. Na lugá di djis bisa e oyentenan cu pa nan agradá Jehova nan mester sirbié di henter alma, lo por ta mas eficas pa puntra: ‘Si nos no ta ègt sirbi Jehova di henter alma, lo e keda contentu?’

12. Ki balor preguntanan di punto di bista tin?

¹² Pregunta di punto di bista ta útil pa determiná si di berdad un studiante di Bijbel ta kere loke e ta siñando. (Mateo 16:13-16) Un studiante lo por contestá corectamente cu fornicacion ta malu. Pero di con bo no ta pega algun pregunta tras di esei, manera: Con abo mes ta sinti tocante Dios su normanan di moralidad? Bo ta haña cu nan ta limitá bo muchu? Segun bo, ta haci diferencia si bo ta cumpli cu Dios su normanan of no?

Ilustracionnan cu Ta Alcansá Curason

13, 14. (a) Kico kier men ilustrá algu? (b) Pakico bon ilustracion ta eficas?

¹³ Otro manera pa alcansá curason di oyentenan i studiantenan di Bijbel ta dor di usa ilustracion eficas. Literalmente, e expresion griego traducí como “ilustracion” ta nificá “ponementu banda di otro of huntu.” Ora bo ta ilustrá, bo ta splica algu dor di ‘pon’é banda’ di algu similar. Por ehempel, Jesus a puntra: “Cu kico nos por compará e reino di Dios, of cu ki ilustracion nos lo present’é?” Como contesta, Jesus a mencioná e simia di mosterd bon conocí.—Marco 4:30-32.

¹⁴ Dios su profetanan a usa hopi ilustracion poderoso. Ora e asirionan, kendenan a sirbi como Dios su instrumento pa castigá e israelitanan, a cuminsá practicá crueldad desenfrená, Isaías a exponé nan frescura cu e siguiente ilustracion: “E hacha lo halsa su mes contra esun cu ta kap cuné, of e zag lo halsa su mes contra esun cu ta hal’é bai-bin?” (Isaías 10:15) Jesus tambe a haci uso extenso di ilustracion ora el a siña hende. Bijbel ta relatá cu “e no a papia cu nan sin ilustracion.” (Marco 4:34) Bon ilustracion ta eficas dor cu nan ta capta tantu mente como curason. Nan ta permití e oyente asimilá informacion nobo cu facilidad dor di compar’é cu algu cu ya ta conocí p’e.

15, 16. Con ilustracion ta bira mas eficas? Duna ehempel.

¹⁵ Con nos por usa ilustracion cu ta ègt alcansá curason? Na promé lugá, un ilustracion mester cuadra razonablemente cu loke bo ta splicando. Si e comparacion no ta pas muchu bon, e ilustracion lo kita e oyentenan su atencion mas cu e ta iluminá nan. Un orador cu bon intencion a yega di purba transmití e sumision cu e resto ungí tin pa Jesucristo, dor di compará nan cu un cachó fiel. Pero, un comparacion degradante asina ta ègt apropiado? Bijbel ta transmití e mésun idea na un moda muchu mas atractivo i digno. E ta compará Jesus su 144.000 siguidónan ungí cu “un bruid dorná pa su esposo.”—Revelacion 21:2.

¹⁶ Ilustracionnan ta mas eficas ora cu nan tin relacion cu bida di hende. Natan su ilustracion tocante e lamchi matá a yega na curason di Rey David dor cu e tabata stima lamchi; den su hubentud el a sirbi como wardadó di carné. (1 Samuel 16:11-13; 2 Samuel 12:1-7) Si e ilustracion tabata tocante toro, lo e por a resultá muchu ménos eficas. Mescos, ilustracionnan basá riba fenómeno científico of sosodementu histórico poco conocí lo por nificá poco pa nos oyentenan. Jesus a saca su ilustracionnan for di bida diario. El a papia di cosnan comun manera un lampi, para di shelu i leli di veld. (Mateo 5:15, 16; 6:26, 28) Jesus su oyentenan por a identificá nan mes fácil cu cosnan asina.

