Famianan, Alabá Dios Como Parti di Su Congregacion

“Entre e multitudnan congregá lo mi bendicioná Jehova.”—SALMO 26:12.

 1. Ademas di studio i oracion na cas, kico ta un parti importante di adoracion berdadero?

ADORACION di Jehova ta encerá no solamente oracion i studio di Bijbel na cas, sino tambe actividad como parti dje congregacion di Dios. Dios a manda Israel di antigwedad pa “congregá e pueblo, e hombernan i e muhernan i e chikitunan,” pa siña nan e ley di Dios pa asina nan cana den su caminda. (Deuteronomio 31:12; Hosué 8:35) A animá tantu esnan mas grandi como ‘hóben i bírgennan’ pa participá den alabá e nomber di Jehova. (Salmo 148:12, 13) Areglonan similar ta aplicá den e congregacion cristian. Den Salonnan di Reino rond e tera, homber, muher i mucha ta participá libremente den sesionnan cu ta enbolbé e auditorio, i hopi ta haña masha placer di por participá den dje.—Hebreonan 10:23-25.

 2. (a) Pakico preparacion ta un factor clave den yuda hóbennan disfrutá dje reunionnan? (b) Ken su ehempel ta importante?

² Ta cierto cu pa yuda hóbennan participá den un rutina saludabel di actividad di congregacion por ta un desafio. Si algun yu cu ta asistí cu nan mayornan aparentemente no ta gusta e reunionnan, kico lo por ta e problema? Di mes mayoria mucha no por concentrá muchu largu riba e mésun cos i ta fada masha lihé. Preparacion por yuda combatí e problema aki. Sin preparacion, yunan no por participá den reunion na un manera significativo. (Proverbionan 15:23) Sin preparacion, lo ta difícil pa nan haci progreso spiritual cu ta duna satisfaccion. (1 Timoteo 4:12, 15) Kico por haci? Di promé, mayornan tin cu puntra si nan mes ta prepará p’e reunionnan. Nan ehempel tin un influencia poderoso. (Lucas 6:40) Planificacion cuidadoso dje studio di famia tambe por ta un factor importante.

Edificá e Curason

 3. Durante e studio di famia, pakico mester haci esfuerso special pa edificá curason, i kico esaki ta rekerí?

³ E studio di famia no mester ta un tempu djis pa yena cabes cu conocimentu, sino tambe pa edificá curason. Esaki ta rekerí pa ta na haltura dje problemanan cu ta confrontá miembronan di famia i tambe un interes amoroso den cada un. Jehova ta “un examinador di curason.”—1 Crónicanan 29:17.

 4. (a) Kico kier men cu un persona “falta curason”? (b) Kico “adkerí curason” ta encerá?

⁴ Kico Jehova ta haña ora e examiná curason di nos yunan? Mayoria di nan lo bisa cu nan ta stima Dios, i esei ta algu encomendabel. Tog, un persona cu ta yong of cu a caba di cuminsá siña tocante Jehova tin poco experencia den Jehova su camindanan. Dor cu e no tin muchu experencia, lo e por “falta curason,” manera Bijbel ta expres’é. Tal bes no ta tur su motibunan ta malu, pero tempu ta necesario pa trece curason di un persona den un condicion cu lo ègt agradá Dios. Esaki ta encerá pone su manera di pensa, su deseo, cariño, emocion i metanan den bida na armonia cu loke Dios ta aprobá, te n’e grado cu esaki ta posibel pa hende imperfecto. Ora un hende moldea e persona interno den un manera cu Dios ta aprobá, e ta “adkerí curason.”—Proverbionan 9:4; 19:8.

 5, 6. Con mayornan por yuda nan yunan “adkerí curason”?

⁵ Mayornan por yuda nan yunan “adkerí curason”? Claro cu ningun hende por hinca un bon condicion di curason den un otro persona. Cada un di nos ta dotá cu boluntad liber, i hopi ta dependé di loke nos ta permití nos mes pensa ariba. Sin embargo, cu dicernimentu, hopi bes mayornan por saca afó kico ta biba den nan yu, haña sa kico tin den su curason i unda e tin mester di yudansa. Haci preguntanan manera ‘Kico bo ta pensa di esaki?’ i ‘Kico realmente lo bo tin gana di haci?’ Anto, scucha cu pacenshi. No bula reaccioná. (Proverbionan 20:5) Si bo kier alcansá e curason ta importante pa bo tin un ambiente di bondad, comprension i amor.

⁶ Pa fortificá inclinacionnan saludabel, trata cada aspecto dje fruta di spiritu cu frecuencia, i traha huntu como famia pa cultivá nan. (Galationan 5:22, 23) Desaroyá amor pa Jehova i pa Jesucristo, no djis dor di bisa cu nos mester stima nan, sino dor di considerá e motibunan pakico nos ta stima nan i con nos por expresá e amor ei. (2 Corintionan 5:14, 15) Fortalecé e deseo di haci loke ta corecto dor di razoná riba e beneficionan cu esei lo trece cuné. Cultivá e deseo pa rechasá mal pensamentu, mal manera di papia i conducta robes dor di considerá e mal efectonan di cosnan asina. (Amos 5:15; 3 Juan 11) Mustra ki efecto pensamentu, manera di papia i conducta—sea bon of malu—por tin riba un persona su relacion cu Jehova.

 7. Kico mayornan por haci pa yuda yunan trata cu problema i tuma decisionnan den un manera cu lo mantené nan den un bon relacion cu Jehova?

⁷ Ora un yu tin un problema of tin cu tuma un decision importante, nos lo por puntr’é: ‘Con bo ta kere Jehova ta mira esaki? Kico bo sa tocante Jehova cu ta pone bo bisa esei? Bo a papia cuné den oracion tocante dje?’ Cuminsá mas pronto posibel, yuda bo yunan desaroyá un patronchi di bida caminda semper nan ta haci un esfuerso sincero pa haci sigur kico ta e boluntad di Dios, anto cumpli cuné. Segun cu nan ta haña un relacion personal i íntimo cu Jehova, nan lo haña placer den cana den su camindanan. (Salmo 119:34, 35) Esaki lo crea den nan aprecio p’e privilegio di asociá cu e congregacion dje Dios berdadero.

Prepará pa Reunionnan di Congregacion

 8. (a) Kico lo por yuda nos incluí den nos studio di famia tur e cosnan cu mester di atencion? (b) Con importante e studio aki ta?

⁸ Tin hopi asuntu cu mester di atencion durante periodonan di studio di famia. Con bo por hinca nan tur aden? Ta imposibel pa haci tur cos n’e mésun tempu. Pero kisas bo ta haña ta probechoso pa traha un lista. (Proverbionan 21:5) Repas’é de bes en cuando i wak kico mester di atencion special. Mustra interes intenso den e progreso di cada miembro di famia. E areglo aki pa studio di famia ta un parti importante di educacion cristian. E ta ekipá nos pa bida awor i ta prepará nos p’e bida eterno cu ta na caminda.—1 Timoteo 4:8.

 9. Ki metanan relacioná cu preparacion pa reunion nos lo por traha ariba progresivamente durante nos studionan di famia?

⁹ Bo studio di famia ta incluí prepará pa reunionnan di congregacion? Tin vários proyecto cu lo bo por traha progresivamente ariba segun cu boso ta studia huntu. Algun di esakinan lo por rekerí simannan, lunanan of asta añanan largu pa logra. Pensa riba e metanan aki: (1) cada miembro di famia ta cla pa comentá na reunionnan di congregacion, (2) cada un ta traha riba duna comentario cu su mes palabra, (3) incluí textonan den comentario i (4) analisá e material cu e meta pa haci aplicacion personal. Tur esaki por yuda un individuo haci e berdad di su mes.—Salmo 25:4, 5.

10. (a) Con nos lo por duna atencion na cada un di nos reunionnan di congregacion? (b) Pakico esaki ta bale la pena?

¹⁰ Asta si bo studio di famia por lo general ta basá riba e les di Toren di Vigilancia p’e siman, no pasa por haltu dje importancia di prepará individualmente of como famia p’e Studio di Buki di Congregacion, e Scol di Ministerio Teocrático i e Reunion di Sirbishi. Esakinan tambe ta partinan importante dje programa pa siña nos cana den Jehova su caminda. Kisas cada tantu tempu boso ta haña chens di prepará e reunionnan ei como famia. Dor di traha huntu, esei lo mehorá abilidadnan di studio. Como resultado, boso por saca mas beneficio for dje reunionnan mes. Entre otro cosnan, papia tocante e beneficionan di preparacion regular pa reunion i e importancia di tin un orario fiho pa haci esei.—Efesionan 5:15-17.