17. (a) Riba kico nos lo por basa nos ilustracionnan? (b) Con nos lo por adaptá e ilustracionnan den nos publicacionnan na circunstancia di nos studiantenan?

¹⁷ Den nos ministerio nos tin hopi oportunidad pa usa ilustracion simpel pero eficas. Observá bon. (Echonan 17:22, 23) Un ilustracion lo por ta basá riba un oyente su yunan, su cas, su trabou of su hobi. Of nos lo por usa cos cu nos sa di un studiante di Bijbel pa amplia e ilustracionnan cu nos material di studio mes ta proveé caba. Tuma como ehempel e ilustracion cu paragraf 14 di capítulo 8 dje buki Conocimentu cu Ta Hiba na Bida Eterno ta usa. E ta bai tocante un mayor amoroso cu un bisiña ta calumniá. Lo ta bon pa nos pensa un poco riba con nos lo por adaptá e ilustracion ei na e circunstancianan di un studiante di Bijbel cu tambe ta un mayor.

Lesa Texto Abilmente

18. Pakico nos mester haci esfuerso pa lesa cu afluencia?

¹⁸ Pablo a exhortá Timoteo: “Sigui aplicá bo mes na lesamentu público, na exhortacion, na siñamentu.” (1 Timoteo 4:13) Ya cu ta Bijbel ta e base di nos siñamentu, ta beneficioso si nos por les’é cu afluencia. E Levitanan tabatin e privilegio di lesa e Ley di Moises pa Dios su pueblo. Nan tabata pega den nan lesamentu of tabata lesa sin modulacion? No, na Nehemías 8:8 Bijbel ta bisa: “Nan a sigui lesa na bos haltu for dje buki, for dje ley dje Dios berdadero, cu a ser splicá, i tabatin un ponementu di nificacion na dje; i nan a sigui duna comprendimentu na e lesamentu.”

19. Con nos por mehorá e manera cu nos ta lesa Bijbel?

¹⁹ Algun homber cristian cu ta papia cu afluencia tin deficiencia den lesamentu. Con nan por mehorá? Cu práctica. Sí, dor di lesa na bos haltu bes tras bes te ora cu nan alcansá afluencia. Si tin caset di Bijbel disponibel den bo idioma, ta sabí pa presta atencion na e lesadó su énfasis i su modulacion, i nota con e ta pronunciá nomber i palabra straño. Esnan cu tin e Traducción del Nuevo Mundo den nan idioma, por probechá di su yudansanan pa pronunciacion tambe.a Dor di practicá, lo bo por lesa asta nombernan manera Má·her-shal·ál-hash-baz cu basta facilidad.—Isaías 8:1.

20. Con nos por ‘presta atencion na nos siñamentu’?

²⁰ Esta un privilegio nos tin como Jehova su pueblo, pa ser usá como maestro! Pues, laga cada un di nos tuma e responsabilidad ei na serio. Laga nos ‘presta atencion constante na nos mes i na nos siñamentu.’ (1 Timoteo 4:16) Dor di ser bon scuchadó, tene cos simpel, haci pregunta dicernidor, usa ilustracion eficas i lesa texto ábilmente, nos por ta maestronan excelente. Laga nos tur beneficiá dje entrenamentu cu Jehova ta percurá pa medio di su organisacion, pasobra e por yuda nos tin “e lenga di esnan siñá.” (Isaías 50:4) Dor di beneficiá plenamente di tur e instrumentonan cu nos a ricibí pa nos ministerio, manera foyeto, caset i video, nos por siña instruí cu perspicacia i poder di persuadí.

[Nota]

Bo Ta Corda?

◻ Con ser un bon scuchadó por yuda nos den nos siñamentu?

◻ Con nos por imitá Pablo i Jesus den siña na moda simpel?

◻ Ki tipo di pregunta nos por usa ora nos ta siña hende?

◻ Ki tipo di ilustracion ta mas eficas?

◻ Con nos por mehorá nos abilidad di lesa den público?

[Plachi na página 16]

Un bon maestro ta scucha p’e haña perspicacia

[Plachi na página 18]

Jesus a saca su ilustracionnan for di cos di bida diaro