11, 12. Con preparacion p’e canticanan di congregacion lo beneficiá nos, i con nos lo por haci esaki?

¹¹ N’e Congresonan “Dios Su Caminda di Bida,” nos a ser animá pa prepará pa un otro rasgo di nos reunionnan—e cantamentu. Bo a traha riba dje? Haciendo esei por yuda graba e berdadnan di Bijbel den nos mente i curason i na mésun tempu laga nos disfrutá mas ainda di reunionnan di congregacion.

¹² Preparacion cu ta incluí lesa i papia tocante e nificacion dje palabranan den algun dje canticanan programá, por yuda nos canta di curason. Den Israel di antigwedad, nan tabata haci hopi uso di instrumentonan musical den adoracion. (1 Crónicanan 25:1; Salmo 28:7) Un hende den bo famia ta toca un instrumento musical? Pakico no usa e instrumento ei pa practicá un dje canticanan di Reino p’e siman, i despues canta e cantica como famia. Un otro posibilidad ta pa usa un grabacion dje canticanan. Den algun pais nos rumannan ta canta masha bunita sin acompañamentu musical. Ora nan ta cana riba caya of ta traha den cunucu, hopi biaha nan ta canta cu smak e canticanan cu ta programá p’e reunionnan di congregacion e siman ei.—Efesionan 5:19.

Prepará Como Famia pa Sirbishi di Veld

13, 14. Pakico consideracionnan di famia, cu ta prepará nos curason p’e ministerio di veld, ta balioso?

¹³ Duna testimonio na otro hende tocante Jehova i su propósito ta un parti importante di nos bida. (Isaías 43:10-12; Mateo 24:14) Sea nos ta hóben of bieu, ora nos ta bon prepará, nos ta disfrutá mas dje actividad aki i nos ta logra mihó resultado. Con nos por haci esaki den famia?

¹⁴ Mescos cu tur cos cu ta enbolbé nos adoracion, ta importante pa prepará nos curason. Nos tin cu papia no solamente tocante kico nos ta bai haci, sino tambe pakico nos ta bai hacié. Den e dianan di rey Jehósafat, e pueblo a haña instruccion den e ley divino, pero Bijbel ta bisa nos cu nan “no a prepará nan curason ainda.” Esaki a laga nan vulnerabel p’e tentacionnan cu lo por a alehá nan for di adoracion berdadero. (2 Crónicanan 20:33; 21:11) Nos meta no ta pa djis por raportá oranan dedicá den sirbishi di veld, ni pa djis laga revista. Nos ministerio mester ta un expresion di nos amor pa Jehova i di nos amor pa hende cu mester haña e oportunidad pa scoge bida. (Hebreonan 13:15) E ta un actividad den cua nos ta “colaboradónan di Dios.” (1 Corintionan 3:9) Esta un privilegio! Ora nos ta participá den e ministerio, nos ta haci esei den cooperacion cu e angelnan santu. (Revelacion 14:6, 7) No tin un mihó tempu pa cultivá aprecio pa esaki cu no ta den consideracionnan di famia, sea na nos studio semanal of ora nos ta trata un texto al caso for di Examinando e Scritura Diariamente.

15. Ki ora nos por prepará pa sirbishi di veld como famia?

¹⁵ Bo ta usa tempu di bo studio di famia de bes en cuando pa yuda e miembronan di bo famia prepará pa sirbishi di veld p’e siman? Esei por ta masha beneficioso. (2 Timoteo 2:15) Esei por yuda haci nan sirbishi significativo i productivo. Tempu-tempu lo bo por apartá henter un sesion di studio pa tal preparacion. Cu mas frecuencia, lo bo por trata cu aspectonan dje ministerio di veld den consideracionnan mas corticu na fin dje studio di famia of otro ora durante siman.

16. Considerá e balor di cada un dje pasonan mencioná den e paragraf.

¹⁶ Sesionnan di famia lo por enfocá riba un seri di paso, como lo siguiente: (1) Prepará un presentacion bon entrená cu ta incluí un texto pa lesa for di Bijbel si ocasion permití. (2) Haci sigur cu cada miembro di famia tin, si ta posibel, su propio tas di sirbishi, un Bijbel, un buki di nota, un pen of potlot, tratado i otro literatura den bon condicion. E tas di sirbishi no tin nodi ta caru, pero e mester ta na ordu sí. (3) Considerá unda i con pa duna testimonio formal. Sigui cada fase dje instruccion aki cu periodonan durante cua boso ta traha huntu den sirbishi di veld. Ofrecé sugerencia útil, pero no consehá riba demasiado punto.

17, 18. (a) Ki sorto di preparacion como famia por yuda haci nos ministerio di veld mas fructífero? (b) Ki aspecto dje preparacion aki nos lo por haci tur siman?

¹⁷ Un parti principal dje trabou cu Jesucristo a asigná na su siguidónan ta di haci disipel. (Mateo 28:19, 20) Haci disipel ta encerá mas cu predicá. E ta rekerí siña hende. Con bo studio di famia por yuda boso ser eficas den haci esaki?

¹⁸ Como famia, papia riba ken lo ta bon pa rebishitá. Kisas algun di nan a aceptá literatura; tal bes algun a djis scucha. Podisé a topa nan den e trabou di cas-pa-cas of den dunamentu di testimonio informal na marshe of na scol. Laga e Palabra di Dios guia bo. (Salmo 25:9; Ezekiel 9:4) Dicidí ken cada un di boso lo kier rebishitá e siman ei. Kico lo bai papia ariba? Consideracion den famia por yuda cada miembro prepará. Nota textonan specífico pa compartí cu personanan interesá i tambe puntonan apropiado for dje foyeto Kico Dios Ta Rekerí di Nos? of e buki Conocimentu cu Ta Hiba na Bida Eterno. No purba cubri demasiado material na un bishita. Laga e doño di cas cu un pregunta cu lo bo contestá n’e siguiente bishita. Pakico no hacié parti di boso rutina semanal di famia pa planea cua rebishita cada ken lo bai haci, ki ora lo e haci nan, i kico e ta spera di logra. Haciendo esaki por yuda haci e ministerio di veld di henter e famia mas fructífero.

Sigui Siña Nan Jehova Su Caminda

19. Si miembronan di famia kier sigui cana den Jehova su caminda, kico nan tin cu sinti, i kico ta contribuí na esaki?

¹⁹ Ta un desafio pa ta cabes di famia den e mundu malbado aki. Satanas i su demoñonan ta trata na destruí e spiritualidad di Jehova su sirbidónan. (1 Pedro 5:8) Ademas, awe tin basta preshon riba boso como mayor, foral riba boso cu ta mayor soltero. Ta difícil pa haña tempu pa haci tur loke bo tin gana di haci. Pero ta bale la pensa, asta si bo por aplicá djis un sugerencia so a la bes, i gradualmente mehorá bo programa di studio di famia. Ta un recompensa alentador pa mira esnan cu ta masha cerca di bo cana lealmente den Jehova su caminda. Pa cana cu éxito den Jehova su caminda, miembronan di famia tin cu haña goso den asistí na reunionnan di congregacion i den participá den e ministerio di veld. Pa esei ta e caso, preparacion ta necesario—preparacion cu ta edificá e curason i cu ta ekipá cada miembro di famia p’e por tin un participacion significativo.

20. Kico por yuda mas mayor experenciá e clase di goso expresá na 3 Juan 4?

²⁰ Relacioná cu esnan cu apostel Juan a yuda den sentido spiritual, el a skirbi: “Mi no tin un motibu mas grandi pa duna gradicimentu cu e cosnan aki, pa mi tende cu mi yunan ta sigui cana den e berdad.” (3 Juan 4) Studio di famia conducí cu metanan cla na mente i cabesnan di famia cu ta atendé e necesidadnan individual di miembronan di famia na un manera bondadoso i práctico, por contribuí hopi n’e goso ei dje famia. Dor di cultivá aprecio pa Dios su caminda di bida, mayornan ta yuda nan famia disfrutá dje mihó caminda di bida.—Salmo 19:7-11.

Bo Por Splica?

◻ Pakico preparacion pa reunion ta asina importante pa nos yunan?

◻ Con mayornan por yuda nan yunan “adkerí curason”?

◻ Con nos studio di famia por yuda pa prepará pa tur reunion?

◻ Con preparacion pa sirbishi di veld como famia lo por yuda nos bira mas eficas?

[Plachi na página 20]

Bo studio di famia lo por incluí preparacion pa reunionnan di congregacion

[Plachi na página 21]

Entrená canta pa reunionnan ta beneficioso